News

POST TYPE

FEATURE

ကမ္ဘာကျော် သားတော်များ (အာဏာရှင်သား ပလေးဘွိုင်း)
29-Sep-2016

သူ့အမည်က သိုအိုဒိုငုမာအိုဘီယန် မွန်ဂဲ (Teodoro Nguema Obiang Mangue) ဖြစ်သည်။ အီကွေတိုးရီးယား ဂီနီနိုင်ငံမှ အာဏာရှင်ကြီး သီအိုဒို အိုဘင်းငုမာအမ်ဘာဆိုဂို (Teodoro Obiang Nguema Mbasogo) ၏ သားဖြစ်သည်။ ရပ်ပါအဆိုတော်မလေး အိဗ်ကို ချိန်းတွေ့ရန်အတွက် မာလီဘူးမှ အိမ်တစ်လုံးကို ဒေါ်လာ ၃၅ သန်း လက်ငင်းငွေချေပြီး ဝယ်ပစ်လိုက်သည့် အာဏာရှင်သားဆိုလျှင် လူတိုင်းသိထားကြပါသည်။ 

အီကွေတိုးရီးယား ဂီနီနိုင်ငံ ဆိုသည်က အာဖရိကတိုက်တွင် တတိယ အကြီးမားဆုံးသော ရေနံထုတ်လုပ်သည့် နိုင်ငံကြီး တစ်နိုင်ငံဖြစ်ပြီး လူ့အခွင့်အရေး အချိုးဖောက်ဆုံး နိုင်ငံတစ်နိုင်ငံ အဖြစ်လည်း ထင်ရှားသည်။ ထို့ပြင် ခေတ်အဆက်ဆက် တိုင်းပြည်ကို အုပ်ချုပ်ခဲ့သည့် အာဏာရှင်တို့ကလည်း နိုင်ငံ၏ ရေနံသယံဇာတများကို ရောင်းချပြီး ရသမျှငွေများကို သူတို့ အိတ်ထဲကို ထည့်သွားကြသည်က များသည်။

အာဏာရှင် အမ်ဘာဆိုဂိုသည် ယခုအခါ အသက် ၇၃ နှစ်ရှိပြီ ဖြစ်သည်။ အာဖရိကတိုက်တွင် သက်တော်ရှည် အာဏာရှင်တစ်ပါး အဖြစ်လည်း ထင်ရှားသည်။ ဦးလေးဖြစ်သူထံမှာ အာဏာသိမ်းကာ ၁၉၇၉ ခုနှစ် လောက်ကတည်းက ဦးလေးကို လုပ်ကြံပြီး အာဏာရှင် ဖြစ်လာခဲ့သည်။ 

သားဖြစ်သူ အိုဘီယန်သည် ပြင်သစ်နိုင်ငံ ပုဂ္ဂလိကကျောင်း တစ်ကျောင်းတွင် ကောင်းစွာ ပညာသင်ကြားခဲ့ရသူ ဖြစ်သည်။ အမေရိကန်ပြည်ထောင်စု၊ မာလီဘူးရှိ ပက်ပါဒိုင်းတက္ကသိုလ်တွင် ငါးလခန့် တက်ရောက်ပညာသင်ဖူးသည်။ သို့သော် ထိုတက္ကသိုလ်မှ ဘွဲ့ရခဲ့ကြောင်း ပြောကြားကြသည်။ 

အိုဘီယန်သည် ၁၉၉၀ ပြည့်နှစ်တွင် ဖခင်ဖြစ်သူ အမ်ဘာဆိုဂိုထံတွင် သမ္မတအကြံပေးအဖြစ် တာဝန်ထမ်းဆောင်ခဲ့သည်။ ထို့နောက် စိုက်ပျိုးရေးနှင့် သစ်တောဝန်ကြီးအဖြစ် ၁၅ နှစ်ခန့် တာဝန်ထမ်းဆောင်ခဲ့သည်။ ၂၀၀၅ ခုနှစ်တွင် သူ့ကို အီကွေတိုးရီးယား ဂီနီနိုင်ငံ၏ ဒုတိယသမ္မတအဖြစ် တင်မြှောက်ကြတော့သည်။ ဖွဲ့စည်းပုံအခြေခံဥပဒေအရ ဖခင် သေဆုံးလျှင် အိုဘီယန် တစ်ယောက် သမ္မတ ဖြစ်လာပေလိမ့်မည်။

