News

POST TYPE

EDUCATION

ဆရာများ၏ ရင်ဖွင့်သံ (သုတေသနလွတ်လပ်ခွင့်)
01-Nov-2018

သုတေသနကိုအားပေးရမည်ဟု ပညာရေးဝန်ကြီးက တွင်တွင်ပြောနေသော်လည်း လက်တွေ့မြေပြင်တွင် လိုအပ်ချက်များစွာရှိနေသည်ကို ယခုအချိန်အထိ လုံလောက်အောင် ဖြည့်ဆည်းပေးနိုင်ခြင်းမရှိသေးပေ။ မူဝါဒအရသော်လည်းကောင်း၊ လက်တွေ့ပစ္စည်းမလုံလောက်မှုနှင့် ရှိသည့်ပစ္စည်းကိုပင် ထုတ်ယူသုံးစွဲရန်ပင်သော်လည်းကောင်း ခက်ခဲနေသည့်အကြောင်းအရာများကို ယခုတစ်ပတ်ဆရာများ၏ ရင်ဖွင့်သံကဏ္ဍမှတစ်ဆင့် The Voice က စုစည်းဖော်ပြလိုက်ပါသည်။

“သုတေသနဌာနနဲ့ သင်ကြားရေးဌာနကို သီးခြားဖွဲ့စည်းထားခြင်းမရှိတာကလည်း ပြဿနာတစ်ခုပေါ့”



ဦးကျော်ဝေဖြိုး(လက်ထောက်ကထိက၊ မြန်မာစာဌာန၊ မုံရွာတက္ကသိုလ်)

ကျွန်တော်တို့မှာ ဌာနတွင်းစာတမ်းဖတ်ပွဲတွေကတော့ ပုံမှန်ပြုလုပ်လေ့ရှိပါတယ်။ ဒါပေမဲ့ ဒီသုတေသနတွေက လက်တွေ့ကျတဲ့ဟာတွေတော့ မဟုတ်ဘူး။ ကျွန်တော်တို့ သုတေသနမှာက ၂ မျိုးရှိတယ်။ Basic Research နဲ့ Apply Research ဆိုပြီးပေါ့။ တချို့သုတေသနတွေက Basic Research အဆင့်ပဲရှိတယ်။ အဲလိုသုတေသနတွေတောင်မှာ ပုံမှန်အဆင့်ထိတောင် မရောက်ဘူး။ သုတေသနလို့ အမည်ခံထားတဲ့ သုတေသနတွေပဲဖြစ်တယ်။ လောလောဆယ်အနေအထားက အလုပ်ဖြစ်ရုံပဲလုပ်ရတာ များနေတယ်။ တော်တော်များများက တက္ကသိုလ်တွေရဲ့ဖွဲ့စည်းပုံပေါ့။ စာရွက်ထဲမှာရှိတဲ့ ဖွဲ့စည်းပုံနဲ့ လက်တွေ့ဝင်အားနဲ့က