News

POST TYPE

EDUCATION

မူလတန်းဆရာ အတတ်ပညာသင်တန်း ဝိဇ္ဇာဘွဲ့ရများပါ လျှောက်ထားနိုင်မည်
05-Jan-2017 tagged as မူလတန်း


ရန်ကုန်၊ ဇန်နဝါရီ ၅

လုပ်ငန်းခွင်အကြို မူလတန်း ဆရာ အတတ်ပညာ သင်တန်းကို ယခင်နှစ်က သိပ္ပံဘွဲ့ရများသာ လျှောက်ထားခွင့်ပြုခဲ့သော်လည်း ယခုနှစ်တွင် ဝိဇ္ဇာဘွဲ့ရများပါ လျှောက်ထားနိုင်မည်ဖြစ်ကြောင်း ပညာရေးကောလိပ် သင်တန်းသားလက်ခံရေးအဖွဲ့ တာဝန်ခံ ဒေါက်တာအောင်အောင်မင်းက The Voice သို့ ပြောကြားသည်။

တက္ကသိုလ်တစ်ခုခုမှ မြန်မာစာ၊ အင်္ဂလိပ်စာ၊ သင်္ချာ၊ ရူပဗေဒ၊ ဓာတုဗေဒ၊ ရုက္ခဗေဒ၊ သတ္တဗေဒ၊ ဘောဂဗေဒ၊ ပထဝီဝင်၊ သမိုင်းဘွဲ့ ရရှိပြီးသော လျှောက်ထားလိုသူများသည် ဇန်နဝါရီလ ၁၆ ရက် နောက်ဆုံး သက်ဆိုင်ရာ ပညာရေးခရိုင်အတွင်းရှိ မြို့နယ်ပညာရေးမှူးရုံး တစ်ခုတည်းတွင် လျှောက်ထားရမည် (ပညာရေးဝန်ကြီးဌာန သို့မဟုတ် အဆင့်မြင့်ပညာဦးစီးဌာနသို့ တိုက်ရိုက် လျှောက်ထားခြင်း မပြုရ)ဖြစ်သည်။

ပညာရေးခရိုင် ၆၄ ခုအောက်ရှိ ပညာရေး ကောလိပ်များ၏ ကျောင်းသား၊ ကျောင်းသူ ဝင်ဆံ့အားအရ သင်တန်းသား၊ သင်တန်းသူ ၆၀၀၀ ခန့် ရွေးချယ် ခန့်ထားမည်ဖြစ်သော်လည်း ဝိဇ္ဇာဘွဲ့ရ (မြန်မာစာ၊ အင်္ဂလိပ်စာ၊ ဘောဂဗေဒ၊ ပထဝီဝင်၊ သမိုင်း)ဦးရေ မည်မျှ ရွေးချယ်မည်နှင့် သိပ္ပံဘွဲ့ရ ဦးရေ မည်မျှ ရွေးချယ်မည်ကိုမူ အခြေခံပညာ ဦးစီးဌာနက အသိပေးထားခြင်း မရှိသေးကြောင်း ဒေါက်တာအောင်အောင်မင်းက ရှင်းပြသည်။

လျှောက်ထားသူသည် ဝန်ထမ်းမဟုတ်လျှင် မေလကုန်အထိ အသက် ၃၀ နှစ်ထက်မကြီးသူ၊ ဝန်ထမ်းဖြစ်ပါက မေလကုန်အထိ အသက် ၃၅ နှစ်အထက် မကြီးသူဖြစ်ရန် လိုအပ်ပြီး ဌာနအကြီးအကဲ ခွင့်ပြုချက်ပူးတွင် တင်ပြရမည်ဖြစ်သည်။ လျှောက်ထားသူများသည် အင်္ဂလိပ်စာ၊ အထွေထွေ ဗဟုသုတ ရေးဖြေစာမေးပွဲနှင့် လူတွေ့နှုတ်ဖြေကို ပညာရေးခရိုင်များတွင် ဖြေဆိုရမည်ဖြစ်ကြောင်း ယင်းအဖွဲ့ထံမှ သိရှိရသည်။

အဆိုပါသင်တန်းကို ဇွန်လ ၁၂ ရက်မှစ၍ စာတွေ့ လေးလ၊ လက်တွေ့ တန်းပြ နှစ်လ စုစုပေါင်း ခြောက်လကြာ ပညာရေးခရိုင် ၆၄ ခုရှိ ပညာရေး ကောလိပ်များတွင် ဖွင့်လှစ်မည်ဖြစ်ပြီး တက်ရောက်ခွင့်ရသူများ စာရင်းကို ပညာရေး ကောလိပ်များ၊ တိုင်း/ ပြည်နယ် ပညာရေးမှူးရုံးများ၊ ခရိုင်ပညာရေးမှူးရုံးများနှင့် မြို့နယ်ပညာရေးမှူးရုံးများတွင် မေလအတွင်း သတင်း ထုတ်ပြန်မည်ဖြစ်ကြောင်း အဆိုပါအဖွဲ့ထံမှ သိရှိရသည်။

လုပ်ငန်းခွင်အကြိုဆရာ အတတ်ပညာသင်တန်းသည် ခြောက်လသာ ကြာမည်ဖြစ်သောကြောင့် ယခင်က ဖွင့်လှစ်ခဲ့သည့် ဆရာအတတ်ပညာ ကျွမ်းကျင်မှု ဒီပလိုမာ(DTEC) သင်တန်းကာလ တစ်နှစ်(စာတွေ့ ရှစ်လ၊ လက်တွေ့ တန်းပြ နှစ်လ၊ ကျောင်းပိတ်ချိန် နှစ်လ)နှင့် နှိုင်းယှဉ်လျှင် စာတွေ့ သင်ကြားချိန်နည်းနေသည်ဟု ယူဆကြောင်း ရှမ်းပြည်နယ်အတွင်းမှ မူလတန်းပြဆရာမ တစ်ဦးက မှတ်ချက်ပြုသည်။

မူလတန်းဆရာ အတတ်သင်တန်း တက်ရောက်ခွင့်ရသူများသည် ဇွန်လ ၁၀ ရက်မှ ၁၁ ရက်အတွင်း တက်ရောက်ခွင့်ရမည့် ပညာရေးကောလိပ်များသို့ သတင်းပေးပို့ရမည်ဖြစ်ပြီး သတင်းပို့ချိန်တွင် တက္ကသိုလ်ဝင်တန်း စာမေးပွဲအောင်မြင်ကြောင်း ထောက်ခံစာ၊ ဘွဲ့လက်မှတ်၊ နိုင်ငံသား စိစစ်ရေးကတ်ပြားမူရင်းများ ယူလာရမည်ဖြစ်ကြောင်း သင်တန်းသား လက်ခံရေးအဖွဲ့ထံမှ သိရှိရသည်။