ဒုတိယသမ္မတသည် ကာကွယ်ရေးနှင့် လုံခြုံရေ ဌာန၏ အကြီးအကဲလည်း ဖြစ်သည်။ လေးနှစ်ခန့် ဒုတိယသမ္မတအဖြစ် တာဝန်ထမ်းဆောင်ပြီးချိန်တွင် ရာထူးတစ်ဆင့် တိုးသည်။ ဒုတိယသမ္မတ နှစ်ယောက် ရှိသည့်အနက် ပထမဆုံး ဒုသမ္မတ နေရာကို ရယူလိုက်ခြင်း ဖြစ်သည်။ ၂၀၁၆ ခုနှစ်အထိ ကာကွယ်ရေးနှင့် လုံခြုံရေးဌာန အကြီးအကဲရာထူးကို မစွန့်သေးပေ။ ထိုရာထူးကြောင့်ပင် ၂၀၁၆ ခုနှစ် ဧပြီလတွင် သူ့ဖခင်ကို နောက်တစ်ကြိမ် သမ္မတအဖြစ် ပြန်လည်ရွေးကောက်ခြင်း ခံရစေရန် အထောက်အကူများ ပေးနိုင်ခဲ့သည်။ 

အိုဘီယန်သည် ပြင်သစ်နိုင်ငံ ဖို့ခ်ျရိပ်သာလမ်းတွင် ငါးထပ်တိုက်ကြီးတစ်လုံး ဝယ်ထားသည်။ ထိုတိုက်ကြီး တစ်တိုက်လုံးသည် အကောင်းစားများနှင့် ပြင်ဆင်ထားသည်။ သူက တစ်နှစ်လျှင် နှစ်ကြိမ်မှ သုံးကြိမ်အထိ ပြင်သစ်နိုင်ငံသို့လာပြီး အပန်းဖြေလျှင် ထိုတိုက်ကြီးတွင် နေထိုင်တတ်သည်။ အိမ်ထဲတွင် ကိုယ်ပိုင်ရုပ်ရှင်ခန်းကြီးထဲ၌ တန်ဖိုးကြီးလှသည့် ဘာဂန်ဒီအရက်ကို သောက်ကာ ဇိမ်ခံတတ်သည်။ ပြင်သစ်တွင် နေထိုင်စဉ် သူစီးသည့် ကား ၁၁ စီးမှာ အဖိုးတန် အကောင်းစားကားများ ဖြစ်သည်။ 

အမှတ် ၄၂ ဖို့ခ်ျရိပ်သာလမ်းရှိ ယင်းအဆောက်အအုံကြီးသည် ဒေါ်လာသန်း ၁၈၀ ခန့် တန်သည်။ ထိုအိမ်တော်ကြီးကို ဖခင်သမ္မတကြီးက ၂၀၁၁ ခုနှစ်တွင် ဝယ်ထားခြင်းဖြစ်ပြီး၊ သားတော် အိုဘီယန်က ဖခင်လက်ထဲမှ လွှဲယူကာ ပျော်ရွှင်စွာ စည်းစိမ်ခံစားသည့် နေရာတစ်နေရာ ဖြစ်လာသည်။ ထိုအဆောက်အအုံကြီးတွင် အခန်းပေါင်း ၁၀၁ ခန်း ရှိသည်။ တူရကီ ရေချိုးခန်း၊ ဆံပင်ညှပ်ခန်း၊ အားကစားခန်း၊ နိုက်ကလပ်နှင့် ရုပ်ရှင်ရုံတို့လည်း ပါဝင်သည်။ 

အိမ်တော်ကြီးထဲတွင် ပြင်ဆင်ထားသည့် ပရိဘောဂ ပစ္စည်းသက်သက် တန်ဖိုးက ဒေါ်လာ သန်း ၅၀ ခန့် တန်သည်။ ရေချိုးခန်းတိုင်းတွင် ရုပ်မြင်သံကြားများ တပ်ဆင်ထားသည်။ ညစာစားပွဲအတွက် ထားသည့် စားပွဲခုံမှာ ရွှေငွေ ကျောက်သံပတ္တမြားတို့နှင့် စီခြယ်ထားသည်။ တကယ့်ဧည့်သည်ထူးများ မကြာခဏ ရောက်လာတတ်ကြသည်။ 

