News

POST TYPE

EXTRA

ဘုဏ်းသိုက်နဲ့ တွေ့ဆုံခြင်း
03-Sep-2018 tagged as အနုပညာ

“ကျွန်တော့်စိတ်ကို ဝမ်းနည်းစေတဲ့ အိမ်ထောင်ရေးနဲ့ ပတ်သက်တာမျိုးတွေကို ကျွန်တော် မပြောချင်ဘူး”


သရုပ်ဆောင်ဘုဏ်းသိုက်နဲ့ တွေ့ဆုံပြီး ယခုလအတွင်းထုတ်လွှင့်ပြသမယ့် “နေရယ်၊ လရယ်၊ အမှန်တရားရယ်” ရုပ်သံဇာတ်လမ်းတွဲမှာ သရုပ်ဆောင်ထားတဲ့ ဇာတ်ကောင်စရိုက်အကြောင်း၊ ဥပဒေနဲ့ ပတ်သက်တဲ့ အကြောင်းအရာတွေနဲ့ အိမ်ထောင်ရေးအကြောင်းတို့ကို The Voice က မေးမြန်းဖော်ပြထားပါတယ်။ 

Voice : နေရယ်၊ လရယ်၊ အမှန်တရားရယ် ဇာတ်လမ်းတွဲမှာ ဘုဏ်းသိုက် သရုပ်ဆောင်ထားတဲ့ ကာရိုက်တာကို ပြောပြပေးပါဦး။
PT : ဒီဇာတ်လမ်းတွဲမှာ ကျွန်တော်က မဟုတ်မခံစိတ်ရှိတဲ့ ရှေ့နေတစ်ယောက်နေရာက သရုပ်ဆောင်ထားပါတယ်။ မဆုပန်ထွာနဲ့က ချစ်သူတွေပေါ့နော်။ ကျွန်တော်တို့က ရုပ်သံကနေလာတဲ့ ရုပ်ရုပ်တစ်ကား၊ ဇာတ်လမ်းတွဲတစ်ခုကိုကြည့်ရင် ဖျော်ဖြေရေးအတွက်ပဲ ကြည့်ကြတာပေါ့နော်။ ကိုယ်ကြည့်လိုက်တဲ့အချိန်မှာ အပြင်းတကယ်ပြေသွားရင်တန်တယ်။ အပြင်းလည်း မပြေဘူးဆိုရင်၊ ဥပမာ - ဟာသကားဖြစ်ပြီး မရယ်ရရင် မတန်ဘူးပေါ့။ ကိုယ်အပျင်းပြေကြည့်လိုက်ရင်းနဲ့  ကိုယ့်အတွက် Message တစ်ခုခုပါ ရသွားတယ်ဆိုရင် အချိန်ကုန်ရကျိုးနပ်တာပေါ့။ နေရယ်၊ လရယ်၊ အမှန်တရားရယ် ဇာတ်လမ်းတွဲမှာဆိုလည်း ဥပဒေနဲ့ ပတ်သက်တဲ့ အကြောင်းအရာတွေ အများကြီးထည့်ရိုက်ပြထားတယ်။ အားလုံးကြည့်သင့်တဲ့ ဇာတ်လမ်းတွဲပါ။ 

Voice : ဒီဇာတ်လမ်းတွဲမှာ ကိုယ်တိုင်ရော ဥပဒေအကြောင်းအရာတွေနဲ့ ပတ်သက်ပြီး ဘယ်လို ဗဟုသုတတွေ ရခဲ့လဲ။
PT : ကျွန်တော့်အတွက် မှတ်မှတ်ရရရှိခဲ့တာဆိုရင် စာချုပ်စာတမ်းကိစ္စတွေပေါ့နော်။ ကျွန်တော်တို့  မြန်မာ လူမျိုးတွေက အားနာတတ်တယ်လေ။ တစ်ခုခုဆို သေချာမဖတ်ကြည့်ဘဲနဲ့လက်မှတ်ထိုးပေးလိုက်တာတွေရှိတယ်။ စာချုပ်ဖတ်ကြည့်ရမှာကို အားနာသလိုလိုဖြစ်နေတာပေါ့နော်။ အမှန်ဆို ဘာမှ အားနာစရာမလိုပါဘူး။ ကိုယ့်ကို တစ်ဖက်လူက ပိုက်ဆံချေးတဲ့ကိစ္စပဲဖြစ်ဖြစ်၊ တစ်ခုခုအပေါင်ခံတာပဲဖြစ်ဖြစ် ကျွန်တော်တို့ စိတ်ထဲမှာ လက်မှတ်ထိုးရတာကို အရမ်းလွယ်တာပဲ။ အမှန်တော့ စာချုပ်တစ်ခုခုချုပ်မယ်ဆိုရင် ပြီးပြီးရော မထိုးလိုက်သင့်ဘူးဆိုတာလေးကို ဇာတ်လမ်းတွဲထဲမှာ ထည့်ရိုက်ပြထားတယ်။

