News

POST TYPE

FEATURE

ဘာသာပြန်စာပေကို မွေ့လျော်ဆဲစာရေးဆရာ သို့မဟုတ် မောင်ပေါ်ထွန်း
11-Mar-2017 tagged as


တောင်ဥက္ကလာပမြို့နယ်၊ (၁၀) ရပ်ကွက်၊ ဇေယျာ (၈) လမ်းအတွင်းမှ ပျဉ်ထောင်တိုက်ခံ နှစ်ထပ်အိမ်လေး၏ အရှေ့ဘက်တွင် ပက်လက်ကုလားထိုင် တစ်လုံးဖြင့် အသက် ၈၂ နှစ်အရွယ် အမျိုးသားကြီးတစ်ဦး ရေဒီယို နားထောင်နေသည်။ သူက တခြားသူမဟုတ် အမျိုးသားစာပေ ရသစာပေ ဘာသာပြန်ဆု နှစ်ဆု၊ အမျိုးသားစာပေ တစ်သက်တာဆု တစ်ဆုတို့ကို ရရှိထားသော ဝါရင့်ဘာသာပြန် စာရေးဆရာကြီး မောင်ပေါ်ထွန်း ဖြစ်သည်။

၁၉၃၅ ခုနှစ် မေလ ၁၄ ရက်တွင် မာန်အောင်ကျွန်း ကျောက်ဖြူမြို့နယ်တွင် မွေးဖွားသော ရခိုင်လူမျိုး ဆရာမောင်ပေါ်ထွန်း၏ အမည်ရင်းမှာလည်း မောင်ပေါ်ထွန်းပင် ဖြစ်သည်။ ၁၉၇၄ ခုနှစ်တွင် အီဂျစ်သမ္မတ ဟမ်မူရာဇာဒ်၏ Revolt in the Niles ကို နိုင်းမြစ်ဝှမ်းမှ တော်လှန်ရေး ဟူသောအမည်ဖြင့်  ဘာသာပြန် ရေးသားခဲ့ခြင်းဖြင့် ဆရာကြီး၏ ဘာသာပြန် စာရေးဆရာ ဘဝကို စတင်ခဲ့သည်။

“အဘတို့ ၁၉၇၀ ကနေ ၁၉၈၀ ဝန်းကျင်ကာလက ဘာသာပြန် စာရေးဆရာတွေ အများဆုံး ကာလလို့ ပြောလို့ရတယ်။ ဘာသာပြန်တဲ့သူတွေ များတာကြောင့် တချို့စာအုပ်တွေဆို ဘာသာပြန်တဲ့သူချင်း ထပ်နေတယ်။ ဟင်းတစ်ခွက်ကို လက်အစုံစုံက နှိုက်လိုက်သလို ဖြစ်နေတာပေါ့”ဟု ဆရာမောင်ပေါ်ထွန်းက စတင် ပြောကြားသည်။ 

စာပေဗိမာန်တွင် အလုပ်လုပ်နေရင်းက တစ်ဖက်ကလည်း လုပ်သားကောလိပ်တွင် သမိုင်းဘာသာရပ်ဖြင့် ကျောင်းတက်နေဖြစ်သည့် ဆရာမောင်ပေါ်ထွန်းအတွက်  ဘာသာပြန်ရန် လှုံ့ဆော်ဖြစ်ခဲ့သည့် စိတ်က စာအုပ်များစွာ ဖတ်ရှုရာမှ ရရှိလာခြင်းဖြစ်သည်။ နိုင်းမြစ်ဝှမ်း တော်လှန်ရေး စာအုပ်ကို ထုတ်ဝေပြီး လအနည်းငယ်ကြာတွင် ထပ်မံပုံနှိပ်မှုများ အကြိမ်ကြိမ် ပြုလုပ်ခဲ့ကြရာ Best Seller ဖြစ်ခဲ့သဖြင့် ရုံးက လူကြီးများကပင် အခွင့်အရေး ယူသည်ဟု အခြား ဝန်ထမ်းများက ထင်မှာစိုးသောကြောင့် ထပ်မထုတ်တော့ရန် ဆရာ့ကို မေတ္တာ ရပ်ခံခဲ့ကြသည်။ အဆိုပါ စာအုပ်အပြီး ယနေ့ ၂၀၁၇ ခုနှစ် လက်ရှိအချိန်ထိ  ဘာသာပြန် စာအုပ်ပေါင်း ၇၈ အုပ် ထုတ်ဝေခဲ့ပြီးဖြစ်သည်။ ယင်းဝတ္ထုများထဲတွင် Kane And Abel ကို ပြန်ထားသည့် ကမ္ဘာ့ရန်၊ Larry Collins နှင့် Dominique Lapierre တို့၏ Is Paris Burning? ကို ပြန်ဆိုထားသည့် ပါရီမီးလောင်ပြီလားနှင့် ၎င်းတို့နှစ်ဦး ပူးတွဲ ရေးသားသော Freedom At Midnight ကို ပြန်ထား  သော သန်းခေါင်ယံ လွတ်လပ်ရေးတို့မှာ ထင်ရှားသည်။ 

