News

POST TYPE

EDUCATION

သြစတြေးလျနိုင်ငံ၏ KG စနစ်
28-Jul-2016 tagged as

သြစတြေးလျနိုင်ငံ အနောက်ပိုင်း ပညာရေးစနစ်တွင် KG (Kindergarten) ဆိုသည်မှာ မတက်မနေရ သဘောမျိုး မဟုတ်ပေ။ သို့သော် မိဘများက မိမိတို့ ကလေးများကို အစကောင်းစေရန် ဆိုသည့် သဘောဖြင့် KG ပို့ကြကြောင်း တွေ့ရသည်။

ဇွန်လ ၃၀ ရက်နေ့တွင် အသက် ၄ နှစ် ပြည့်သည့် ကလေးတိုင်း KG တက်ခွင့် ရှိသည်။ KG ဆိုသည်မှာ ကလေးတစ်ဦးအတွက် ပထမဆုံး ခြေလှမ်းအစဟု သတ်မှတ်ကာ ကလေးများကို အစောပိုင်းကာလ သိသင့်သိအပ်သော စာ၊ ကိန်းနှင့် လူမှုပေါင်းသင့် ဆက်ဆံရေးတို့ကို ပျိုးထောင်လေ့ကျင့်ပေးရာ နေရာအဖြစ် သတ်မှတ်ထားသည်။ 

KG ဆိုသည်မှာ သူတို့နိုင်ငံတွင် တစ်နေကုန် တက်ရသည့် ကျောင်းမျိုးမဟုတ်ပေ။ အချိန်ပိုင်းလေးသာ မိဘများနှင့် ညှိနှိုင်းပြီး ဖွင့်ထားကြခြင်း ဖြစ်သည်။ အခြေအနေအရ တစ်နေကုန် ဖွင့်ထားပေးသည့်ကျောင်းများ ရှိသလို နေ့ဝက်သာ တက်ကြရသည့် ကျောင်းများလည်း ရှိသည်။ 

အချို့သော ရပ်ကွက်များတွင် မိမိတို့ အဖွဲ့အစည်းအလိုက် ဖွင့်ထားသော KG ကျောင်းများလည်း ရှိကြသည်။ ထိုကျောင်းများသည် အစိုးရကျောင်းများနှင့် ချိတ်ဆက်ထားကြပြီး မိဘများကိုယ်တိုင် ဦးစီးဦးဆောင်လုပ်ကာ ဖွင့်ထားကြသော ရပ်ကွက်ကျောင်းမျိုး ဖြစ်သည်။ 

KG အစတွင် ကလေးများကို သင်ကြားပေးသည့် စနစ်များမှာ ကလေးများနှင့် တွေ့ဆုံဆွေးနွေးသည့် သဘောမျိုးဖြစ်ကြောင်း တွေရသည်။ ဆရာမနှင့် ကလေးများ ဝိုင်းထိုင်ပြီး စကားပြောကြသည်။ ကစားကြသည်။ ဆရာမက ကလေးတွေကို ပုံပြောပြသည်။ ဘာတွေစိတ်ဝင်စားသလဲ၊ သူငယ်ချင်းတွေက ဘယ်သူလဲ၊ ကျောင်းကိုလာစဉ် ဘာတွေတွေ့ခဲ့သလဲ စသည်ဖြင့် ကလေးများကို ပြောရဲဆိုရဲ ရှိလာစေရန် အခြေခံကစပြီး သင်ပေးကြသည်။

KG ဆိုသည်မှာ ကလေးများ လာရောက်ချင်အောင် စွမ်းဆောင်နိုင်သည့် နေရာဖြစ်ရန် လိုပါသည်။ ကလေးတစ်ယောက်က ကျောင်းမသွားချင်ဘူးဟု တွင်တွင်ငြင်းနေလျှင် မအောင်မြင်သေးဟု ဆိုရမည်။ ကျောင်းသို့ ရောက်လာသည့် ကလေးတစ်ယောက်သည် ပျော်ရွှင်ပြီး အရာရာကို သင်ယူလေ့လာရန် အသင့်အနေအထားတွင် ဖြစ်နေရန် အရေးကြီးသည်။ 