မမျှတဘူး။ အခုဆိုရင် တက္ကသိုလ်တွေမှာ One Campus-Two Systems ဆိုတာ ကျင့်သုံးနေပြီ။ ကျွန်တော်တို့က အဝေးသင်ကိစ္စတွေရှိတယ်။ နေ့သင်တန်းစာစစ်ရတာ ရှိတယ်။ အဲလိုနဲ့ အနီးကပ်သင်တန်း အဲဒီတော့ သုတေသနရက်သတ္တပတ်ဆိုပေမယ့် မအားတဲ့ကြားကပဲ အဖြစ်လုပ်လိုက်ရတာကများတယ်။ နောက် ကျောင်းဖွဲ့စည်းပုံမှာ သုတေသနဌာနနဲ့ သင်ကြားရေးဌာနကို သီးခြားဖွဲ့စည်းထားခြင်းမရှိတာကလည်း ပြဿနာတစ်ခုပေါ့။ သီးခြားသုတေသနဌာန စဉ်ဆက်မပြတ်သုတေသနလုပ်တဲ့သူ ရှိနေရမှာ။ သုတေသနဌာနမရှိဘဲ သင်ကြားရေးဌာနက ပူးတွဲလုပ်ဆောင်ရတဲ့အခါ ပြဿနာတွေရှိတယ်ပေါ့။ တော်တော်များများ သုတေသနတွေက အဖြစ်ပဲ လုပ်ရတာများတယ်။ စာတမ်းဖတ်ပွဲတွေကတော့ ဌာနအဆင့်မှာ လစဉ်ရှိတယ်။ စာရွက်ပေါ်မှာရှိကြတာပေါ့။ တကယ်တမ်းလုပ်ဖြစ်ဖို့က တော်တော်ရှားတယ်။ တစ်နှစ်မှာ တစ်ကြိမ်၊ နှစ်ကြိမ်လောက်ပဲ ဖတ်ဖြစ်ကြတယ်။ အဲဒါတောင် ပါရဂူဘွဲ့ ကြိုကျောင်းသားတွေ ဖတ်ကြတာရှိမယ်။ ဆရာ၊ ဆရာမတွေစာတမ်းဖတ်ပွဲတော့ မလုပ်ဖြစ်တာက များတယ်။ ကျွန်တော်တို့အနေနဲ့ကတော့ ကျောင်းတွင်းအဆင့်ရှိမယ်။ ဌာနတွင်းရှိမယ်။ ကျောင်းတွင်းအဆင့်ကတော့ တစ်နှစ်တစ်ခါလောက် ဖတ်ကြတာမျိုးရှိတယ်။ နောက်ဝိဇ္ဇာ၊ သိပ္ပံပညာရှင်များ စာတမ်းဖတ်ပွဲဆိုတာ ရှိတယ်။ အဲဒီတော့ တကယ်စာတမ်းဖတ်ချင်တဲ့သူအတွက် တစ်နှစ်မှာ သုံးကြိမ်လောက် သုတေသနလုပ်ဖို့ အခွင့်အရေးရှိတယ်။ အများစုကတော့မလုပ်ဖြစ်ကြတာများပါတယ်။ 

