News

POST TYPE

ENVIRONMENT

မြန်မာနိုင်ငံ အနောက်ဘက်ခြမ်းဒေသ အင်အားပြင်း မြေငလျင်ကြီး အန္တရာယ်ရှိဟုဆို
03-Aug-2016

ရန်ကုန်၊ သြဂုတ် ၃

အိန္ဒိယမြေထုချပ်သည် မြန်မာနိုင်ငံ မြေထုချပ်အောက်ကို တွန်းဝင်နေပြီး လှုပ်ရှားမှု အင်အား ပြင်းထန်နေသည့် ပြတ်ရွေ့ အရှိန်ကြောင့် မြန်မာနိုင်ငံ အနောက်ဘက်ခြမ်း ဒေသများသည် အင်အားပြင်း မြေငလျင်ကြီး အန္တရာယ်ရှိနေကြောင်း  မြန်မာနိုင်ငံ မြေငလျင်ကော်မတီမှ Senior Researcher ဒေါ်လှလှအောင်က ပြောကြားသည်။

မြန်မာနိုင်ငံ အနောက်ဘက်ခြမ်း ဒေသများဖြစ်သည့် ချင်းတောင်တန်းနှင့် နာဂတောင်တန်းဒေသသည် သုတေသနပြု လေ့လာချက်များအရ India Plate(အိန္ဒိယ မြေထုချပ်)နှင့် Burma Plate (မြန်မာမြေထုချပ်) နှစ်ခုသည် ထိပ်တိုက် တွေ့ဆုံနေပြီး India Plate မှာ တွန်းကန်မှု တန့်သွားကာ အရွေ့အင်အား စုစည်းနေသည်မှာ နှစ်ပေါင်း ၄၀၀ ကြာမြင့်ခဲ့သည့်အတွက် အင်အား ရစ်ခ်ျစတာစကေး ၉ အဆင့်ရှိသည့် အင်အားပြင်း မြေငလျင်ကြီးများ လှုပ်ခတ်နိုင်ခြေရှိကြောင်း ၎င်းက ပြောဆိုသည်။

“ဒီငလျင်က မြန်မာနိုင်ငံမှာ မလှုပ်ဘူးလို့လည်း မပြောနိုင်ဘူး။ အကယ်၍ လှုပ်လာခဲ့ရင်လည်း ဘယ်လိုလုပ်ကြမလဲ ဒါကို ကြိုတင်ပြင်ဆင်ဖို့ လိုပါတယ်”ဟု ဒေါ်လှလှအောင်က ဆိုသည်။

ယင်းသို့ အိန္ဒိယ မြေထုချပ်မှာ မြန်မာနိုင်ငံဘက်သို့ တွန်းတိုက် ရွေ့လျားနေသည့်အတွက် မြေငလျင်တိုင်းစက်များကို အိန္ဒိယ - မြန်မာ နယ်စပ်နှင့် စစ်ကိုင်း - မန္တလေးမြို့များကိုဖြတ်၍ ကျောက်မဲနှင့် သီပေါမြို့တို့တွင် တပ်ဆင်မည်ဖြစ်ပြီး ယင်းစက်မှ လှုပ်ခတ်နေသည့် မြေငလျင်များပေါ် မူတည်ကာ မြေထုချပ်၏ ရွေ့လျားတွန်းတိုက်မှု၊ ပြင်းအား ပမာဏနှင့် အင်အားပြင်း မြေငလျင် လှုပ်ခတ်နိုင်သည့် အခြေအနေတို့ကို လေ့လာမည်ဖြစ်ကြောင်း မြန်မာနိုင်ငံ မြေငလျင်ကော်မတီ အတွင်းရေးမှူး ဒေါက်တာမျိုးသန့်က ပြောကြားသည်။

အလားတူ စစ်ကိုင်းပြတ်ရွေ့ကြောမှ အင်အားပြင်း မြေငလျင် လှုပ်ခတ်ခဲ့သည်မှာ နှစ်ပေါင်း ၈၀ ကျော်ရှိပြီဖြစ်ပြီး နေပြည်တော်၊ မန္တလေး၊ စစ်ကိုင်း၊ မိထ္ထီလာ၊ ဝန်းသို၊ ဖြူး၊ ဆွာနှင့် ပဲခူးမြို့ အပါအဝင် မြို့ကြီးများမှာ အင်အားပြင်း မြေငလျင် အန္တရာယ်ရှိနေကြောင်း မြေငလျင် ကျွမ်းကျင် ပညာရှင်များက သတိပေး ပြောဆိုထားသည်။

ဆူမာတြားကျွန်း၊ ကပ္ပလီပင်လယ်ပြင် ရခိုင်ကမ်းရိုးတန်း အနီးမှာ ရှိနေသည့်ပြတ်ရွေ့မှလည်း အင်အားပြင် မြေငလျင်များ လှုပ်ခတ်ခဲ့ဖူးကြောင်း၊ ယခု India Plate ၏ တွန်းကန်နေမှုကို မြေအောက်ကျောက်များ ခံနိုင်ရည် မရှိဘဲ ချော်ထွက်သွားပါက ငလျင်ကြီး လှုပ်ခတ်နိုင်ပြီး ဘင်္ဂလားဒေ့ရ်ှနှင့် ဘင်္ဂလား ပင်လယ်အော်အတွင်း ၂၃ ကီလိုမီတာ အထူ ကျဆင်းနေသည့် နုန်းအနည်များကိုဖြတ်၍ ငလျင်လှိုင်းများ ရိုက်ခတ်ခဲ့ပါက အင်အား ပြင်းထန်နိုင်ကြောင်း နိုင်ငံတကာ မြေငလျင် ကျွမ်းကျင် ပညာရှင်များ၏ သုတေသနပြု လေ့လာထားချက်များကို ကိုးကား၍ ဒေါ်လှလှအောင်က ရှင်းပြ ပြောဆိုသည်။

မြန်မာနိုင်ငံရှိပြတ်ရွေ့များထဲတွင် ကဘော်နှင့် ကျောက်ကြမ်းပြတ်ရွေ့ကဲ့သို့ ထိခိုက်ပျက်စီးဆုံးရှုံးမှုများနိုင်သည့်   စစ်ကိုင်းပြတ်ရွေ့သည် ကီလိုမီတာတစ်ထောင်ခန့်အရှည်ရှိပြီး ကချင်ပြည်နယ်မြောက်ပိုင်း ပူတာအိုမြို့နှင့် မြစ်ကြီးနားမြို့မှ ဧရာဝတီမြစ်ကြောင်းအတိုင်း ခရမ်း၊ သုံးခွနှင့် ပဲခူးရိုးမအရှေ့ဘက်ခြမ်းမှ မုတ္တမပင်လယ်ကွေ့ဘက်သို့ ဖြတ်သန်းသွားကြောင်း မြန်မာနိုင်ငံမြေငလျင်ကော်မတီ၏ မှတ်တမ်းများအရ သိရသည်။

ဓာတ်ပုံ - Myanmar Earthquake Committee

  • VIA