News

POST TYPE

EXTRA

ကျန်းမာကြံ့ခိုင်သော နိုင်ငံသားများဖြစ်လာရန်အတွက် လုပ်ဆောင်ရမည့်အရာများ
20-Jun-2018


အလုပ်ကိစ္စတစ်ခုနဲ့ နယ်မြို့လေးတစ်မြို့ကို ခရီးထွက်ရင်း ခရီးလမ်းတစ်လျှောက်မှာ ဗိုက်အနည်းငယ်ဆာလာသောကြောင့် လမ်းမပေါ်ရှိ မုန့်ဆိုင်လေးတစ်ဆိုင်အတွင်းသို့ဝင်ပြီး အစာပြေမည့်မုန့်များကိုရွေးရင်း သတိထားကြည့်မိလိုက်တော့ မုန့်ထုပ်များပေါ်တွင် ရိုက်နှိပ်ဖော်ပြထားသော သက်တမ်းကုန်ဆုံးမည့်ရက်စွဲမှာ ကျော်လွန်နေသည်ကို တွေ့ရသည်။ ဈေးရောင်းနေသည့် အမျိုးသမီးငယ်လေးအား “မုန့်ထုပ်မှာ သက်တမ်းကျော်လွန်နေသောကြောင့် သက်တမ်းမကုန်သေးသော မုန့်ထုပ်ရှိလျှင် လဲလှယ်ချင်ကြောင်း ပြောပြတော့”အမျိုးသမီးငယ်လေးမှာ နားမလည်သောအကြည့်ဖြင့် ကျွန်တော့်ကို ပြန်ကြည့်နေသည်။ မုန့်ထုပ်ပေါ်မှာ ရိုက်နှိပ်ဖော်ပြထားသော သက်တမ်းကုန်ဆုံးမည့်ရက်စွဲကို ညွှန်ပြပြီး ထပ်မံမေးကြည့်တော့မှ သဘောပေါက်သွားဟန်ဖြင့် မရှိကြောင်း၊ မိမိတို့ဆိုင်တွင် လာရောက်ဝယ်ယူသည့် အခြားသူများမှာ ထိုကဲ့သို့ စစ်ဆေးလေ့မရှိဘဲ ဝယ်ယူလိုသည့် မုန့်ထုပ်ကိုသာ ချက်ချင်းဝယ်ယူကြကြောင်းပြောပြတော့ ကျွန်တော်လည်း ဘာမျှမပြောသာတော့ဘဲ အခြားတစ်မျိုးကိုသာ ရွေးချယ်ရတော့သည်။ ထိုကဲ့သို့ သက်တမ်းကုန်ဆုံးနေသောမုန့်များကို ရောင်းချနေခြင်းမှာ ထိုအမျိုး သမီးငယ်၏ အပြစ်တော့လည်း မဟုတ်ပေ။ ကျွန်တော်ကိုယ်တိုင်လည်း ငယ်စဉ်ကဆိုလျှင် အသိပညာကလည်းနည်းပါး၊ ပစ္စည်းများကိုလည်း ကိုယ်တိုင် ဝယ်ယူရခြင်း သိပ်မရှိခဲ့သောကြောင့် တစ်ခုခုဝယ်ယူချင်ပါက လိုချင်သည့်ပစ္စည်းကိုသာ ချက်ချင်းရွေးဝယ်ယူခဲ့သည်။ ကျွနု်ပ်တို့နိုင်ငံအတွင်း နေရာအတော်များများတွင် နေထိုင်သောသူများမှာ ယနေ့ထိတိုင် ကျန်းမာရေး အသိပညာ အလွန်နည်းပါးနေသေးသည်။ 

