POST TYPE

EDITORIAL

မြန်မာ့စီးပွားရေးဘဏ် စီးပွားဖြစ်ရေး
ထိုအရှုံးပေါ်နေသော ဘဏ်ကို ပြည်ထောင်စုဘတ်ဂျက်မှ ရန်ပုံငွေ ဖြည့်တင်းပေးရင်း အသက်ဆက်နေရသည်။ အမှန်တကယ်တွင် ဘဏ်လုပ်ငန်း ဆိုသည်မှာ အဖွဲ့အစည်းများ အားလုံးတွင် ငွေကြေးပိုင်ဆိုင်မှု အများဆုံးရှိသော အဖွဲ့အစည်းမျိုးဖြစ်သလို ၀င်ငွေ၊ အမြတ်များစွာ ရရှိသည့် အဖွဲ့အစည်းလည်း ဖြစ်သည်။

၂၀၁၆ ခုနှစ်အတွက် ကမ္ဘာပေါ်တွင် အကြီးဆုံး အများပိုင်ကုမ္ပဏီ ထိပ်တန်း ဆယ်ခုစာရင်းတွင် ဘဏ်လုပ်ငန်းခြောက်ခု အထိ ပါဝင်သည်။ သို့သော် မြန်မာနိုင်ငံတွင် အရှုံးပေါ်နေသော ဘဏ်ရှိသည်။ ထိုဘဏ်မှာ ပုဂ္ဂလိဘဏ်မဟုတ်။ နိုင်ငံတော်ပိုင် ဘဏ်တစ်ခုဖြစ်သော မြန်မာ့စီးပွားရေးဘဏ် ဖြစ်သည်။

"ဘဏ်လုပ်ငန်းတွေနဲ့ ပတ်သက်လို့ နိုင်ငံတကာမှာ ရှိနေတာကို ပြောရရင် နိုင်ငံတော်အနေနဲ့ ဘဏ်လုပ်ငန်းလုပ်တာဟာ အတော့်ကိုချာတဲ့ အလုပ်တစ်ခုပါပဲ" ဘဏ်လုပ်ငန်းတွင် အစိုးရ၏ ပါဝင်ဆောင်ရွက်မှုကို မြန်မာ့အရေး ကျွမ်းကျင်သူ သြစတြေးလျနိုင်ငံရှိ Macquire တက္ကသိုလ်မှ ပါမောက္ခ Sean Turnell က ဤသို့ မှတ်ချက်ပြုသည်။ ပြီးခဲ့သည့် ပထမအကြိမ်လွှတ်တော် သက်တမ်းအတွင်း မြန်မာ့စီးပွားရေးဘဏ်၏ အရှုံးပြမှုကို ငွေကြေးထောက်ပံ့ရန် ဘဏ္ဍာ ရေးလျာထားမှုကို ထိုစဉ်က ပြည်သူ့ငွေ စာရင်းပူးပေါင်းကော်မတီက စစ်ဆေးတွေ့ရှိ အစီရင်ခံခဲ့ခြင်း ဖြစ်သည်။

ထိုအစီရင်ခံစာတွင် နှစ်ပေါင်း ၂၀ ကျော်ကြာ အမြတ်မရရှိခြင်း၊ အရှုံးပြခြင်းတို့ကို ထောက်ပံ့ရန် ငွေကျပ် သန်းပေါင်း ၈၀,၀၀၀ နီးပါး သုံးစွဲခဲ့ရကြောင်း ဖော်ပြထားသည်။ပြည်ထောင်စု ဘတ်ဂျက်အတွင်းမှ ထိုငွေပမာဏကို သုံးစွဲခြင်းမှာ ပြည်သူ့ဘဏ္ဍာငွေကို ထိခိုက်ခြင်းပင် ဖြစ်သည်။

