News

POST TYPE

EXTRA

ငွေလဲနှုန်းအတက်အကျကြမ်းခြင်း စနစ်တကျထိန်းသိမ်းစီမံပေးရန် အစိုးရထံတင်ပြ
26-Aug-2018


ရန်ကုန်၊ ဩဂုတ် ၂၅

အချိန်တိုအတွင်း ငွေလဲနှုန်း အတက်အကျကြမ်းခြင်းများကို အစိုးရနှင့် ဗဟိုဘဏ်တို့အနေနှင့် စနစ်တကျ ထိန်းသိမ်းစီမံဆောင်ရွက်ပေးရမည့်အချက်များကို ကုန်သည်စက်မှုအသင်းချုပ်က အကြံပြုတင်ပြထားကြောင်း ယင်းအသင်းချုပ်ထံမှ သိရသည်။

ပြည်တွင်းတွင်ထုတ်လုပ်သည့် ကုန်ပစ္စည်းများကို ပြည်ပမှတင်သွင်းမှုအပေါ် အကောက်ခွန်စနစ်တို့ဖြင့် ထိန်းကွပ်ပေးရန်၊ နိုင်ငံခြားဘဏ်များ၏ Trade Financing လုပ်ငန်းများကို ပိုမိုကျယ်ပြန့်စွာဆောင်ရွက်ရေး စီစဉ်ပေးရန်၊ တရုတ်နိုင်ငံနှင့် ကုန်သွယ်မှုအတွက် ယွမ်ငွေသုံးခြင်း၊ ထိုင်းနိုင်ငံနှင့် ကုန်သွယ်မှုအတွက် ဘတ်ငွေသုံးခြင်း စသည့် ကုန်သွယ်ဖက်နိုင်ငံများနှင့် ညှိနှိုင်းဆောင်ရွက်ရန်၊ ပြည်တွင်းဘဏ်ငွေလဲလှယ်နှုန်းဈေးကွက်ဖွံ့ ဖြိုးရေးကို ဗဟိုဘဏ်က ဖော်ဆောင်ပေးရန် စသည့်အချက်များကို တင်ပြထားကြောင်း ကုန်သည်စက်မှုအသင်းချုပ်ထံမှ သိရသည်။

ဩဂုတ်လ ၂၄ ရက်နေ့က ပြုလုပ်သည့် ဒုတိယသမ္မတ (၁) ဦးဆောင်သည့် ပုဂ္ဂလိကကဏ္ဍ ဖွံ့ဖြိုးတိုးတက်ရေးကော်မတီနှင့် လုပ်ငန်းရှင်များ ပုံမှန်တွေ့ဆုံပွဲတွင် တင်ပြခဲ့ခြင်းဖြစ်သည်။

ထို့ပြင် ပို့ကုန်ရငွေ၏ ၄၀ ရာခိုင်နှုန်းခန့်သည် နယ်စပ်ကုန်သွယ်ရေးစခန်းများမှတစ်ဆင့် တင်ပို့ကုန်များဖြစ်၍ မြန်မာ့ဘဏ်များအတွင်း ပို့ကုန်ငွေဝင်ရောက်မှု နည်းပါးသောကြောင့် တရားဝင်ကုန်သွယ်မှုဖြစ်စေရေး သက်ဆိုင်ရာကုန်သွယ်ဖက်နိုင်ငံများနှင့် ဦးစားပေးညှိနှိုင်းရန်၊ နယ်စပ်ကုန်သွယ်မှုတွင် ဘဏ်များကိုတွင်ကျယ်စွာ အသုံးပြုရေးညှိနှိုင်းပေးရန်၊ ပြည်တွင်းတွင် ဒေါ်လာဖြင့် ငွေပေးချေမှုများအပေါ် တားမြစ်သည့်ညွှန်ကြားချက်များ ထပ်မံထုတ်ပြန်ပေးရန်နှင့် လိုက်နာရန်ပျက်ကွက်ပါက ဒဏ်ကြေး၊ ပြစ်မှု၊ ပြစ်ဒဏ်များ ထည့်သွင်းဖော်ပြရေးတို့ကို ထိရောက်စွာကိုင်တွယ်ဆောင်ရွက်ပေးရန် စသည့်အချက်များကို ထည့်သွင်းတင်ပြထားကြောင်း ကုန်သည်စက်မှုအသင်းချုပ်ထံမှ သိရသည်။ 

