News

POST TYPE

EDUCATION

အိပ်မက်ကို အကောင်အထည် ဖော်နေသူများ
19-May-2018



လာမည့် ဆယ်စုနှစ်အတွင်း ကမ္ဘာ့စီးပွားရေးက AI (Artificial Intelligence) ဘက်ကို ကူးပြောင်းနေကြောင်း သဘောပေါက်သူများထဲတွင် တရုတ်က ထိပ်ဆုံးက ဖြစ်မည်ထင်သည်။ ၂၀၁၇ ခုနှစ် ဇူလိုင်လတွင် တရုတ်နိုင်ငံတော်ကောင်စီက AI ဗျူဟာစီမံချက်ကို စတင်အကောင်အထည်ဖော်ရန် လမ်းစဉ်များချမှတ်သည်။ လာမည့် ၂၀၃၀ ပြည့်နှစ်တွင် တရုတ်သည် AI တီထွင်မှုတွင် ထိပ်တန်းနိုင်ငံတစ်နိုင်ငံဖြစ်ရမည်ဟု ခေါင်းဆောင်များက သတ်မှတ်ပေးသည်။ ထို့အတွက်လည်း နိုင်ငံတော်အနေနှင့် ယွမ် ၁ ထရီလီယံ (ဒေါ်လာ ၁၄၇ ဒသမ ၈၀ ဘီလီယံ) သုံးစွဲခွင့်ပေးထားသည်။ ပြည်တွင်း AI ဖြင့် စက်မှုလုပ်ငန်းများ ဖွံ့ဖြိုးတိုးတက်စေရေးနှင့် AI နည်းပညာဖွံ့ဖြိုးရေးအတွက် ထိုငွေများကို သုံးစွဲရမည်ဖြစ်သည်။

လွန်ခဲ့သည့် ၁၀ နှစ်အတွင်း တရုတ်နိုင်ငံ၏ လူဦးရေကလည်း အဆမတန်တက်လာသည်။ နိုင်ငံအတွင်း နည်းပညာကို စိတ်ပါဝင်စားသူများသလို တီထွင်သူများလည်း များလာသည်။ စမတ်ဖုန်းထုတ်လုပ်မှုနှင့် သုံးစွဲမှုနှုန်းက အမြင့်ဆုံးဖြစ်လာပြီး ၂၀၀၇ ခုနှစ်ကထက် ၅၀ ရာခိုင်နှုန်းမြင့်တက်လာသည်။ 

တရုတ်ဆိုရှယ်မီဒီယာ အသုံးပြုနှုန်းကလည်း မယုံကြည်နိုင်လောက်အောင် ဖြစ်လာသည်။ တရုတ်ဆိုရှယ်မီဒီယာ WeChat ကို သုံးစွဲနှုန်းက ၂၀၁၂ ခုနှစ်တွင် သန်း ၁၀၀ ရှိရာမှ ၂၀၁၈ ခုနှစ်တွင် သန်း ၁၀၀၀ ကျော် ဖြစ်သွားသည်။ ဒစ်ဂျစ်တယ်ငွေပေးချေမှုများတွင်လည်း တရုတ်က ထိပ်တန်းနိုင်ငံဖြစ်သွားသည်။ တရုတ်မြို့ပြဧရိယာများတွင် ပိုက်ဆံကို လက်ထဲကိုင် မသုံးသလောက် ဖြစ်လာသည်။ ၂၀၁၆ ခုနှစ်တွင် အမေရိကန်ပြည်ထောင်စု၌ မိုဘိုင်းလ်ငွေပေးချေမှုခေါ် အွန်လိုင်းကတစ်ဆင့် ငွေပေးချေမှုသည် ဒေါ်လာ ၁၁၂ ဘီလီယံ ဖြစ်သော်လည်း တရုတ်တွင် အမေရိကန်ဒေါ်လာ ၉ ထရီလီယံခန့်အထိ အွန်လိုင်းပေးချေမှုများကို လုပ်နေကြကြောင်း Forrester Research အဖွဲ့၏ ထုတ်ပြန်ချက်တွင် တွေ့ရသည်။