"အစိုးရဘဏ်တွေအနေနဲ့ ဝန်ဆောင်မှုပိုင်း ကောင်းအောင်လုပ်ဖို့လိုတယ်။ ဘဏ်ခွဲအများဆုံးထဲမှာ မြန်မာ့စီးပွားရေးဘဏ်ပါတယ်။ ပုဂ္ဂလိကဘဏ်တွေမှာ ဘဏ်ခွဲအများဆုံးဖြစ်တဲ့ ကမ္ဘောဇဘဏ်တောင် အမြတ်ငွေ အများကြီးရပြီး အလှူအတန်းတွေ အများကြီး လုပ်နေနိုင်တာပဲ" ဟု စီးပွားရေးလုပ်ငန်းရှင် ဒေါက်တာစိုးထွန်းက သူ၏အမြင်ကို ပြောသည်။ "အစိုးရပိုင်ဘဏ်တွေက မြေတို့၊ အဆောက်အအုံတို့က အလကားနီးပါး ရတာကို။ စီမံခန့်ခွဲမှု ပြောင်းဖို့လိုနေတာပါ"

ယခု အစိုးရသစ် လက်ထက်တွင် နိုင်ငံပိုင် စီးပွားရေးလုပ်ငန်းများကို ပိုမို အောင်မြင်စေရန် ဆောင်ရွက်ခြင်းဆိုသည့် အချက်ကို မကြာခင်က ထုတ်ပြန်ထားသော စီးပွားရေး မူဝါဒတွင် ဖော်ပြထားသည်။ မြန်မာ့စီးပွားရေးဘဏ် (MEB)၊ မြန်မာ့နိုင်ငံခြား ကုန်သွယ်မှုဘဏ် (MFTB)၊ မြန်မာ့ရင်းနှီးမြှုပ်နှံမှုနှင့် ကူးသန်းရောင်းဝယ်ရေးဘဏ် (MICB) နှင့် မြန်မာ့လယ်ယာ ဖွံ့ဖြိုးရေးဘဏ် (MADB) ဟူ၍ နိုင်ငံပိုင်ဘဏ်လေးခု ရှိသည်။

မြန်မာနိုင်ငံရှိ ဘဏ်လုပ်ငန်းအားလုံး ပိုင်ဆိုင်မှု၏ ငါးပုံသုံးပုံခန့်၊ ၆၄ ရာခိုင်နှုန်းခန့်သည် နိုင်ငံပိုင်ဘဏ် လေးခုအပါအဝင် ဝန်ကြီးဌာနနှင့် စည်ပင်သာယာရေး ကော်မတီ လက်အောက်ရှိ ဘဏ်များက ပိုင်ဆိုင်ထားသည်။
ယင်းအနက် မြန်မာ့စီးပွားရေးဘဏ် (MEB) သည် ဘဏ်ခွဲပေါင်း ၃၀၀ ကျော်၊ ဝန်ထမ်းပေါင်း ၉၀၀၀ နီးပါးဖြင့် လုပ်ငန်းဆောင်ရွက်လျက်ရှိသည်။

MEB ဘဏ်ကို ၁၉၇၆ ခုနှစ်တွင် စတင် တည်ထောင်ခဲ့ခြင်းဖြစ်ရာ ယခုဆိုလျှင် နှစ်ပေါင်း ၄၀ သက်တမ်းရှိပြီ ဖြစ်သည်။ MEB ဘဏ်၏ ပင်မလုပ်ငန်းမှာ ကူးသန်းရောင်းဝယ်ရေးဘဏ် (Commercial Banking) ဖြစ်သော်လည်း အစိုးရ၏ ဘဏ်အဖြစ်လည်း ဦးစီး လုပ်ဆောင်နေရသည်။