ကျွန်တော် သိကျွမ်းခဲ့ဖူးသော နိုင်ငံခြားတိုင်းပြည်များမှ မိတ်ဆွေများဆိုလျှင် ဈေးဝယ်အတူထွက်လို့ ပစ္စည်းတစ်ခုခုဝယ်ယူတော့မည်ဆိုလျှင် ထိုပစ္စည်း၏ သက်တမ်းကုန်ဆုံးရက်၊ ပါဝင်သည့်ပစ္စည်းများ၊ အာဟာရတန်ဖိုးနှင့် ထုတ်လုပ်သည့်အရင်းအမြစ် စသည့်အချက်အလက်များကို စစ်ဆေးပြီးမှသာ ဝယ်ယူလေ့ရှိသည်။

အစားအသောက်မဟုတ်သော အခြားလူသုံးကုန်ပစ္စည်းများကို ဝယ်ယူပြီးသောအခါ အရည်အသွေးနိမ့်ကျနေခြင်း၊ သက်တမ်းကျော်လွန်ခြင်းနှင့် အခြားသောပြဿနာများကြုံတွေ့ရပါက သုံးစွဲရာတွင် ရေရှည်မခံခြင်း၊ နောက်ထပ်အသစ်တစ်ခု ထပ်မံဝယ်ယူရခြင်းကြောင့် ငွေပိုကုန်ကျခြင်း စသည့်ပြဿနာများသာ ကြုံတွေ့ရနိုင်ပေမယ့် ကျွနု်ပ်တို့နေ့စဉ်စားသုံးနေသော အစားအသောက်များတွင် အာဟာရမပြည့်ဝခြင်း၊ သက်တမ်းကျော်လွန်နေခြင်း၊ ရောဂါပိုးများပေါက်ပွားနေခြင်း၊ လူကို ဘေးအန္တရာယ်ဖြစ်စေသော ဓာတုပစ္စည်းများနှင့် ဓာတုဆိုးဆေးများ ပါဝင်လာပါက ငွေပိုကုန်ကျခြင်းအပြင် စားသုံးသူများ၏ ကျန်းမာရေးအပေါ်တွင်ပါ ဆိုးကျိုးများ သက်ရောက်ခံစားလာရနိုင်သည်။

ကျွနု်ပ်တို့နိုင်ငံအတွင်းရှိ ကျေးလက်ဒေသများတွင် နေထိုင်သူများမှာ ကျန်းမာရေးနှင့် ပတ်သက်၍ အသိပညာများ ပိုမိုပြည့်ဝရန် လိုအပ်နေသေးသည်။ အချို့သောသူများမှာ အစားအသောက်များတွင်မှို များပေါက်နေသည်ကို တွေ့ရှိနေသော်လည်း လွှင့်ပစ်ရန်နှမြောနေသောကြောင့် မှိုပါသည့် အစိတ်အပိုင်းကို သာဖယ်ရှားပြီး စားသုံးလိုက်ကြသည်ကိုလည်း တွေ့ရသည်။ မျက်စိနှင့် မမြင်ရသော်လည်းမှိုများသည် ဖယ်ရှားလိုက်သောမုန့်၏ အစိတ်အပိုင်းအပြင် ကျန်ခဲ့သည့်အစိတ်အပိုင်းများတွင်ပါ ပြန့်ပွားပေါက်နေသည်။ အချို့သောအစားအသောက်များတွင် ပေါက်နေသောမှိုများမှာ စားသုံးလိုက်သော အစားအသောက်မှ တစ်ဆင့် လူကို ဘေးအန္တရာယ်ဖြစ်စေသည်။ ကျန်းမာရေးအတွက် သန့်ရှင်းလတ်ဆတ်သော အစားအစာများကို စားသောက်ရန်လည်း လိုအပ်သည်။

