News

POST TYPE

FOREIGN AFFAIRS

တူရကီ အာဏာသိမ်း ကြိုးကိုင်အုပ်စု၏ မြန်မာကွန်ရက်
23-Jul-2016 tagged as

တူရကီနိုင်ငံတွင် ဖြစ်ပွားခဲ့သော အာဏာသိမ်းပွဲများအပြီး တူရကီအစိုးရက နောက်ကွယ်မှ ကြိုးကိုင်သူများကို အလျင်အမြန် ထုတ်ပြန်ကြေညာခဲ့သည်။

FETO - Felhullah Gulen Terrorist Organization ဖသူလ္လာ ဂူလန် အကြမ်းဖက် အဖွဲ့အစည်းက စီစဉ်ခဲ့ခြင်းဖြစ်ကြောင်း တူရကီအစိုးရက ကြေညာခဲ့သည်။

အဆိုပါ အဖွဲ့အစည်း၏ စီးပွားရေး ကွန်ရက်ဖြန့်ကျက်မှုသည် မြန်မာနိုင်ငံသို့ပင် ရောက်ရှိနေကြောင်း မြန်မာနိုင်ငံဆိုင်ရာ တူရကီသံအမတ်ကြီးနှင့် နီးစပ်သူတစ်ဦးက ဆိုသည်။

တူရကီနိုင်ငံတွင် ဇူလိုင်လ ၁၅ ရက်နေ့က ဖြစ်ပွားခဲ့သည့် အာဏာသိမ်းပိုက်မှု ကိုပြည်သူလူထုက ဆန့်ကျင်ခဲ့သည်။ ရာဇဝင်တွင်လောက်သည့် စည်းလုံးညီညွတ်မှုကို ပြသပြီး လမ်းများပေါ်တွင် တင့်ကားများကို ဆန့်ကျင်ပြီး ဒီမိုကရက်စီ အခွင့်အရေးကို ကာကွယ်ခဲ့သည်။

အကြမ်းဖက်သမားများသည် အသံလွှင့်ရုံမှ စတူဒီယိုခန်းမများ၊ အစိုးရပိုင် မီဒီယာများစသည်တို့ အပါအဝင် နေရာ အများအပြားကို လွှမ်းမိုးချုပ်ကိုင်ရန် ကြိုးပမ်းခဲ့သော်လည်း နိုင်ငံရေးပါတီများ၊ တူရကီ အမျိုးသားများ၊ အရေးပါ အရာရောက်သော အဖွဲ့အစည်းများ အားလုံးက တစည်းတလုံးတည်းဖြင့် ဖွဲ့စည်းအုပ်ချုပ်ပုံ အခြေခံ ဥပဒေဘက်မှ ရပ်တည်ခဲ့ကြသည်။

တူရကီ အစိုးရသည် အဆိုပါ အာဏာသိမ်းပိုက်မှုနှင့် ပတ်သက်သမျှကို စဉ်ဆက်မပြတ် ဖော်ထုတ်နေကြောင်း တူရကီနိုင်ငံခြားရေး ဝန်ကြီးဌာနက သတင်းထုတ်ပြန်သည်။

အစွပ်စွဲခံ အကြမ်းဖက် အဖွဲ့အစည်း၏ ခေါင်းဆောင် ဖသူလ္လာဂူ(Felhullah Gulen) သည် ဘာသာရေး ဆရာနှင့် တရားဟောပြောသူ တစ်ဦးဖြစ်ပြီး အမေရိကန် ပြည်ထောင်စု ပင်စာဗေနီယာမြို့တွင် နေထိုင်သူ တစ်ဦး ဖြစ်သည်။

အဆိုပါ အဖွဲ့သည် တူရကီနိုင်ငံရှိ ကျောင်းများနှင့် အခြားနိုင်ငံရှိ ကျောင်းများ ပါဝင်သည့် ကျယ်ပြန့်သော ကွန်ရက်ချိတ်ဆက်မှုဖြင့် စီးပွားရေး ဆက်သွယ်ရေးကွန်ရက်များ ချိတ်ဆက်ထားသည်။ ယင်းတွင် မြန်မာနိုင်ငံရှိ Horizon School အပါအဝင် ဖြစ်ကြောင်း တူရကီ နိုင်ငံခြားရေး ဝန်ကြီးဌာန သတင်း အရင်းအမြစ်များအရ သိရသည်။

အဆိုပါ ကွန်ရက်များတွင် နိုင်ငံအသီးသီးရှိ ဘဏ်များ၊ အာမခံကုမ္ပဏီများ၊ ဆေးရုံများ၊ တက္ကသိုလ် ကျောင်းများ၊ ခရီးသွားအေဂျင်စီများ၊ အစိုးရ မဟုတ်သော အဖွဲ့အစည်းများ၊ သတင်းစာများ၊ တီဗွီအသံလွှင့် ဌာနများနှင့် ဘာသာရေး သင်တန်းကျောင်းများ ပါဝင်နေသည်။