အထူးသဖြင့် နိုင်ငံ့ဝန်ထမ်းများ၏ ပင်စင်ငွေထုတ်ပေးခြင်း၊ အစိုးရငွေတိုက် စာချုပ်၊ ငွေချေးစာချုပ်များကို တာဝန်ယူ ရောင်းဝယ်ခြင်း၊ ဝန်ကြီးဌာနများ၏ ရန်ပုံငွေစာရင်း ထိန်းသိမ်းပေးရခြင်းတို့အပြင် အစိုးရ၏ စီးပွားရေး မူဝါဒအပေါ် မူတည်၍ သက်သာသော အတိုးနှုန်းများဖြင့် ချေးငွေများ ထုတ်ချေးပေးရခြင်းတို့ဖြစ်သည်။ ဤအချက်သည်ပင် မြန်မာ့စီးပွားရေးဘဏ် စီးပွားမဖြစ်ရခြင်း အကြောင်းရင်းလည်း ဖြစ်သည်။

ဘဏ်လုပ်ငန်းအပေါ် နိုင်ငံရေးအရ လွှမ်းမိုးနေခြင်း၊ နိုင်ငံရေးအရ ပါဝင် ပတ်သက်နေခြင်းဖြစ်သည်။နိုင်ငံရေးအရ လွှမ်းမိုးမှုနှင့် ဆုံးဖြတ်ချက်များအတိုင်း လုပ်ငန်းဆောင်ရွက်ရသည့်အတွက် နိုင်ငံပိုင်ဘဏ်များသည် အကျိုးအမြတ်ရခြင်းကို အဓိကထားလေ့ မရှိကြောင်း Sean Turnell က ဆိုသည်။

"သူတို့ထုတ်ချေးထားတဲ့ ငွေတွေဟာ ပုံမှန်ဘဏ်တွေ ကြည့်လေ့ရှိတဲ့ အချက်တွေကို ကြည့်တာမဟုတ်ဘူး။ ယေဘုယျအားဖြင့် ငွေချေးတဲ့အခါ ဆုံးဖြတ်ချက်တွေက နိုင်ငံရေးအရ ဖြစ်လေ့ရှိတယ်။ နိုင်ငံရေးနဲ့ နွှယ်ပြီးချေးတဲ့ ချေးငွေတွေဟာ စီးပွားရေး အရချေးတဲ့ ချေးငွေတွေလောက် ပြန်ရချက်မှာ အားမကောင်းဘူး"ဟု ၎င်းက ဆိုသည်။

လက်ရှိကာလ မြန်မာနိုင်ငံတော် ဗဟိုဘဏ်၏ အတိုးနှုန်းမှာ ၁၀ ရာခိုင်နှုန်း၊ အပ်ငွေအပေါ် အနည်းဆုံး အတိုးနှုန်း ၈ ရာခိုင်နှုန်းနှင့် ချေးငွေအပေါ် အများဆုံးအတိုးနှုန်း ၁၃ ရာခိုင်နှုန်း သတ်မှတ်ထားသော်လည်း မြန်မာ့စီးပွားရေးဘဏ်မှာ အစိုးရကိုယ်စား ချေးငွေများကို အတိုးနှုန်း သက်သာစွာဖြင့် ထုတ်ချေးပေးရသည်။

မြန်မာ့စီးပွားရေးဘဏ်မှ နိုင်ငံပိုင် စီးပွားရေးလုပ်ငန်းများနှင့် နိုင်ငံပိုင် ဘဏ်များသို့ အတိုးနှုန်း ၄ ရာခိုင်နှုန်း၊ အသေးစားနှင့် အလတ်စား စက်မှုလုပ်ငန်း ဖွံ့ဖြိုးရေးဘဏ်သို့ အတိုးနှုန်း ၈ ဒသမ ၅ ရာခိုင်နှုန်းဖြင့် ချေးငွေများ ထုတ်ချေးပေးနေခြင်း ဖြစ်သည်။ နိုင်ငံရေးအရ လွှမ်းမိုးမှု၊ စွက်ဖက်မှုများ အကြားတွင် ယခင်ခေတ်များက အစိုးရထိပ်ပိုင်း လူကြီးများနှင့် ရင်းနှီးသော လုပ်ငန်းရှင်ကြီးများကိုလည်း စီမံကိန်း အကောင်အထည်ဖော်ရန် အတိုးနှုန်း သက်သာသော ချေးငွေများ ထုတ်ချေးခဲ့ရသည်။