“တချို့စာအုပ်တွေကို ဘာသာပြန်ရင်းနဲ့ လက်သီးလက်မောင်းတန်း ဖြစ်တယ်။ တချို့စာအုပ်တွေကတော့ ဘာသာပြန်ရင်း မျက်ရည် ပိုးပိုးပေါက်ပေါက် ကျပြီး ဘာသာပြန်တာကို ခဏ ရပ်လိုက်ရတာမျိုးတွေ ရှိခဲ့တယ်”ဟု ဆရာကြီးက တွေးတွေးဆဆ ပြောဆိုသည်။ သူ အမှန်တကယ် စိတ်ဝင်စားသော ဘာသာရပ်မှာ အင်္ဂလိပ်၊ စိတ်ပညာနှင့် ဒဿနိကဗေဒ ဘာသာရပ်များ ဖြစ်သော်လည်း အလုပ်တစ်ဖက်နှင့် ကျောင်းတက်ရသည့် အခြေအနေအရ သမိုင်းကိုသာ ယူခဲ့ရသည်ဟုလည်း ဆရာက ဖွင့်ဟသည်။ သို့သော် Mother of History is Mother of All Subjects ဟူသော စကားရပ်အရ သမိုင်း ယူခဲ့ဖြစ်ခဲ့သည်ကိုလည်း ကျေနပ်ပါသည်ဟုလည်း ဆရာက ရယ်ရယ်မောမော ပြောဆိုသည်။ 

၂၀၁၆ ခုနှစ်တွင် Jefferry Archer ၏ Rage Of Angels စာအုပ်ကို ဒေါသမာန်အမည်ဖြင့် ပြန်ဆိုခဲ့ရာ ရှေ့နေလောကထဲမှ ရှေ့နေ အမျိုးသမီးငယ်၏ ဘဝအတွက် ကြိုးစားမှုနှင့် တရားရုံး အကြောင်းများ ပါဝင်သဖြင့် ရှေ့နေများ အတော်ကြိုက်ခဲ့သည့် စာအုပ်ဟု ဆရာက ဆိုသည်။ ၂၀၁၆ ခုနှစ်ထဲတွင်ပင် တက်ကျမ်းတစ်အုပ်ဖြစ်သော Present ကိုလည်း ပစ္စုပ္ပန်အမည်ဖြင့် ဘာသာပြန်ဆိုဖြစ်ခဲ့သည်။ ယခု ၂၀၁၇ ခုနှစ်ထဲတွင် Winston Graham ၏ The Sleeping Partner ကို ချစ်မိလေသောကြောင့် ဟူသောအမည်ဖြင့် ထုတ်ဝေထားပြီး ပြီးခဲ့သည့် ဇန်နဝါရီလထဲတွင် ကိုယ်ပိုင် စာအုပ်တိုက်ဖြစ်သော မေဃဝတီစာပေမှ  ဖြန့်ချိထားသည်။

