News

POST TYPE

EDUCATION

လိုအပ်နေသည့် ကျူ (Q) တစ်လုံး
11-Jul-2019


ဉာဏ်ရည်ဉာဏ်သွေး စိတ်နေသဘောထား စီမံဆောင်ရွက်မှု ယဉ်ကျေးမှု စသည်တို့ကို တိုင်းတာသည့်အခါ Quotient ဆိုသည့် စကားလုံး ထည့်သွင်းသုံးနှုန်းလေ့ရှိသည်။ ယခုအခါ လူသိအများဆုံး ကျူများ (Qs) အဖြစ် IQ (Intelligence Quotient), EQ (Emotional Quotient) နှင့် MQ (Management Quotient) တို့ဖြစ်သည်။

မြန်မာနိုင်ငံတွင် ကျောင်းသား၊ ကျောင်းသူများ၏ ဉာဏ်ရည်ကို တိုင်းတာရာတွင် တော်သည့် ကျောင်းသား၊ ဂုဏ်ထူးများများရသည့် ကျောင်းသားဆိုလျှင် IQ မြင့်သည်ဟု ဆိုကြသည်။ လက်တွေ့ဘဝတွင်မူ IQ မြင့်သူနှင့် EQ မြင့်သူတို့ ယှဉ်လျှင် EQ မြင့်သူတို့က သာလွန်အောင်မြင်သည်ကို တွေ့ရသည်ဟု ဆိုကြပါသည်။ ဆိုရလျှင် IQ ရော EQ ပါ အရေးကြီးသည်။ IQ သည် ဦးနှောက်နှင့်ဆိုင်သည်ဟုဆိုလျှင် EQ သည် နှလုံးသားဖြင့် ဆိုင်သည်ဟု ဆိုနိုင်သည်။ တစ်နည်းအားဖြင့် IQ သည် သုတဆိုလျှင် EQ သည် ရသဟု ဆိုနိုင်မည်ထင်သည်။ IQ နှင့် EQ တို့၏ မူလဘူတ သဘောလက္ခဏာများကို သိလျှင် ပို၍ဆင်ခြင်တွေးတောကြံဆနိုင်လိမ့်မည်ဟု ထင်သည်။

IQ (Intelligence Quotient)

- သတင်းအချက်အလက်စုဆောင်းခြင်း
(Information Collection)

- ပြဿနာများ ခွဲခြမ်းစိတ်ဖြာနိုင်ခြင်း
(Problems Analysis)

- ကိန်းဂဏန်းများ မှတ်မိလွယ်ခြင်းနှင့် သဘော ပေါက်ခြင်း
(Numeoial Interpretation)

- ဝေဖန်ပိုင်းခြားနိုင်ခြင်း
(Judgement)

- အသေးစိတ်မှတ်မိခြင်း
(Detail Consciousness)

- စီမံကိန်းရေးတတ်ခြင်း
(Planning)

- စည်းရုံးသိမ်းသွင်းနိုင်ခြင်း
(Organizing)

- မြင်ကွင်းကျယ်ကြည့်နိုင်ခြင်း
(Perspective)

- အသင်းအဖွဲ့သတိရှိခြင်း
(Organizational Awareness)

- တီထွင်ဖန်တီးတတ်ခြင်း
(Creativity)

- စွန့်စားလုပ်ဆောင်နိုင်ခြင်းတို့ဖြစ်သည်။
 (Risk Taking)

EQ (Emotional Quotient) တွင်

- နှလုံးသွင်းနားထောင်မှု
(Perspective Listening)

- နိုးကြားနေခြင်း
(Sensitivity)

- ပျော့ပျောင်းသော သဘောရှိခြင်း
(Flexibility)

- ရည်မှန်းချက်ရှိခြင်း
(Achievement Orientation)

- စိတ်ဖိစီးမှုဒဏ် ခံနိုင်ခြင်း
(Stress Tolerance)

- ရှုံးနိမ့်မှုများမှ ပြန်ထနိုင်ခြင်း
(Resilience)