"အထက်က အမိန့်ကြောင့် ဟိုလူ့ကိုတော့ ငွေထုတ်ချေးလိုက်ပါ ဆိုတာမျိုး၊ လူက ဘဏ်မရောက်သေးဘူး၊ အမိန့်က ရောက်နှင့်ပြီဆိုတာမျိုး အရင်က ရှိခဲ့တာပေါ့။ နိုင်ငံရေးအရ လွှမ်းမိုးမှု၊ Political Influence ပေါ့။ အထက်က ညွှန်ကြားလို့ ချေးရတာမျိုးထက် ကိုယ့်ဘာသာ သေချာလေ့လာ ဆန်းစစ်ပြီး ချေးသင့်၊ မသင့် ဆုံးဖြတ်ရမှာပေါ့"ဟု ဘဏ်လုပ်ငန်းပညာရှင် ဦးစံသိန်းက ပြောသည်။

နိုင်ငံရေးနှင့် နွှယ်နေသော ချေးငွေအများစုသည် ပြန်မဆပ်နိုင်သောကြွေးမြီများ ဖြစ်လေ့ရှိပြီး ထိုကဲ့သို့ ကြွေးမြီများမှာ နိုင်ငံပိုင်ဘဏ်များတွင် များပြားနေကြောင်း မြန်မာနိုင်ငံရှိ ဘဏ်များအကြောင်း စာတမ်းကို ပြုစုရေးသားခဲ့သူ Sean Turnell က ဆိုသည်။လက်ရှိတွင် ပုဂ္ဂလိက ကူးသန်းရောင်းဝယ်ရေး ဘဏ်များ ရှိနေပြီဖြစ်ရာ အရှုံးပေါ်နေသော မြန်မာ့စီးပွားရေးဘဏ်ကို မည်သို့ ပြုပြင် ပြောင်းလဲမည်နည်းဆိုသည်မှာ မေးခွန်းဖြစ်လာသည်။

"နိုင်ငံပိုင်ဘဏ်ဆိုတာတော့ ရှိကြပါတယ်။ ဒါပေမဲ့ နိုင်ငံပိုင် ဘဏ်အတော်များများသည် ပို့ကုန်သွင်းကုန် ဘဏ်အဖြစ် ရှိနေတာပေါ့။ MEB က ဒီလောက် ကြီးကြီးမားမားရှိဖို့ မလိုတော့ဘူး။ နေရာတိုင်းမှာ ဖွင့်ထားတော့ ရှုံးတာပေါ့" ဟု ကမ္ဘောဇဘဏ်၏ အကြီးတန်းအကြံပေး ဦးသန်းလွင်က ဆိုသည်။

"အကြံပေးချင်တာက ဒီဘဏ်တွေကို ပို့ကုန်သွင်းကုန်ဘဏ်အဖြစ် အသွင်ပြောင်းပစ်ရမယ်၊ ဘဏ်ခွဲများတာတွေ ဖြုတ်ပစ်ရမယ်။" နိုင်ငံပိုင် စီးပွားရေးလုပ်ငန်းများ၏ ထုံးစံတစ်ခု ရှိသေးသည်။ ယင်းမှာ ဝန်ဆောင်မှု ညံ့ဖျင်းခြင်း ဖြစ်သည်။အချိန်နှောင့်နှေးကြန့်ကြာခြင်း၊ ဝန်ဆောင်မှု ယူသူများအပေါ် မချေမငံ ဆက်ဆံခံရခြင်းများမှာ နိုင်ငံပိုင်လုပ်ငန်းများနှင့် ဆက်ဆံဖူးသူတိုင်း ခံစားကြရသည်။

