News

POST TYPE

EXTRA

သင်မက်ဆေ့ချ်ပို့တာကို နောက်ကွယ်က စောင့်ကြည့်နေတယ်လို့ ခံစားရဖူးသလား
31-May-2018
အသုံးပြုသူများ၏ ကိုယ်ရေးကိုယ်တာ အချက်အလက်များ ကိုင်တွယ်ထိန်းသိမ်းခြင်း ကိစ္စနှင့်ပတ်သက်ပြီး အငြင်းပွားဖွယ်ရာကိစ္စရပ်များ မကြာသေးမီ ရက်သတ္တပတ်များတွင် ဖြစ်ပွားခဲ့သည်။ သုံးစွဲသူများကိုယ်တိုင် ဖြည့်စွက်ထားသော ကိုယ်ရေးအချက်အလက်များမှာ အင်တာနက်အခြေပြု အဖွဲ့အစည်းကြီးများအတွက် အဓိကကျ အရေးပါလှသည်။ ထိုအချက်အလက်များကို ဝယ်ယူစရာပင် မလိုအပ်ဘဲ အသုံးပြုသူများမှ အခမဲ့ပေးအပ်ထားခြင်းဖြစ်သည်။ လူမှုကွန်ရက်နှင့် စာတိုပေးပို့မှုစနစ်များ ပေါ်ပေါက်လာသည်မှာ အသုံးပြုသူများ၏ နေ့စဉ်ဘဝ ကိုယ်ရေးကိုယ်တာ ကိစ္စရပ်များကို နည်းလမ်းမျိုးစုံအသုံးပြု၍ မျှဝေရန်အတွက် ဖြစ်သည်။ Terms of Service ဟုခေါ်သည့် ဝန်ဆောင်မှု အသုံးပြုခြင်းဆိုင်ရာ စည်းမျဉ်းစည်းကမ်းအများစုတွင် အသုံးပြုသူများက ကိုယ်ရေးကိုယ်တာ သတင်းအချက်အလက်များကို Post တင်ခြင်း၊ မျှဝေခြင်းနှင့်ပတ်သက်၍ ကိုယ်တိုင်ထိန်းချုပ်နိုင်စွမ်းရှိသည်ဟု ဆိုသည်။ သို့သော်လည်း ယခုအချိန်တွင် ထိုဝန်ဆောင်မှုပေးနေသူများက အချက်အလက်များကို ထိန်းချုပ်နေပြီး လိုရာတွင် အသုံးချနေကြောင်း သိသာထင်ရှားလာပြီး နောက်ဆက်တွဲအနေနှင့် မဖြစ်သင့်သော ပေါက်ကြားမှုများ ဖြစ်ပေါ်လာနိုင်ပြီး အသုံးပြုသူများမှာ တိမ်တိုက်မည်းကြီး လွှမ်းခြုံထားသလို ခံစားနေရသည်။

ထိုလူမှုကွန်ရက်များသည် အဖိုးတန်လှသော မိသားစု၊ သူငယ်ချင်းများနှင့် ပတ်သက်သော အမှတ်တရများ သတင်းအချက်အလက်များ စုစည်းထားသော နေရာတစ်ခုဖြစ်သည်။ သို့သော်လည်း ထိုအမှတ်တရများ သတင်းအချက်အလက်များသည် တစ်ခါတစ်ရံတွင် မိမိသိလိုက်ခြင်းမရှိဘဲ အခြား Third Party အဖွဲ့အစည်းများဆီသို့ မျှဝေခြင်းခံနေရသည်။ သင့်အနေနှင့် သင့်မိတ်ဆွေဆီသို့ ယနေ့ည ပီဇာသွားစားရအောင်ဟု စာတိုပေးပို့ပြီးသောအခါ သင်၏ Facebook Newsfeed တွင် ပီဇာနှင့် ပတ်သက်သော ကြော်ငြာများ တွေ့ရသည်မှာ တိုက်ဆိုင်မှု မဟုတ်ဘဲ စီးပွားရေးကြော်ငြာအတွက် အသုံးပြုနေခြင်းဖြစ်သည်။ အချို့မှာ အသုံးပြုသူများအတွက် သူတို့စိတ်ဝင်စားနိုင်သော အကြောင်းအရာများကို ဖော်ပြပေးခြင်းသာဖြစ်သည်ဟု ဆိုသော်လည်း အမှန်မှာ လူမှုကွန်ရက်မှ သင်၏ မက်ဆေ့ချ်များကို ဖတ်ရှုပြီး စီးပွားရှာခြင်းသာဖြစ်သည်။ 