အရင်တုန်းက တက္ကသိုလ်က တစ်နိုင်ငံလုံးမှာ ၂ ခုပဲရှိတယ်။ တက္ကသိုလ်ကြီးနှစ်ခုပဲ ရှိချိန်တုန်းက သုတေသနလုပ်ငန်းအတွက် လက်တွေ့ပစ္စည်းတွေက လုံလောက်တယ်။ တက္ကသိုလ်တွေ ဗုံးပေါလအောဖွင့်လိုက်တဲ့အချိန်မှာ သုတေသနဆိုတာ စာရွက်ပေါ်မှာပဲ ရှိတော့တာ။ သိပ္ပံသုတေသနမှာဆို လက်တွေ့ပစ္စည်းတွေ အများကြီးလိုအပ်တယ်။ အဲဒီလက်တွေ့ ပစ္စည်းတွေက ဈေးကလည်း အင်မတန်ကြီးတယ်။ အဲဒီတော့ ဖြည့်ဆည်းပေးနိုင်ခြင်းမရှိဘူး။ အဲဒီ တော့တက္ကသိုလ်တွေသာ ဖွင့်ထားတာ။ သုတေသနဆိုတာ ဆိတ်သုဉ်းနေတာကြာပြီပေါ့။ မဆလ လက်ထက်လောက်ကစပြီးတော့ ချို့ယွင်းလာတာပေါ့။ သိပ္ပံလက်တွေ့သုံးပစ္စည်းတွေက အမှန်မပြနိုင်တော့ဘူး။ အဲဒီအဆင့်ကနေ တဖြည်းဖြည်းလျှောကျလာလိုက်တာ လက်တွေ့လုပ်တယ်ဆိုတာက စာရွက်ပေါ်မှာ လက်မှတ်ထိုးတဲ့အဆင့်ကို ရောက်လာတယ်။ နောက်ကျမှ သုတေသနကို ဘယ်ဟာနဲ့ မြှင့်တင်လဲဆိုရင် ပါရဂူဘွဲ့ တို့ မဟာဘွဲ့တို့နဲ့ထပ်ပြီးလုပ်လိုက်တယ်။ အဲဒီအခါမှာ အဖြစ်လုပ်ကြတဲ့သုတေသနတွေပဲ ဖြစ်လာတယ်။ တကယ့်လက်တွေ့အသုံးချလို့ရတဲ့သုတေသနကတော့ ရှားနေတုန်းပဲ။ အခုတော့ ဆရာ၊ ဆရာမတွေ စိတ်ပါဝင်စားဖို့အတွက် ရာထူးတိုးတဲ့အခါမှာ သုတေသန ရမှတ်တွေကိုပါ ထည့်သွင်းစဉ်းစားတာရှိလာတယ်။ အခုချိန်မှာက အရည်အသွေးမီသည်ဖြစ်စေ၊ မမီသည်ဖြစ်စေ သုတေသနအလုပ်ကို နည်းနည်းကြိုးစားချင်စိတ်ဖြစ်လာတယ်။ ဒါတောင်မှ မြို့ပေါ်ကဆရာမနဲ့ နယ်ကဆရာမ အခွင့်အရေးမတူဘူးဆိုတဲ့ ပုံစံမျိုးတွေရှိနေတယ်။ ဘာကြောင့်လဲဆိုတော့ ဝိဇ္ဇာက စာအုပ်၊ စာတမ်းပဲ အဓိကထားပြီးသုတေသနလုပ်ရတာ။ သိပ္ပံတွေမှာကျ လက်တွေ့ပစ္စည်းတွေက မြို့ကျောင်းမှာနေ တဲ့သူတွေလောက် အခွင့်မရတော့ မြို့ကျောင်းက လူတွေပဲ သုတေသနလုပ်ခွင့်ရတဲ့ အခြေအနေဖြစ်နေတယ်။ ဖြစ်နိုင်ရင်တော့ သုတေသနစင်တာကြီးကို တစ်နိုင်ငံလုံးမှာတစ်နေရာပဲထားပြီးတော့ ဆရာ၊ ဆရာမတွေအတွက် သုတေသနစနစ်တကျလုပ်နိုင်ဖို့ အခွင့်အလမ်းတွေပေးထားရင် ပိုပြီးအဆင်ပြေတာပေါ့။ သင်ကြားရေးနဲ့ သုတေသနဌာနခွဲပြီးတော့ သီးသန့်သုတေသနလုပ်တဲ့သူတွေကို နေရာတစ်ခုပေးလိုက်ရင် အရည်အသွေးရှိတဲ့ သုတေသနတွေ ထွက်လာနိုင်တယ်ပေါ့။ သုတေသနကိုအမှတ်ပေးတာ ကောင်းပေမယ့် ပြီးပြည့်စုံမှုတော့မရှိသေးဘူး။

