News

POST TYPE

EDUCATION

မြန်မာဘာသာစကားကို တရုတ်ကျောင်းသား အများဆုံး သင်ယူ
22-Dec-2016 tagged as မြန်မာ တရုတ်

ရန်ကုန်၊ ဒီဇင်ဘာ ၂၁

ရန်ကုန် နိုင်ငံခြားဘာသာတက္ကသိုလ်တွင် မြန်မာဘာသာစကား သင်ယူသူ နိုင်ငံတကာ ကျောင်းသား၊ ကျောင်းသူများအနက် တရုတ်နိုင်ငံမှ ကျောင်းသား၊ ကျောင်းသူ အများဆုံးဖြစ်ကြောင်း ရန်ကုန် နိုင်ငံခြားဘာသာတက္ကသိုလ် ပါမောက္ခချုပ် ဒေါက်တာကြည်ရွှင်က The Voice သို့ ပြောကြားသည်။ 

ရန်ကုန် နိုင်ငံခြားဘာသာ တက္ကသိုလ်တွင် ၁၉၇၄ ခုနှစ်မှ ယခုနှစ်အထိ လက်ရှိစာရင်းအရ မြန်မာဘာသာစကား သင်ယူသည့် နိုင်ငံတကာကျောင်းသား၊ ကျောင်းသူ စုစုပေါင်း ၁၅၃၉ ဦး ရှိပြီး တရုတ်နိုင်ငံမှ ကျောင်းသား၊ ကျောင်းသူ ၆၉ဝ ဦး၊ ကိုရီးယားနိုင်ငံ (တောင်) မှ ၃၄၈ ဦး၊ ဂျပန်နိုင်ငံမှ ၂၃၄ ဦးရှိကြောင်း ယင်းတက္ကသိုလ်ထံမှ သိရှိရသည်။

ထိုစာရင်းအရ နိုင်ငံပေါင်း ၃၁ နိုင်ငံမှ ကျောင်းသား၊ ကျောင်းသူများ မြန်မာဘာသာစကား သင်ယူပြီး မြောက်ကိုရီးယားနိုင်ငံမှ ကျောင်းသား၊ ကျောင်းသူ နှစ်ဦး၊ ဗီယက်နမ်နိုင်ငံမှ ၅၂ ဦး၊ ထိုင်းနိုင်ငံမှ ၄၂ ဦး၊ အိန္ဒိယနိုင်ငံမှ ၂၈ ဦး၊ လာအိုနိုင်ငံမှ ၂၅ ဦး၊ ပြင်သစ်နိုင်ငံမှ ၂၃ ဦး၊ ဘင်္ဂလားဒေ့ရ်ှနှင့် ဂျာမန်နိုင်ငံတို့မှ ၁၅ ဦးစီ ပါဝင်သည်။

မြန်မာဘာသာစကား သင်ယူသည့် နိုင်ငံတကာ ကျောင်းသား၊ ကျောင်းသူများတွင် အိန္ဒိယ၊ သီရိလင်္ကာ၊ ဘင်္ဂလားဒေ့ရ်ှနှင့် ထိုင်းနိုင်ငံတို့မှ စစ်ဘက်ဆိုင်ရာနှင့် အစိုးရအရာရှိ တာဝန်ရှိသူ အချို့လည်း တက်ရောက်သင်ယူနေကြောင်း ရန်ကုန် နိုင်ငံခြားဘာသာ တက္ကသိုလ်ထံမှ သိရှိရသည်။

“မြန်မာဘာသာစကား အပေါ်မှာ စိတ်ဝင်စားမှု ဆိုတာကတော့ လူမှုစီးပွားရေး ဆက်သွယ်မှု ပိုများလာတာပေါ့။ ပိုများလာတဲ့အတွက် သူတို့ မြန်မာစကား တတ်တဲ့လူတွေ ပိုအပ်လာတယ်” ဟု ဒေါက်တာကြည်ရွှင်က ပြောကြားသည်။

တရုတ်တက္ကသိုလ်များ အနေနှင့် မြန်မာဘာသာစကား သင်ယူရန် ရန်ကုန် နိုင်ငံခြားဘာသာ တက္ကသိုလ်၊ မန္တလေး နိုင်ငံခြားဘာသာ တက္ကသိုလ်၊ ရန်ကုန်တက္ကသိုလ်တို့နှင့် အနီးကပ် ဆက်ဆံနေပြီး ကျောင်းသားများကို တက္ကသိုလ်သုံးခုသို့ အညီအမျှပို့၍ သင်ယူစေကြောင်း ၎င်းက ရှင်းပြသည်။

ရန်ကုန် နိုင်ငံခြားဘာသာ တက္ကသိုလ် အနေနှင့် ပညာရေး မြှင့်တင်မှု ပူးပေါင်းဆောင်ရွက်ရေး နိုင်ငံတကာမှ တက္ကသိုလ်ပေါင်း ၂၅ ခုနှင့် နားလည်မှုစာချွန်လွှာ ရေးထိုးထားပြီး တရုတ်နိုင်ငံမှ တက္ကသိုလ် ဆယ်ခုခန့် ပါဝင်ပါသည်။

ယင်းအနက် ဘေဂျင်း နိုင်ငံတကာလေ့လာရေး တက္ကသိုလ် (Beijing Foreign Studies University) နှင့် အနီးကပ် ဆက်ဆံမှု ပိုများကြောင်း ယင်းတက္ကသိုလ်ထံမှ သိရှိရသည်။

နိုင်ငံရေး လေ့လာသုံးသပ်သူ စာရေးဆရာ သန်းစိုး (ဘောဂဗေဒ) က “ပထဝီနိုင်ငံရေးနဲ့ ပတ်သက်ပြီး မြန်မာနိုင်ငံအရေး မကျွမ်းကျင်လို့ မရဘူး။ ရေနံပိုက်လိုင်းဆိုင်ရာ အကျိုးစီးပွားနဲ့ ဆိုင်နေတော့ မြန်မာ့ရေးရာကို နားမလည်လို့ မရဘူး။ မရတော့ တရုတ်က မြန်မာ့ရေးရာ ကျွမ်းကျင်သူတွေကို မွေးတာပေါ့။ ဒါက အကျိုးစီးပွားနဲ့ ဆိုင်တာပေါ့။ အဲဒါကြောင့်မို့ပါ” ဟု သုံးသပ်ပြောဆိုသည်။

မန္တလေး နိုင်ငံခြားဘာသာ တက္ကသိုလ်တွင် လက်ရှိစာရင်းအရ မြန်မာဘာသာစကား သင်ယူသူ နိုင်ငံတကာ ကျောင်းသား၊ ကျောင်းသူ ၆၉ ဦး ရှိသည့်အနက် တရုတ်နိုင်ငံမှ ကျောင်းသား၊ ကျောင်းသူ ၆၈ ဦး၊ ကိုရီးယားနိုင်ငံမှတစ်ဦး ဖြစ်ကြောင်း ယင်းတက္ကသိုလ် ပါမောက္ခချုပ် ဒေါက်တာတင့်တင့်က ပြောကြားသည်။

တရုတ်တက္ကသိုလ် အချို့သည်လည်း ကျောင်းသားများ စေလွှတ်၍ မြန်မာဘာသာစကား သင်ယူနိုင်ရေး နှစ်ဦးသဘောတူ စာချုပ်များ ရေးထိုးနိုင်ရန် စီစဉ်လျက် ရှိကြောင်း ရန်ကုန်နိုင်ငံခြားဘာသာ တက္ကသိုလ်ထံမှ သိရှိရသည်။