တရုတ်နိုင်ငံတွင် ငွေသုံးစွဲမှုနှင့်ပတ်သက်ပြီး မြို့ကြီးများ၌ AI စနစ်ဖြင့် တီထွင်ထားသော မျက်နှာပြင်မှတ်သားစနစ် (AI Face Recorgnition) ကို ငွေပေးချေမှုလုပ်ငန်းများတွင် စမ်းသပ်အသုံးပြုနေကြသည်။ စက်ရှေ့တွင် မျက်နှာပြလိုက်သည်နှင့် ငွေပေးချေမှုကို အတည်ပြုသည့်စနစ်ဖြစ်သည်။ တရုတ်နိုင်ငံတွင် လက်ရှိလည်း အွန်လိုင်းကို အသုံးပြုနေသူပေါင်းမှာ ၁ ဒသမ ၄ ဘီလီယံနှုန်းခန့်ရှိနေသည်။ တရုတ်က ကမ္ဘာပေါ်တွင် မျက်နှာပြင်မှတ်သားသည့် AI စနစ်ကို နိုင်ငံအတွင်း ကျယ်ပြန့်စွာအသုံးပြုနိုင်ရန် လုပ်ဆောင်နေကြခြင်းကို သတိပြုရန်လိုသည်။ 

တရုတ်က AI စနစ်များကို ကျန်းမာရေးစောင့်ရှောက်မှု၊ ကားများကို အလိုအလျောက်မောင်းခိုင်းမှု၊ ယာဉ်ကြောရှင်းလင်းမှုများအပြင် တရုတ်တွင် အကောင်အထည်ဖော်နေသည့် စမတ်မြို့တော် တည်ဆောက်ရေး စီမံကိန်းများအတွက်ပါ အသုံးပြုရန် စီစဉ်နေကြသည်။ တရုတ်မြို့ပြနေ ပြည်သူတို့က နည်းပညာကို အခြားသောနိုင်ငံများထက် စောစီးစွာအသုံးပြုခွင့်ရနေသလို သဘောကျစွာဖြင့် တုံ့ပြန်မှုများရှိနေခြင်းက AI အတွက် အားတက်စရာဖြစ်သည်။ 

တရုတ်နိုင်ငံ နည်းပညာဝန်ကြီးဌာနက ၂၀၁၆ ခုနှစ်တွင် AI လုပ်သားပေါင်း ၅ သန်းခန့် လိုအပ်နေကြောင်း ထုတ်ပြန်ခဲ့သည်။ ထို့ကြောင့်လည်း AI နည်းပညာများကို ကောင်းစွာတတ်မြောက်သူများကို လစာကောင်းကောင်းပေးပြီး မွေးထုတ်နေသည်။ ထို့ပြင် အစိုးရအစီအစဉ်ဖြင့် Thousand Talents Plan ကို ချမှတ်ပေးသည်။ ထိုစီမံချက်က တရုတ် ပရိုဂရမ်မာပေါင်း ၁၀၀,၀၀၀ ကို မွေးထုတ်ပေးရန်ဖြစ်သည်။ နည်းပညာရှင်များ ပေါ်ထွက်ရေးအတွက် ယန်စီမြစ် ပညာတော်သင်ဆုကို ကျောင်းများသို့ ကမ်းလှမ်းထားသည်။ လျှောက်ထားသည့် ကျောင်းသားများထဲက ထူးချွန်သူများကို ကွန်ပျူတာ ပရိုဂရမ်းမင်းပညာရှင်များဖြစ်အောင် မွေးထုတ်ပေးမည်ဖြစ်သည်။ တရုတ်တွေ၏ ယခုကတည်းက ပြင်ဆင်နေကြပုံဖြစ်သည်။ 

တရုတ်ပညာရေးလမ်းကြောင်းက ရှင်းရှင်းလေးဖြစ်သည်။ Education in Coding ဖြစ်သည်။ ကျောင်းများတွင် ကွန်ပျူတာ ပရိုဂရမ်ရေးနည်းများကို မူလတန်းနှင့် အလယ်တန်းကျောင်းများတွင် အခြေခံအဖြစ် စတင်သင်ကြားပေးတော့မည်။ ထို့ကြောင့် တရုတ်နိုင်ငံကလေးများသည် အင်နှင့်အားနှင့် အခြားနိုင်ငံမှ ကလေးများထက် ကွန်ပျူတာနှင့် ပရိုဂရမ်းမင်းပညာရပ်များကို စောစီးစွာ ထိတွေ့ခွင့်ရတော့မည်ဖြစ်သည်။ 

