News

POST TYPE

FEATURE

ပုပ်ရဟန်းမင်းကြီး ဖရန်စစ်
28-Nov-2017 tagged as


ပုပ်ရဟန်းမင်းကြီး ဖရန်စစ်ကို အာဂျင်တီး နားနိုင်ငံတွင် မွေးဖွားသည်။ ယေဇူးမိတ်ဆွေများ အသင်းဂိုဏ်း (Jesuit) ဝင် ဘုန်းတော်ကြီးများထဲတွင် ဥရောပ ဒေသက မဟုတ်ဘဲ လက်တင် အမေရိကမှ ပထမဆုံး ရိုမန်ကက်သလစ် သာသနာတော်၏ ၂၆၆ ယောက်မြောက် ပုပ်ရဟန်းမင်းကြီး ဖြစ်လာခဲ့ရသူလည်း ဖြစ်သည်။

ပုပ်ရဟန်းမင်းကြီး ဖရန်စစ်ကို ၁၉၃၆ ခုနှစ်၊ ဒီဇင်ဘာ ၁၇ ရက်နေ့တွင် အာဂျင်တီးနားနိုင်ငံ၊ ဗျူနိုးစ် အေးရိစ်၌ မွေးဖွားသည်။ အီတလီမျိုးရိုးနွယ်ဖြစ်သည်။ ဗာတီကန်က ထုတ်ပြန်သည့် တရားဝင် အချက်အလက်များအရ ၁၉၅၈ ခုနှစ် မတ်လ ၁၁ ရက်နေ့တွင် ယေဇူး အသင်းတော်ကို ဝင်ရောက်ခဲ့သည်။ ၁၉၆၉ ခုနှစ်တွင် အာဂျင်တီးနားနှင့် ဂျာမနီနိုင်ငံများသို့ သွားရောက် ပညာသင်ကြားခဲ့သည်။ 

ငယ်ရွယ်စဉ်က ကူးစက်ဝေဒနာကြောင့် အဆုတ် တစ်စိတ်တစ်ပိုင်းကို ဖယ်ရှားခြင်း ခံထားရသော်လည်း ယနေ့တိုင် ကျန်းမာလျက်ရှိသည်။ ၁၉၉၂ ခုနှစ်တွင် (Bishop) အဖြစ်လည်းကောင်း၊ ၁၉၉၈ ခုနှစ်တွင် (Archbishop) အဖြစ်လည်းကောင်း တင်မြှောက်ခြင်း ခံရသည်။ ၂၀ဝ၅ ခုနှစ်တွင် ပုပ်ရဟန်းမင်းကြီးအဖြစ် ရွေးချယ်ရန်အတွက် လျှို့ဝှက်ရွေးချယ် သတ်မှတ်လျာထားခြင်း ခံရသည်။ ၁၉၇၃ ခုနှစ်မှ ၂၀၁၃ ခုနှစ်အထိ ကက်သလစ်ဂိုဏ်းချုပ် ဆရာတော်ကြီးနှင့် (Cardinal) အဖြစ် ဆောင်ရွက်ခဲ့သည်။ အသက် ၇၆ နှစ်အရွယ် ၂၀၁၃ ခုနှစ် မတ်လ ၁၃ ရက်နေ့တွင် ရိုမန် ကက်သလစ် သာသနာတော်၏ ၂၆၆ ယောက်မြောက် ပုပ်ရဟန်းမင်းကြီးအဖြစ် ရွေးချယ်တင်မြှောက်ခြင်း ခံခဲ့ရသည်။

ပုပ်ရဟန်းမင်းကြီးအဖြစ် ရွေးချယ်ခံလိုက်ရကြောင်း သတင်း ကြားလိုက်ရသည့်အခါတွင် အာဂျင်တီးနား နိုင်ငံတစ်ခုလုံး အံ့အားသင့်သွားကြသည်။ ဥရောပဒေသက မဟုတ်သည့်အပြင် အသက်အရွယ်အားဖြင့်လည်း ငယ်သေးသောကြောင့် မဖြစ်နိုင်ဟု ယူဆထားကြသည်။ သို့သော် ဗျူနိုးစ်အေးရိစ် တစ်မြို့လုံး ဝမ်းသာအားရ လမ်းများပေါ်တွင် ကားဟွန်းတွေ တီးပြီး ဂုဏ်ပြုပူဇော်ကြသည်။ လူတွေလည်း အော်ဟစ် မြူးထူး ကုန်ကြသည်။ 

