News

POST TYPE

EDUCATION

၂၀၁၈ တက္ကသိုလ်ဝင်တန်း စာမေးပွဲကြီးကို ဗေဒင်၊ ယတြာအားကိုးပြီး ကျော်ဖြတ်ကြမှာလား
20-Feb-2018 tagged as ပညာရေး



၂၀၁၈ ခုနှစ် မတ်လ ၇ ရက်နေ့တွင် ပြည်တွင်း၊ ပြည်ပတစ်နိုင်ငံလုံး အတိုင်းအတာအနေနှင့် ကျင်းပမည့် တက္ကသိုလ်ဝင်တန်းစာမေးပွဲကြီးကား ရက်အနည်းငယ်သာ လိုပါတော့သည်။ အချို့ ကျောင်းသား၊ ကျောင်းသူများ ကျောင်းစာသင်နှစ်စကတည်းက စနစ်တကျ အချိန်ဇယားနှင့် ကြိုတင်ပြင်ဆင်ခဲ့ကြခြင်းကြောင့် တက္ကသိုလ်ဝင်တန်း စာမေးပွဲကြီးအတွက် အဆင်သင့်ဖြစ်နေကြပါပြီ။ အချို့ကျောင်းသား၊ ကျောင်းသူများ Hot Spot မေးခွန်းနောက်လိုက်နေကြသည်။ အချို့လည်း “ဘယ်ဝန်ကြီးရဲ့မြေး၊ ဘယ်ဗိုလ်ချုပ်ကြီးရဲ့မြေး “ကျိတ်ဝိုင်းကျူရှင်” က ခန့်မှန်းမေးခွန်းက လာမယ့်စာမေးပွဲကြီးမှာ အနည်းဆုံး ဘယ်နှမှတ်ဖိုး ကျိန်းသေပါမယ်” ဆိုပြီး မိတ္တူကူးယူ၊ သင်ပေး၊ သင်ယူ လုပ်နေသူတွေကလည်း ရန်ကုန်၊ မန္တလေး၊ နေပြည်တော်လို မြို့ကြီးပြကြီးတွေမှာ မရေတွက်နိုင်အောင်ပင်များ ပြားလွန်းလှသည်။ ဗေဒင်၊ ယတြာ၊ မန္တရားဆရာများကလည်း မြန်ပြည်တစ်ဝန်း နေရာပေါင်းစုံမှ အလျှိုအလျှို ထွက်ပေါ်လာနေကြသည်။ ထိုဆရာသမားတို့အား ဆက်သရသော အလှူငွေကြေး၊ ဉာဏ်ပူဇော်ခကြေးများကလည်း မနည်းလှချေ။ “လူနာ မျက်ဖြူဆိုက်လေ ဆရာကြိုက်လေ” ဆိုတဲ့ စကားကလည်း အခုလို စာမေးပွဲရာသီအချိန်မျိုးတွင် ရာခိုင်နှုန်းပြည့် မှန်နေသလိုမျိုး စာရေးသူခံစားနေရသည်။ 

