News

POST TYPE

FOREIGN AFFAIRS

နိုင်ငံပိုင်မှ ပုဂ္ဂလိကသို့ လွှဲပြောင်းလိုက်သည့်စက်ရုံမှ ဝန်ထမ်းများ၏အခက်အခဲ သမ္မတထံတင်ပြရန် စီစဉ်
28-Nov-2018
ရန်ကုန်၊ နိုဝင်ဘာ ၂၇

စက်မှုဝန်ကြီးဌာနအောက်ရှိ နိုင်ငံပိုင် စက်ရုံအလုပ်ရုံများကို ပုဂ္ဂလိကသို့ လွှဲပြောင်းလိုက်ပြီးနောက် အဆိုပါစက်ရုံများတွင် ဆက်လက် လုပ်ကိုင်နေသော ဝန်ထမ်းများ၏ အခက်အခဲများကို သမ္မတထံ တင်ပြရန်စီစဉ်နေကြောင်း မြန်မာနိုင်ငံလုံးဆိုင်ရာ အလုပ်သမားသမဂ္ဂအဖွဲ့ချုပ် အလုပ်အမှုဆောင် ဦးထွန်းနိုင်ဦးက ပြောကြားသည်။

နိုင်ငံပိုင်စက်ရုံများကို လွှဲပြောင်းလိုက်သည့်အတွက် အလုပ်သမားများအနေနှင့် အလုပ်ရှင်၊ အလုပ်သမား စာချုပ်ပါအချက်များကို အပြည့်အဝလိုက်နာမှု မရှိခြင်း၊ ဝန်ထမ်းများကို အကြောင်းပြ၍ အလုပ်မှထုတ်ပယ်ခြင်း၊ အသက် ကန့်သတ်မှုများနှင့်ကြုံတွေ့ရခြင်း၊ ပုဂ္ဂလိကသို့ လွှဲပြောင်းပေးသည့်ဝန်ကြီးဌာနများမှ နောက်ဆက်တွဲပြဿနာများကို တာဝန်ယူမှုမရှိခြင်း စသည့်အခက်အခဲများနှင့် ကြုံတွေ့နေရသဖြင့် အဆိုပါအခက်အခဲများနှင့်ပတ်သက်၍ ပုဂ္ဂလိကသို့ လွှဲပြောင်းခံရသည့် စက်ရုံပေါင်း ၁၅ ခုမှ ဝန်ထမ်းကိုယ်စားလှယ်များက နိုဝင်ဘာလ ၂၆ ရက်မှ ၂၇ ရက်အထိ ရန်ကုန်မြို့၊ ပြည်လမ်း ၉ မိုင်ရှိ မစိုးရိမ်ကျောင်းတိုက်တွင် ဖြေရှင်းနိုင်မည့်နည်းလမ်းများကို ဝိုင်းဝန်းဆွေးနွေးခဲ့ကြပြီးနောက် သမ္မတထံ တင်ပြရန်စီစဉ်ခြင်းဖြစ်သည်။

“အစိုးရပိုင်ကနေ ပုဂ္ဂလိကကို လွှဲပြောင်းတဲ့အခါ အလုပ်သမားတစ်ယောက် ရသင့်တဲ့အခွင့်အရေးတွေ စာချုပ်မှာပါတဲ့ အတိုင်းမရဘူး။ မြေပြင်အခြေအနေတွေကို သမ္မတနဲ့တွေ့ပြီး ကိုယ်တိုင်ပြောပြချင်တာ။ ခိုင်မာတဲ့မူဝါဒတွေ ချမှတ်နိုင်မလား ဆိုတဲ့မျှော်လင့်ချက်နဲ့ တွေ့ချင်တာပါ”ဟု ဦးထွန်းနိုင်ဦးက ပြောဆိုသည်။

အဆိုပါဆွေးနွေးပွဲတွင် အလုပ်သမား ကိုယ်စားလှယ်များက အနည်းဆုံး အခကြေးငွေကို ရာထူးအဆင့်အလိုက် အပြည့်အဝ ပေးချေရေး၊ လွှဲပြောင်းခံဝန်ထမ်းများအတွက် ခိုင်မာသည့်မူဝါဒချမှတ်ရေး၊ အစိုးရနှင့် ကုမ္ပဏီအကြား ချုပ်ဆိုသည့် စာချုပ်များကို ဝန်ထမ်းများအား အသိပေးရန်၊ စာချုပ်ချုပ်ဆိုရာတွင် အလုပ်သမားများကို ကိုယ်စားပြုသည့်အလုပ်သမား သမဂ္ဂများ ပါဝင်ခွင့်ရရှိရန် စသည့်အချက်များကို ဖြေရှင်းပေးစေလိုသည်ဟု ဆွေးနွေးခဲ့ကြကြောင်း ၎င်းက ဆက်လက်ပြောဆိုသည်။