၂၀၁၂ ခုနှစ် စက်တင်ဘာလတွင် ပြင်သစ်ရဲများက ထိုအိမ်တော်ကြီးကို ဝင်စီးပြီး တန်ဖိုးကြီး ဇိမ်ခံကား ၁၁ စီးကို သိမ်းလိုက်သည်။ အိမ်ထဲတွင် သိုလှောင်ထားသည့် အရက်အကောင်းစားများ၏ တန်ဖိုးမှာ ဒေါ်လာ ၂ သန်းခန့် ဖြစ်သည်။ အာဖရိက ရေနံထွက်သည့်နိုင်ငံမှ ခိုးယူထားသော ငွေများဖြင့် ကောင်းကောင်းဇိမ်လာခံနေသော အိုဘီယန်ကို ပြင်သစ်ရဲများက စတင်စစ်ဆေးမှုများ ပြုလုပ်ကြတော့သည်။ 

ပြင်သစ်နိုင်ငံတွင် သားတော် အိုဘီယန်နှင့် ခမည်းတော် အမ်ဘာဆိုဂိုတို့ကို အရေးယူပေးပါရန် ဦးတိုက်လာလျှောက်သူများမှာ ကွန်ဂိုနိုင်ငံသား နှစ်ယောက် ဖြစ်သည်။ သူတို့သည် NGO အဖွဲ့အစည်းတစ်ခုက ဖြစ်ပြီး နိုင်ငံတော်မှ ငွေများကို ခိုးလာပြီး ပြင်သစ်နိုင်ငံတွင် တရားမဝင် အဆောက်အအုံများ ပစ္စည်းများကို ဝယ်ယူထားပါသည် ဆိုသည့် စွဲချက်ကို အခြေပြုပြီး ပစ္စည်းများကို ထိန်းသိမ်းကာ စစ်ဆေးခဲ့ကြခြင်း ဖြစ်သည်။ 

သူတို့သည် အိုဘီယန် ပိုင်ဆိုင်သည့် ပစ္စည်းများကို ထိန်းသိမ်းစစ်ဆေးသော်လည်း အိုဘီယန်ကို တစ်ယောက်မှ မတွေ့ဖူးကြပေ။ သူတို့ အိမ်တော်ကို ဝင်သိမ်းသည့်အခါတွင် ဒေါ်လာ ၃ ဒသမ ၇ သန်းတန် နာရီတစ်လုံး၊ နာမည်ကျော် ပန်းချီပညာရှင်ကြီးများ ဖြစ်သည့် ဒေးဂါးစ်နှင့် ရိုဒင်၏ တန်ဖိုးကြီး ရှားပါးပန်းချီကား ငါးချပ်နှင့် ယူရိုငွေ သန်းပေါင်းများစွာကိုလည်း တွေ့ရှိခဲ့ရသည်။ 

ပြင်သစ်ရဲများက တွေ့ရှိထားသည့် ပစ္စည်းများအပေါ် အခြေခံပြီး အိုဘီယန်ကို ဖမ်းဝရမ်း ထုတ်လိုက်ကြသည်။ ပြည်သူ့ဘဏ္ဍာငွေများကို ကိုယ်ကျိုးအတွက် အသုံးပြုခြင်း၊ တရားမ၀င် ကုမ္ပဏီ ထူထောင်ခြင်း စသည့် အမှုများဖြင့် တရားစွဲရန် ပြင်ဆင်ကြသည်။ ထို့ပြင် ငွေမည်းခဝါချမှုများ၊ ယုံကြည်မှု ကတိကဝတ်များကို ချိုးဖောက်မှုများ၊ အလွဲသုံးစား ပြုလုပ်ထားသည့် ငွေကြေးများဖြင့် ပြင်သစ်နိုင်ငံတော်မှ တန်ဖိုးရှိသော ပစ္စည်းများကို ဝယ်ယူသိမ်းပိုက်ထားမှုများလည်း စွဲဆိုထားသည့် အမှုများထဲတွင် ပါဝင်သည်။ 