"နိုင်ငံပိုင်ဘဏ်တွေမှာ အဓိကတော့ Efficiency ပေါ့။ လုပ်ငန်းတွေကို သွက်သွက် လက်လက် လုပ်နိုင်ဖို့၊ ဝန်ဆောင်မှု ကောင်းဖို့၊ ခေတ်မီ နည်းပညာစနစ်တွေ တပ်ဆင်ဖို့၊ လူ့စွမ်းအားရင်းမြစ် စွမ်းဆောင်ရည်မြှင့်တင်ဖို့။ ဒါတွေလုပ်ရမယ်" ဟု ဘဏ်လုပ်ငန်း ပညာရှင် ဦးစံသိန်းက ထောက်ပြသည်။

ပုဂ္ဂလိကလုပ်ငန်းရှင်များ မလုပ်ချင်သော၊ စိတ်မဝင်စားသော နယ်ပယ်ကဏ္ဍမျိုးတွင် နိုင်ငံအစိုးရအနေနှင့် တာဝန်ယူကာ ဘဏ်လုပ်ငန်း လုပ်ဆောင်ရခြင်းမျိုး ရှိနိုင်သော်လည်း ယေဘုယျအားဖြင့် နိုင်ငံတကာတွင် ဘဏ်လုပ်ငန်းကို ပုဂ္ဂလိက က လုပ်ဆောင်ခြင်းသာ ပိုမိုသင့်လျော်လေ့ရှိကြောင်း Sean Turnell က ဆိုသည်။

လတ်တလောတွင် နိုင်ငံပိုင် ဘဏ်လုပ်ငန်းများကို ပုဂ္ဂလိကသို့ လွှဲပြောင်းပေးခြင်းထက် ပြုပြင်ပြောင်းလဲ ဖွဲ့စည်းရန် အစိုးရက စီစဉ်နေသည်။ "MEBက အစိုးရဘဏ်အနေနဲ့လည်း လုပ်ရတယ်။ ဌာနတွေရဲ့ ငွေစာရင်းတွေ ထိန်းပေးရတယ်။ အဲဒီလုပ်ငန်းတွေရှိတော့ တခြား ကူးသန်းရောင်းဝယ်ရေးဘဏ်တွေလို ဝန်ဆောင်မှုက မလိုက်နိုင်ဘူး ဖြစ်နေတာ။ ဒါတွေပေါ်မှာ စဉ်းစားပြီးတော့ Structure ကို ပြောင်းလဲဖို့ စဉ်းစားရမှာပေါ့" ဟု စီမံကိန်းနှင့် ဘဏ္ဍာရေး ဝန်ကြီးဌာန ဒုတိယဝန်ကြီး ဦးမောင်မောင်ဝင်းက ပြောဆိုသည်။

ဘဏ်လုပ်ငန်းကို အစိုးရ ဆောင်ရွက်သည့်အခါ နိုင်ငံရေးအရ လွှမ်းမိုးမှုများကြောင့် ဆုံးရှုံးမှုများတတ်ပြီး ထိုသို့ အရှုံးပေါ်ခြင်းသည် နိုင်ငံ့စီးပွားရေးကို ထိခိုက်စေသလို နိုင်ငံ၏ ရင်းမြစ်များကို ဆုံးရှုံးရကြောင်း လက်ရှိအစိုးရသစ်၏ စီးပွားရေး မူဝါဒ ရေးဆွဲမှုတွင် ပါဝင်ခဲ့သူ Sean Turnell က ဆိုသည်။

"နိုင်ငံပိုင် ဘဏ်လေးခုမှာ ဘယ်ဘဏ်က ပုဂ္ဂလိက ဘဏ်တွေ လုပ်နိုင်သလဲ၊ ဘယ်ဘဏ်က အစိုးရ၊ ပုဂ္ဂလိက ပူးပေါင်းလုပ်သင့်သလဲ၊ ဘယ်ဘဏ်က နိုင်ငံပိုင်အဖြစ် ဆက်ရှိနေဖို့ မလိုတော့ဘူးလဲ ဆိုတာတွေကို သေချာတစ်ခုချင်း နက်နက်နဲနဲ လေ့လာဆန်းစစ်ဖို့လိုတယ်Sean Turnell ဟု ၎င်းက ဆိုသည်။

ABOUT AUTHOR

(စစ်ငြိမ်းသူ)