News

POST TYPE

EDUCATION

မသန်စွမ်းသူများနှင့် ဆရာဖြစ်ခွင့်
07-Jul-2018 tagged as

မသန်စွမ်းသူများ ပညာသင်ယူခွင့်နှင့် ဆရာဖြစ်ခွင့်က မြေပြင်အခြေအနေတွင် အတားအဆီးများနှင့် ရင်ဆိုင်နေရဆဲဖြစ်သည်။ ထိုအခြေအနေများအပေါ် မသန်စွမ်းသူများအခွင့်အရေး လှုပ်ရှားသူများနှင့် လက်တွေ့ကြုံခဲ့ရသူများ၏ သဘောထားအမြင်များ၊ ဖြစ်စဉ်များကို စာဖတ်ပရိသတ်အတွက် The Voice က ကောက်နုတ်ဖော်ပြလိုက်ပါသည်။

“စီမံခန့်ခွဲမှုမလုပ်ချင်တာနဲ့ အလုပ်ရှုပ်တယ်ဆိုပြီး ငြင်းပယ်လိုက်တာလို့ ကျွန်တော်တို့မြင်တယ်”

ကိုရဲဝင်း (မြန်မာနိုင်ငံ မသန်စွမ်းသူများအသင်းချုပ်၊ မသန်စွမ်းသူများပညာရေးကော်မတီ အထွေထွေအတွင်းရေးမှူး)

ရှေးရိုးစွဲအယူအဆတွေပေါ့။ ဆရာဆိုတာ စံပြဖြစ်ရမယ်ဆိုတာမျိုး ကျင့်သုံးချင်တာပေါ့။ စံပြဆိုတော့ ဘာစံပြလဲဆိုတာ ရှိပါသေးတယ်။ အဲဒါကို ကျွန်တော်တို့ကထပ်ပြီး မေးခွန်းထုတ်ချင်ပါတယ်။ ဆရာတစ်ယောက်က ကိုယ်လက်အင်္ဂါမပြည့်စုံတာနဲ့ ကျောင်းသားတွေရှေ့မှာ စံပြမဖြစ်ထိုက်တော့ဘူးလား။ စာသင်ကောင်းတယ်၊ သင်ကြားရေးကောင်းတယ်ဆိုရင် အကုန်လုံးက လက်ခံကြတာပဲ။ အဲဒီတော့ အဓိကကျတာ သင်ကြားရေးကျွမ်းကျင် ကောင်းမွန်ဖို့လား၊ ဥပဓိရုပ်ကောင်းမွန်ဖို့လား။ ရုပ်ကိုပဲ ဦးစားပေးတာလား။ ဥပဓိရုပ်အဆင်ပြေပြီး စာသင်မကောင်းတဲ့ဆရာတွေလည်း အများကြီးပါပဲ။ တွေ့နေရတာပဲလေ။ အဲဒီတော့ စာသင်ကောင်းရမယ်၊ ကိုယ်သင်တဲ့၊ တတ်တဲ့ဘာသာရပ်ကို ထူးချွန်စွာ သေချာတတ်မြောက်ရမယ်၊ ကလေးတွေကို ကောင်းမွန်စွာ ပြန်ကြားသင်ပေးနိုင်ရင် ဒါဟာဆရာတစ်ဦးရဲ့ အရည်အချင်းနဲ့ ပြည့်စုံနေပါပြီ။ မူလတန်းဆင့်မှာ ဆရာတွေပင်ပန်းတယ်ဆိုတာ ကျွန်တော်တို့သိပါတယ်။ ဒါပေမဲ့ အခုဟာ နိုင်ငံခြားတိုင်းပြည်တွေမှာ ဒီလိုမသန်စွမ်းဆရာတွေကို ဘယ်လိုနေရာခန့်ထားတယ်၊ ဘယ်လိုစီမံခန့်ခွဲပေးတယ်ဆိုတာ ပညာရေးဝန်ကြီးဌာနအနေနဲ့ လေ့လာဖို့လိုတယ်။ ကျွန်တော်တို့ NNER အဖွဲ့တွေနဲ့ အမေရိကန်ပြည်ထောင်စုကို လေ့လာရေးသွားတော့ ကျောင်းဆရာတစ်ယောက်ဆိုရင် KG တန်းမှာ ကလေးတွေကို စာသင်နေတာ။ ဓာတ်ပုံတွေရိုက်ပြီး ယူလာတယ်။ သူက Wheelchair နဲ့ စာသင်ခန်းစီမံခန့်ခွဲမှုကို သေသေချာချာလုပ်ပြီးတော့ ကလေးတွေကို စာသင်ပေးနိုင်သေးတယ်။ ကျွန်တော်တို့နိုင်ငံမှာ အကန့်အသတ်တွေရှိနေသေးတုန်းပဲဆိုတာ လက်ခံတယ်။ စာသင်ကျောင်းတွေဟာ Wheelchair သမားသွားဖို့ အကန့်အသတ်ဖြစ်နေသေးတယ်။ ကျောင်းဆရာ တစ်ယောက်က Wheelchair နဲ့စာသင်ရင် ကလေးတွေအတွက် အဆင်ပြေပါ့မလားဆိုတဲ့ စိုးရိမ်စိတ်လည်း ရှိနေကြတယ်။ 

