News

POST TYPE

EDUCATION

တရုတ်နိုင်ငံကျောင်းများနှင့် AI ပညာရေး
02-Jun-2018
၂၀၁၇ ခုနှစ်ကတည်းက တရုတ်ခေါင်းဆောင်များသည် လာမည့် ၂၀၃၀ ပြည့်နှစ်တွင် AI သုတေသနလုပ်ငန်းများ၌ ကမ္ဘာကို ဦးဆောင်နိုင်သည့် နိုင်ငံကြီးတစ်နိုင်ငံဖြစ်နေရမည်ဆိုသည် Masterplan ကို ချမှတ်ထားသည်။ ထိုလမ်းပြမြေပုံကို ရေးဆွဲထားပြီးနောက် တရုတ်လူ့ဘောင်အဖွဲ့အစည်းတွင် AI (Artificial Intelligence) ကို မည်သို့ထည့်သွင်းမည်နည်း၊ မြို့ပြစက်မှုလုပ်ငန်းများတွင် AI ကို မည်သို့ထည့်သွင်းအသုံးချမည်နည်း ဆိုသည်တို့ကိုလည်း လေ့လာဆန်းစစ်နေကြသည်။ 

တရုတ်တို့ချမှတ်ထားသည့် လမ်းပြမြေပုံက ပညာရေးကို အဆင့်မမြှင့်ပေးဘဲ လုံးဝမရနိုင်ကြောင်းလည်း ကောင်းစွာ သဘောပေါက်ထားသည်။ ထို့ကြောင့် ၂၁ ရာစုနှင့် ကိုက်ညီမည့် ပညာရေးစနစ်ကို ပြုပြင်ပြောင်းလဲရန်လည်း ကြိုးစားအားထုတ်နေကြသည်။ မည်သည့် ပညာရေးစနစ်မျိုးကို သင်ကြားမည်နည်းကို သူတို့တွေးထားပြီးဖြစ်သည်။ တီထွင်ဖန်တီးစွမ်းအား ကောင်းသူများ အနာဂတ်တွင် လိုအပ်နေသည်။ ထိုသူများကို မွေးထုတ်နိုင်သည့် ပညာရေးစနစ်ကို သူတို့အဖြေရှာနေကြသည်။

တရုတ်နိုင်ငံတွင် ယခုအခါ တစ်နိုင်ငံလုံး၌ ဖြန့်ကြက်အသုံးပြုနေသည့် နည်းစနစ်မှာ လူမျက်နှာသွင်ပြင်ကို မှတ်သားပြီး တုံ့ပြန်ဖော်ဆောင်ပေးနိုင်မည့် စနစ်ဖြစ်သည်။ လမ်းသွားနေသူအားလုံးကို စောင့်ကြည့်ပြီး ဆော့ဖ်ဝဲနှင့် တိုက်ဆိုင်စစ်ဆေးမည်။ ငွေပေးငွေယူကိစ္စများ မျက်နှာပြလိုက်ရုံသာဖြစ်သည်။ ရုံးဝင်၊ အဆောင်ဝင် ကိစ္စတွေကအစ လုံခြုံရေးအတွက် မျက်နှာပြင်မှတ်သားစနစ်ကိုသာ အသုံးပြုရန်စီစဉ်နေသည်။ ထိုစနစ်က နောက်ဆုံး ကျောင်းစာသင်ခန်းအတွင်းအထိ ရောက်လာပြီ။ 

တရုတ်တို့အသွင်ပြောင်းမည့် စာသင်ခန်းစနစ်သည် (Intelligence Classroom) စနစ်ဖြစ်သည်။ စာသင်ခန်းတိုင်းကို စက္ကန့် ၃၀ တစ်ကြိမ်စောင့်ကြည့်မည်။ ကျောင်းသားများ၏ မျက်နှာများကို ဆော့ဖ်ဝဲလ်ဖြင့် Scan ဖတ်ကြည့်နေမည်။ ကျောင်းသားတွေ ပျော်နေသလား၊ ဝမ်းနည်းနေသလား၊ ကြောက်နေလား၊ စိတ်ဆိုးနေသလား အားလုံးကို ဆော့ဖ်ဝဲလ်ဖြင့် စောင့်ကြည့်ပြီး ကွန်ပျူတာက အဆုံးအဖြတ်ပေးနေမည်။ စာသင်ခန်းအတွင်း ကင်မရာကို ကျောက်သင်ပုန်းကြီးအပေါ်တွင် တပ်ဆင်ထားမည်။ ကျောင်းသားများ၏ အနေအထားကို ကွန်ပျူတာ၏ အချက်ပေးမှုအရ မည်သို့ဆက်လုပ်ရမည်ကို ဆရာတွေက ဆုံးဖြတ်သင်ကြားသွားကြရမည်။

သဘောမှာ စာသင်ခန်းများတွင် ကျောင်းသားများကိုသာမက ဆရာများကိုပါ တစ်ချိန်လုံး စောင့်ကြည့်ပြီး မှတ်တမ်းယူနေမည်ဆိုသည့် သဘောဖြစ်သည်။ ကျောင်းသားများ၏ ကျောင်းတက်မှုမှတ်တမ်း၊ ပညာရေးအပေါ် စိတ်ဝင်စားမှု၊ တုံ့ပြန်မှုများအပြင် ဆရာတွေ၏သင်ပြမှုကိုလည်း အကဲဖြတ်အမှတ်ပေးနိုင်မည့်စနစ်ဟု ဆိုနိုင်သည်။ ကျောင်းတွင် စောင့်ကြည့်နေသည့် ကင်မရာများရှိနေသည်ကို သိထားခြင်းကပင် ယခင်လို အချောင်ခို၍မရတော့ကြောင်း ကောင်းစွာသိစေလိမ့်မည်ဟုဆိုသည်။ 