ဝန်ထမ်းကိုယ်စားလှယ်များ၏ နှစ်ရက်တာ ညှိနှိုင်းတွေ့ဆုံမှုအရ သမ္မတနှင့်တွေ့ ဆုံရာတွင် အခက်အခဲများ တင်ပြပြောဆိုရန် ကော်မတီတစ်ရပ် ဖွဲ့စည်းမည်ဖြစ်ပြီး ဒီဇင်ဘာလအတွင်း တွေ့ဆုံတင်ပြခွင့်ရရန် ကြိုးစားမည်ဖြစ်ကြောင်း မြန်မာနိုင်ငံလုံးဆိုင်ရာ အလုပ်သမားသမဂ္ဂအဖွဲ့ချုပ်ထံမှ သိရသည်။

“နိုင်ငံပိုင်ကနေ ပုဂ္ဂလိကကိုစလွှဲတဲ့ ၂၀၁၀ ခုနှစ်ကစပြီး စက်ရုံမလည်ဘဲနဲ့ရပ်ထားတာ။ စက်ရုံအလုပ်မဟုတ်ဘဲနဲ့ ခြံစိုက်ပျိုးရေးလုပ်ငန်းတွေခိုင်းနေတာ။ လစာကတော့ ပေးထားတယ်။ တခြား ရက်မှန်ကြေးတွေကတော့ မရတော့ဘူး။ လက်ရှိကတော့ ပြည်ပကုမ္ပဏီတွေနဲ့ ပူးပေါင်းထုတ်ဖို့ အစီအစဉ်ရှိတယ်ပြောတယ်”ဟု နမ္မတူ-ဘော်တွင်း ဝင်းမြင့်မိုရ် သတ္တုစက်ရုံမှ စက်မှုကျွမ်းကျင်ဝန်ထမ်း ဦးမြင့်ဦးက ပြောကြားသည်။

ဆားလင်းကြီးမြို့၊ အမှတ်(၆) အထည်စက်ရုံ အခြေခံအလုပ်သမားအဖွဲ့အစည်း အတွင်းရေးမှူး ဦးဇော်ဝင်းအောင်က “ဆားလင်းကြီးမြို့ အထည်စက်ရုံက အခုတော့နိုင်ငံပိုင်ပါ။ ပုဂ္ဂလိကကို လွှဲပြောင်းမယ်လို့ သတင်းတွေကြားနေပါပြီ။ ပုဂ္ဂလိက လွှဲပြောင်းတာကို မလိုက်ချင်တဲ့အတွက် တခြားစက်ရုံပြောင်းမယ်ဆိုတော့လည်း အသက် ၃၅ ကျော်ရင် ပြောင်းလို့မရဘူး ပြောတယ်”ဟုဆိုသည်။

နိုင်ငံပိုင် စက်ရုံအလုပ်ရုံများကို ပုဂ္ဂလိကသို့ လွှဲပြောင်းလိုက်ပြီး အဆိုပါစက်ရုံများတွင် ဆက်လက်လုပ်ကိုင်နေသော ဝန်ထမ်းများ၏ အခက်အခဲများနှင့်ပတ်သက်၍ စက်မှုဝန်ကြီးဌာနထံ ဆက်သွယ်မေးမြန်းရာတွင် အစည်းအဝေးသွားနေသဖြင့် ဖြေကြားပေးနိုင်မည့်သူ မရှိကြောင်း ပြန်လည်ပြောကြားသည်။

မြန်မာတစ်နိုင်ငံလုံးတွင် အရှုံးပေါ်နေသည့် နိုင်ငံပိုင်စက်ရုံ ၃၀ ကျော်ကို ပုဂ္ဂလိကသို့ လွှဲပြောင်းလုပ်ကိုင်ခွင့်ပြုထားကြောင်း စက်မှုဝန်ကြီးဌာနထံမှ သိရသည်။

J-11