ဖခင်နှင့် သားဖြစ်သူတို့ နိုင်ငံတော်ဘဏ္ဍာကို လျှို့ဝှက်စွာ ကဲ့ယူထားကြမှုများကို အမေရိကန်ပြည်ထောင်စုကလည်း စစ်ဆေးခဲ့သည်။ အဘယ်ကြောင့်ဆိုသော် သားတော် အိုဘီယန်ကလည်း အမေရိကန်ပြည်ထောင်စုတွင် လာရောက်သောင်းကျန်းထားသည်မှာ များလွန်းလှသည်။

ပြင်သစ်တွင် အိမ်တော်ကြီးတစ်လုံး ပြဿနာရှင်း၍ မပြီးသေးမီ အမေရိကန်ပြည်ထောင်စု မာလီဘူးတွင်လည်း အိမ်များ ဝယ်ထားသည့် စာရင်းတွေ ပေါ်ထွက်လာသည်။ အမေရိကတွင် အိုဘီယန် ဝယ်ထားသည့် ကားများကလည်း အကောင်းစားတွေချည်း ဖြစ်သည်။ ဖာရာရိစ်၊ ဘူဂက်တစ်နှင့် ဘင့်တ်လေကားများ ဖြစ်သည်။ ထို့ပြင် အိုဘီယန်သည် ကွယ်လွန်သူ အဆိုတော် မိုက်ကယ်ဂျက်ဆင် ခရေဇီတစ်ယောက် ဖြစ်သောကြောင့် မိုက်ကယ် ဂျက်ဆင်၏ အထိမ်းအမှတ် ပစ္စည်းများကိုလည်း တန်ဖိုးကြီးစွာ ပေးဝယ်ပြီး စုဆောင်းထားသည်။ ယင်းပစ္စည်းများထဲတွင် နာမည်ကျော် လက်အိတ်ဖြူလည်း ပါဝင်သည်။ မိုက်ကယ်ဂျက်ဆင် ပစ္စည်းများကို ဝယ်ယူစုဆောင်းထားသည့် စုစုပေါင်း ငွေကြေးတန်ဖိုးမှာ ဒေါ်လာ ၃၄ သန်းခန့် ဖြစ်သည်။

အသက် ၄၃ နှစ်ခန့် ရှိနေပြီ ဖြစ်သည့် ဒုတိယသမ္မတဘွဲ့ခံ သားတော် အိုဘီယန်သည် ပြင်သစ်နှင့် အမေရိကတွင် ပိုက်ဆံကို ပုံအောပြီး ဥပဒေကို လက်တစ်လုံးခြားလုပ်ကာ ရှေ့နေများ အကာအကွယ်ဖြင့် နှစ်ပေါင်းများစွာ ကျင်လည်ခဲ့သူ ဖြစ်သည်။ သူ့နိုင်ငံပြည်သူများ တစ်နေ့ဝင်ငွေ ၁ ဒသမ ၂၅ ဒေါ်လာနှုန်းခန့်ဖြင့် အသက်ဆက်နေရချိန်တွင် အိုဘီယန်ကတော့ အမေရိကသို့ လာပြီး ပျော်ပါးနေတော့သည်။ အောက်ပါ စွဲချက်များသည် ၂၀၁၅ ခုနှစ် စက်တင်ဘာ ၃၀ ရက်နေ့က ကုလသမဂ္ဂ အထွေထွေညီလာခံတွင်ပင် မိန့်ခွန်းတက်ပြောခွင့် ရခဲ့သည့် အိုဘီယန်၏ စွမ်းဆောင်ချက်များ ဖြစ်ပါသည်။

အမေရိကန် တရားရေးဌာန၏ ဖော်ထုတ်ချက်အရ အမေရိကန်ရှိ ဝေါ်လ်တာ ရေနံနှင့် သဘာဝဓာတ်ငွေ့ ကုမ္ပဏီသည် အိုဘီယန် အမေရိကတွင် လာရောက်နေထိုင်စဉ် ငါးလကာလ ၁၉၉၁ ခုနှစ်က ပက်ပါဒိုင်းတက္ကသိုလ်သို့ ကျောင်းလခများ ပေးသွင်းပေးရသည်။ သူက ထိုကာလတွင် ဘီဗာလေတောင်ကုန်း ဟိုတယ်တွင် တည်းခိုသည်။ ထို့ပြင် နောက်ပိုင်း မာလီဘူးတွင် အိမ်ငှားနေသည်။ ထိုငွေကြေးများကိုလည်း ရေနံကုမ္ပဏီက ပေးထားခဲ့သည်။ ထိုကုမ္ပဏီသည် အီကွေတိုးရီးယား ဂီနီနိုင်ငံတွင် ရှေးဦးကတည်းက ရေနံနှင့်ဓာတ်ငွေ့ ထုတ်လုပ်ခွင့်များကို ရထားသည့် ကုမ္ပဏီတစ်ခု ဖြစ်သည်။

