News

POST TYPE

ENTERTAINMENT

ဇေရဲထက်နဲ့ တွေ့ဆုံခြင်း
28-Jan-2018



“ကျွန်တော်က ကလေးဘဝမှာလည်း ကလေးတစ်ယောက်ရဲ့ ပျော်ရွှင်မှုမျိုးကို မရခဲ့ဘူး၊ ဆယ်ကျော်သက်အရွယ်မှာလည်း ဆယ်ကျော်သက်ဘဝရဲ့ ပျော်ရွှင်မှုတွေ မရခဲ့ဘူး”

ကိုယ်မြတ်နိုးတန်ဖိုးထားတဲ့အလုပ်တစ်ခုမှာ အနုတ်လက္ခဏာဖြစ်လာမှာစိုးတာကြောင့် အကောင်းဆုံးဖြစ်မယ့် ဇာတ်တွေကိုပဲ လက်ခံပြီး ရိုက်ကူးသွားမယ့် သရုပ်ဆောင်ဇေရဲထက်နဲ့ တွေ့ဆုံပြီး ချမှတ်ထားတဲ့ အနုပညာအစီအစဉ်တွေ အကြောင်း၊ ဘာသာရေးလုပ်ဖြစ်ခြင်းအကြောင်းနဲ့အတူ မိဘအပေါ်ထားတဲ့ စိတ်ခံစားမှုများအကြောင်း တစေ့တစောင်းကို The Voice က မေးမြန်းဖော်ပြလိုက်ပါတယ်။

Voice : ၂၀၁၈ ခုနှစ်ကစပြီး ကိုယ်ချမှတ်ထားတဲ့ အနုပညာအစီအစဉ်တွေကနေ စပြောပေးပါဦး။
ZYH : အမှန်အတိုင်းပြောရရင် ဒီအလုပ်လုပ်ရတာ စိတ်ညစ်တာတွေလည်းရှိတယ်၊ စိတ်ပျက်တာတွေလည်း ရှိတယ်၊ စိတ်ကုန်တာတွေလည်း ရှိတယ်။ တစ်ခါတလေကျရင် လုပ်ချင်တဲ့စိတ်ပျောက်တဲ့အထိတောင် ဖြစ်လာတယ်။ အဲ့ဒါကြောင့် နောက်ပိုင်းမှာ ကျွန်တော်စဉ်းစားထားတာက ကိုယ်အရမ်းကြိုက်ပြီးတော့ အရမ်းနှစ်သက်တဲ့ဇာတ်တွေကိုပဲ ရိုက်သွားမယ်။ အဓိက ကျွန်တော့်အတွက် အကောင်းဆုံးဖြစ်မယ့်ဇာတ်တွေကိုပဲ လက်ခံပြီး ရိုက်ကူးသွားမယ်လို့ ဆုံးဖြတ်ထားပါတယ်။ 

Voice : ကိုယ်လုပ်နေတဲ့အလုပ်ကို စိတ်ပျက်ရတဲ့အကြောင်းအရင်းက ဖိအားတွေများလာလို့လား၊ တခြားကိုယ်ရေးကိုယ်တာနဲ့ ပတ်သက်တဲ့ တိုက်ခိုက်မှုတွေကြောင့်လား။ 
ZYH : အကုန်လုံးပါပါတယ်။ ကိုယ်ရေးကိုယ်တာကြောင့် လည်းပါတယ်၊ တိုက်ခိုက်မှုတွေကြောင့်လည်း ပါပါတယ်။ နောက်တစ်ခုက ဒီလောကမှာ ကိုယ်တစ်ယောက်တည်းက ကောင်းနေလို့လည်းမရဘူး၊ ဘာဖြစ်လို့လဲဆိုတော့ အဘက်ဘက်က မပြည့်စုံဘူးလေ။ တစ်ခါတလေကျရင် ကိုယ့်အတွက် အနုတ်လက္ခဏာဖြစ်လာမှာစိုးတဲ့စိတ်တွေ ဝင်လာတယ်။ ကိုယ်က ဒီလောကထဲကို ဝင်လာကတည်းက ခက်ခက်ခဲခဲနဲ့ဝင်လာခဲ့တာဖြစ်တဲ့အတွက် အရမ်းလည်း တန်ဖိုးထားတယ်၊ အရမ်းလည်းမြတ်နိုးတယ်။ အဲ့ဒါကြောင့် ကိုယ်တန်ဖိုးမြတ်နိုးထားတဲ့ အရာတစ်ခုကိုတော့ ပြီးစလွယ်ကြီး၊ လက်လွတ်စပယ်ကြီးတော့ အဖြစ်မခံနိုင်ဘူး။ အဲ့ဒီစိတ်လေးတွေ ရှိလာတာကြောင့်လည်း ပါပါတယ်။ 

