News

POST TYPE

FOREIGN AFFAIRS

အမေရိကန် အခွန်စနစ် ပြုပြင်ပြောင်းလဲရေးအတွက် ရီပတ်ဘလစ်ကန်များ သဘောတူ
17-Dec-2017

နယူးယောက်၊ ဒီဇင်ဘာ ၁၆

အမေရိကန် အခွန်စနစ်ကို နှစ်ပေါင်း သုံးဆယ်အတွင်း အကြီးမားဆုံး ပြုပြင်ပြောင်းလဲမည့် ဥပဒေကြမ်းကို အထက်နှင့် အောက်လွှတ်တော် နှစ်ရပ်စလုံးမှ ရီပတ်ဘလစ်ကန် အမတ်များက သဘောတူ ချပြလိုက်သည်ဟု BBC သတင်းတွင် ဖော်ပြထားသည်။

အစီအစဉ်သစ်အရ ကော်ပိုရိတ် အခွန်နှုန်းထားကို လက်ရှိ ၃၅ ရာခိုင်နှုန်းမှ ၂၁ ရာခိုင်နှုန်းသို့ ချပေးမည်ဖြစ်သည်။ တစ်ဦးချင်း ဝင်ငွေခွန်နှုန်းကိုလည်း ၃၉ ဒသမ ၆ ရာခိုင်နှုန်းမှ ၂၁ ရာခိုင်နှုန်းသို့ ချပေးမည်ဖြစ်သည်။

အခွန်နှုန်းထား လျှော့ချပေးမည်ဟု မဲဆွယ်စဉ်က ကတိပြုခဲ့သူ သမ္မတထရမ့်အနေနှင့် ယခု ဥပဒေကြမ်း ထုတ်ပြန်နိုင်ခြင်းသည် ထင်ရှားသော အောင်ပွဲတစ်ခုဖြစ်ပြီး ခရစ္စမတ်မတိုင်မီ ဥပဒေအဖြစ် အတည်ပြု လက်မှတ်ထိုးလိုသည်ဟ ု၎င်းက ပြောဆိုထားသည်။

အခွန်လျှော့ချမှုသည် ကြွဝသူများကိုသာ ဦးစားပေးပြီး လူလတ်တန်းစားများအပေါ် အကျိုးသက်ရောက်မှု နည်းသည်ဟု ဒီမိုကရက်အမတ်များက အငြင်းပွားကြသည်။ အခွန်စနစ်ဆိုင်ရာ ဘက်မလိုက် ပူးတွဲကော်မတီကလည်း အစီအစဉ်သစ်များကြောင့် တစ်မျိုးသားလုံး ကြွေးမြီသည် ဆယ်နှစ်အတွင်း ၁ ဒသမ ၄ ထရီလီယံမှ ၂၀ ထရီလီယံသို့ တိုးသွားမည်ဟု သောကြာနေ့က မှတ်ချက် ပေးထားသည်။

ရီပတ်ဘလစ်ကန် အမတ်များ လွှမ်းမိုးထားသည့် လွှတ်တော်နှစ်ရပ်စလုံးက လာမည့်အပတ်တွင် ဥပဒေကြမ်းကို ထောက်ခံမဲ ပေးကြဖွယ်ရှိသည်။ ရီပတ်ဘလစ်ကန် အမတ်များအကြား သောကြာနေ့က နာရီအတန်ကြာ ဆွေးနွေးခဲ့ကြပြီးနောက် သဘောတူညီမှုရရှိခဲ့ပြီး ဥပဒေကြမ်း ထောက်ခံသူများက ရီပတ်ဘလစ်ကန် အလံများကို ဝှေ့ယမ်းခဲ့ကြသည်။ အောက်လွှတ်တော် အခွန်နည်းလမ်းများဆိုင်ရာ ကော်မတီ၏ ရီပတ်ဘလစ်ကန် ဥက္ကဋ္ဌ ကီဗင်ဘရက်ဒီက ယခု အခိုက်အတန့်ကို အလွန်စိတ်လှုပ်ရှားမိသည်ဟု ပြောကြားသည်။

ဥပဒေဖြစ်လာရန် သေချာသလောက် ရှိနေပြီဖြစ်သော သမ္မတထရမ့်၏ ဥပဒေကြမ်း အစိတ်အပိုင်းများသည် ယခုအခါ နေရာတကျ ရှိနေပြီဖြစ်သည်။

ဤဥပဒေသည် ပါတီ၏ ဥပဒေပြုရေး ကိစ္စကိုပင် မလုပ်နိုင်သည့် ကွန်ဂရက်လွှတ်တော်၏ စွမ်းရည်ကို စိတ်ပျက်နေသော ပါတီတွင်းမှ အကြီးစား အလှူရှင်များကို သေချာပေါက် ကျေနပ်စေမည် ဖြစ်သည်။ သို့ရာတွင် သမ္မတထရမ့်အပေါ် ထောက်ခံမှု ကျဆင်းနေခြင်းနှင့် လာမည့်နှစ် ကွန်ဂရက်လွှတ်တော် ရွေးကောက်ပွဲများတွင် ရီပတ်ဘလစ်ကန် အမတ်များ ရုန်းကန်ရမည်ဟု ဝိုင်းဝန်း ခန့်မှန်းနေခြင်းများကို ယခု အောင်ပွဲက ပြန်လှန်ပေးနိုင်မလားဟု မေးခွန်းထုတ်စရာ ရှိနေသည်။

အနည်းဆုံးအနေနှင့်မူ အစိုးရကို ဆန့်ကျင်နေသော အပြင်လူများထံမှ စိန်ခေါ်မှုများကို ကျော်လွှားရန် လွယ်ကူသွားစေမည်ဟု ဆိုသည်။

ကော်ပိုရိတ်အခွန်လျှော့ချမှုသည် နိုင်ငံ၏ ရေရှည်အကျိုးကို သယ်ပိုးနိုင်မလား ဆိုသည်မှာ မသေချာသော်လည်း သာမန် အမေရိကန်ပြည်သူများ၏ မျှော်မှန်းချက်ကိုမူ ဖမ်းဆုပ်နိုင်မည့် အလားအလာ မရှိပေ။

အမေရိကန်သို့ အလုပ်တာဝန်ဖြင့် ခေတ္တရောက်ရှိနေသူ အလွန်အမင်းနွမ်းပါးမှု ပြဿနာဆိုင်ရာ ကုလသမဂ္ဂ အထူးကိုယ်စားလှယ် ဖိလစ်အယ်လ်စတန်က ယခု အခွန်စည်းကမ်းသစ်များသည် လူမှုဖူလုံရေး စည်းမျဉ်းနှင့် ကွာဟလာစေပြီး အမေရိက၏ လူမှုဆိုင်ရာ မညီမျှမှုကို ပိုဆိုးသွားစေနိုင်သည်ဟု ဝေဖန်ကန့်ကွက်ထားသည်။ 

F-04


  • VIA