ယနေ့အချိန်အခါတွင် ခေတ်မီတိုးတက်လာနေသော နည်းပညာများကိုအသုံးချကာ လူသားများအားလုံးအတွက် ကောင်းကျိုးများစွာကို ပေးစွမ်းနိုင်သော ခေတ်မီအသုံးအဆောင်ပစ္စည်းများ၊ ဓာတုဆေးဝါးများနှင့် အစားအသောက်များကို တီထွင်ထုတ်လုပ်လာကြသည်။ သို့သော် အချို့သောသူများမှာ မိမိကိုယ်ကျိုး စီးပွားတစ်ခုတည်းကိုသာ အဓိကထားပြီး စားသုံးသူများ၏ ကျန်းမာရေးအပေါ် ဘေးထွက်ဆိုးကျိုးများ သက်ရောက်လာနိုင်သော ဓာတုပစ္စည်းများကို အစားအသောက်များတွင် တရားမဝင် ထည့်သွင်းအသုံးပြုလာခြင်းဖြင့် တီထွင်ထုတ်လုပ်လာခြင်းသည် စားသုံးသူများ၏ ကျန်းမာရေးကို အလေးမထားသည့်အပြင် တိုးတက်လာသောနည်းပညာများကို လွဲမှားစွာအသုံး ပြုလာခြင်းဖြစ်သည်။ စားသုံးသူများအပြင် ရောင်းချသူများပါ ကျန်းမာရေးအသိပညာ ပြည့်ဝနေရန် အလွန်လိုအပ်သည်။ ယခုနောက်ပိုင်းတွင် သားငါးများ၊ ဟင်းသီးဟင်းရွက်များနှင့် မီးဖိုချောင်အတွက် လိုအပ်သော ပစ္စည်းများကို ဝယ်ယူရရာတွင် ဘေးကင်းလုံခြုံ စိတ်ချရမှုမရှိတော့ဟု ခံစားနေရသလိုပင် ဖြစ်နေသည်။ မီးဖိုချောင်သုံး ဟင်းခတ်ပစ္စည်းများတွင် အရောင်အသွေး လှပနေစေရန် ဓာတုဆိုးဆေးများ အသုံးပြုလာခြင်း၊ သစ်သီးများတွင် ဓာတုဆေးများ ပက်ဖျန်းထားခြင်းနှင့် ဓာတုဆေးများအသုံးပြုခြင်းမှ ဟင်းသီးဟင်းရွက်များတွင် ဓာတုပစ္စည်းအကြွင်းအကျန်များ ပါရှိနေတတ်ခြင်းများကြောင့် စားသုံးသူများမှာ ကျန်းမာရေးအတွက် စိုးရိမ်စိတ်များစွာဖြင့် ဝယ်ယူစားသုံးနေရသည်။ ရောဂါတစ်ခုခုကို မိမိကိုယ်တိုင်က ပိုက်ဆံပေးဝယ်ယူနေမိသလို ဖြစ်နေမည်ကိုလည်း စိုးရိမ်လာရသည်။ ငွေကြေးတတ်နိုင်သောသူများအနေနှင့် ဘေးကင်းလုံခြုံစိတ်ချရသော အစားအသောက်များကို ရွေးချယ်ဝယ်ယူနိုင်ကြသော်လည်း ဆင်းရဲနွမ်းပါးသောသူများမှာ ဝင်ငွေကို ထည့်သွင်းတွက်ချက်နေရခြင်းနှင့် ကျန်းမာရေး ဗဟုသုတများနည်းပါးနေခြင်းကြောင့် လက်လှမ်းမီတာကိုပင် ဝယ်ယူစားသုံးနေကြသည်။ ကျေးလက်ဒေသများရှိ နိုင်ငံသားများအားလုံး၏ အတော်များများမှာ ကောင်းမွန်သောကျန်းမာရေးစောင့်ရှောက်မှု ရရှိဖို့ဆိုတာထက် ကျန်းမာရေးအသိပညာများ ပြည့်ဝနေဖို့ရန်ပင် အားနည်းနေဆဲဖြစ်သည်။ 

