News

POST TYPE

FOREIGN AFFAIRS

ထရမ့်နှင့် ရှီကျင့်ဖျင် တွေ့ဆုံမှုသည် ကုန်သွယ်ရေးအငြင်းပွားမှုကို ဖြေရှင်းပေးနိုင်ခြေမရှိသော်လည်း နောက်ထပ်ဆွေးနွေးမှုများအတွက် လမ်းဖွင့်ပေးနိုင်
20-Jun-2019


ဘေဂျင်း၊ ဇွန် ၂၀

အမေရိကန်နှင့် တရုတ်ခေါင်းဆောင် နှစ်ဦးအကြား မကြာမီ ပြုလုပ်မည့် တွေ့ဆုံဆွေးနွေးမှုသည် နှစ်နိုင်ငံအကြား ကုန်သွယ်ရေး အငြင်းပွားမှုများကို ချက်ချင်း ပြေလည်သွားစေမည့်အလားအလာ မရှိသော်လည်း နောက်ထပ်ဆွေးနွေးမှုများ ပြန်လည်စတင်ရန် လမ်းပွင့်သွားစေနိုင်သည်ဟု တရုတ်နိုင်ငံပိုင်မီဒီယာက ကြာသပတေးနေ့ကပြောကြားကြောင်း Reuters သတင်းတွင် ဖော်ပြထားသည်။

ဒေါ်နယ်ထရမ့်နှင့် ရှီကျင့်ဖျင်တို့အကြား လာမည့်အပတ်တွေ့ဆုံမှုမတိုင်မီ ဆွေးနွေးမှုများကို ပြန်လည်ပြုလုပ်နေသည်ဟု အမေရိကန်နှင့် တရုတ် နှစ်ဖက်စလုံးက ယခုသီတင်းပတ်အစောပိုင်းတွင် ပြောကြားထားသည်။

သဘောတူပြီးသား ကတိကဝတ်များကို တရုတ်ဘက်က နောက်ပြန်ဆုတ်ခဲ့သည်ဟု အမေရိကန်အဖွဲ့က စွပ်စွဲပြောဆိုခဲ့ပြီးနောက် နှစ်နိုင်ငံကုန်သွယ်ရေးညှိနှိုင်းမှုများ ယခင်လက ရပ်ဆိုင်းသွားခဲ့ခြင်းဖြစ်သည်။ ကမ္ဘာ့စီးပွားရေး အင်အားကြီး နှစ်နိုင်ငံသည် နှစ်ဖက်စလုံး အထိနာသည့် ကုန်သွယ်ရေးအငြင်းပွားမှုအတွင်း ပိတ်မိနေကြပြီး တစ်ဖက်နှင့်တစ်ဖက် ထုတ်ကုန်များအပေါ် မြင့်မားသောအခွန်နှုန်းများ အပြန်အလှန် ချမှတ်ထားကြသည်။

ကုန်သွယ်ရေးစစ်ပွဲသည် နှစ်ဖက်စလုံး ရှုံးနိမ့်မည့်သဘောရှိသောကြောင့် ဆွေးနွေးညှိနှိုင်းရေးကို နှစ်နိုင်ငံစလုံး အားသန်နေကြသော်လည်း ဆွေးနွေးပွဲတစ်ပွဲဖြင့် အရာရာကို ဖြေရှင်းနိုင်မည် မဟုတ်ကြောင်း၊ သို့သော်လည်း နောက်ထပ်ဆွေးနွေးမှုများ အသစ်ပြန်စရန် လမ်းဖွင့်ပေးနိုင်မည်ဖြစ်ကြောင်း တရုတ်ချိုင်းနား ဒေးလီးသတင်းစာက ဆိုသည်။

ကွန်မြူနစ်ပါတီက ထုတ်ဝေသော ပြည်သူ့နေ့စဉ်သတင်းစာကမူ “ညှိနှိုင်းမှု ရလဒ်ကောင်းများသည် များသောအားဖြင့် ဆွေးနွေးခြင်းဖြင့်မရနိုင်ဘဲ ယှဉ်ပြိုင်မှုဖြင့်သာ ရယူနိုင်သည်။ အကယ်၍ ရလဒ်ကောင်းကိုအလိုရှိပါက တရုတ်နိုင်ငံအနေနှင့် ကြောက်ရွံ့မနေဘဲ ဇွဲလုံ့လရှိရမည်”ဟု လှုံ့ဆော်ရေးသားထားသည်။

“တရုတ်နှင့် အမေရိကန်အကြား ကုန်သွယ်မှုသည် ဆက်လက်ဖြစ်ပေါ်ရန် သေချာသလောက်ရှိသောကြောင့် အဆုံးတွင် သဘောတူညီမှုရရှိနိုင်သည်။ သို့သော် တရုတ်သည် စိတ်ရှည်ရှည်ထားမည်ဖြစ်ပြီး ကြန့်ကြာမှုများကို စိုးရွံ့နေမည်မဟုတ်”ဟု ကွန်မြူနစ်သတင်းစာက ရေးသားထားသည်။

တရုတ်နိုင်ငံသည် ကုန်သွယ်ရေးစစ်ပွဲအတွက် ပိုင်းဖြတ်ကာ ကြိုတင်ပြင်နိုင်မှု စွမ်းရည်ကြောင့် အမေရိကန်အား ဆွေးနွေးပွဲစားပွဲဝိုင်းသို့ ပြန်လာအောင် စီမံနိုင်ခဲ့သည်ဟု အီကိုနောမစ်ဒေးလီးက WeChat တွင် ဖွင့်ထားသော တောင်ရန် နုတ်စ် စာမျက်နှာတွင် ဖော်ပြထားသည်။

ထရမ့်အစိုးရကမူ တရုတ်နိုင်ငံသည် အသိပညာ မူပိုင်ခွင့်များကို ချိုးဖောက်ခဲ့ပြီး အမေရိကန်ကုမ္ပဏီများထံမှ နည်းပညာများကို အတင်းအကျပ် ရယူသည့်အပြင် တရုတ်ဈေးကွက်တွင် တန်းတူညီမျှ ယှဉ်ပြိုင်ခွင့်မပေးခဲ့ကြောင်း အခိုင်အမာ ပြောကြားထားသည်။

ကြာသပတေးနေ့က ဘေဂျင်းတွင် နိုင်ငံခြားကော်ပိုရေးရှင်းကြီးများမှ စီအီးအို ၁၉ ဦးနှင့်တွေ့ဆုံခဲ့သော တရုတ်ဝန်ကြီးချုပ် လီကီရှန်းက တရုတ်နိုင်ငံသည် နိုင်ငံခြား ရင်းနှီးမြှုပ်နှံသူများအတွက် ဈေးကွက်ကို ကျယ်ကျယ်ဖွင့်ပေးထားပြီး ကောင်းမွန်သော ဝန်ဆောင်မှုများနှင့် ဆက်ဆံမှုများကို ဖြည့်ဆည်းပေးထားသည်ဟု ထပ်မံ ကတိပေးပြောဆိုခဲ့သည်။

F-04