အသက် ၃၀ အရွယ်တွင် ဖခင်ဖြစ်သူ အမ်ဘာဆိုဂိုသည် သားကို ဝန်ကြီးရာထူး ပေးခဲ့သောကြောင့် နိုင်ငံ၏ အသက်အငယ်ဆုံး ဝန်ကြီး ဖြစ်ခဲ့ရသည်။ စိုက်ပျိုးရေးနှင့် သစ်တောဝန်ကြီး ရာထူးကို ရယူထားခြင်း ဖြစ်သည်။ အိုဘီယန်တွင် ညီငယ်တစ်ယောက်လည်း ရှိသေးသည်။ ညီဖြစ်သူ အမ်ဘာဂါသည် သတ္တုတွင်းနှင့် စွမ်းအင်ဝန်ကြီး ဖြစ်လာသည်။ ဝန်ကြီးနေရာပေါင်း ၅၀ တွင် ၂၁ နေရာသည် သမ္မတ အမ်ဘာဆိုဂိုနှင့် နီးစပ်သည့် ဆွေမျိုးအသိုင်းအဝိုင်းများသာ ဖြစ်နေသည်။ 

အမေရိကန်ပြည်ထောင်စုနှင့် ပြင်သစ်နိုင်ငံများသို့ လှည့်လည်သွားလာနေသည့် အိုဘီယန်သည် ငွေမည်းခဝါချသည့် လုပ်ငန်းများကို ကောင်းကောင်းလုပ်နိုင်သူ တစ်ဦးလည်း ဖြစ်သည်။ ရုရှားသုံးဦးကို စပိန်နိုင်ငံတွင် အမ်ဘာဆိုဂို၏ ငွေများကို ခဝါချပေးမှုဖြင့် ဖမ်းဆီးနိုင်ခဲ့သော်လည်း ကာယကံရှင်များကို မဖမ်းဆီးနိုင်သေးပေ။ 

အမေရိကန်ပြည်ထောင်စု တရားရေးဌာန၏ စွပ်စွဲပြောဆိုမှုတွင် အိုဘီယန်သည် နိုင်ငံမှ ခိုးယူလာသည့် ငွေပေါင်း ၃၁၅ သန်းခန့် ရှိမည်ဟု ဆိုထားသည်။ ၂၀၀၄ ခုနှစ်မှ ၂၀၁၁ ခုနှစ်အတွင်း ဝယ်ယူထားသည့် အိမ်များ၊ ကားများ၊ ပစ္စည်းများကို စာရင်းပေါင်းကြည့်ထားခြင်း ဖြစ်သည်။ သူနောက်ဆုံး ဝယ်သွားသည့် မာလီဘူးရှိ အိမ်က ဒေါ်လာ သန်း ၃၀ တန်သည်။ ထို့ပြင် အကောင်းစား ဖာရာရီကားလည်း ဝယ်စီးသွားသေးသည်။

အိုဘီယန်က မိမိသည် ထိုပစ္စည်းများကို ဒုတိယသမ္မတ မဖြစ်မီ စိုက်ပျိုးရေးနှင့် သစ်တောဝန်ကြီး ဘဝကတည်းက ကိုယ်ပိုင်ငွေများဖြင့် ဝယ်ယူထားခြင်း ဖြစ်ကြောင်း ပြောကြားသည်။ သူ၏ ကိုယ်ပိုင်ငွေ ဆိုသည်မှာလည်း နိုင်ငံတော်ကို အခွန်ပေးပြီး ကုမ္ပဏီထောင်ကာ နိုင်ငံခြားသို့ သစ်များပို့ခြင်းမှ ရသည့် ဝင်ငွေဟု ဆိုသည်။ သူက နိုင်ငံခြားသို့ သစ်လုံးတစ်လုံး ပို့တိုင်း တိုင်းပြည်ကို အခွန် ၂၈ ဒသမ ၈၀ ဒေါ်လာ ပေးဆောင်ခဲ့ကြောင်း ငြင်းချက်ထုတ်ထားသည်။ 