“ငွေလဲနှုန်းနဲ့ပတ်သက်ပြီး ညွှန်ကြားချက်တွေအရ အစည်းအဝေးတွေ အမြဲတမ်း၊ အမြဲတမ်းလုပ်နေတယ်။ ပစ်ထားတာ မဟုတ်ပါဘူး။ သို့သော် မပြောသင့်တဲ့ကိစ္စမို့လို့ မပြောဘဲနေတာ။ ဘာမှမလုပ်ဘဲနေသလားလို့တော့ မထင်လိုက်ပါနဲ့။ ကျွန်တော်တို့ ကြိတ်လုပ်နေတယ်ဆိုတာကိုတော့ လုပ်ဖော်ကိုင်ဖက်တွေကို အသိပေးချင်ပါတယ်”ဟု ယင်းတွေ့ဆုံပွဲတွင် စီမံကိန်းနှင့် ဘဏ္ဍာရေးဝန်ကြီးဌာန ပြည်ထောင်စုဝန်ကြီး ဦးစိုးဝင်းက ပြောကြားသည်။ 

လက်ရှိဖြစ်ပေါ်နေသည့် ငွေလဲနှုန်းများနှင့်ပတ်သက်၍ စီမံကိန်းနှင့် ဘဏ္ဍာရေးဝန်ကြီးဌာန၊ ဗဟိုဘဏ်၊ စီးပွားရေးနှင့် ကူးသန်းရောင်းဝယ်ရေးဝန်ကြီးဌာနမှ တာဝန်ရှိသူများ တစ်လလျှင် သုံးကြိမ်ခန့်အထိ တွေ့ဆုံ၍ ညှိနှိုင်းဆွေးနွေးမှုများ ပြုလုပ်လျက်ရှိကြောင်း ၎င်းက ပြောဆိုသည်။

ရင်းနှီးမြှုပ်နှံမှုကို မြန်မာနိုင်ငံ ရင်းနှီးမြှုပ်နှံမှုကော်မရှင်နှင့် ရင်းနှီးမြှုပ်နှံမှုနှင့် ကုမ္ပဏီများညွှန်ကြားမှုဦးစီးဌာနတို့က လွယ်ကူစွာ ခွင့်ပြုဆောင်ရွက်ပေးထားသော်လည်း လက်တွေ့တွင် အကောင်အထည် ဖော်ဆောင်ရွက်ရာ၌ မြေသုံးစွဲမှုအပါအဝင် အခက်အခဲများ ကြုံတွေ့နေရသဖြင့် လွယ်ကူလျင်မြန်စေရေး ဆောင်ရွက်ပေးရန်၊ ပြည်ပပို့ကုန်လုပ်ငန်းများအတွက် အကောက်ခွန်ဦးစီးဌာန၏ ဝန်ထမ်းအင်အား တိုးချဲ့ပေး၍ ပိတ်ရက်မရှိ ဝန်ဆောင်မှုပေးရန်နှင့် ပြည်ပမှချေးငွေစီးဝင်မှုများကို လျင်မြန်စွာ စိစစ်ခွင့်ပြုပေးရန် စသည့်အချက်များ ဆောင်ရွက်ပေးရေးတို့ကို ထည့်သွင်းတင်ပြထားကြောင်း ကုန်သည်စက်မှုအသင်းချုပ်ထံမှ သိရသည်။

J-11