ယနေ့ဆိုလျှင် မျက်နှာပြင်ဖတ်ဆော့ဖ်ဝဲစနစ်ကို စမ်းသပ်နေသည့် ကျောင်းပေါင်း တရုတ်နိုင်ငံတွင် ၆၀,၀၀၀ ခန့်ရှိသည်။ ပညာရေးတွင် စောင့်ကြည့်အကဲဖြတ်ခြင်းက ထိရောက်သည်ဆိုလျှင် ဆော့ဖ်ဝဲနှင့် နည်းပညာအထောက်အကူများကို ယူခြင်းလောက် ထိရောက်သည့်နည်းမရှိဟု ယူဆကာ စမ်းသပ်နေခြင်းဖြစ်သည်။ 

ကွန်ပျူတာနည်းပညာက လူသားတို့၏ ပြဿနာအတော်များများကို ဖြေရှင်းပေးနိုင်သည့်ခေတ် ရောက်လာပြီဖြစ်သည်။ ကျောင်းသားများကို စောင့်ကြည့်ပြီး အကဲဖြတ်ကာ အမှတ် သို့မဟုတ် အဆင့်ခွဲခြားမှုကိုပင် စက်က လုပ်ဆောင်ကောင်း လုပ်လာလိမ့်မည်ဟုဆိုကြသည်။ ကျောင်းသားတစ်ယောက်၏ စိတ်ပါဝင်စားမှုနှင့် မျက်နှာအနေအထားကို ဆော့ဖ်ဝဲလ်ဖြင့် လုပ်ဆောင်နိုင်သည်ဆိုခြင်းကပင် ပညာရေးအတွက် ပြုပြင်ပြောင်းလဲမှု အဆင့်တစ်ဆင့်ကို ရောက်စေလိမ့်မည်ဟု တရုတ်တို့က ယူဆထားသည်။ 

ကျောင်းသားသန်းပေါင်းများစွာကို ဗဟိုက စောင့်ကြည့်ပြီး ထိန်းချုပ်ကာ ပိုင်းဖြတ်အမှတ်ပေးရမည့် ကွန်ရက်စနစ်ကြီးတစ်ခုကိုလည်း တရုတ်တို့စဉ်းစားနေကြပြီဖြစ်သည်။ ပြည်သူတို့ကို စောင့်ကြည့်ရန် လမ်းဆုံလမ်းခွတိုင်းတွင် ကင်မရာတွေထားလာသည်။ လုပ်ငန်းတိုင်း၊ နေရာတိုင်း၊ ဘဏ်တိုင်းတွင်လည်း ကင်မရာများဖြင့် စောင့်ကြည့်မည်။ နောက်ဆုံး ပညာရေးတွင်ပါ ဗဟိုဦးစီးစနစ်ဖြင့် ချုပ်ကိုင်စောင့်ကြည့်ပြီး ပိုင်းဖြတ်နိုင်မည့် စနစ်တစ်ခုဆီသို့ တရုတ်တို့က ဦးတည်ရွေ့နေကြသည်။ 

လာမည့် ၂၀၂၀ ပြည့်နှစ်လောက်တွင် ဗဟိုက အမှတ်ပေးပိုင်းဖြတ်သည့် အဆင့်တစ်ခုဆီသို့ ရောက်ကောင်း ရောက်လာနိုင်ပါသည်။ ထိုအချိန်တွင် စာမေးပွဲလိုပါဦးမည်လော၊ ရှိပါဦးမည်လော။ ကျောင်းသားတစ်ယောက် ဘာလုပ်လုပ် ဗဟိုတွင် မှတ်တမ်းတွေက ရှိနေမည်သာဖြစ်သည်။ ထိုမှတ်တမ်းများသည် သူ့အနာဂတ်ဖြစ်သည်။ လူတစ်ယောက်အကြောင်း၊ ကျောင်းသားတစ်ယောက်အကြောင်း အင်တာနက်ထဲတွင် တစ်ချက်ခေါက်လိုက်ရုံဖြင့် ဒေတာတွေ ပြုံကျလာနိုင်သောစနစ်ကိုလည်း တရုတ်တို့က စီစဉ်နေကြသည်။ 

အနာဂတ်တွင် AI နှင့် လွတ်သည့်နေရာ မည်သည့်နေရာမှ မရှိနိုင်ပေ။ AI ကို ကျယ်ပြန့်စွာ အသုံးပြုလာရမည် ဖြစ်သလို ထို AI ကို တီထွင်နိုင်၊ ဖြန့်ကြက်နိုင်၊ လုပ်ဆောင်နိုင်၊ ထိန်းချုပ်နိုင်သူတွေကလည်း များစွာ လိုအပ်လာနိုင်ပါသည်။ တရုတ်တို့သည် AI ဖြင့် AI ကို မွေးထုတ်ပြီး၊ AI ဖြင့်ထိန်းချုပ် နိုင်ရန်ကြိုးစားနေကာ AI ဖြင့်ပင် ကမ္ဘာကြီးကို ချုပ်ကိုင်နိုင်ရန် လုပ်ဆောင်နေကြကြောင်း သဘောပေါက်ထားစေလိုသည်။ 

E-01
(Ref: South China Morning Post) 



  • VIA