ပုပ်ရဟန်းမင်းကြီး၏ ပထမဆုံး နိုင်ငံတကာ ခရီးစဉ်ကို ၂၀၁၃ ခုနှစ် ဇူလိုင်လတွင် စတင်ခဲ့သည်။ ဘရာဇီးနိုင်ငံသို့ သွားရောက်ခဲ့ခြင်း ဖြစ်သည်။ ၂၀၁၃ ခုနှစ် ဒီဇင်ဘာလတွင် Time မဂ္ဂဇင်းကြီးက (Person of the Year) အနေနှင့် ဂုဏ်ပြုချီးမြှောက်ခဲ့သည်။ စတင် တာဝန်ထမ်းဆောင်စဉ်ကတည်းက လူသား အချင်းချင်း စာနာ ထောက်ထားရေးနှင့် ကမ္ဘာ့ဆင်းရဲသူ အပေါင်းနှင့် ဒုက္ခသည် အပေါင်းကို အကူအညီများ ပေးရန် တိုက်တွန်း နှိုးဆော်ပေးခဲ့သည်။ ထို့ပြင် ကမ္ဘာ့နိုင်ငံများ အချင်းချင်း ညီညွတ်သင့်မြတ်ရေးနှင့် ငြိမ်းချမ်းရေးအတွက်လည်း သံခင်းတမန်ခင်းအရ ဆောင်ရွက်တော်မူသည့်အပြင် သဘာဝ ပတ်ဝန်းကျင် ထိန်းသိမ်းရေးကိုလည်း ထောက်ခံအားပေးသူအဖြစ် ထင်ရှားသည်။

ပုပ်ရဟန်းမင်းကြီး၏ ငယ်မည်မှာ Jorge Mario Bergoglio ဖြစ်သည်။ ငယ်စဉ်က နည်းပညာကျောင်းမှအောင်ပြီး ဓာတုဗေဒ ကျွမ်းကျင်ပညာရှင်တစ်ဦး ဖြစ်လာသည်။ သို့သော် ၁၉၅၈ ခုနှစ်တွင် ရဟန်းဖြစ်သင်ကျောင်းသို့ သွားတက်ပြီး ယေဇူး၏ မိတ်ဆွေများ အသင်းဂိုဏ်း (Society of Jesus) အဖွဲ့ဝင်တစ်ဦး ဖြစ်လာသည်။

Santa Fé  မြို့ရှိ Immaculate Conception College တွင် စာပေပညာနှင့် စိတ်ပညာဆိုင်ရာ ဘာသာရပ်များကို သင်ကြားပို့ချသည့် တာဝန် ၁၉၆၄ မှ ၁၉၆၅ အထိ ယူခဲ့သည်။ ၁၉၆၆ ခုနှစ်တွင် ဗျူနို့စ် အေးရိစ်သို့ပြန်လာပြီး Colegio del Salvatore ၌ ထိုဘာသာရပ်များကို ဆက်သင်ပေးသည်။ ဘာသာရေးဆိုင်ရာ (Theology) ပညာရပ်များကို ၁၉၆၇ ခုနှစ်မှ ၁၉၇၀ ခုနှစ်အထိ Colegio of San José တွင် တက်ရောက်သင်ယူခဲ့ပြီး ဘွဲ့ရရှိခဲ့သည်။ (Theology) ဆိုင်ရာ ကျမ်းတင်ပြီး ၁၉၈၆ ခုနှစ်က ဂျာမနီနိုင်ငံ Freiburg တွင် ဒေါက်တာဘွဲ့ကို ရရှိခဲ့သည်။