သူ့ရှေ့နေများကလည်း အိုဘီယန်သည် သူ့ကိုယ်ပိုင်ထူထောင်ထားသော ကုမ္ပဏီများက တစ်နှစ်လျှင် ဒေါ်လာတစ်သိန်း ဝင်ငွေရှိနေသူဖြစ်ကြောင်း၊ သူသုံးနေသည့် ငွေကြေးများမှာလည်း လုပ်ငန်းမှ ရရှိထားသည့် အကျိုး အမြတ်များထဲက သုံးစွဲနေခြင်း ဖြစ်ကြောင်း လျှောက်လဲကြသည်။ 

ပြင်သစ်နိုင်ငံတွင် သိမ်းဆည်းထားသော အိမ်နှင့် ကားများ၊ ပစ္စည်းများနှင့် ပတ်သက်ပြီး ဂီနီအစိုးရကလည်း ပြင်သစ်နိုင်ငံကို နိုင်ငံတကာ တရားရုံးတွင် ပြန်ပြီး တရားစွဲထားသည်။ သံတမန်ဆိုင်ရာ အခွင့်အရေးများကို ချိုးဖောက်သည်ဆိုသည့် စွဲချက်များဖြင့် တရားစွဲထားခြင်း ဖြစ်သည်။ 

၂၀၁၆ ခုနှစ် စက်တင်ဘာလတွင် ပြင်သစ်နိုင်ငံ ဒေသတရားသူကြီး နှစ်ဦးသည် နိုင်ငံတရားရုံးသို့ တက်ရောက်လာပြီး အမ်ဘာဆိုဂိုနှင့် သားဖြစ်သူ အိုဘီယန်တို့ကို ဖမ်းဝရမ်းထုတ်ခွင့် တောင်းကာ နိုင်ငံတကာရဲတပ်ဖွဲ့ကိုလည်း အကူအညီ တောင်းထားသည်။ 

အိုဘီယန်သည် အမေရိကန်၊ ပြင်သစ်တို့တွင် သာမက စပိန်နိုင်ငံတို့တွင်ပါ တရားရင်ဆိုင်ရမည့် အမှုပေါင်းများစွာ ရှိနေသည်။ သူက ဆိုရှယ်မီဒီယာများကို အသုံးပြုပြီး မည်မျှစင်ကြယ်ကြောင်း ဝါဒဖြန့်မှုများ လုပ်ကိုင်နေသည်။ ထို့ပြင် သူ့အကြောင်း ဗီဒီယိုများ သီချင်းများကိုလည်း အွန်လိုင်းပေါ် ပျံ့အောင် လုပ်ကာ သူတော်စင်ယောင် ဆောင်ပြနေသည်။ 

ဂီနီနိုင်ငံတွင် ယနေ့တိုင် ပြည်သူတွေ လျှပ်စစ်မီး မသုံးနိုင်သေးပေ။ ရေကောင်းရေသန့် မရသည့်အပြင် စုတ်ပြတ်သည့် တဲများဖြင့်သာ နေထိုင်ကြရသေးသည်။ Freedom House အဆိုအရ အာဏာရှင်အုပ်စိုးမှုအောက်တွင် မြောက်ကိုရီးယား၊ မြန်မာနှင့် ဆိုမာလီနိုင်ငံတို့ ပြီးလျှင် အဆိုးဆုံးနိုင်ငံ ဖြစ်ကြောင်း သိရသည်။ နိုင်ငံတွင် တစ်ပါတီအာဏာရှင်စနစ်ကို ၁၉၇၉ ခုနှစ် ကတည်းက ထူထောင်ထားသောကြောင့် မြန်မာနိုင်ငံနှင့် ခေတ်ပြိုင် အာဏာရှင် လက်အောက် ကျရောက်ခဲ့ရသော နိုင်ငံဖြစ်သော်လည်း ခမည်းတော် အမ်ဘာဆိုဂို သာမက၊ သားတော် အိုဘီယန် နှိပ်စက်သမျှ ကျောကော့အောင် ယနေ့တိုင် ခံစားနေကြရသော နိုင်ငံ ဖြစ်နေခဲ့ပါသည်။ 

(Ref : Daily Mail, Time, Business Insider, The New York Times, Global Journalist, International Business Times) 

ကျော်ဗလ