ကျွနု်ပ်တို့နိုင်ငံသည် ဖွံ့ဖြိုးဆဲနိုင်ငံဖြစ်ပြီး နိုင်ငံလူဦးရေ၏ ၃၂ ရာခိုင်နှုန်းမှာ ဆင်းရဲနွမ်းပါးသော အခြေအနေများတွင် အသက်ရှင်ရုန်းကန်နေရပြီး လူဦးရေ အားလုံး၏ ၆၃ ဒသမ ၃၅ ရာခိုင်နှုန်းမှာ ကျေးလက်ဒေသများတွင် နေထိုင်ကြသည်။ ၂၀၁၄ ခုနှစ် လူဦးရေနှင့် အိမ်အကြောင်းအရာ သန်းခေါင်စာရင်းအရ အိမ်ထောင်စုအားလုံး၏ သုံးပုံနှစ်ပုံသာ ကောင်းမွန်သော ရေအရင်းအမြစ်ကိုရရှိတယ်။ အထူးသဖြင့် ကျေးလက်ဒေသများတွင် နေထိုင်နေသောသူများမှာ သန့်ရှင်းသော ဘေးကင်းလုံခြုံသော သောက်သုံးရေကို မရရှိကြသေးပေ။ တစ်ကမ္ဘာလုံးကြုံတွေ့ရသော ဝမ်းလျှောရောဂါမှာ အများအားဖြင့် မသန့်ရှင်းသော သောက်သုံးရေကို သောက်သုံးမိခြင်းမှ ဖြစ်ပွားသည်။ ဝမ်းလျှောရောဂါကြောင့် ကလေးငယ်များသေဆုံးမှုနှုန်းမှာ အေအိုင်ဒီ အက်စ်၊ ဝက်သက်နှင့် ငှက်ဖျားရောဂါတို့ထက် ပိုမိုမြင့်မားသည်။ ထို့အပြင် ကျွနု်ပ်တို့နိုင်ငံမှာရှိသော အိမ်ထောင်စု အားလုံး၏ ၇၄ ဒသမ ၃ ရာခိုင်နှုန်းသာ ကောင်းမွန်သော မိလ္လာစနစ်ကို အသုံးပြုကြသည်။ ကျေးလက်နေ ပြည်သူများ၏ ၁၃ မီလီယံမှာ အိမ်သာ သို့မဟုတ် တွင်းအိမ်သာများ အသုံးမပြုကြသေးပေ။

ဆင်းရဲနွမ်းပါးခြင်းသည် ကျန်းမာရေးစောင့်ရှောက်မှု ကဏ္ဍအားနည်းနေရခြင်း၏ အဓိကအကြောင်းအရာများထဲမှ တစ်ခုဖြစ်သည့်အပြင် ကျန်းမာရေးစောင့်ရှောက်မှုအတွက် လိုအပ်သောအရာများကို လက်လှမ်းမီနိုင်ရန်အတွက်လည်း အဟန့်အတားဖြစ်စေသည်။ လူတိုင်းသည် အသက်ရှင်နေစဉ်အတောအတွင်း အနာရောဂါကင်းရှင်းစွာဖြင့် အသက်ရှည်စွာ နေထိုင်လိုကြသူများသာဖြစ်သည်။ ရောဂါတစ်ခု ခံစားလာရပါကလည်း ခေတ်မီစက်ပစ္စည်းများ၊ ဆေးဝါးများဖြင့် ကောင်းစွာကုသနိုင်သော ကျန်းမာရေးစောင့်ရှောက်မှုများကို အလိုရှိကြသည်။ သို့သော် ငွေကြေးသည် အဓိကအရာ ဖြစ်နေသည်။ အချို့သောသူများမှာ ကျေးလက်ဒေသများတွင် နေထိုင်ရစေကာမူ ကျန်းမာရေးစောင့်ရှောက်မှုများနှင့် ပတ်သက်၍ အသိပညာကြွယ်ဝကြသည်။ သို့သော် ဆင်းရဲနွမ်းပါးပြီး မိသားစုစားဝတ်နေရေးအတွက် ရုန်းကန်နေရသောကြောင့် ကျန်းမာရေးစောင့်ရှောက်မှုကို အဓိကထားပြီး မလိုက်နာနိုင်တော့ပေ။ ထို့အပြင် လမ်းပန်းဆက်သွယ်ရေးခက်ခဲသော နယ်ဒေသများတွင် နေထိုင်သူများမှာဆိုလျှင် မြို့ကြီးများတွင်သာ ကုသရနိုင်သောရောဂါများ ခံစားလာရပါက ငွေကြေးမတတ်နိုင်ကြသောကြောင့် သွားရောက်မကုနိုင်သူများစွာရှိနေသည်။ ချမ်းသာသောနိုင်ငံများတွင် နိုင်ငံအတွင်း နေရာဒေသမရွေး ကျန်းမာရေးစောင့်ရှောက်မှုနှင့် ပတ်သက်၍ သာတူညီမျှ တန်းတူအခွင်းအရေး ထားရှိနိုင်ကြသည်။