သူ့ကို ပုပ်ရဟန်းမင်းကြီးအဖြစ် ရွေးကောက်တင်မြှောက်ရန် စာရင်းတင်သွင်းထားကြောင်း အသံတွေ ပေါ်ထွက်လာစဉ်ကတည်းက ကမ္ဘာက စောင့်ကြည့်ခြင်းခံရသည်။ သာသနာတော်၏ အမြင့်ဆုံး ပုပ်ရဟန်းမင်းရာထူးကို တစ်ကမ္ဘာလုံးက စိတ်ဝင်စားကြသည်။ ဆရာတော် ဖရန်စစ်ကို စာရင်းပါသည်ဆိုသော အသံထွက်လာကတည်းက မီဒီယာကလည်း စောင့်ကြည့်ပြီး ဆရာတော်ကြီး၏ လူမှုရေး ဆောင်ရွက်ချက်များကို ဖော်ပြကြသည်။ 

ထိုအချိန်တွင် ဆရာတော်ကြီးသည် သူ၏ ဘော်ဒါဆောင်လေးတွင် ရိုးရှင်းစွာ နေခဲ့သည်။ အဆောင်နေခကိုလည်း ကိုယ်တိုင်ကပင် ရှင်းပေးခဲ့သည်။ သူနေထိုင်သည့် ဘော်ဒါဆောင် အခန်းလေးက နှစ်ခန်းသာ ပါသည့် ရိုးရှင်းသော ဘဝလေးဖြစ်သည်။ သူသည် ရိုးစင်းသော ဘဝကိုသာ ရွေးချယ်နေထိုင်ပြီး၊ အစဉ်အလာအရ ရာထူး အဆင့်အတန်းနှင့်အညီ ခမ်းနားစွာ နေထိုင်ရမည်ဆိုသည့် သဘောတရားများကိုလည်း ဆန့်ကျင်ခဲ့သူ ဖြစ်သည်။ 

အီတလီနိုင်ငံ၊ ရောမမြို့ရှိ၊ ဗာတီကန်စီတီးတွင် တာဝန် ထမ်းဆောင်စဉ် စိန့်ပီတာရင်ပြင်၌ ဆရာတော်ကြီးသည့် မိန့်ခွန်းပြောကြားစဉ်က -

“အားလုံး သိတော်မူတဲ့အတိုင်း ရောမပုပ်ရဟန်းမင်းကြီးအဖြစ် တာဝန်ပေးအပ်ခြင်းဟာ ညီအစ်ကိုတော် ရဟန်းတော်များရဲ့ ရွေးချယ် တင်မြှောက်ခြင်းကြောင့် ဖြစ်လာတာပါ။ ဒီနေရာကို ရောက်လာတဲ့အတွက် အားလုံးကို ကျေးဇူးတင်ပါတယ်”ဟု ပြောကြားခဲ့သည်။ 

၂၀၁၃ ခုနှစ်တွင် ပုပ်ရဟန်းမင်းကြီးအဖြစ် ရွေးချယ်စဉ်က အမေရိကန် ပြည်ထောင်စုတွင် သမ္မတ အိုဘားမား အစိုးရအဖွဲ့ တာဝန်ယူထားချိန်ဖြစ်သည်။ သမ္မတ အိုဘားမားက ပုပ်ရဟန်းမင်း အသစ်နှင့်ပတ်သက်ပြီး အမေရိကမှ ပထမဆုံး ပုပ်ရဟန်းမင်းကြီး ဖြစ်လာသည့်အတွက် ဂုဏ်ယူကြောင်း၊ ဒေသအတွင်း စည်းလုံးညီညွတ်မှု ပိုမိုခိုင်မာပြီး၊ ကမ္ဘာကြီးကိုပါ ညီညွတ်သည့် ကမ္ဘာကြီး ဖြစ်စေရန် ပုံဖော်ပေးနိုင်မည်ဟု ယူဆကြောင်း၊ သမိုင်းဝင် ဤနေ့ထူးနေ့မြတ်အတွက် အမေရိကန် ပြည်ထောင်စုနှင့်တကွ သန်းပေါင်း များစွာသော လက်တင် အမေရိက ပြည်သူများက ဝမ်းသာဂုဏ်ယူမိကြောင်း သဝဏ်လွှာ ပေးပို့ခဲ့သည်။ 

