News

POST TYPE

ENTERTAINMENT

ဘဝမှာ ဖုံးကွယ်ပြီး လုပ်ခဲ့တာ တစ်ခုမှ မရှိပါဘူးဆိုတဲ့ ဝိုင်းစုခိုင်သိန်း
09-Jan-2017 tagged as သရုပ်ဆောင်

ရန်ကုန်၊ ဇန်နဝါရီ ၈

နာမည်ကျော် တေးသံရှင်နဲ့ သရုပ်ဆောင်တစ်ဦးဖြစ်တဲ့ ဝိုင်းစုခိုင်သိန်းက ဘဝမှာ ဖြတ်သန်းခဲ့တဲ့ ကာလတစ်လျှောက်မှာ ဖုံးကွယ်ပြီး လုပ်ခဲ့တာ တစ်ခုမှ မရှိပါဘူးလို့ The Voice ကို ပြောကြားပါတယ်။

“ကိုယ့်ကိုပြောချင်တဲ့ သူတွေကတော့ ပြောမှာပါပဲ။ ဝိုင်းစု ဘာလုပ်ထားတယ် ဆိုတာ လူတိုင်းကို ချပြပြီးသားလေ။ ဝိုင်းစု ဘာတွေလုပ်နေတယ်၊ ဘာဖြစ်တယ် ဆိုတာနဲ့ ပတ်သက်ပြီး ဘယ်အရာမှ ခိုးကြောင်ခိုးဝှက် လုပ်ထားတာ တစ်ခုမှ မရှိပါဘူး။ လူတွေက ပြောချင်လို့သာ ပြောနေကြတာပဲ ရှိပါတယ်” လို့ လတ်တလော ထွက်ပေါ်နေတဲ့ လူမှုရေးကိစ္စတွေနဲ့ ပတ်သက်ပြီး ၎င်းက ထပ်လောင်းပြောဆိုပါတယ်။

အနုပညာရှင်တိုင်းက လူတွေရဲ့ အာရုံစိုက်မှုကို သာမန်လူတွေထက် ပိုပြီး ခံနေရတဲ့သူတွေ ဖြစ်တဲ့အတွက် ကိုယ်နဲ့ ပတ်သက်တဲ့ သတင်းတစ်ခု ထွက်လာပြီဆိုရင် ပြောချင်တဲ့ သူတွေကတော့ ပြောကြမှာပဲဖြစ်ပြီး ကိုယ့်စိတ်ကို ကြံ့ကြံ့ခံနိုင်အောင် ပြင်ဆင်ထားဖို့ပဲ လိုတယ်လို့ မြင်ကြောင်း ဝိုင်းစုခိုင်သိန်းက ပြောကြားပါတယ်။ 

“အပြင်က ဝိုင်းစုပရိသတ်တွေရော၊ တခြားအနုပညာရှင်တွေပါ ကိုယ်ကဘာတွေ လုပ်နေပါတယ်။ ဘယ်သူနဲ့ ဘာဖြစ်နေပါတယ်ဆိုပြီး ပြောပြတာမျိုး ဝိုင်းစု တစ်ခါမှ မကြားဖူးဘူး။ ကြုံလည်းမကြုံဖူးဘူး။ အဲ့ဒါကြောင့် ကိုယ့်ရဲ့ Personal နဲ့ ပတ်သက်ပြီး လိုက်ပြောစရာ မလိုဘူးလို့ ထင်ပါတယ်။ ကိုယ့်ကိုပြောတာတွေကို လိုက်ဖြေရှင်းနေရင်လည်း ပြီးမှာကို မဟုတ်တော့ဘူး” လို့ ၎င်းက ပြောဆိုပါတယ်။ 

လက်ရှိမှာတော့ ချစ်ခင်အားပေးနေတဲ့ ပရိသတ်တွေအနေနဲ့ ကိုယ့်ရဲ့ပုဂ္ဂိုလ်ရေး ကိစ္စတွေထက် အနုပညာ အလုပ်တွေကို ပိုပြီး အာရုံစိုက်စေချင်ပြီး၊ ဘဝအတွက် တကယ်အရေးကြီးတဲ့ အရာတွေကို ပရိသတ်တွေကို ချပြနေကျ ဖြစ်တဲ့အတွက် အသိပေးစရာရှိတဲ့  အချိန်ကျရင်တော့ အသိပေးမှာ ဖြစ်ကြောင်း ဝိုင်းစုခိုင်သိန်းက ပြောကြားပါတယ်။

မကြာသေးခင်က တေးသံရှင် အောင်လနဲ့ ဝိုင်းစုခိုင်သိန်းတို့ ချစ်သူတွေ ဖြစ်နေတယ်လို့ သတင်းများ ထွက်ပေါ်ခဲ့ပြီး၊  ရင်ဘတ်ပေါ်မှာ အမှတ်တရ တက်တူးတွေ အပြန်အလှန် ထိုးထားကြတဲ့ ဓာတ်ပုံတွေ လူမှုကွန်ရက် Facebook မှာ ပျံ့နှံ့ခဲ့ပေမယ့် နှစ်ယောက်စလုံးကတော့ အတည်ပြု ပြောကြားခြင်း မရှိသေးပါဘူး။