ဆင်းရဲနွမ်းပါးသောသူများမှာ ရောဂါတစ်ခုဖြစ်လာပါက ရောဂါရှာဖွေစမ်းသပ်ရန်၊ ဆရာဝန်နှင့် တိုင်ပင်ဆွေးနွေးရန်၊ လိုအပ်သောဆေးဝါးများ ဝယ်ယူရန်စသည့် ကုန်ကျမှုများပါ ထည့်သွင်းစဉ်းစားလာရတော့သည်။ ယခုနောက်ပိုင်းနှစ်များတွင် ကျွနု်ပ်တို့ နိုင်ငံအတွင်းရှိ ပြည်သူ့ဆေးရုံများတွင် လူနာများကို အခမဲ့ဆေးကုသပေးလာသည်ကို တွေ့ရှိရသည်။ ထို့အပြင် အချို့ မြို့များနှင့်ကျေးလက်ဒေသများတွင် ပရဟိတအဖွဲ့အစည်းများမှ ဆေးခန်းများဖွင့်လှစ်ကာ ဆင်းရဲနွမ်းပါးသောသူများကို အခမဲ့ကုသပေးလာသည်ကို တွေ့နေ ရသည်။ ထိုကဲ့သို့သောအခြေအနေများ တိုးတက်လာသော်လည်း ဆင်းရဲနွမ်းပါးသောသူများမှာ သွားလာရေးအတွက် ကုန်ကျစရိတ်နှင့် အခြားအမည်ဖော်ပြမရသော ကုန်ကျစရိတ်များကိုပါ တွက်ချက်ရသောကြောင့် လက်လှမ်းမမီကြသေးသူများ ရှိနေသည်။

ကျွနု်ပ်တို့လို ဖွံ့ဖြိုးဆဲနိုင်ငံများရှိ အခြေခံလူတန်းစားများမှာ အတော်အသင့် ဖျားနာလာမည်ဆိုပါက စားဝတ်နေရေးအတွက် ပုံမှန်ဝင်ငွေလျော့နည်းသွားမည်ကို စိုးရိမ်ရသောကြောင့် ကျန်းမာရေးကို အဓိကမထားနိုင်ဘဲ အလုပ်လုပ်ကြရသည့် မိသားစုကများသည်။ ထို့အပြင် ဆေးရုံတက်ရောက်ကုသရမည်ဆိုပါက မကျန်းမာသောသူကို မိသားစုရှိ အခြားသူတစ်ဦးဦးမှ လိုက်ပါစောင့်ရှောက်ရန် လိုအပ်လာသည်။ ထိုအခါမျိုးတွင် အလုပ်ပျက်ကွက်လာမည်ကိုပါ ထည့်သွင်း စဉ်းစားလာကြရပြီး စားဝတ်နေရေးအတွက်ပါ စိတ်ပူ လာကြရတော့မည်။

ထို့ကြောင့် ကျန်းမာရေးကဏ္ဍဖွံ့ဖြိုးတိုးတက် လာစေရန်အတွက် ဆင်းရဲနွမ်းပါးမှု လျှော့ချနိုင်ရေးသည်လည်း အဓိကထည့်သွင်းစဉ်းစားရမည့်အချက် ဖြစ်နေသည်။ ဆင်းရဲနွမ်းပါးသောသူများမှာ ကျန်းမာစွာအသက်ရှင်နေထိုင်ရန်အတွက် အာဟာရပြည့်ဝသော အစားအစာများ၊ ကျန်းမာရေး အထောက်အကူပြု အသုံးအဆောင်များနှင့် ဆေးဝါးများ၊ လစဉ် သို့မဟုတ် နှစ်စဉ်ရောဂါရှာဖွေစစ်ဆေးခြင်းများကို မပြုလုပ်နိုင်ကြပေ။