- ဆွဲဆောင်စည်းရုံးနိုင်ခြင်း
(Persuasiveness)

- စေ့စပ်နိုင်စွမ်းရှိခြင်း
(Negotiating)

- လိုက်လျောညီထွေနေတတ်ခြင်း
 (Adaptability)

- မဆုတ်မနစ်လုပ်ဆောင်ခြင်း
(Decisiveness)

- ဩဇာအာဏာရှိခြင်း
(Ascendancy)

- ခွန်အားပြည့်ဝခြင်း
 (Energy)

- ဒဏ်ခံဝံ့ခြင်း
(Impact)

- ရိုးသားဖြောင့်မတ်ခြင်း
 Integrity)

- လူအများလှုံ့ဆော်နိုင်ခြင်း
(Motivating Others)

- ဦးဆောင်နိုင်သည့် အရည်အသွေးရှိခြင်း
(Leadership) တို့ဖြစ်သည်။

စီးပွားရေးလောကတွင် အောင်မြင်သူများ တွေ့ရှိရလေ့ရှိသည့် MQ ကိုလည်း တွေ့ရသည်။

MQ (Managerial Quotient)

- ကိုယ်စားပြုဆောင်ရွက်နိုင်ခြင်း
(Delegating)

- ချီးမွမ်းရန်ဝန်မလေး
(Apprasing)

- လက်အောက်ငယ်သားများကို တိုးတက်စေခြင်း
(Developing-Subordinating)

- စကားပြောပြေပြစ်ခြင်း
  (Oral-Expression)

- တင်ပြမှုကောင်းမွန်ခြင်း
(Oral-Presentation)

- စီးပွားရေးအမြင်ရှိခြင်း
(Business Sense)

- ကိုယ့်ကိုယ်ကိုယ် စီမံခန့်ခွဲတတ်ခြင်း
(Self-management)

- ဖတ်ရှုလေ့လာခြင်း
(Reading)

- စာဖြင့်ရေးသား ဆက်သွယ်မှုကောင်းခြင်း
(Written Communication)

- စတင်ဦးဆောင်နိုင်ခြင်း
 (Imitative)

- လွတ်လပ်သောအမြင်ရှိခြင်း
 (Independence)

- မဆုတ်မနစ် (ဇွဲ) ရှိခြင်းတို့ပင်ဖြစ်သည်။ (Tenacity)

ခေတ်စနစ်တို့သည် အစဉ်ပြောင်းလဲနေသည်သာဖြစ်သည်။ သို့ဖြစ်၍ မည်သည့်အရာမျှ လှေနံဓားထစ် မှတ်ယူ၍ မရနိုင်။ အလျှော့အတင်း အတိုးအဆုတ် ရှိသည်။ မိမိပါဝင်သည့် အဖွဲ့အစည်း လုပ်ငန်းဆောင်တာ အဝန်းအဝိုင်းနှင့် လိုက်လျောညီထွေ သုံးတတ်ဖို့လိုသည်။ ယခုအခါ တိုးတက်အောင်မြင်စေနိုင်သည့် IQ နှင့် EQ ကို ဆတူဖွံ့ဖြိုးတိုးတက်ရန် ကြိုးပမ်းနေကြ၏။ အထူးသဖြင့် လုပ်ငန်းခွင်များတွင် MQ ၏ အရေးပါအရာရောက်မှုကိုလည်း အသိအမှတ်ပြုလာ၏။ သို့ရာတွင် ၂၁ ရာစုလူ့အဖွဲ့အစည်းသည် ကြီးမားကျယ်ပြန့်လာသည်။ Globalization သဘောတရားအရ ကမ္ဘာကြီးသည် အပြောမကျယ်လှတော့ပေ။ တစ်ကမ္ဘာခြား၍ နေရသည်လည်းမဟုတ်၊ အနောက်ကမ္ဘာ၊ အရှေ့ကမ္ဘာဟူ၍လည်း ခွဲခြား၍ မရတော့ပေ။ တစ်နည်းအားဖြင့် လူမှုရေး၊ စီးပွားရေး၊ နိုင်ငံရေးသာမက အရာရာတိုင်းသည် အရှိန်အဟုန် ဖြင့် တိုးဝင်စီးမျောလိုက်ပါနေကြရ၏။