Voice : နောက်ပိုင်းမှာ ဘာသာရေးကို ပိုလုပ်ဖြစ်နေသလိုပဲ၊ အဓိကအကြောင်းရင်းက ဘာဖြစ်မလဲ။ 
ZYH : အရင်ကတည်းက ကျွန်တော်က ဘာသာရေးကို ဝါသနာပါတယ်။ ငယ်ငယ်ကတည်းက တရားထိုင်တာတို့၊ အမေတို့နဲ့အတူတူ ဝိပဿနာတရား အားထုတ်တာတို့ ရှိခဲ့ဖူးတယ်။ ကျွန်တော်က အရင်ကတည်းက ဘုရား၊ တရားကိုပဲ ယုံကြည်ခဲ့တာပေါ့နော်။ ကျွန်တော်က ကလေးဘဝမှာလည်း ကလေးတစ်ယောက်ရဲ့ ပျော်ရွှင်မှုမျိုးကို မရခဲ့ဘူး၊ ဆယ်ကျော်သက်ဘဝရဲ့ ပျော်ရွှင်မှုတွေမရခဲ့ဘူး။ ကျွန်တော်က အလုပ်လုပ်တာနဲ့ အချိန်ကုန်ခဲ့တယ်။ အဲ့ဒါကြောင့် ကျွန်တော့်မှာ ဘုရား၊ တရားမှတစ်ပါး ဘာမှမရှိဘူးဆိုတဲ့စိတ်နဲ့ ဘုရား၊ တရားကိုပဲ အားထုတ်ခဲ့သလို ခင်ပွန်းကြီးဆယ်ပါးကိုလည်း မပြစ်မှားမိအောင်၊ မစော်ကားမိအောင် အမြဲတမ်းထိန်းထိန်းသိမ်းသိမ်းနဲ့ နေလာခဲ့တာပါ။ 

Voice : Facebook မှာလည်း အမေနဲ့ရိုက်ထားတဲ့ဓာတ်ပုံလေးတွေ တင်တာတွေ့ရတယ်၊ အမေ့ကို တော်တော်ချစ်တဲ့ပုံပဲနော်။ 
ZYH : ကျွန်တော့်မှာ သက်ရှိဘုရားတစ်ဆူရှိတယ်။ အဲ့ဒါကတော့ အမေပဲပေါ့၊ ကျွန်တော့်မှာ အဖေမရှိတော့တဲ့အတွက် အမေကိုသာလျှင် ဘုရားတစ်ဆူလိုပဲ ကိုးကွယ်တယ်၊ ဘုရားတစ်ဆူလိုပဲ သဘောထားတယ်။ ကျွန်တော့်အမေ စိတ်ညစ်တာကိုလည်း မလိုချင်ဘူး၊ အဲ့ဒါကြောင့် ကျွန်တော့်ရှုတင်မှာကအစ မိဘကိုမဝင်ခိုင်းဘူး။ ဘာဖြစ်လို့လဲဆိုတော့ ကျွန်တော်စိတ်ဆင်းရဲရင် မိဘစိတ်ဆင်းရဲမှာစိုးရိမ်တဲ့စိတ်နဲ့ ကျွန်တော့်လောကထဲမှာ အမေကို မပါစေချင်တာပါ။ တစ်ခါတလေ Facebook မှာ ကျွန်တော့်အမေကိုတိုက်ခိုက်လာရင် အရမ်းစိတ်ဆိုးမိတယ်။ အမေ့ကို ကျွန်တော့်လောကထဲကိုတောင် မဝင်ရောက်စေဘဲနဲ့ အေးအေးဆေးဆေးထားတယ်၊ ကျွန်တော့်လောကထဲက ဘယ်သူနဲ့မှလည်းမပတ်သက်စေချင်ဘူး၊ ဘယ်သူနဲ့မှလည်း အဆက်အဆံမလုပ်စေချင်ဘူး။ အဲ့ဒီကြားထဲကနေ ကျွန်တော့်မိဘကိုတိုက်ခိုက်လာရင်တော့ မကြိုက်ဘူး၊ ဘယ်သူဖြစ်ဖြစ် ကိုယ့်မိဘကို ထိခိုက်လာရင်တော့ ဘယ်သူက လက်ခံနိုင်မှာလဲ၊ ကျွန်တော်ကတော့ အမေ့ကို အရမ်းချစ်တယ်။ နောက်တစ်ခုက ကျွန်တော့်ရဲ့ မွေးစားအဖေနဲ့ အမေ ဆုံးမထားတာတစ်ခုရှိတယ်။ ကျွန်တော်လုပ်နေတဲ့အရာမှန်သမျှ အားလုံးက အမေလုပ်ပေးနေတာတဲ့၊ လက်ရှိ ကျွန်တော့်ရဲ့ခန္ဓာကိုယ်၊ အသားအရေအားလုံးက ကိုယ်လုပ်တယ်လို့သာ အမည်ခံထားပေမယ့် အမေမွေးပေးထားတာပါ။ 