ပညာရေးဝန်ကြီးဌာန ပြည်ထောင်စုဝန်ကြီး ဒေါက်တာမျိုးသိမ်းကြီးကလည်း ဒီဇင်ဘာလ ၂၇ ရက်နေ့တွင် နေပြည်တော် ပျဉ်းမနားမြို့နယ် အထက (၂) ကျောင်း၌ ပြုလုပ်သော တက္ကသိုလ်ဝင်တန်း စာမေးပွဲစာစစ်ဌာန ကြီးကြပ်ရေးမှူး၊ တွဲဖက်ကြီးကြပ်ရေးမှူး၊ လက်ထောက်ကြီးကြပ်ရေးမှူးများနှင့် စာဖြေသူများလိုက်နာရန် စည်းကမ်းချက်များဆိုင်ရာ ဆွေးနွေးပွဲ သင်တန်းတွင် “တက္ကသိုလ်ဝင်တန်း စာမေးပွဲသည် အမှားမခံ၊ မေးခွန်းပေါက်ကြား၍မရ၊ အမှတ်ကိုအောင်လျှင်လည်း လျှော့၍မရသလို မအောင်၍လည်း တိုး၍မရ၊ သတ်မှတ်ချက်အတိုင်း တစ်သဝေမတိမ်း လိုက်နာရန် လိုအပ်ကြောင်း၊ စာမေးပွဲလုပ်ငန်းတွေသည် သိလို့မှားမှား၊ မသိလို့မှားမှား၊ မှားတယ်ဆိုရင် အရေးယူတယ်ဆိုတာကို အင်မတန်သတိထားဖို့ မေတ္တာရပ်ခံလိုကြောင်း၊ ပညာရေးဝန်ကြီးဌာနအနေနဲ့ ညွှန်ကြားထားတဲ့ စည်းမျဉ်းစည်းကမ်း၊ လုပ်ထုံးလုပ်နည်းတွေဘက်က မူအတိုင်းပဲ ရပ်တည်လို့ရကြောင်း၊ ကိုယ့်သဘောနဲ့ကိုယ် ဆောင်ရွက်လို့မှားသွားခဲ့ရင် ကျွန်တော်တို့ ကာကွယ်လို့မရဘူးဆိုတာကို အလေးအနက် မှာကြားလိုကြောင်း၊ မေးခွန်းနဲ့ပတ်သက်၍၊ ရမှတ်တွေနဲ့ပတ်သက်၍၊ အဖြေလွှာစာအုပ်နှင့် ပတ်သက်၍ လုံးဝ ပေါက်ကြားလို့မရပါဘူး။ အောင်စာရင်းမထွက်ခင် အချိန်အထိ ပေါက်ကြားလို့မရပါဘူး။ စာမေးပွဲသည် မသမာမှုဖြစ်လို့မရဘူး။ စာမေးပွဲသည် သူ့ရဲ့အောင်လိုတဲ့ အမှတ်ကိုလည်း အောင်သည်ထက် ပိုလျှော့လို့မရဘူး။ သူ့ရဲ့အမှတ်ကို မအောင်လို့ဆိုပြီးတော့ အောင်အောင်တိုးပေးလို့လည်း မရဘူး။ မြန်မာနိုင်ငံ စာစစ်ဦးစီးဌာနကလည်း သေသေချာချာ ပြင်ဆင်ထားပါ။ အဲဒီအတိုင်း တစ်သဝေမတိမ်း လိုက်နာဆောင်ရွက်ပါလို့ မှာကြားလိုပါတယ်”ဟု လမ်းညွှန်ခဲ့ကြောင်း စာရေးသူ သတိပြုခဲ့မိပါသည်။ 

စာမေးပွဲအောင်မြင်ချင်စိတ် ဆန္ဒလွန်ကဲသွားသည့် ကျောင်းသား၊ ကျောင်းသူ၊ မိဘအချို့ကလည်း မိမိတို့အားကိုးရာ ဗေဒင်၊ ယတြာ ဆရာသမားများထံ ချဉ်းကပ်ကာ ထိုဆရာသမားများ မှာကြား၊ လမ်းညွှန်တဲ့အတိုင်း “တက္ကသိုလ်ဝင်တန်းစာမေးပွဲကြီး ဖြေဆိုမည့် ဘာသာရပ်ခြောက်ခုအတွက် မည်သည့်ဘာသာရပ် ဖြေဆိုသည့်နေ့တွင် မည်သည့်အရပ်ဘက်ကို မျက်နှာမူပါ။ မည်သည့်နေ့တွင် မွေးဖွားသူသည် မည်သည့်နေ့တွင် မည်သည့်သစ်သီးကိုစားပါ။ ဘယ် အကြော်ကိုစားပါ။ ဘယ်ဖျော်ရည်ကို သောက်သွားပါ။ ဘာမုန့်ကို စားသွားပါ။ ဘာပန်းကို ယူဆောင်သွားပါ။ ဘယ်မှာတင်ပါ။ ဒီဘောလ်ပင်တွေနဲ့ ဖြေဆိုပါ။ ဒီဘောလ်ပင်တွေကို ဘုရားစင်ပေါ်မှာ တင်ထားပြီး စာမေးပွဲကြီးမဖြေဆိုခင် လုံးဝအသုံးမပြုဘဲ စာမေးပွဲကြီးစဖြေသည့်နေ့တွင် အသုံးပြုရန်၊ စာမေးပွဲဖြေရန် အိမ်ကစထွက်သည့်အခါ ခြေလှမ်းဘယ်နှလှမ်း ရှေ့ကိုလှမ်း၍ လက်ခုပ်ဘယ်နှချက် တီးပြီးထွက်ပါ” စသည်၊ စသည်ဖြင့် အခါတော်ပေး ပြောဟောနေသူများကလည်း စုံလှပါသည်။ 

လောကတွင် ကံ ကံ၏အကျိုးသည် သွေးထွက်အောင် မှန်လှပါသည်။ သို့သော် လောကတွင် “ကံ၊ ဉာဏ်၊ ဝီရိယတည်း” ဟူသော အဖော်မွန်သုံးဦးသည် ရိုးသားကြိုးစားသူတွေအတွက် အကောင်းဆုံးသော မိတ်ဆွေစစ်များဖြစ်ကြသည်။ ကံကိုယုံပြီး ဆူးပုံပေါ်တက်နင်းလျှင် ဆူးစူးခံရမည်မှာ သေချာလှသည်။ ကွယ်လွန်သူ စာရေးဆရာကြီး ပီမိုးနင်းကလည်း “ “ကံ” ဟူသည် အလုပ်ဖြစ်သည်။ အလုပ်ကို ကောင်းစွာလုပ်မှ ကံ၏အကျိုးကို မုချခံစားရမှာဖြစ်ကြောင်း” ရေးသားခဲ့ဖူးသည်ကို စာရေးသူဖတ်ခဲ့ဖူးပါသည်။ 