ကျွန်တော်ဆိုရင်လည်း ချိုင်းထောက်နဲ့ရပ်ပြီး သင်တာပဲ။ အဲဒီတော့ လူတိုင်းဟာလည်း သူလုပ်နိုင်လို့ ဝင်လျှောက်တာပဲ။ ကျွန်တော်တို့သိရတဲ့စာရင်းအရ ၂၀၁၆ ကဆိုရင် ပညာရေးကောလိပ်လျှောက်တဲ့အထဲမှာ Wheelchair သမားဆိုတာမပါဘူး။ သူတို့ကိုယ် သူတို့သိတယ်။ ဒီနိုင်ငံအနေအထားနဲ့ Wheelchair သမားက စာသင်လို့ အဆင်မပြေတာသိတော့ မလျှောက်ကြဘူး။ ချိုင်းထောက်သမားလည်း မပါဘူး။ အခုဖြစ်နေတဲ့ပြဿနာက မသန်စွမ်းမှုက မပြင်းထန်တဲ့သူတွေ - ဥပမာ- လက်ကလေးတစ်ဖက်မသန်တာ၊ ခြေထောက်တစ်ဖက် နည်းနည်းမသန်တာတို့၊ ခြေပူး၊ လက်ပူးဖြစ်နေတာတို့ အဲဒီလိုမျိုးတွေပဲ ပညာရေးကောလိပ်တွေ၊ တက္ကသိုလ်တွေကို လျှောက်ကြတာတွေ့ရတယ်။ ကျန်တဲ့မသန်စွမ်းတွေက သူတို့အသက်မွေးဝမ်းကျောင်းအတွက် ဘာလုပ်ရမယ်ဆိုတာသိတယ်။ ကျွန်တော်တို့ပြောချင်တာ မသန်စွမ်းမှု မပြင်းထန်တဲ့သူတွေရော ကျောင်းဆရာ၊ ဆရာမဖြစ်ခွင့်မရှိတော့ဘူးလား။ သူတို့မှာ ကြိုးစားနိုင်တဲ့ အင်အားတွေရှိတယ်။ တစ်နေကုန်လည်း စာသင်နိုင်တယ်။ အခုဆိုရင် အခြေခံပညာမှာ ဆရာ၊ ဆရာမတွေ လိုနေတာ။ နိုင်ငံတော်အတွက် တန်ဖိုးရှိတဲ့ လူ့စွမ်းအားအရင်းအမြစ်တွေ ဆုံးရှုံးရတာပေါ့ဗျာ။ 

မြန်မာနိုင်ငံသန်ခေါင်းစာရင်းအရ မသန်စွမ်းဦးရေက ခန့်မှန်းချက်ပဲရှိသေးတယ်။ တကယ့်လက်တွေ့မှာ ဒီထက်ပိုများနိုင်တယ်လို့ ကမ္ဘာ့ကျန်းမာရေးအဖွဲ့ (WHO) က ခန့်မှန်းထားတယ်။ အဲဒီတော့ နိုင်ငံတော့်အတွက် အထောက်အကူဖြစ်မယ့် လူ့စွမ်းအားအရင်း အမြစ်တွေမဆုံးရှုံးအောင်၊ လုပ်အားတွေမဆုံးရှုံးအောင် မသန်စွမ်းသူတွေ ပညာသင်ကြားခွင့်ရဖို့ ဘယ်လိုလုပ်ပေးမလဲဆိုတာ စဉ်းစားသင့်တယ်။ တက္ကသိုလ်တွေမှာ ဆရာဖြစ်ခွင့်က ကိုယ်အင်္ဂါမသန်စွမ်းတွေအတွက် အရင်ခေတ်က အတိုင်းအတာတစ်စုံတစ်ရာ ထိခွင့်ပြုခဲ့တယ်။ အခြေခံပညာကျောင်းတွေမှာ ဆရာဖြစ်ခွင့်အပိုင်းမှာတော့ တော်တော်ကြီးကို အမြင်သဘောထား ကွဲတာတွေရှိတယ်။ အဓိက အောက်အဆင့် (သူငယ်တန်း၊ ပထမတန်း၊ ဒုတိယတန်း၊ တတိယတန်း)အတန်းတွေမှာ ကလေးတွေကို ဘယ်လိုထိန်းမလဲ၊ ဘယ်လိုသင်မလဲဆိုတာပေါ့။ ဝိဝါဒကွဲပြားစရာတွေ၊ ငြင်းချက်ထုတ်စရာတွေ အများကြီးရှိနေပါသေးတယ်။ တကယ်လို့ မသန်စွမ်းဆရာတွေက အောက်အဆင့်တွေမှာ သင်လို့မရရင် အထက်အဆင့် (တတိယတန်း၊ စတုတ္ထတန်း စသဖြင့်) မှာ သင်လို့မရနိုင်ဘူးလား ပြန်စဉ်းစားသင့်ပါတယ်။ မသန်စွမ်း ဆရာ၊ ဆရာမတွေ ပါလာရင် ဘယ်လိုနေရာမျိုးတွေခန့်ရမလဲ၊ တချို့ ဆရာ၊ ဆရာမတွေက တောထဲသွားပြီး စာမသင်နိုင်ဘူး၊ မြစ်တွေ၊ ချောင်းတွေ၊ မြောင်းတွေကူးပြီး မသင်နိုင်ဘူးဆိုရင် ဒီဆရာ၊ ဆရာမတွေကို မြို့ပေါ်ထားလို့မရဘူးလား။ ဒါမှမဟုတ် သွားလာရေးအဆင်ပြေလောက်တဲ့ ရွာတွေမှာရော ခန့်ထားလို့မရဘူးလား။ ပညာရေးဝန်ကြီးဌာနက စဉ်းစားရမယ့် အချက်တွေပေါ့။ နောက်ပြီး ပညာရေးမှူးရုံးတွေက စီမံခန့်ခွဲရမယ့်ကိစ္စပေါ့။ စီမံခန့်ခွဲမှု သေသေချာချာလုပ်နိုင်ရင်တော့ လူ့စွမ်းအားအရင်းအမြစ် မဆုံးရှုံးတော့ဘူး။ အခုဟာ စီမံခန့်ခွဲမှုမလုပ်ချင်တာနဲ့ အလုပ်ရှုပ်တယ်ဆိုပြီး ငြင်းပယ်လိုက်တာလို့ ကျွန်တော်တို့မြင်တယ်။  