၂၀၁၃ ခုနှစ် ဇူလိုင် ၂၂ ရက်နေ့တွင် ပုပ်ရဟန်းမင်းကြီး ဖရန်စစ်သည် နိုင်ငံတကာ ခရီးစဉ်အဖြစ် ဘရာဇီးလ်နိုင်ငံသို့ ရောက်ရှိခဲ့သည်။ Galeão-Antonio Carlos Jobim နိုင်ငံတကာ လေဆိပ်တွင် ဘရာဇီးနိုင်ငံ သမ္မတ ဒီလ်မာ ရို့စ်ဆပ်က ကြိုဆိုသည်။ ထို့နောက် ပုပ်ရဟန်းမင်းကြီးသည် မြို့တွင်းရှိ ပြည်သူများထံ အနီးကပ် သွားရောက်ကာ တွေ့ဆုံနှုတ်ဆက်သည်။ ရီယိုမြို့သို့ရောက်စဉ် ကမ္ဘာ့လူငယ်များနေ့ အခမ်းအနားသို့ တက်ရောက်တော်မူခဲ့သည်။ ထိုပွဲသို့ လူပေါင်း သုံးသန်းကျော် တက်ရောက်ခဲ့ကြသည်။ 

ရဟန်းမင်းကြီးသည် ရီယိုမှပြန်လာပြီးနောက် ကက်သလစ် ဘာသာဝင် မိန်းမလျာများနှင့် တွေ့ဆုံခဲ့ကြောင်း The New York Times သတင်းတွင် ဖော်ပြထားသည်။ ပုပ်ဖရန်စစ်က မိန်းမလျာများနှင့် ပတ်သက်ပြီး -

“လူတစ်ယောက်ဟာ မိန်းမလျာဖြစ်နေပြီ၊ သူသည် ဘုရားသခင်ကိုလည်း ကောင်းမြတ်တဲ့စိတ်ထားနဲ့ ရှာနေပြီဆိုလျှင် သူ့ကို ကျွန်ုပ်သည် ဘာဆိုပြီး ဆုံးဖြတ်သတ်မှတ်ရန်မလို”ဟု မိန့်တော် မူခဲ့သည်။ ရဟန်းမင်းကြီး၏ သဘောထားမှတ်ချက်ကို မိန်းမလျာများနှင့် လိင်တူဆက်ဆံသူများက ကြိုဆို ထောက်ခံခဲ့ကြသည်။

၂၀၁၃ ခုနှစ် စက်တင်ဘာလကလည်း ပုပ်ရဟန်း မင်းကြီးသည် ဆီးရီးယားနိုင်ငံငြိမ်းချမ်းရေးအတွက် သူနှင့်အတူ ဆုတောင်းပွဲများ ကျင်းပရန် ဖိတ်ခေါ် ခဲ့ပါသည်။ စိန့်ပီတာရင်ပြင်တွင် စက်တင်ဘာ ၇ ရက်နေ့က ဆုတောင်းပွဲကို ကျင်းပခဲ့သည်။ လူပေါင်း သိန်းချီပြီး တက်ရောက် ဆုတောင်းခဲ့ကြသည်။ ပုပ်ရဟန်းမင်းကြီးက -

“လူတစ်ယောက်သည် မိမိတစ်ဦးတည်းသာ ရှိနေသည်ဟု သတ်မှတ်လျှင်၊ မိမိသာလျှင် အာဏာကို စိုးမိုးချုပ်ကိုင်ထားနိုင်သူဟု ထင်နေလျှင် အကြမ်းဖက်လိုသည့်တံခါးက ပွင့်သွားပြီး လူသားကို ဥပေက္ခာပြုခြင်း၊ ပဋိပက္ခ ပြုလိုခြင်းစိတ်များ ဖြစ်ပေါ်လာတတ်သည်”ဟု ပြောဆိုခဲ့သည်။ 

“ကိုယ်ကျိုးစီးပွားများကို နောက်မှာထားခဲ့ပါ။ အတ္တတရားတွေက နှလုံးသားကို မာကျောစေပါသည်။ ကိုယ်ချင်းစာတရားက ဆင်ခြင်တုံတရား ကင်းမဲ့မှုကို အနိုင်ယူနိုင်စွမ်း ရှိသည်။ ပွင့်လင်းစွာ ဆွေးနွေးပြီး ပြန်လည် ပေါင်းစည်းနိုင်ရေးကို ကြိုးစားပေးစေချင်ပါသည်”ဟုလည်း ငြိမ်းချမ်းရေးစကားကို ပြောကြားခဲ့သည်။ 