၂၀၁၇ ခုနှစ်ကတည်းက တရုတ်ပညာရေးဝန်ကြီးဌာနသည် AI စွမ်းရည်မြင့်သင်တန်းကို ဖွင့်လှစ်ထားသည်။ ထိုသင်တန်းကို ဆရာ ၅၀၀ နှင့် ထိပ်တန်းတက္ကသိုလ်ကြီးများမှ ကျောင်းသား ၅၀၀၀ ကိုခေါ်ပြီး သင်တန်းပေးသည်။ ထို့နောက် တရုတ် ၂၀၃၀ ဗှု ပန်းတိုင်သို့ဆိုကာ လမ်းကြောင်း ချမှတ်ပေးလိုက်သည်။ ၂၀၃၀ အထိ AI နည်းပညာဆိုင်ရာ လုပ်ငန်းများကို သင်တန်း အဆင့်ဆင့်ဖြင့် မြှင့်တင်သွားကြတော့မည်ဖြစ်သည်။ အွန်လိုင်းကလည်း AI+X ဆိုသည့် သင်တန်းများပေးနေပြီး၊ သင်တန်းများကို ပြင်ပတွင် ယူချင်ပါကလည်း စီစဉ်ပေးနေသည်။ 

အစိုးရအနေနှင့် AI နည်းပညာရပ်များကို သုတေသနများလုပ်ဆောင်ရန်အထိ လမ်းဖွင့်ပေးပြီး ငွေတွေကိုလည်း ပုံအောပြီး အသုံးပြုပေးခဲ့သည်။ ၂၀၁၈ ခုနှစ် ဇန်နဝါရီလအထိ AIသင်ယူရေးအတွက် ပညာရေးတွင် ဒေါ်လာ ၂ ဒသမ ၁ ဘီလီယံ သုံးစွဲပြီးပြီဖြစ်ကြောင်း တရုတ်ပညာရေးဝန်ကြီးဌာနက ထုတ်ပြန်ခဲ့သည်။

တရုတ်နိုင်ငံ ဘေဂျင်းရှိ Mentougou နယ်တွင် AI Industrial Park ခေါ် အိုင်တီရပ်ဝန်းကြီး တစ်ခုကို တည်ဆောက်ဖွင့်လှစ်ပေးလိုက်သည်။ ထိုရပ်ဝန်းထဲတွင် အိုင်တီကုမ္ပဏီပေါင်း ၄၀၀ ကျော်လာဖွင့်ထားပြီး Cloud Computing နည်းပညာများကို ဝန်ဆောင်မှုများပေးနိုင်ရန် စီစဉ်နေကြသည်။ တရုတ်က နည်းပညာလုပ်ငန်းတွင် မည်သည့်နိုင်ငံ၊ မည်သူ့နည်းပညာကိုမှ အားမကိုးဘဲ ကိုယ့်နည်းကိုယ့်ဟန်ဖြင့် ရပ်တည်နိုင်ရန် အားထုတ်နေမှုများထဲက တစ်ခုဖြစ်သည်။ 

တရုတ်က Belt and Road Initiative ဆိုသည့် လမ်းကြောင်းတစ်ခုကို ချမှတ်ထားပြီး အာရှ၊ ဥရောပနှင့် အာဖရိကတိုက်များအထိ ခြေဆန့်ကာ စီးပွားရေးဖွံ့ဖြိုးတိုးတက်စေရန် စီစဉ်နေသည်။ အထူးသဖြင့် တရုတ်ထုတ်ကုန်နှင့် နည်းပညာများ ကမ္ဘာကိုလွှမ်းနိုင်ရေးက တရုတ်အတွက် သေရေးရှင်ရေးဖြစ်နေသည်။ တရုတ် Alibaba ကလည်း အစိုးရလုပ်ငန်းများကို အကောင်အထည်ဖော်နိုင်ရန် အာရှ၏ အလားအလာရှိသော နိုင်ငံများကိုလှည့်လည်ပြီး ဈေးကွက်ရှာနေသည်။ တရုတ်၏လမ်းကြောင်းများ၊ ဗျူဟာများ၊ ပညာရေးဖြင့် အခြေချနေမှုများသည် ပရမ်းပတာလုပ်နေခြင်း မဟုတ်ကြောင်း သဘောပေါက်ရန်လိုပါသည်။ 

တရုတ်သည် AI လမ်းကြောင်းတွင် ဝုန်းဒိုင်းကြဲနေခြင်းမှာ အောင်မြင်မည်၊ မအောင်မြင်မည် မသိနိုင်သော်လည်း သူတို့၏ တတ်နိုင်သမျှ ရှေ့ပြေးနေခြင်းက အားလုံးကို ကျော်ဖြတ်သွားရန်မှာ သေချာသလောက်ဖြစ်နေသည်။

E-01 
(Ref: South China Morning Post)


  • VIA