သုတေသနလုပ်တဲ့သူကို အားပေးချီးမြှောက်တယ်ဆိုတာထက် တစ်လောကပဲ မုံရွာတက္ကသိုလ်မှာဖြစ်သွားတာ အပြောင်းအရွှေ့တွေမှာ ဒေသအကျိုးပြုသုတေသနဆိုတာ ရှိတယ်။ အဲဒီသုတေသနလုပ်နေတဲ့သူက အပြောင်းအရွှေ့ပါသွားရင် အဲဒီလုပ်ငန်းကြီးက ရပ်တန့်သွားတာ။ အဲဒီမျိုးတွေ မဖြစ်ဖို့ရှောင်ရမယ်။ နောက်သုတေသနလုပ်တဲ့သူကို ထောက်ပံ့မှုရှိလားဆိုရင် ဘယ်သူမှ မထောက်ပံ့ဘူးလို့ပဲ ရှင်းရှင်းလင်းလင်းပြောချင်တယ်။ တကယ်သုတေသနလုပ်ဖို့အတွက် တင်ပြကြပါ၊ တောင်းဆိုကြပါဆိုပေမယ့် သုတေသန ဆိုတာက ခရီးတွေသွားရတယ်။ ကုန်ကျစရိတ်လည်း တအားများတယ်။ အဲဒီကုန်ကျစရိတ်ကို နိုင်ငံတော် ပညာရေးဝန်ကြီးဌာနက အပြည့်အစုံချပေးနိုင်ခြင်း မရှိဘူး။ တကယ့်သုတေသနကုန်ကျစရိတ်ရဲ့ ဆယ်ပုံတစ်ပုံတောင်မှ နိုင်ငံတော်ကချပေးတဲ့ ငွေမရဘူး။ မရတဲ့အပြင်ချည်နှောင်ထားတာတွေ ရှိသေးတယ်။ လက်တွေ့လုပ်ရတဲ့ သုတေသနက လွယ်တာမဟုတ်ဘူး။ တောထဲမှာရောက်နေပြီး တစ်လတစ်ခါ Report တွေတင်ရတယ်။ အဲလိုလုပ်ဖို့က မလွယ်ဘူး။ အဲဒီအခါ ပြင်ပကုမ္ပဏီတွေနဲ့ ပေါင်းလုပ်ရတာမျိုးရှိမယ်။ တတ်နိုင်တဲ့သူက ကိုယ့်ဘာသာပိုက်ဆံစိုက်လုပ်ကြတာရှိမယ်။ မတတ်နိုင်တဲ့သူက မလုပ်ဘူးပေါ့။ ခုနကပြောသလို သုတေသနစင်တာကြီးဖွင့်ထားပြီး သီးသန့်သုတေသနရန်ပုံငွေထောက်ပံ့နိုင်ရင် ပိုကောင်းတာပေါ့။ နိုင်ငံတိုးတက်ရေးမှာ သုတေသနဆိုတာ အရေးကြီးတယ်။ အခုလုပ်နေတဲ့ သုတေသနတွေက နိုင်ငံဖွံ့ဖြိုးတိုးတက်ရေးသာလုပ်နေကြတာ။ ဘယ်ဟာမှ Research ကိုမသွားဘူး။ တိုင်းအစိုးရကလည်း သုတေသနအဖွဲ့အစည်းဆိုတာလည်း ဖွဲ့ထားတာမရှိဘူး။ လက်ငုတ်လက်ရင်းက တက္ကသိုလ်တွေမှာပဲဖြစ်တဲ့အတွက် တက္ကသိုလ် သုတေသနကိုမြှင့်တင်နိုင်မှသာလျှင် နိုင်ငံတော်ကဏ္ဍပေါင်းစုံရဲ့ သုတေသနလုပ်ငန်းတွေ တိုးတက်လာမယ်လို့ထင်တယ်။ 