၂၀၁၁ ခုနှစ်က ပုပ်ရဟန်းမင်းကြီး ဖရန်စစ်၏ တရားတော်များကို မှတ်တမ်းအဖြစ် ထုတ်ဝေခဲ့သည်။ ထိုစာအုပ်ထဲတွင်လည်း တွေ့ဆုံဆွေးနွေးခြင်း သဘောတရားများကို ပြောပြထားချက်များမှာ စိတ်ဝင်စားစရာ ကောင်းလှသည်။

“တွေ့ဆုံဆွေးနွေးခြင်းဆိုသည်မှာ တစ်ဦးနှင့်တစ်ဦး အပြန်အလှန် လေးစားစိတ်မှ မွေးဖွားဖြစ်ပေါ်လာရန် လိုသည်။ သူ့ထံတွင်လည်း ကောင်းမွန်သည့် ပြောဆိုဆွေးနွေးစရာများ ရှိနေလိမ့်မည်ဆိုသည့် စိတ်မျိုးထားနိုင်ရမည်။ နှလုံးသား တစ်နေရာတွင် အခြားသူ တစ်ဦးတစ်ယောက်၏ အမြင်၊ စိတ်ကူး၊ အဆိုပြုလိုမှုများကို နေရာပေးနိုင်မှသာ တွေ့ဆုံဆွေးနွေး ရန်လိုသည်။ တွေ့ဆုံဆွေးနွေးမှုတွင် ကြိုတင်ပြစ်တင် ဝေဖန်စရာမလို။ ပြန်လည်ပြင်ဆင် ပြောင်းလဲပေးနိုင်ပါက ပြောင်းလဲပေးရမည်ဆိုသည့် စိတ်ထားမျိုးလိုသည်။ တွေ့ဆုံဆွေးနွေးမှုတွင် သူ့ကိုလည်း ပြောခွင့်ပေး၊ တံခါးလည်း ဖွင့်ပေး၊ လူသားဆန်သည့် နွေးထွေးမှုကိုလည်း ပေးရန် လိုအပ်သည်”

ပုပ်ရဟန်းမင်းကြီး ဖရန်စစ်သည် အိုဘားမားလက်ထက်တွင် အမေရိကန်နှင့် ကျူးဘားနှစ်နိုင်ငံကြား၌ ပြေလည်မှုများ ရရှိစေရန် စွမ်းဆောင်နိုင်ခဲ့သူလည်းဖြစ်သည်။ ၂၀၁၄ ခုနှစ် ဒီဇင်ဘာ ၁၇ ရက်နေ့တွင် ဘားရက် အိုဘားမားနှင့် ကျူးဘားသမ္မတ ရော ကက်စ်ထရိုတို့ ငြိမ်းချမ်းစွာ ပြန်လည် ဆက်ဆံနိုင်ရေးအတွက် နှစ်နိုင်ငံ လက်မှတ်ရေးထိုးမှုများ ပြုလုပ်နိုင်ခြင်းမှာ ပုပ်ရဟန်းမင်းကြီး၏ စွမ်းဆောင်ချက်များကြောင့်ဖြစ်သည်။

၂၀၁၄ ခုနှစ် ဒီဇင်ဘာ ၁၉ ရက်နေ့ထုတ် Los Angeles Times သတင်းစာကြီး၏ မျက်နှာဖုံးတွင် “ကျူးဘားနှင့် ဗာတီကန် တံတားထိုးပြီ” ဆိုသည့် သတင်းပါလာသည်။ ထိုသတင်းတွင် ကျူးဘားနိုင်ငံ၌ အမေရိကန် သမ္မတက တွေ့ဆုံဆွေးနွေးမှုများ ပြုနိုင်ရေးအတွက် ဖရန်စစ်၏ လုပ်ဆောင်ချက်များကို ဖော်ပြထားသည်။ သံခင်း တမန်ခင်းများကိုလည်း ကောင်းစွာ နားလည်လုပ်ဆောင်ခဲ့နိုင်သဖြင့် ထင်ရှားခဲ့ရသည်။ 