Voice : လက်ရှိမှာ အမေအားကိုးရလောက်တဲ့ သားတစ်ယောက်ဖြစ်နေပြီလား။ 
ZYH : ကျွန်တော်က အမေ့အတွက်အားကိုးရတဲ့ သားတစ်ယောက် မဖြစ်သေးပါဘူး။ ကျွန်တော်ကိုယ်တိုင်လည်း လက်ရှိအချိန်ထိကို ကြိုးစားနေဆဲရှိသေးတယ်။ အမှန်အတိုင်းပြောရရင် အမေ့ကိုတောင် စိတ်ချမ်းသာအောင် မထားနိုင်သေးဘူး။ ကျွန်တော်ကိုယ်တိုင်ကလည်း အမေ့အတွက် သားကောင်းတစ်ယောက်တော့ မဖြစ်သေးပါဘူး။ အမေ့ရဲ့စကားကို နားထောင်တဲ့ သားတစ်ယောက်ပဲဖြစ်သေးတယ်။ ကျွန်တော့်အနေနဲ့ မိဘရဲ့ကျေးဇူးကို ဆပ်နိုင်တဲ့သားကောင်းတစ်ယောက်ဖြစ်အောင် အများကြီးကြိုးစားဖို့ လိုပါသေးတယ်။ 

Voice : မိဘဆိုတဲ့အရာကို အဓိပ္ပာယ်ဖွင့်ဆိုကြည့်မယ်ဆိုရင် ရလာမယ့်အဖြေက ဘယ်လိုအဖြေမျိုးဖြစ်မလဲ။ 
ZYH : မိဘကို ကာယကံ၊ ဝစီကံ၊ မနောကံနဲ့ ပြစ်မှားဖို့မသင့်ပါဘူး။ ကျွန်တော်တို့ကို လူလားမြောက်အောင် မွေးထုတ်ပေးခဲ့တဲ့မိဘကို လူတိုင်းက ဘုရားတစ်ဆူလိုပဲကိုးကွယ်ရမယ်၊ ဆည်းကပ်ရမယ်။ နောက်တစ်ခုက ကျွန်တော်တို့ကို လူဖြစ်လာအောင် လုပ်ပေးတယ်၊ လူဆိုတာက သတ္တဝါထဲမှာ အမြင့်ဆုံးပါ။ ကျွန်တော်တို့က အထက်ကိုလည်း တက်လို့ရသလို အောက်ကိုလည်း ဆင်းလို့ရတယ်။ အဓိက အထက်တက်မလား၊ အောက်ဆင်းမလား ရွေးချယ်လို့ရအောင် မွေးထုတ်ပေးခဲ့တဲ့မိဘကို ပြစ်မှားဖို့မပြောနဲ့၊ စိတ်နဲ့တောင် မပြစ်မှားသင့်ဘူးလို့ ပြောချင်ပါတယ်။

ဝင်းထွန်းနိုင်