“ကာယအောင်ရင် ဝင်ခွင့်ရမယ်တဲ့။ ပညာရှိစကားပြောတာမှ မဟုတ်ဘဲ”

ကိုဉာဏ်ထွန်း (တောင်သာမြို့နယ်၊ မြင်းခြံခရိုင်)

ကျွန်တော်က PPTT လျှောက်ပါတယ်။ လျှောက်တဲ့နေရာမှာ အခက်အခဲတွေအများကြီးရှိတယ်။ ပထမအကြိမ်ကို ၂၀၁၄ ခုနှစ်က မိတ္ထီလာပညာရေးကောလိပ်မှာ လျှောက်တယ်။ ရေးဖြေစာမေးပွဲအောင်ပါတယ်။ နောက်လူတွေ့စစ်ဆေးမှုမှာ မဖြစ်နိုင်တာတွေ လုပ်ခိုင်းတယ်။ ဆရာက ကျွန်တော့်ကို ကာယလုပ်ခိုင်းတယ်။ မဖြစ်နိုင်ဘူးလေ။ ကာယအောင်ရင် ဝင်ခွင့်ရမယ်တဲ့။ ပညာရှိစကားပြောတာမှ မဟုတ်ဘဲ။ မသန်စွမ်းတစ်ယောက်က ကာယကို ဘယ်လိုလုပ်နိုင်မှာလဲ။ ကျွန်တော့်လောက် အခြေအနေမဆိုးတဲ့သူတွေလည်း ကျန်ခဲ့တယ်။ ဒုတိယတစ်ကြိမ်လျှောက်တယ်။ အဲဒီမှာ ဆေးထောက်ခံစာ တောင်းရတယ်။ ကျွန်တော်တို့ မြို့နယ်ဆရာဝန်ဆီမှာ ဆေးထောက်ခံချက်တောင်းတယ်။ ဒါပေမဲ့ မသန်စွမ်းတစ်ယောက်ကို ထောက်ခံချက်မပေးနိုင်ဘူးပြောတယ်။ ဒါကြောင့် ခရိုင်အဆင့်မှာသွားပြီး ဆေးထောက်ခံချက်ယူရတယ်။ ခရိုင်မှာကျ အဆင်ပြေသွားတယ်။ ဒါပေမဲ့ အချိန်တွေအများကြီးကြန့်ကြာတယ်။ ကိုယ့်မြို့နယ်မှာဆိုရင် ငွေကုန်ကြေးကျလည်း သက်သာမယ်။ အချိန်ကုန်လည်း သက်သာမယ်ပေါ့။ ကျွန်တော်ပြောချင်တာက မသန်စွမ်းတာက ကျန်းမာရေးမကောင်းတာမှ မဟုတ်ဘူး။ ဒုတိယအကြိမ်မှာ ပညာရေးကောလိပ်တော့ လျှောက်ခွင့်ရခဲ့တယ်။ ဒါပေမဲ့ ရေးဖြေစာမေးပွဲ မအောင်ခဲ့ဘူး။ ကျွန်တော်ပြောချင်တာက အများနည်းတူ အခွင့်အရေးရှိချင်တယ်။ ဒုတိယအကြိမ်လျှောက်တာကတော့ အများနည်းတူပါပဲ။ ဆေးထောက်ခံစာယူရတာကလွဲရင် ကျန်တာအဆင်ပြေပါတယ်။ ကျန်းမာရေးကောင်းမွန်ကြောင်း ရောဂါမရှိကြောင်း ထောက်ခံစာပေါ့။ မသန်စွမ်းဆိုတာ ရောဂါမှမဟုတ်ဘဲ။ ကျွန်တော့်အနေနဲ့ပြောချင်တာက မသန်စွမ်းတွေလည်း အများနည်းတူ ပညာသင်ထားတယ်။ သူတို့မှာလည်း အရည်အချင်းတွေရှိတယ်။ အဓိကက စာသင်နိုင်ဖို့ပဲ။ ကာယဆိုတာက ကျောင်းတွေမှာလည်း ကာယဆရာတွေရှိတယ်။ ကျွန်တော်ကတော့ နောက်နှစ်တွေလည်း ဆက်လျှောက်မှာပဲ။ ခုကတော့ ကွန်ပျူတာသင်နေတယ်။ ဒီကျောင်းဆရာအလုပ်ကို ဝါသနာပါလို့ကို လျှောက်မှာပါ။ မသန်စွမ်းတွေလည်း ပညာတတ်တွေပါ။ ခွဲခြားဆက်ဆံမှုမလုပ်ကြပါနဲ့လို့ ပြောချင်တယ်။  