၎င်းတို့နှင့်ဆက်နွယ်နေသော အဖွဲ့အစည်းများ အားလုံးကို တူရကီနိုင်ငံမှ အကြမ်းဖက် အဖွဲ့အဖြစ် သတ်မှတ်ကြောင်း တူရကီအစိုးရက အတိအလင်း ကြေညာ ထားသည်။

အဆိုပါ အဖွဲ့အစည်းနှင့် ဆက်စပ်နေသော ကျောင်းများတွင် အယူဝါဒပိုင်းဆိုင်ရာ သင်ကြားနေမည်ဟု တူရကီအစိုးရက ယုံကြည်ကြောင်း တူရကီသံအမတ်ကြီးနှင့် နီးစပ်သူက ဆိုသည်။

အဆိုပါ အဖွဲ့အစည်းနှင့် အဆက်အစပ်များ တူရကီနိုင်ငံ အာဏာသိမ်းမှု ဖြစ်စဉ်များနှင့် ပါတ်သက်ပြီး မြန်မာနိုင်ငံဆိုင်ရာ တူရကီ သံရုံးအနေနှင့် သတင်းစာ ရှင်းလင်းပွဲ ပြုလုပ်မည် ဖြစ်ကြောင်းလည်း ၎င်းက အသိပေး ပြောကြားသည်။

၎င်းတို့၏ အဖွဲ့ဝင်များသည် ၎င်းတို့ ရောက်ရှိနေသော နိုင်ငံများတွင် မျှတစွာ နေထိုင်ပြီး နိုင်ငံရေး ဘက်လိုက်ခြင်းများကို တတ်နိုင်သမျှ ရှောင်ကြဉ်ကြသည်။ ၎င်းတို့သည် စာရိတ္တ ကောင်းသူ၊ တန်ဖိုး သိတတ်သူများအဖြစ် ဖုံးကွယ် နေထိုင်ပြီး ရေရှည် စီမံကိန်းများကို ဝှက်ထားကြကြောင်း တူရကီ နိုင်ငံခြားရေး ဝန်ကြီးဌာနက ထုတ်ပြန်သည့် သတင်း အချက်အလက်များတွင် ဖော်ပြထားသည်။

မြန်မာနိုင်ငံတွင် ဖသူလ္လာဂူလန် အဖွဲ့နှင့် ပတ်သက်သည်ဟု တူရကီအစိုးရက ပြောဆိုထားသည့် Horizon School သည် ရန်ကုန်မြို့တွင် ကျောင်းခွဲ လေးခု၊ မန္တလေးမြို့တွင် နှစ်ခု၊ နေပြည်တော်တွင် တစ်ခု ဖွင့်လှစ်ထားသည့် နိုင်ငံတကာကျောင်း တစ်ခုဖြစ်သည်။

အဆိုပါ ကျောင်းသည် ၎င်းတို့ စိတ်ကြိုက် ရွေးချယ်ထားသည့် မြန်မာကျောင်းသား အချို့ကို တူရကီနိုင်ငံရှိ တက္ကသိုလ်များသို့ ပညာသင်ဆု နည်းလမ်း အမျိုးမျိုးဖြင့် ပို့ဆောင်မှုများ ရှိနေကြောင်း တူရကီအစိုးရက ယူဆထားသည်။

အသေးစိတ် ကိစ္စများနှင့်ပတ်သက်၍ စုံစမ်းနေဆဲ ဖြစ်ပြီး တူရကီသံရုံးက အသေးစိတ် ရှင်းလင်းရန် ရှိကြောင်းသာ ပြောဆိုသည်။

အထက်ပါ ကိစ္စနှင့်ပတ်သက်၍ Horizon School ကို ဇူလိုင်လ ၂၁ ရက်နေ့က အကြိမ်ကြိမ် ဆက်သွယ်ခဲ့သော်လည်း မေးမြန်းခွင့် မရခဲ့ပေ။

တူရကီအာဏာသိမ်းမှုဖြစ်စဉ်တွင် အရပ်သား ၂၈ဝ ကျော်သေဆုံးပြီး ၁၄ဝဝ ကျော် ဒဏ်ရာရရှိခဲ့ကာ အာဏာသိမ်းရန် ကြိုးပမ်းခဲ့သူ ၆ဝဝဝ ကျော် ဖမ်းဆီးထားကြောင်း တူရကီအစိုးရက သတင်းထုတ်ပြန်ထားသည်။

အကြမ်းဖက်သမား ရှစ်ဦးမှာ ၎င်းတို့ ခိုးယူထားသော ရဟတ်ယာဉ်ဖြင့် ဂရိနိုင်ငံသို့ ထွက်ပြေး တိမ်းရှောင်ခဲ့ကြောင်း နိုင်ငံတကာ သတင်းများအရ သိရသည်။ FETO အဖွဲ့အစည်းနှင့် မဟာမိတ်အဖွဲ့များကို ဖော်ထုတ်နေကြောင်းလည်း အစိုးရက ထုတ်ပြန် ကြေညာထားသည်။ „

DK News

  • VIA
  • TAGS