Voice : ကိုယ်တိုင်ရော စာချုပ်စာတမ်းတွေနဲ့ အလုပ်လုပ်ရတဲ့ ကိစ္စမျိုးတွေမှာ ပေါ့လျော့ခဲ့တာမျိုးတွေရှိလား။
PT : ကျွန်တော်တို့ဆိုလည်း တစ်ခါတလေကျရင် စာချုပ်တစ်ခုခုချုပ်မယ်ဆိုရင် ဘာရယ်မဟုတ်ဘူး လက်မှတ်ထိုးပေးခဲ့တာတွေရှိတယ်။ စာချုပ်တော်တော်များများမှာ ကျွန်တော် လက်မှတ်ထိုးပေးလိုက်မိတာ မှားတယ်ပေါ့နော်။ ဘယ်စာချုပ်မဆို စာချုပ်ချုပ်ပြီဆိုကတည်းက ပုံမှန်ထက် အရေးကြီးတယ်လို့ သတ်မှတ်လို့သာ စာချုပ်,ချုပ်ကြတာကိုး။ ဘယ်စာချုပ်မှာမှ ကိုယ်တိုင်က သေသေချာချာထဲထဲဝင်ဝင်မသိဘဲ၊ စာချုပ်ရဲ့ အပြင်း၊ အပျော့ အလေးအနက်ကို ကိုယ်တိုင်သေချာမသိဘဲ ဘယ်တော့မှလက်မှတ်မထိုးပါနဲ့လို့ ပြောချင်ပါတယ်။

Voice : အရောင်းအဝယ်စာချုပ်တွေမှာ မှားယွင်းသွားရင် ငွေကြေးပဲဆုံးရှုံးတာလေ။ ဘဝနဲ့ဆိုင်တဲ့ စာချုပ်တွေမှာကျတော့ မှားယွင်းသွားရင်ဆုံးရှုံးမှုက ပိုကြီးမားမယ်ထင်တယ်။ ကိုယ်တိုင်ရော ချမ်းချမ်းကို ကွာရှင်းစာချုပ်မှာ လက်မှတ်ထိုးပေးလိုက်တာ နောင်တရလား။
PT : ဘဝနဲ့ဆိုင်တဲ့ စာချုပ်တွေမှာ ဥပမာ - လက်ထပ်စာချုပ်ပဲဖြစ်ဖြစ်၊ ကွာရှင်းစာချုပ်ပဲဖြစ်ဖြစ်၊ ဘယ်စာချုပ်မဆို သေချာမဖတ်ဘဲနဲ့ ဘယ်တော့မှ ပြီးပြီးရော လက်မှတ်မထိုးနဲ့ပေါ့။ အိမ်ထောင်ရေးအကြောင်းတွေ ပြောပြဖို့ကတော့ လောလောဆယ်မှာ ကျွန်တော့်အတွက် အဆင်မပြေသေးဘူး။ ကျွန်တော့်စိတ်ကို ဝမ်းနည်းစေတဲ့ အိမ်ထောင်ရေးနဲ့ ပတ်သက်တာမျိုးတွေကို ကျွန်တော်မပြောချင်ဘူး။ လက်ရှိမှာ ကျွန်တော့်ဘဝကို အဆင်ပြေပြေနေနိုင်အောင် ကြိုးစားနေရတာပေါ့နော်။ အရင်ကထက် ပိုပြီးတော့ ကျွန်တော်ယုံကြည်တဲ့အလုပ်တွေကို လုပ်ခွင့်ရတယ်။ အဲဒီအတွက်လည်း ကျွန်တော်အလုပ်တွေကို အကောင်းဆုံးလုပ်ပါတယ်။ 