“ခန္ဓာကိုယ်ကျန်းမာသန်စွမ်းပြီး ဆရာမတစ်ယောက်ရဲ့ အင်္ဂါရပ်နဲ့ကိုက်ညီရမယ် ဆိုတဲ့အချက်နဲ့ ငြိစွန်းတာပေါ့”

ဒေါ်မြင့်မြင့်ခိုင် (လူမှုဖူလုံရေးအသင်း၊ စည်းရုံးရေးမှူး၊ စစ်ကိုင်းတိုင်း၊ ယင်းမာပင်ခရိုင်၊ မင်းအူးကျေးရွာ)

ကျွန်မ ၂၀၁၇ ခုနှစ်က မုံရွာပညာရေးကောလိပ်မှာ PPTT (Pre-Service Primary Teacher Ttaining) လျှောက်တယ်။ အဲဒီမှာ ဝင်ခွင့်ရေးဖြေ စာမေးပွဲအောင်သွားတယ်။ ရက်ကိုတော့ အတိအကျ မမှတ်မိတော့ဘူး။ ရေးဖြေအောင်ပြီး လူတွေ့စစ်ဆေးတယ်။ ကျွန်မတို့ ယင်းမာပင်ခရိုင်မှာဆိုရင် ၁၂၅ ယောက်က ရေးဖြေအောင်တယ်။ အောင်တဲ့သူတွေကို လူတွေ့စစ်ဖို့ မနက် ၉ နာရီအရောက် ခေါ်လိုက်တယ်။ ရောက်ရောက်ချင်း ဆရာ ၂ ယောက်၊ ဆရာမ ၂ ယောက်က လူတွေ့စစ်တယ်။ မုံရွာတိုင်းပညာရေးမှူးရုံးမှာ စစ်တာပေါ့။ စစချင်း လက်မှတ်ထိုးရတယ်။ နောက်ကျွန်မတို့ ဆယ်တန်းအောင်လက်မှတ်၊ ဘွဲ့လက်မှတ်ရယ် မှတ်ပုံတင်ပြရတယ်။ ပြပြီးမှမေးတယ်။ ကျရာဒေသမှာ တာဝန်ထမ်းဆောင်နိုင်လားမေးတယ်။ ကျွန်မနာမည်မေးတယ်။ နေရပ်လိပ်စာမေးတယ်။ ပြီးတော့ စာသင်ပုန်းမှာ ကျွန်မတို့နေရပ်လိပ်စာတွေကို ထွက်ရေးပြရတယ်။ နောက်ကျရာဒေသမှာ တာဝန်ထမ်းဆောက်နိုင်ခြင်း ရှိ မရှိ လက်မှတ်ထိုးရတယ်။ တစ်ယောက်ကိုအလွန်ဆုံး ၂ မိနစ် ၃ နစ်လောက်ပဲကြာတယ်။ ကျွန်မခြေထောက်နဲ့ပတ်သတ်ပြီးလည်း မမေးဘူး။ ကျွန်မက လုံးဝ မသန်စွမ်းကြီးထဲမှာလည်း မပါဘူး။ အဝေးကကြည့်ရင်တောင် မသိသာပါဘူး။ အောင်စာရင်းထွက်လာတဲ့ အခါကျ ကျွန်မ မပါဘူး။ ဒါနဲ့ ယင်းမာပင်ပညာရေးမှူးရုံးကို သွားမေးတယ်။ ဘာကြောင့် ကျွန်မ မပါတာလဲပေါ့။ ကျွန်မက မသန်စွမ်းဖြစ်လို့လားဆိုတော့ အဲဒီလို မဟုတ်ဘူး။ သူတို့ခေါ်ခိုင်းသလောက်ပဲ ခေါ်ရတာလို့ ပြောတယ်။ ကျွန်မက လူမှုရေးဝန်ကြီးဆီ စာတင်တယ်။ အဲဒီမှာ လက်ထောက် ၃ ယောက်နဲ့ချိတ်ပေးတယ်။ အဲဒီမှာ ပညာရေးပိုင်းက ဆရာတစ်ယောက်ပါတယ်။ အဲဒီဆရာပြောတဲ့ချိန်မှာ ကျွန်မသိခဲ့ရတာက ခန္ဓာကိုယ်ကျန်းမာသန်စွမ်းပြီး ဆရာမတစ်ယောက်ရဲ့ အင်္ဂါရပ်နဲ့ ကိုက်ညီရမယ်ဆိုတဲ့အချက်နဲ့ငြိစွန်းတာပေါ့။ 