လူတစ်ယောက် အလုပ်တစ်ခုလုပ်သောအခါ အလုပ်ပြီးမြောက်နိုင်စွမ်းအားမှာ အကြောင်းအရာ များစွာအပေါ်မူတည်နေသော်လည်း အာဟာရပြည့်ဝ သောအစားအစာများ ရရှိနိုင်မှုနှင့် ကျန်းမာရေးကောင်းမွန်မှုဟာ အရေးကြီးသော အစိတ်အပိုင်းများအဖြစ် ပါဝင်နေပေသည်။ ကျန်းမာရေးကောင်းမွန်ပြီး အာဟာရပြည့်ဝသော အစားအစာများကို ရရှိစေခြင်းသည် လူတစ်ယောက်၏ ကိုယ်ခန္ဓာကြံ့ခိုင်ရေးကို ပိုမိုအားကောင်းစေခြင်း၊ စွမ်းရည်များပြည့်ဝနေခြင်း၊ အလုပ်အပေါ်မှာ အာရုံစူးစိုက်နိုင်မှု အားကောင်းလာစေသည်။ အရည်အသွေးများ အားကောင်းလာစေခြင်းတို့ကြောင့် လုပ်ငန်းခွင်မှာလည်း ပိုမိုထိရောက်စွာလုပ်နိုင်ပြီး ကုန်ထုတ်စွမ်းအားများလည်း မြင့်တက်လာမည်ဖြစ်ပေသည်။ 

ကျန်းမာရေးစောင့်ရှောက်မှုကဏ္ဍ တိုးတက်လာရန်အတွက် ဆင်းရဲနွမ်းပါးမှု လျှော့ချနိုင်ရေးအပြင် ကျန်းမာရေးဆိုင်ရာ သတင်းအချက်အလက်များကို နိုင်ငံအတွင်းရှိ ပြည်သူများအားလုံး အချိန်နှင့်တစ်ပြေးညီ သိရှိနိုင်အောင် ဖြန့်ဝေပညာပေးနိုင်ရန်မှာလည်း အလွန်အရေးကြီးသည်။ ကျန်းမာစွာ အသက်ရှင်နေထိုင်နိုင်ရန်အတွက် လိုက်နာသင့်သော အလေ့အကျင့်ကောင်းများကို ပြည်သူများအားလုံး သိရှိအောင် သတင်းအချက်အလက်များ ဖြန့်ဝေပေးရန်လည်း လိုအပ်သည်။ ရောဂါတစ်ခုခု ကူးစက်ပြန့်ပွားလာပါကလည်း အချိန်နှင့်တစ်ပြေးညီသိရှိနိုင်ပြီး လိုက်နာရမည့်အချက်များနှင့် ကြိုတင်ကာကွယ်ရမည့်အချက်များကို ရေဒီယို၊ တီဗီ၊ မီဒီယာများတစ်ဆင့် ဖြန့်ဝေအကြံပြုနေခြင်းသည်လည်း နိုင်ငံသားများ၏ ကျန်းမာရေးစောင့်ရှောက်မှုကဏ္ဍ တိုးတက်လာရန်အတွက် များစွာအထောက်အကူပြုသည်။ ထို့အပြင် ကျန်းမာရေးစောင့်ရှောက်မှု အားနည်းနေသော နေရာများတွင် နေထိုင်နေသောသူများမှလည်း မိမိတို့၏ လိုအပ်ချက်များကို ရှင်းလင်းစွာသိရှိကြရန် လိုအပ်သည်။