မှန်ကန်သော စာတိုပေးပို့မှု အက်ပလီကေးရှင်း ရွေးချယ်မှုသည် မှန်ကန်သော လက်တွဲဖော် ရွေးချယ်မှုသကဲ့သို့ အရေးပါပါသည်။ အကြောင်းအရင်းမှာ သင်နှင့်သင်၏ မိုဘိုင်းလ် စာတိုပေးပို့မှု အက်ပလီကေးရှင်းသည် သင်နှင့်အတူ အချိန်တိုင်းလိုလို ထိတွေ့ကာ သင့်ဘဝအတွက် အရေးပါသောသူများနှင့် ဆက်သွယ်နေမည်ဖြစ်သောကြောင့် ဖြစ်သည်။ ထို့ကြောင့် အချက်အလက်များ လုံခြုံစိတ်ချနိုင်ရန်အတွက် သင်အသုံးပြုသော အက်ပလီကေးရှင်းသည် သင့်အနေနှင့် သင်၏ ကိုယ်ရေးကိုယ်တာ အချက်အလက်များကို ပိုက်ဆံအများဆုံးပေးသည့်သူထံ မပေးအပ်သွားဖို့ ယုံကြည်မှုအပြည့်ရှိရန် လိုအပ်ပါသည်။

End-to-end Encryption သည် အသုံးများသည့် နည်းပညာအခေါ်အဝေါ် တစ်ခုဖြစ်သော်လည်း နားလည်ရန် မခက်ခဲသော အသုံးအနှုန်းဖြစ်သည်။ အဓိပ္ပာယ်မှာ သင်ပို့လိုက်သော စာတို၊ ဓာတ်ပုံ၊ ဗီဒီယို၊ အသံဖိုင်နှင့် ဗီဒီယိုဖုန်း ခေါ်ဆိုမှုများကို သင့်ဖုန်းမှ ပြုလုပ်လိုက်သည်နှင့် တစ်ပြိုင်နက် အချက်အလက်များကို လက်ခံသူထံသို့ မရောက်ရှိမီ ကြားမှကြည့်ရှု၍ မရအောင် ှScrambled သို့မဟုတ် Hashed ပြုလုပ်ပြီး ပေးပို့သောစနစ်ဖြစ်သည်။ ထိုအချက်အလက်များကို ပေးပို့နေသော အက်ပလီကေးရှင်း၏ ဆာဗာအပါအဝင် ကြားမှမည်သူမှ ဝင်ရောက်ဖတ်ရှုနိုင်မည် မဟုတ်ပါ။ သတင်းအချက်အလက်များ လက်ခံသူထံသို့ ရောက်ရှိသွားသည်နှင့်တစ်ပြိုင်နက် အချက်အလက်များကို ဗဟိုဆာဗာထဲတွင် သိမ်းဆည်းထားခြင်း ရှိတော့မည်မဟုတ်ပါ။ အကယ်၍ သတင်းအချက်အလက်များ လက်ခံသူထံ ရောက်ရှိရန် အချိန်ကြာမြင့်နေပါက Scrambled ပြုလုပ်ထားသော အချက်အလက်ကို အချိန်အတိုင်းအတာတစ်ခုထိသာ သိမ်းဆည်းထားပေးမည်ဖြစ်ပြီး လက်ခံသူမှရရှိသည်နှင့် တစ်ပြိုင်နက် ဆာဗာမှပျောက်ကွယ်သွားမည် ဖြစ်သည်။ လက်ခံသူ၏ စက်၌သာ ပေးပို့သူ၏ Scrambled ကုဒ်ကို ဖြေ (ဖြည်) နိုင်သည့် Key ပါရှိပြီး လက်ခံသူမှအပ အခြားမည်သူမှ ထိုကုဒ်ကို ဖြေ (ဖြည်) နိုင်မည်မဟုတ်ပါ။