ကျွန်မအနေနဲ့က ပညာရေးကောလိပ်မလျှောက်ခင်က ဒီအချက်ကို သိမထားဘူး။ ကျွန်မတို့မြို့မှာ ကျွန်မတစ်ယောက်ပဲ ပထမဆုံးဒီအချက်နဲ့ငြိတာပါ။ ဒါပေမဲ့ ဒီနှစ်တော့ ပညာရေးကောလိပ်တွေက လူတွေ့စစ်ဆေးတာမျိုးမရှိတော့ ရေးဖြေအောင်တဲ့သူအကုန်လုံးကို လက်ခံတယ်။ မသန်စွမ်းတွေကိုရော လက်ခံတယ်လို့ ပြောလို့ရတာပေါ့။ ကျွန်မအနေနဲ့က အခုလိုခွဲခြား ဆက်ဆံတာမျိုးတွေရှိတာကို လက်မခံနိုင်ဘူး။ ကိုယ်က ဒီဆရာမအလုပ်ကို လုံးဝဝါသနာပါလို့ လျှောက်တာဖြစ်တဲ့အတွက် ကျောင်းတက်ဖို့ သင်တန်းတက်ဖို့ အားလုံးပြင်ဆင်ပြီးသွားပြီ။ အဲဒီအချိန်မှာ ခန္ဓာကိုယ်ကျန်းမာသန်စွမ်းပြီး ဆရာမတစ်ယောက်ရဲ့အင်္ဂါရပ်နဲ့ ကိုက်ညီရမယ်ဆိုတဲ့အချက်နဲ့ ငြိတဲ့အတွက် နောက်ထပ်ဆက်ဖြေဖို့ လုံးဝဆန္ဒမရှိတော့ဘူး။ ကျွန်မနေနဲ့က ဒီအချက်နဲ့ငြိစွန်းမှန်းမသိလို့ ပညာရေးမှူးရုံးကိုသွားခဲ့တာ။ ကျွန်မသိခဲ့ရင် ပညာရေးမှူးရုံးကိုလည်း လုံးဝသွားမှာမဟုတ်ဘူး။ သူတို့ဘက် မဟုတ်ဘူးပြောပေမယ့် ခွဲခြားခံရတာ သိသာတယ်။ ဒီကိစ္စအတွက် လူမှုရေးဝန်ကြီးက စစ်တော့စစ်ပေးတယ်။ ဒါပေမဲ့ စာပြန်တာ၊ အကြောင်းပြန်တာမျိုး လုံးဝမရှိခဲ့ဘူး။ ကြာလည်းကြာခဲ့ပြီဆိုတော့ အခုကတော့ သိပ်ပြီးမခံစားရတော့ပါဘူး။  

  • TAGS