သို့ဖြစ်ရာ လုပ်ငန်းနယ်ပယ်အသီးသီးတွင် ထီးတည်းရပ်တည်၍ မရနိုင်တော့ပေ။ အကြောင်းခံ တစ်မျိုးမျိုးဖြင့် ကူးလူးဆက်ဆံ ပူးပေါင်းလုပ်ဆောင်လာကြရတော့သည်။ ၂၁ ရာစုအတွက် ဒေသတိုင်း၊ နိုင်ငံတိုင်းတွင် အဓိကလိုအပ်လာသည့် ကျူ (Q) တစ်လုံးမှာ CQ ခေါ်သည့် Cultural Quotient ပင်ဖြစ်သည်။ CQ ၏ အခန်းကဏ္ဍ တစ်စတစ်စ မြင့်တက်လာနေသည်ကို တွေ့ရ၏။ အသိသာဆုံးပမာပြရလျှင် လူမျိုးဘာသာ အမျိုးအမည် စုံလင်ထွေပြားလှသည့် အိန္ဒိယနိုင်ငံသည် အိုင်တီနည်းပညာမြင့်မားလာရုံသာမက ဖွံ့ဖြိုး တိုးတက်လျက်ရှိသည့် ဒီမိုကရေစီ နိုင်ငံကြီး တစ်နိုင်ငံအဖြစ် ရပ်တည်နေနိုင်ခြင်းသည် နိုင်ငံနှင့် နိုင်ငံသားများ (CQ) ကို ကောင်းစွာနားလည်၍ သင့်တင့်လျောက်ပတ်စွာ အသုံးချနိုင်သောကြောင့်သာဖြစ်သည်။ အိမ်နီးချင်းနိုင်ငံများဖြစ်သည့် ထိုင်းနိုင်ငံ၊ စင်ကာပူ နိုင်ငံနှင့် ဒေသတွင်းနိုင်ငံများ အပါအဝင် ကမ္ဘာ့နိုင်ငံ အသီးသီးတွင် CQ ဖွံ့ဖြိုးလာမှုတစ်စတစ်စ မြင့်မားလာသည်ကိုလည်း တွေ့ရသည်။

ထို့ကြောင့် နိုင်ငံနှင့် နိုင်ငံသားများ၏ ဘက်စုံ ဖွံ့ဖြိုးတိုးတက်မှုအတွက် အဓိက ပြုစုပျိုးထောင်ပေးရမည့်နေရာမှာ ပညာရေးမှအပမရှိနိုင်။ လူ့အဖွဲ့အစည်းအတွင်း လိုအပ်နေမှုများကို အခြေခံကျလှသည့် ကျောင်းများတွင်သာစတင်နိုင်ဖို့လိုနေပါသည်။ သို့ဖြစ်၍ အခြေခံပညာမှစ၍ ပြုပြင်ပြောင်းလဲနေရာ ကျောင်းသား၊ ကျောင်းသူများ၏ Mind Set ပြုပြင်နိုင်ရေးအတွက် အဓိကအရေးကြီးလှသည့် သင်ရိုးညွှန်းတမ်း သင်ရိုးမာတိကာများမှစ၍ လိုအပ်နေသေးသည့် ကျူများ (Qs) ကို အစဉ်လေ့လာစောင့်ကြည့်၍ ပြည့်စုံပြည့်ဝသည့် သင်ကြားမှု၊ သင်ယူမှုစနစ် ဖြစ်နိုင်ရန် ကြိုးပမ်းဆောင်ရွက်သင့်လှပါကြောင်း . . . ။

ခင်မောင်ဌေး (ပညာရေး) 





  • VIA