News

POST TYPE

EDUCATION

ကျောင်းများတွင် ကွန်ပျူတာ ပရိုဂရမ်ရေးနည်း သင်ကြားရန် IBM ကုမ္ပဏီ ပူးပေါင်းမည်
29-Dec-2016 tagged as

ဝါရှင်တန်၊ ဒီဇင်ဘာ ၂၈

အမေရိကန် ပြည်ထောင်စု အပါအဝင် နိုင်ငံပေါင်း ၁၈၀ ရှိ၊ ကျောင်းသား ကျောင်းသူပေါင်း သန်း ၁၀ဝ ခန့်ကို ကွန်ပျူတာ ပရိုဂရမ် ကုတ်ရေးနည်း သင်တန်းများ သင်ကြားပေးရန် ကမ္ဘာကျော် ကွန်ပျူတာ ကုမ္ပဏီကြီး တစ်ခုဖြစ်သည့် IBM သည် ပူးပေါင်းပါဝင်မည်ဖြစ်ကြောင်း USA Today သတင်းတွင် ဖော်ပြထားသည်။

၂၀၁၆ ခုနှစ် ဒီဇင်ဘာလ ၅ ရက်နေ့မှ ၁၁ ရက်နေ့အထိကို နှစ်စဉ် ကွန်ပျူတာသိပ္ပံ ပညာရေး လှုပ်ရှားမှု ရက်သတ္တပတ်အဖြစ် သတ်မှတ်ပြီး HOC (Hour of Code) သင်တန်းများကို ပေးသွားရန် စီစဉ်ထားကြောင်း ယင်းသတင်းက ဆိုသည်။

၂၁ ရာစုသည် ပညာရေးတွင် နည်းပညာကို တတ်မြောက်ရန် ဆိုခြင်းထက် နည်းပညာကို ဖန်တီးတတ်စေရန် လေ့ကျင့်သင်ကြား ပေးသင့်ကြောင်း၊ ကွန်ပျူတာ သိပ္ပံပညာရပ်သည် ကမ္ဘာကြီး၏ လုပ်ငန်း အရပ်ရပ်ကို ပြုပြင် ပြောင်းလဲပေးနိုင်မည့် တစ်ခုတည်းသော ပညာရပ်ဖြစ်သည်ကို သဘော ပေါက်လာစေရန် သင်ကြားပေးရန် လိုအပ်လာကြောင်း IBM မှ တာဝန်ရှိသူများက ပြောကြားသည်။

ကွန်ပျူတာ ပညာရပ် အခြေခံများ တတ်မြောက်ထားသူသည် တီထွင် ဖန်တီးစိတ်နှင့် ပြဿနာများကို ဖြေရှင်းနိုင်စွမ်းများ အလိုအလျောက် တိုးတက်လာပြီး ဖြစ်ကြောင်း၊ အနာဂတ် အလုပ်အကိုင် အခွင့်အလမ်းများအတွက် ကွန်ပျူတာ ပညာရေးတွင် ကုတ်ရေးနည်း သင်တန်းများကို ကျောင်းများက စပြီး သင်ကြားသင့် ကြောင်း USA Today တွင် ရေးသားထားသည်။

အမေရိကန် ပြည်ထောင်စု နိုင်ငံ တစ်ဝန်းလုံးတွင် ကွန်ပျူတာနှင့် ပတ်သက်သည့် လုပ်ငန်းပေါင်း ငါးသိန်းကျော် ရှိကြောင်း၊ ကွန်ပျူတာနှင့် ဘွဲ့ရကျောင်းပြီးသူများမှာလည်း ဒုတိယ လစာ အများဆုံး ခံစားနေကြရသည့် စာရင်းတွင် ပါဝင်နေကြောင်း၊ အချိန်ပြည့် လုပ်သားများအဖြစ် ခန့်အပ်ခြင်း ခံရမှုတွင်လည်း ဘွဲ့ရပြီး ၆ လအတွင်း ၇၆ ရာခိုင်နှုန်းအထိ တိုးမြင့်လာခဲ့ကြောင်း ပညာရှင်များက ထောက်ပြထားသည်။
 
ဒီဇင်ဘာ HOC ရက်သတ္တပတ် လှုပ်ရှားမှုအဖြစ် Scott အထက်တန်းကျောင်းတွင် ကွန်ပျူတာ ပရိုဂရမ်ရေးနည်း အထူး သင်တန်းများကို တတိယတန်း အဆင့်က စတင် သင်ကြားပေးခဲ့ပြီး၊ STEM ပညာရေး အကောင်အထည် ပေါ်လာစေရေးအတွက် ဝိုင်းဝန်း ကြိုးပမ်းကာ၊ ကွန်ပျူတာ ကုတ်ရေးပြီး စက်ရုပ်များကို ခိုင်းစေနိုင်ရေး ဆရာများကလည်း ပူးပေါင်း ဆောင်ရွက်လျက်ရှိကြောင်း USA Today သတင်းတွင် ဖော်ပြထားသည်။

E-01

  • TAGS