Voice : ကိစ္စတစ်ခုကို ကိုယ့်ဘက်က မဖြေရှင်းတဲ့အခါမျိုးမှာ လူတွေက အမြင်အမျိုးမျိုးနဲ့ မြင်ကြတာမျိုးရှိတယ်လေ။ တစ်ခါတလေမှာ လူတွေ ကိုယ့်အပေါ် နားလည်အောင်ရှင်းပြချင်တာမျိုးရှိလား။
PT : ကျွန်တော်တို့တွေက တစ်ဖက်ဖက်မှာပဲ ရပ်ချင်ကြတာကိုး။ နိုင်ငံရေးနဲ့ ပတ်သက်ပြီး ပါတီကိစ္စပဲဖြစ်ဖြစ်ပေါ့။ ကျွန်တော်တို့က တစ်ခုမကောင်းဘူးဆို နောက်တစ်ခုကို ကောင်းတယ်လို့ သတ်မှတ်တယ်။ အမှန်တော့ နှစ်ခုလုံး ကောင်းနိုင်တာမျိုးရှိသလို၊ ချို့ယွင်းချက်တွေနဲ့ ဆိုတာမျိုးလည်း ဖြစ်နိုင်တာပဲလေ။ အိမ်ထောင်ရေးကိစ္စမှာကျတော့ ကျွန်တော့် စိတ်ခံစားချက်အမှန်ကို ရှင်းပြလိုက်ရင် လူတွေကလည်း တစ်ဖက်ဖက်မှာပဲ ရပ်ကြမှာလေ။ ကျွန်တော့်ကို အဆိုးမြင်တဲ့အမြင်နဲ့ ကြည့်ခံရတာကို ကျွန်တော်က အသားကျနေပါပြီ။ ကျွန်တော့်အပေါ်ကို အမြင်ရှင်းပြီး တခြားတစ်ဖက်ကို ချစ်တဲ့ခင်တဲ့ဟာ လျော့သွားမှာမျိုးကတော့ ကျွန်တော် ဘယ်တော့မှ လိုလားမှာလည်း မဟုတ်ဘူး။ ဒီအကြောင်းအရာနဲ့ ပတ်သက်ပြီး ဘယ်တော့မှ ဖြေမှာလည်း မဟုတ်ဘူး။

Voice : သမီးလေး မြမိုးဂင်္ဂါကိုရော ကိုယ့်ဘက်က ဘယ်လိုအချိန်ပေးပြီး ပြုစုစောင့်ရှောက်ဖြစ်လဲ။
PT : သမီးအတွက်ကတော့ ကျွန်တော် သီးသန့်အချိန်ပေးဖြစ်ပါတယ်။ သမီးနဲ့ ကျွန်တော်ကတော့ အမြဲတမ်းလည်း တွေ့ဖြစ်ပါတယ်။ ကျွန်တော်ရန်ကုန်မှာရှိတယ်ဆိုရင် တစ်ပတ်မှာငါးရက်လောက် သမီးက ကျွန်တော်နဲ့အတူရှိတယ်။ ကျွန်တော်ပဲ ရေမိုးချိုးပြီး ကျောင်းပို့ ကျောင်းကြိုလုပ်တယ်။ တကယ်လို့ သူ့မေမေက ကျွန်တော့်ထက်ပိုပြီးအားတယ်ဆိုရင် သူ့မေမေနဲ့ ပိုပြီးနေဖြစ်တယ်။ ကျွန်တော်တို့ နှစ်ယောက်လုံးကတော့ သမီးလေးအတွက် အချိန်တစ်ခုပေးပြီး သေချာစောင့်ရှောက်ကြပါတယ်။ 

သန့်ဇင်ဦး