“အဲဒီပစ္စည်းကို အသုံးပြုဖို့ ပျက်စီးမှာစိုးလို့ ထုတ်မပေးဘူး”



ဦးစစ်သူအောင်(လက်ထောက်ကထိက၊ အဏ္ဏဝါသိပ္ပံဌာန၊ ပုသိမ်တက္ကသိုလ်)

လက်ရှိမှာက သုတေသနလုပ်တာ သူ့မေဂျာနဲ့သူ ကွဲလွဲမှုရှိမှာပေါ့။ ကျွန်တော်တို့ဆီမှာက ကိုယ်စိတ်ဝင်စားတာကို လုပ်ကြတာများပါတယ်။ ဆရာ၊ ဆရာမတစ်ယောက်က တစ်နှစ်ကိုစာတမ်း ဘယ်နှစောင်လုပ်ရမယ်ဆိုတာမျိုးတော့ သတ်မှတ်ထားတာမရှိဘူး။ သုတေသနကိုစိတ်ဝင်စားတဲ့သူက အချိန်ပြည့်ဒီသုတေသနကိုပဲ လုပ်နေတယ်။ စာတမ်းတွေ သွားဖတ်တယ်။ ဒါက သူ့ရဲ့စိတ်ပါဝင်စားမှုပေါ်မှာ မူတည်တယ်။ ကျွန်တော်တို့ပတ်ဝန်းကျင်မှာ သုတေသနစိတ်ဝင်စားတဲ့သူ အရမ်းနည်းပါတယ်။ ဒီပုသိမ်တက္ကသိုလ်မှာဆို ဆရာ၊ ဆရာမ ၄၀၀ နီးပါးရှိတယ်။ အဲဒီထဲကမှ စိတ်ဝင်စားသူသည် ၅၀ အောက်ပဲရှိတယ်။ အဓိကကတော့ မူဝါဒနဲ့လည်းဆိုင်တာပေါ့။ ဘာကြောင့်လဲ ဆိုတော့ တက္ကသိုလ်ဆရာ၊ ဆရာမနဲ့ အခြေခံဆရာ၊ ဆရာမဘာကွာလဲဆိုရင် ဒီသုတေသနအမြဲတမ်းလုပ်ရတာ ကွာတာပေါ့။ ဒီသုတေသနလုပ်ထားတာတွေကို ချပြပြီးမှ သင်ကြားမှုကို သွားရမှာ။ လက်ရှိကအဲဒီ အခြေအနေမျိုးမဖြစ်တော့ဘဲ ပြဋ္ဌာန်းစာအုပ်တွေထုတ်ပေးလိုက်တယ်။ ပြဋ္ဌာန်းစာအုပ်ကိုပဲ သင်ကြတာများတယ်။ လက်ရှိတွေ့ရှိချက်တွေကိုပဲ သင်တယ်ဆိုတာ မရှိတော့ဘူး။ အဲဒါက ယနေ့ခေတ်ပညာရေးရဲ့ အားနည်းချက်ပေါ့။ သုတေသနလုပ်မယ့် ဆရာ၊ ဆရာမတွေကို လွတ်လပ်ခွင့်ပေးသင့်တယ်။ ပြီးတော့သူ့တို့ကို ဖိအားတွေ၊ တာဝန်တွေကင်းသင့်တယ်။ ဆရာ၊ ဆရာမတွေက တာဝန်တွေများနေတဲ့အခါ သုတေသနကို ကောင်းကောင်းမွန်မွန် လုပ်လို့မရတော့ဘူး။ သူတို့မှာလည်း စားဝတ်နေရေးရှိတယ်။ အဲဒီအောက်မှာ အလုပ်လုပ်ရတယ်။ မြန်မာနိုင်ငံမှာ လက်ရှိဖြစ်နေတာက သုတေသနလုပ်တာက ဘွဲ့တစ်ခုအတွက်သာလျှင် လုပ်ကြတဲ့ပုံစံဖြစ်နေတယ်။ အဲဒါမျိုး ဘာကြောင့်ဖြစ်သလဲဆိုတော့ ကျွန်တော်တို့ဆီမှာက သုတေသနလုပ်တဲ့ဆရာ၊ ဆရာမက တာဝန်လည်းထမ်းဆောင်ရတယ်။ ရုံးတက်၊ ရုံးဆင်းတာဝန်တွေထမ်းဆောင်ရယ်။ စာသင်ရတယ်။ သူ့အိမ်အတွက်စားဝတ်နေရေးလုပ်ရတာရယ်၊ ဒီသုတေသနအလုပ်ကို မနိုင်တော့တာပေါ့။ အဲဒီမှာပင်ပန်းသွားပြီးတော့ သုတေသနလုပ်ဖို့အတွက် အချိန်မပေးနိုင်တော့ဘူး။ သုတေသနလုပ်ဖို့အတွက်ဆိုရင် အချိန်ပေးရမယ်။ သိပ္ပံမှာက အချိန်အတိအကျပေးပြီး လုပ်ရတာမျိုးရှိတယ်။ မနက် ၉ နာရီ လုပ်ရမယ့်အလုပ်က မနက် ၉ နာရီဆို လုပ်ကို လုပ်ရမယ်။ တခြားတာဝန်ပေးလိုက်တာတို့ အစည်းအဝေးခေါ်လိုက်တာတို့ဆိုရင် ဒါဆက်လုပ်လို့မရတော့ဘူး။ ဆရာ၊ ဆရာမ တာဝန်နဲ့ သုတေသနယှဉ်လိုက်တဲ့အခါမှာ တာဝန်ကိုပဲရွေးလိုက်တယ်။ ဒီသုတေသနမလုပ်လို့ အလုပ်ကိုထိခိုက်မှုမရှိဘူး။ တာဝန်ကိုမလုပ်ရင် အလုပ်ကိုထိခိုက်မယ်။ အဲဒီအခါ ကောင်းမွန်တဲ့ သုတေသနတွေ ထွက်မလာတော့ဘူး။ ဒါက ဆရာ၊ ဆရာမတွေရဲ့ အခက်အခဲပေါ့။ နောက်ပြီး လက်တွေ့လုပ်တဲ့အခါမှာ အသုံးချရမယ့် အထောက်အပံ့ပစ္စည်းတွေကလည်း နိုင်ငံတကာနဲ့ယှဉ်လို့မရဘူး။ တစ်ခုခုလုပ်ချင်ပြီဆိုရင် တိုင်းရမယ့်ပစ္စည်းတွေဆိုရင် အလွယ်တကူယူလို့မရဘူး။ တချို့ကျလည်း ပစ္စည်းရှိတယ်။ ဒါပေမဲ့ဌာနက သိမ်းထားတာရှိမယ်။ နိုင်ငံတော်က ထောက်ပံ့ပေးတာ ရှိချင်ရှိမယ်။ အဲဒီပစ္စည်းကို အသုံးပြုဖို့ ပျက်စီးမှာစိုးလို့ထုတ်မပေးဘူး။ အနေကြာတဲ့ဆရာ၊ ဆရာမသာလျှင် ကိုယ့်တက္ကသိုလ်မှာ ဘာရှိတယ်ဆိုတာ သိတာ။ အခုမှရောက်တဲ့ဆရာတွေက ဒါလေးလိုချင်တယ်။ ဒါလေးတိုင်းချင်တယ်။ ဒါပေမဲ့လည်း အဲဒီပစ္စည်းက ဌာနမှာရှိမှန်းမသိဘူး။ သိမ်းထားတာကိုး။ ဒီပစ္စည်းတွေသည် တန်ဖိုးကြီးတယ်။ ပျက်စီးသွားမှာ စိုးရိမ်ကြတယ်။ ဒါကလည်း ကောင်းတဲ့အရာတော့မဟုတ်ဘူး။ ဒီပစ္စည်းတွေက သုတေသနလုပ်တဲ့အခါ ဆရာ၊ ဆရာမတွေသုံးဖို့ ထုတ်ထားပေးသင့်တယ်။ သုံးရင်တော့ ပျက်တဲ့အခါပျက်မှာပေါ့။ ပေးမသုံးဘဲ ဒီတိုင်းထားရင်းလည်း ပျက်စီးသွားတာတွေ အများကြီးကြုံဖူးတယ်။ သုတေသနလုပ်ငန်းတွေ နိုင်ငံတကာ အဆင့်မီဖို့ဆိုရင် Researcher  ကောင်းတွေ မွေးထုတ်ပေးဖို့လိုတယ်။ ပြီးတဲ့အခါမှာ မူဝါဒပိုင်းပေါ့။ လက်ရှိသုတေသနလုပ်နေတာက ဘွဲ့လွန်စာတမ်းတွေမှာပဲ လုပ်ကြတာ။ ဒါပေမဲ့ဘွဲ့လွန်စာတမ်းမှာ အားနည်းတာက မှန်ကန်သော အောင်မြင်သော သုတေသနပဲလိုချင်တယ်။ လုပ်နေရင်းနဲ့ မအောင်မြင်တဲ့ဟာဆိုရင် သူတို့ကမလိုချင်ဘူး။ အဲဒါကလည်း မှားယွင်းနေတဲ့မူဝါဒလို့ထင်တယ်။ သူများနိုင်ငံနဲ့ ယှဉ်တဲ့အခါကွာဟမှုက အဲဒါတွေပေါ့။ သုတေသနလုပ်ရင်းတန်းလန်းမှာ မျှော်မှန်းထားတာထွက်ချင်မှ လည်းထွက်မယ်။ ကြိုးစားအားထုတ်မှုမှန်လား၊ မှန်တယ်ဆိုရင် မအောင်မြင်လည်းရတယ်။ လက်ခံတယ်။ အဲဒါမျိုးဖြစ်ရမှာ။ သုတေသနလုပ်တဲ့ဆရာ၊ ဆရာမတွေအတွက် လိုအပ်တဲ့အထောက်အပံ့တွေရှိလားဆိုတော့လည်း မြန်မာနိုင်ငံမှာက သုတေသနလုပ်မယ်ဆိုရင် ကိုယ့်ပိုက်ဆံနဲ့ကိုယ်လုပ်ရတယ်။ တချို့က တော်ရက်သားနဲ့ ငွေကြေးမတတ်နိုင်လို့ မလုပ်ရတာတွေရှိတယ်။ တစ်ဖက်ကလည်း စားဝတ်နေရေးရှိတယ်။ တစ်ဖက်ကလည်း သုတေသနရှိတယ်။ အဲဒီတော့ မလုပ်နိုင်ဘူး။ ဒါတွေကလည်း နိုင်ငံတော်အတွက် ကောင်းမွန်တဲ့ရလဒ်တွေ မဟုတ်ဘူး။ ဒါတွေက နိုင်ငံတော်က ထောက်ပံ့ပေးသင့်တဲ့အရာလို့ ကျွန်တော်ကတော့ မြင်တယ်။ သုတေသနလုပ်တဲ့ဆရာ၊ ဆရာမအတွက် လိုအပ်တဲ့ပစ္စည်း၊ိုအပ်တဲ့ ငွေရေးကြေးရေး၊ ပညာရပ်ပိုင်းဆိုင်ရာတွေ ရင်းနှီးမြှုပ်နှံပေးရမယ်။ ပညာရပ်ပိုင်းမှာ လိုအပ်တဲ့ပညာရှင်တွေကို နိုင်ငံခြားကခေါ်ပေးတာမျိုးဖြစ်ဖြစ်ပေါ့။ စာအုပ်တွေထောက်ပံ့တာဖြစ်ဖြစ် လုပ်ပေးသင့်တယ်လို့မြင်တယ်။ သုတေသနလုပ်တယ်ဆိုတာ အမှန်တော့ သီအိုရီရှာပေးတာပေါ့။ ထွက်လာတဲ့ သီအိုရီကို နိုင်ငံတော်ကိုအပ်ရတာပဲ။ အဲဒီပုံစံနဲ့ ပညာရေးကသွားနိုင်ရင် အဆင်ပြေတာပေါ့။ လက်ရှိက အဲဒီလိုမဟုတ်ခဲ့ဘူး။ တွေ့ရှိချက်တွေရဖို့ဆိုရင် ပညာရေးကောင်းဖို့ဆိုရင် သုတေသနတွေ များများလုပ်ရမယ်။

မြဇာခြည်သင်း