“အဘတို့တုန်းက ဆရာမြ (မြသန်းတင့်)၊ နတ်နွယ်၊ နန္ဒမိတ်၊ မောင်သက်နောင်၊ မောင်ထွန်းသူ၊ မောင်မိုးသူ၊ မြတ်ငြိမ်း၊ တင်မောင်မြင့် စတဲ့ ဘာသာပြန် စာရေးဆရာတွေ အများကြီး ရှိခဲ့တယ်။ လက်ဖက်ရည်ဆိုင်တွေနဲ့ စာအုပ်ဆိုင်တွေမှာ ဆုံကြပြီး ပျော်ပျော်ပါးပါး စကားတွေ ပြောကြနဲ့ အတော်လေး စည်ပင်ခဲ့တာပေါ့။ အခုတော့ New Generation က ရှိပေမယ့် နည်းနေတယ်”ဟု ဆရာကြီးက လက်ရှိ ဘာသာပြန်စာပေ၏ အနေအထားပေါ် ရှုမြင်ပြောကြားသည်။ 

ယခုအချိန်တွင် ဘာသာပြန်စာရေးဆရာ လူငယ် အများစုမှာ ဝါသနာအရ အပျော်သဘော မဂ္ဂဇင်းနှင့် ဂျာနယ်များတွင် ဝတ္ထုတိုလေးများကိုသာ ဘာသာပြန် နေသည်ကို တွေ့ရှိနေရပြီး လုံးချင်းထုတ်ဝေနိုင်မှု မရှိသလောက် ဖြစ်နေသည်ဟု ဆရာကြီးက ဆိုသည်။ 

“တချို့လူငယ်တွေ ဝတ္ထုအတိုတွေ ဘာသာပြန်တာ သိပ်ကောင်းတယ၊် အားရတယ်။ စာရေးဆရာ ဖြစ်ချင်ရင် စာအုပ် ထုတ်နိုင်အောင် ကြိုးစား။ ဝတ္ထုတစ်အုပ်ကို  ထုပ်ထုပ်ပိုးပိုး ဘာသာပြန်နိုင်အောင် လုပ်။ အပျော်တမ်း Amateur သဘောမျိုး မဟုတ်ဘဲ တကယ့်ကျကျနန Professional ဖြစ်အောင် လုပ်ရမယ်”ဟု ဆရာကြီးက ရှုမြင်သည်။ 

ဘာသာပြန်စာရေးသူ တစ်ဦးအတွက် အဓိက လိုအပ်ချက်မှာ ကိုယ်ပိုင်ဘာသာစကားတွင် ဝေါ်ဟာရကြွယ်ဝမှုဖြစ်ပြီး စာများများ ဖတ်ရန်လည်း အထူး လိုအပ်သည်ဟု ဆရာက ထပ်လောင်း ပြောကြားသည်။ ဘာသာပြန်ရာတွင် တွေ့ရသော အင်္ဂလိပ် ဝေါဟာရများကို မြန်မာမှုပြုရာတွင် ဆရာစံထားသော စာရေးဆရာမှာ ဆရာမြသန်းတင့်ဖြစ်ပြီး ဆရာမြ၏ စာအုပ်များမှ ဘာသာပြန်ချက်များကို ဖတ်ရသည်မှာ အထူးပင် မြိန်လှသည်ဟုလည်း သူက ဆိုသည်။ 

“ဆရာမြရဲ့ စာအုပ်တွေက မြန်မာစာ အရမ်း ကျွမ်းတဲ့သူတစ်ဦးက ပြန်ထားမှန်း သိပ်သိသာတယ်။ ဝါကျလေးတစ်ကြောင်း စကားလုံးလေးတစ်လုံးကအစ အရသာရှိတယ်၊ သူ့စာတွေကို ပြီးစလွယ် ဖတ်လို့ မရဘူး။ သူရေးသမျှ အားလုံး ကြိုက်တယ်။ ဆရာမြက အညာသားဆိုတော့ အညာသား စကားကြွယ်တယ်ဆိုတဲ့ သဘောများလားတော့ မသိဘူး စာတွေက သိပ်ကို မြိန်တယ်”ဟု ချီးမွမ်းစကားဆိုသည်။ 