ကျောင်းသို့ ရောက်လာသော ကလေးများကို ဆရာမများက မိမိတို့ လွယ်အိတ်များကို စနစ်တကျ ထားတတ်ရန်၊ အိမ်သာကို ကိုယ်တိုင်သွားတတ်ရန်၊ ရေ၊ စက္ကူ အသုံးပြုမှုတို့ကို ကိုယ်တိုင်လုပ်ဆောင်တတ်ရန်က အစ စနစ်တကျ သင်ပေးသည်။ ကျောင်းလာတက်မည် ဆိုလျှင် လိုအပ်သည့် လွယ်အိတ်၊ ရေဘူး၊ ထမင်းဘူး အစရှိသည်တို့ကို မိဘများအား ကျောင်းက စာရင်းထုတ်ပေးလိုက်သည်။ သတ်မှတ်ထားသော ကုန်တိုက်တွင် သွားဝယ်ကြရသည်။ 
ဤကျောင်းမှဆိုလျှင် ယူနီဖောင်း၊ အိတ်၊ ထမင်းဘူးကအစ အားလုံးဆင်တူအောင် ထုတ်ပေးလိုက်မည်သာ ဖြစ်သည်။

ကျောင်းတွင် သက်ဆိုင်ရာ ဗီရိုလေးများကို ထားပေးထားသည်။ ကလေးများ၏ အမည်လေးများကိုလည်း ကပ်ပေးထားသည်။ ကိုယ့်ဗီရိုထဲတွင် ထမင်းဘူးနှင့် အခြားအသုံးအဆောင်များကို စနစ်တကျ ထားတတ်ရန် လေ့ကျင့်ပေးသည်။ ကျောင်းသို့ ရောက်လာသည်နှင့် ကိုယ့်အားကိုယ်ကိုးပြီး လုပ်ဆောင်ရမည့် အလုပ်မှန်သမျှကို လုပ်ဆောင်တတ်ရန် တာဝန်ပေးပြီး ဆရာမများက လုပ်ခိုင်းတတ်သည်။ 

ကျောင်းသို့ပို့မည့် ကလေးများကို ယူနီဖောင်းကအစ စမတ်ကျနေစေရန် ကျောင်းက ဖိအားပေးထားသောကြောင့် ကျောင်းကို ဖြစ်သလို မလွှတ်ရဲကြပေ။ ညကတည်းက မီးပူတိုက်ထားပြီး အားလုံးကို ပြင်ဆင်ပေးထားကြရသည်။ 

ကျောင်းချိန်အတွင်း ကစားလိုက်၊ နားလိုက်၊ စာသင်လိုက်၊ အိပ်လိုက်နှင့် ပျော်ရွှင်စရာကောင်းသော ဘဝတစ်ခုကို ကလေးများ ရယူခံစားနိုင်စေရန် ဖန်တီးပေးထားသည်။ ကျောင်းက နေ့လယ်စာကျွေးသည့် ကျောင်းများလည်း ရှိသည်။ အာဟာရ ပြည့်ဝသည့် အစားအသောက်များကို ဖန်တီးပြီး ကျွေးကြသည်။ တစ်နေကုန် ဆော့ကစားနေကြရသည့် ကလေးများအတွက် အားဖြစ်စေသည့် အာဟာရများကို ဖြည့်ဆည်းပေးရမည်ဟု ခံယူထားကြသည်။ 

ကျောင်းတွင် စာသင်သည် ဆိုသော်လည်း ဝိုင်းထိုင်ပြီး စကားပြောကြရင်းက သင်ခန်းစာတွေကို တစ်ခုပြီးတစ်ခု တက်သွားသည့်သဘော ဖြစ်နေသည်။ ကလေးများထံက မည်သည့် Feedback ကို ပြန်ရမှ ရှေ့တစ်ဆင့်တိုးရန် သတ်မှတ်ထားကြပြီး ဖြစ်သည်။ 

ကျောင်းသို့ ကလေးများ ရောက်လာစေရန်နှင့် ရောက်လာသည့် ကလေးများကို အကောင်းဆုံး ဖြည့်ဆည်းပေးရန် ဆိုသည်မှာ ဆရာများ၏ ဦးတည်ချက်ဖြစ်သည်။ ကလေးများအတွက် ကျောင်းဆိုသည်မှာ အနာဂတ်ဖြစ်သည်ဟု ယူဆရန် လိုသလို၊ ကျောင်းဆိုသည်မှာလည်း ဆရာများအတွက် အနာဂတ်တစ်ခုအဖြစ် ယူဆလာစေရန် သူတို့ပညာရေးစနစ်က KGမှစကာ အခြေခံထားသည်။ အခြေခံကို အခြေခိုင်စေရန် ကြိုးစား တည်ဆောက်နိုင်မှသာ ပညာရေး မြှင့်တင်နိုင်မည်ဟု ယူဆထားသည်။ KG သည် အားလုံးအတွက် အကောင်းဆုံး အခြေခံပေးနိုင်သော နေရာတစ်နေရာဟု မိဘများရော ဆရာများကပါ လက်ခံယူဆထားကြသည်။ 

(Ref : Department of Education, Australia)

  • TAGS