ကျန်းမာရေးကဏ္ဍဖွံ့ဖြိုးတိုးတက်မှသာလျှင် နိုင်ငံသားအားလုံးမှာလည်း ကျန်းမာကြံ့ခိုင်ပြီး နိုင်ငံဖွံ့ဖြိုးတိုးတက်ရေးလုပ်ငန်းများကို စိတ်ရောကိုယ်ပါ အားတက်သရော ပါဝင်ဆောင်ရွက်နိုင်ကြမည်။ ထို့အပြင် ကျန်းမာသန်စွမ်းသော အနာဂတ်ခေါင်းဆောင်ကောင်းများ မွေးထုတ်နိုင်မည်ဖြစ်သည်။ အထူးသဖြင့် ဆင်းရဲနွမ်းပါးပြီး ကျန်းမာရေးစောင့်ရှောက်မှုကဏ္ဍတွင် အားနည်းနေသော နေရာဒေသများနှင့် ဝေးလံခေါင်သီပြီး လမ်းပန်းဆက်သွယ်ရေးခက်ခဲသောကြောင့် ကောင်းမွန်သော ကျန်းမာရေးစောင့်ရှောက်မှုရရှိရန် အလှမ်းကွာဝေးနေသော နေရာဒေသများကို အထူးအလေးပေး ဆောင်ရွက်သင့်ပါသည်။

နိုင်ငံဖွံ့ဖြိုးတိုးတက်ရေးအတွက် ကျန်းမာသန်စွမ်းသောနိုင်ငံသား၏ စွမ်းအားများ များစွာလိုအပ်သောကြောင့် ကျန်းမာရေးစောင့်ရှောက်မှုကဏ္ဍဖွံ့ဖြိုး တိုးတက်ခြင်းအပြင် နိုင်ငံသားအားလုံး၏ ကျန်းမာရေး အသိပညာများပြည့်ဝနေအောင် ဆောင်ရွက်ရန်လည်း လိုအပ်သည်။ ထိုကဲ့သို့ဆောင်ရွက်ရန်အတွက် နိုင်ငံတော်နှင့်အတူ၊ သက်ဆိုင်ရာဌာနများ၊ ပုဂ္ဂလိကအဖွဲ့အစည်းများနှင့် နိုင်ငံသားအားလုံးမှ ပူးပေါင်းလုပ်ဆောင်ရန် လိုအပ်သည်။ ထို့ထက်ပိုအရေးကြီးသည်မှာ စားသောက်ကုန်များနှင့် ဆေးဝါးများကို ရောင်းချသောသူများမှ ကျန်းမာရေးအသိပညာများ ပြည့်ဝနေရန် လိုအပ်သလို စားသုံးသူများမှလည်း ပြည့်ဝနေရန်လိုအပ်သည်။ ထိုကဲ့သို့ လုပ်ဆောင်ခြင်းနှင့်အတူ ဆင်းရဲနွမ်းပါးမှုကို လျှော့ချနိုင်ရေးလုပ်ငန်းများကိုလည်း ပိုမိုလုပ်ဆောင်ရမည်။ မိသားစုဝင်ငွေတိုးလာအောင်ဆောင်ရွက်ပေးခြင်းနှင့် ဆင်းရဲနွမ်းပါးမှုကို လျှော့ချနိုင်အောင်ဆောင် ရွက်နိုင်မည်ဆိုပါက အိမ်ထောင်စုများကို ပိုမိုအာဟာရပြည့်ဝသော အစာအာဟာရများကို စားသုံးနိုင်စေပြီး ကျန်းမာရေးစောင့်ရှောက်မှုများကိုလည်း ပိုမိုလိုက်နာဆောင်ရွက်နိုင်ကြပေမည်ဟု မျှော်လင့်မိသည်။

ဒေါက်တာကိုကိုလတ် (ဇီဝနည်းပညာ)

Ref: Poverty and Health, The 2014 Myanmar Population and Housing Census:
Thematic report on Housing Conditions and Household Amenities- Census Report Volme 4-I (August 2017)