၁၉၉၇ ခုနှစ်တွင် Anne အန်နီဖြင့် အမျိုးသားစာပေ ဘာသာပြန်ရသဆု၊ ၂၀ဝ၆ ခုနှစ်တွင် Meera Nan Joker ကို ဘာသာပြန်ထားသည့် ကံကြမ္မာ အကျဉ်းသားဖြင့် ဒုတိယအကြိမ် ဘာသာပြန်ရသဆုနှင့် ၂၀၁၅ ခုနှစ်တွင် အမျိုးသား စာပေတစ်သက်တာဆုတို့ကို ဆရာ မောင်ပေါ်ထွန်း ရရှိခဲ့သည်။ ဆရာ၏ မိသားစုတွင် မွေးချင်း လေးယောက်ရှိသည့်အနက် ဆရာက တတိယမြောက်ဖြစ်ပြီး အထက်တွင် အစ်ကိုနှစ်ယောက်နှင့် ဆရာ့အောက် ညီမလေး တစ်ယောက်ရှိသည်။  အိမ်ထောင်ကျပြီးသည်နှင့် တောင်ဥက္ကလာတွင် နေထိုင်ခဲ့ပြီး သားသမီးငါးဦး ထွန်းကားခဲ့သည်။ သားသမီးများထဲတွင် စာပေထုတ်ဝေရေးလုပ်ငန်း လုပ်ကိုင်သည့်သူသာရှိပြီး စာရေးသည့်သူမရှိဟု သိရသည်။ 

အသက်အရွယ် ကြီးရင့်နေပြီဖြစ်သော လက်ရှိအချိန်တွင် မျက်စိအနည်းငယ် မှုန်သည်မှအပ ဆရာ့ကျန်းမာရေးက ကောင်းမွန်နေဆဲ ဖြစ်သည်။ မျက်စိ အခြေအနေကြောင့် ဘာသာပြန်နိုင်မှု ပမာဏမှာ အသက် ၅၀ အရွယ်လောက်ကထက်တော့ အများကြီး ကွာဟသွားကြောင်းလည်း ဆရာက ပြောဆိုသည်။

“အရင် ငယ်တုန်းရွယ်တုန်းကဆို ခြင်ထောင်ထောင်၊ အဲဒီထဲမှာ ဖယောင်းတိုင် ထွန်း၊ ကျကျနန ထိုင်ပြီး စာရေးတယ် ဘာသာပြန်တယ်။ တော်တော် ရေးဖြစ်ခဲ့တယ်။ ၁၉၇၄ ကနေ ၁၉၉၀ လောက်အထိပေါ့။ ခက်ခက်ခဲခဲနဲ့ မြတ်မြတ်နိုးနိုး ပြန်ဖြစ်ခဲ့တာ သန်းခေါင်ယံ လွတ်လပ်ရေးပါ”ဟု ပြန်ပြောင်းပြောပြသည်။ 

ဆရာတို့ခေတ်၏ ဘာသာပြန် စာရေးဆရာများထဲတွင် ဆရာမောင်ထွန်းသူနှင့် ဆရာမြတ်ငြိမ်းတို့မှာ ကွယ်လွန်သွားခဲ့ပြီဖြစ်သည်။ ဆရာ တင်မောင်မြင့်၊ ဆရာ ချစ်ဝင်းညွန့်၊ ဆရာဇင်သန့်နှင့် ဆရာ တင်နွယ်မောင်တို့မှာ သက်ရှိထင်ရှားရှိနေဆဲဖြစ်သည်။

လာမည့် သုံးလအတွင်းတွင် ဘာသာပြန်နိုင်ရန်အတွက် စာအုပ်များ ရွေးချယ်မှု ပြုလုပ်နေသည့် ဆရာ မောင်ပေါ်ထွန်းက ဘာသာပြန်ခြင်းကို မွေ့လျော်ကာ ဘာသာပြန်စာပေ ရေးသားရန်အတွက် လန်းဆန်းမှုဖြင့် ဈာန်ဝင်နေဆဲ ဖြစ်သည်။ 

ဆရာမောင်ပေါ်ထွန်းက အနာဂတ် မျိုးဆက်သစ် လူငယ်လူရွယ် ဘာသာပြန် စာရေးဆရာများကိုလည်း ကြိုဆိုမျှော်လင့်လျက်ရှိပြီး Man is Mortal; Book is immortal ဆိုသော စကားကဲ့သို့ လူမှာ သေသွားနိုင်ပြီး စာအုပ်စာပေများမှာ အမြဲ ရှင်သန်နိုင်သောကြောင့် လူငယ်များအနေနှင့် စာများများ ဖတ်ပါ၊ စာစုံဖတ်ပါ၊ စာများများရေးပါဟု အမှာစကားကို ပြောဆိုလေသည်။ 

အေးကျော့ခိုင်

  • TAGS