၂၀၁၅ ခုနှစ် မေလကလည်း ပုပ်ရဟန်းမင်းကြီးသည် ပါလက်စတိုင်းသမ္မတ မာမွတ်အက်ဘာ့စ်ကို ဗာတီကန်တွင် လက်ခံ တွေ့ဆုံခဲ့သည်။ ရဟန်းမင်းကြီးက အက်ဘာ့စ်ကို “ငြိမ်းချမ်းရေးနတ်သား”ဟု ချီးမွမ်းခဲ့ကြောင်း မီဒီယာများတွင် ထုတ်ဖော်ရေးခဲ့သည်။ သို့သော် ပုပ်ရဟန်းမင်းကြီး အမှန်ပြောသွားသည့် စကားမှာ -

“ငြိမ်းချမ်းရေး နတ်သားက စစ်ပွဲနတ်ဆိုးကို ဖျက်ဆီးနိုင်သည်။ သင့်ကို ကျွန်ုပ်သိပါသည်။ သင်သည် ငြိမ်းချမ်းရေး နတ်သားတစ်ပါး ဖြစ်နိုင်သည်”ဟူ၍ ဖြစ်သည်။ ပုပ်ရဟန်းမင်းကြီးသည် ပါလက်စတိုင်း နိုင်ငံဖြစ်မြောက်ရေးကို သဘောတူ လက်မှတ်ရေးထိုးခဲ့သည်။ ထို့ပြင် ဗာတီကန်အနေနှင့် အစ္စရေးနှင့် ပါလက်စတိုင်းတို့ကြားတွင် ငြိမ်းချမ်းစွာ တွေ့ဆုံဆွေးနွေးနိုင်လိမ့်မည်ဟု ယုံကြည်ကြောင်းလည်း ထုတ်ပြန်ခဲ့သည်။

ပုပ်ရဟန်းမင်းကြီးသည် ခေတ်မီသူတစ်ဦးဖြစ်ပြီး ဆိုရှယ်မီဒီယာဖြစ်သည့် Twitter ကို အသုံးပြုသည်။ သူ့ထံတွင် Follower ပေါင်း ၇ သန်းကျော်ရှိသည်။ စပိန်၊ အီတလီ၊ လက်တင် စကားများကို ကောင်းစွာ ပြောတတ်သည်။ အင်္ဂလိပ်စကားကို သိပ်ပြီး မပြောတတ်ဟုဆိုသည်။ ရဟန်းမင်းကြီး ဖြစ်သော်လည်း သမ္မာကျမ်းစာ တစ်မျိုးတည်း ဖတ်သူမဟုတ်။ အခြားဝတ္ထုများလည်း ဖတ်ဖူးကြောင်း သိရသည်။ 

လက်ရှိတွင် ပုပ်ရဟန်းမင်းကြီးသည် အာဂျင် တီးနား၊ အီတလီနှင့် ဗာတီကန်နိုင်ငံ သုံးနိုင်ငံ၏ နိုင်ငံသားအဖြစ် ခံယူထားသည်။ ရိုးသား ရှင်းလင်းစွာ နေထိုင်တတ်သဖြင့် ဗာတီကန်တွင် နေသော်လည်း အဆောင်အယောင်များနှင့် နေထိုင်ခြင်း မရှိ။ အဆောင်သေးသေး အိမ်သေးသေးလေးတွင်သာ အခန်းငယ်လေးနှင့်နေသည်။

ပိုပြီးကြည်ညိုဖွယ် ကောင်းသည်မှာ ကမ္ဘာ အရပ်ရပ်က လှူသည့် တန်ဖိုးကြီး မော်တော်ဆိုင်ကယ်များ၊ ကားများကို ပြန်ရောင်းပြီး ရရှိသည့် ငွေများအား ဆင်းရဲသား အိုးမဲ့အိမ်မဲ့များအတွက် လှူဒါန်းခြင်းဖြစ်သည်။

(Ref: BBC, Biography, The Guardian, The Fact Site)

  • VIA
  • TAGS