စာရေးသူ ရန်ကုန်စက်မှုတက္ကသိုလ် (R.I.T)  (ယခု အဆင့်မြင့်နည်းပညာတက္ကသိုလ် ကြို့ကုန်း) တက်ရောက်စဉ် ဗေဒင်၊ ယတြာများနှင့်ပတ်သက်လို့ စာရေးဆရာကြီး လယ်တွင်းသားစောချစ် ပြောဟောခဲ့ဖူးသော စကားလေးတစ်ခွန်းကို ပြန်လည်မျှဝေချင်စိတ် ဖြစ်ပေါ်မိပါသည်။ ဆရာကြီးက “ကိုယ့်အကြောင်း ကိုယ့်လောက်မသိတဲ့သူကို ကိုယ့်အကြောင်းကို ပိုက်ဆံပေးပြီး ပြောဟောခိုင်းတဲ့ လူတွေဟာ အင်မတန်သနားစရာ ကောင်းလှတယ်” ဟူ၍ ပြောခဲ့ဖူးပါသည်။ 

လာမည့် စာမေးပွဲကြီးကို ကံစမ်းမဲ သဘောထားကာ “ပါရင်စံမည်။ မပါရင်ခံမည်” ခပ်လွယ်လွယ်၊ ခပ်ပေါ့ပေါ့ ဖြေဆိုကြမည့် စာဖြေသူများကလည်း ဒုနဲ့ဒေး ရှိနေသည်ကို ဆရာတစ်ယောက်အနေနဲ့ စာရေးသူသတိပြုမိသည်။ 

“အနာမခံလျှင် အသာမစံရ” (No Pain, No Gain) ဟူသော အင်္ဂလိပ်စကားပုံသည် စိတ်ဓာတ်ခွန်အား ကြီးမြတ်သူ၊ လုံ့လ၊ ဝီရိယရှင်များရဲ့ လက်ကိုင်ထားရာ အောင်မြင်မှုသော့ချက်ဖြစ်သည်။ 

ဘုရားလောင်း မဟာဇနက္ကမင်းသားသည် ပင်လယ်ပြင်ကြီးကို အောင်မြင်စွာ ဖြတ်ကျော်နိုင်ခဲ့ခြင်းမှာ “ဇွဲ၊ လုံ့လ၊ ဝီရိယ” သူရဲကောင်းသုံးဖော်ကို မဟာမိတ်လုပ်ခဲ့သောကြောင့် အသက်ဘေးမှ လွတ်မြောက်ခဲ့ခြင်း ဖြစ်ပါသည်။ ဒါကြောင့် အစိုးရစစ်စာမေးပွဲကြီးတွင် ဖြေဆိုကြမည့် စာဖြေသူအပေါင်းအား နှစ် ၃၀ ကျော် စာသင်သက်ရှိတဲ့ စာရေးသူအနေနှင့် အထူးမှာကြားလိုသည်မှာ “တကယ်ဖြစ်ချင် တကယ်လုပ်ပါ။ အဟုတ်ဖြစ်ပါမည်”။ မြတ်စွာဘုရားသခင်က ရွှေစကား မိန့်ကြားခဲ့သည်မှာ “မိမိကိုယ်သာ အားထားရာ၊ မိမိကိုယ်သာ ယုံကြည်ရာ” ဖြစ်သည်။ မိမိ၏ အနာဂတ်ပန်းတိုင်သည် မိမိလက်ဝယ်တွင် ရှိနေသည်ဟု ယုံကြည်ပြီး မကြာခင်ကျင်းပတော့မည့် အစိုးရစစ်စာမေးပွဲကြီး မဖြေဆိုခင် မိမိ၏ ကိုယ်ပိုင် ဇွဲ၊ လုံ့လ၊ ဝီရိယကို အစွမ်းကုန်အသုံးချကာ ဖြေဆိုမည်ဆိုပါက အောင်မြင်မှုသရဖူကို ဆွတ်ခူးရယူနိုင်မည်ဖြစ်ပါကြောင်း လေးနက်စွာ အကြံပြုလိုက်ပါသည်။ 

ဆရာဂျက်ဖရီတင်အုန်း (ရန်ကုန်စက်မှုတက္ကသိုလ်) 

  • VIA