မက်ဆေ့ချ်ပေးပို့သော ဝန်ဆောင်မှုပေးသည့် အက်ပလီကေးရှင်းအများစုကို Login Password ဟုဆိုသည့် စကားဝှက်ဖြင့် ဝင်ရောက်အသုံးပြုနိုင်သည်။ ထိုသို့ အသုံးပြုနိုင်ရန်အတွက် မက်ဆေ့ချ်များကို ဗဟိုဆာဗာတွင် Decrypt ပြုလုပ်ထားသည့် မက်ဆေ့ချ်များအတိုင်း သိမ်းဆည်းထားရသည်။ ထို့ကြောင့် end-to-end encryption ကို အသုံးပြု၍ မရဘဲသင့် Privacy မှာ အန္တရာယ်ရှိသည့် အခြေအနေတွင် ဖြစ်နေသည်။ သင်ပေးပို့ထားသော မက်ဆေ့ချ်များသည် သူငယ်ချင်းနှင့် မိသားစုများကြားတွင် မျှဝေထားသည့်အပြင် ကြော်ငြာလုပ်ငန်းအတွက် ဖတ်ရှု အသုံးပြုနိုင်သည့် မက်ဆေ့ချ်များ ဖြစ်သွားသည်။ ထို့အပြင် အခြား Third Party များကိုလည်း မျှဝေခြင်း ပြုလုပ်သွားနိုင်သည့်အပြင် Hack လုပ်ခြင်းကိုလည်း ခံရနိုင်သည့် အခြေအနေ ဖြစ်သွားသည်။

ယခုခေတ်၏ လုံခြုံရေးအန္တရာယ်မြင့်မားသော ပတ်ဝန်းကျင်တွင် အသုံးပြုသူ၏ ကိုယ်ရေးကိုယ်တာ အချက်အလက်များ အရေးပါမှု၊ သတင်းအချက်အလက်များ မျှဝေရန်မလိုပဲ ဘေးကင်းလုံခြုံစွာ အသုံးပြုနိုင်မှုတို့ကို အလေးပေးသည့်စနစ်များ လိုအပ်သည်။ ထို အက်ပလီကေးရှင်းများက အသုံးပြုသူတို့ ပေးပို့သည့်စာတိုများကို ဝင်ရောက်ဖတ်ရှု၍ မရရန် အရေးကြီးသည်။ ထို လုံခြုံရေးအစီအမံများတွင်လည်း အသုံးပြုသူက Encryption ကို အသုံးပြုနိုင်ရန် အဆုံးမရှိသည့် Setting များကို ဝင်၍ပြောင်းရန်မလိုဘဲ အလိုအလျောက်ဖြစ်နေသင့်သည်။ ကိုယ်ရေးကိုယ်တာနှင့် လုံခြုံရေးသည် Default Mode နှင့် ဖြစ်သင့်သည်။ ပါဝင်သောအချက်အလက်များကို ဖော်ပြခြင်းသည် အသုံးပြုသူက မည်သည့်အကြောင်းကြောင့် မည်သူ့ကို Share ကြောင်း သိနားလည်၍ ရွေးချယ်ခြင်းဖြစ်သင့်သည်။

နေ့တိုင်း၊ မိနစ်တိုင်း အသုံးပြုနှုန်းမှာ နှစ်စဉ် မြင့်တက်လာသည့်အတိုင်း အချက်အလက်ပိုင်ဆိုင်မှုနှင့် လုံခြုံရေးတို့တွင်လည်း အကာအကွယ်ပေးမှု မြင့်တက်လာသင့်ပေသည်။ Privacy ကို မြတ်နိုးသူများအနေနှင့်လည်း အပြောထက် အလုပ်ဖြင့် သက်သေပြကာ end-to-end encryption ကို Default နှင့်ထားပြီး အက်ပလီကေးရှင်းများကို အသုံးပြုကြရန် လိုအပ်သည်။ ဤအချက်ဖြင့် သင်သည် Privacy ဖြင့် အသုံးပြုနေသူလား၊ Privacy ကို အသုံးပြုခြင်း ခံနေရသူလား ဆိုသည်ကို ခွဲခြားသိရှိနိုင်မည်ဖြစ်သည်။