News

POST TYPE

EDITORIAL

သားသမီးဆိုတာ တိုင်းပြည်အတွက်လည်း ရတနာပါ (Daily, Vol-5/No-59)
19-Jun-2017 tagged as

ယခုအခါ တက္ကသိုလ်ဝင်တန်း(ဆယ်တန်း) အောင်စာရင်းများ ထွက်ရှိသွားပြီဖြစ်ရာ ဆယ်တန်း အောင်မြင်သွားသူများက တက္ကသိုလ်နှင့် အင်စတီကျု အသီးသီးသို့ ဝင်ရောက်ကာ ပညာဆက်လက်ဆည်းပူးရန် ပြင်ဆင်နေကြမည် ဖြစ်သလို ရှုံးနိမ့်ခဲ့သူများ အနေနှင့်လည်း နောင်နှစ်တွင် သေချာပေါက် အောင်မြင်နိုင်ရေးအတွက် မလျှော့သောဇွဲဖြင့် ပြန်လည်ကြိုးစားရန် ပြင်ဆင်နေကြမည်သာ ဖြစ်ပေသည်။ ဂုဏ်ထူးနှင့် အောင်သည်ဖြစ်စေ၊ ဂုဏ်ထူးမပါဘဲ အောင်သည်ဖြစ်စေ ဆယ်တန်း အောင်မြင်သွားသည်ဆိုသည်နှင့် မိဘ၊ ဆရာများနှင့် ညီအစ်ကိုမောင်နှမ ဆွေမျိုးသားချင်းများက ဝမ်းမြောက်ဝမ်းသာ ချီးမွမ်းဂုဏ်ပြုကြသည်မှာ ဓမ္မတာပင်ဖြစ်သော်လည်း အကြောင်းကြောင်းကြောင့် အရေးနိမ့်ခဲ့ရသူများကို ပြစ်တင်ရှုတ်ချမှုမပြုဘဲ ကြီးမားသော ဇွဲ၊ လုံ့လ၊ ဝီရိယဖြင့် ပြန်လည် ကြိုးစားအားထုတ်ချင်စိတ် ဖြစ်လာအောင် မဖြစ်မနေ တွန်းအားပေးကြရန် အထူး လိုအပ်မည်ဖြစ်ပေသည်။ ဝမ်းနည်းဝမ်းသာဖြစ်လွယ်ပြီး စိတ် ခံစားချက် ပြင်းထန်တတ်သော ဆယ်ကျော်သက်အရွယ် အပျိုဖော်ဝင်ခါစ ကာလထဲတွင်ရှိသူများဖြစ်ရာ ရှုံးနိမ့်ခဲ့မှုအပေါ် မိမိတို့၏ အပြုအမူ၊ အပြောအဆိုတို့က ချစ်ရာမရောက်စေဘဲ နှစ်ရာရောက်စေသည့်သဘောမျိုး မသက်ရောက်သွားစေရန် မိဘ၊ ဆရာများနှင့် ညီအစ်ကို မောင်နှမများအနေနှင့် အထူး သတိချပ်သင့်ကြောင်း ဦးစွာ ပြောလိုပါသည်။ 

မြန်မာနိုင်ငံတွင် တက္ကသိုလ်ဝင်တန်း(ဆယ်တန်း) စာမေးပွဲသည် လွန်စွာမှ နတ်ကြီးသော အရည်အချင်းစစ် စာမေးပွဲတစ်ခုဖြစ်သည်ဟု ခေတ်အဆက်ဆက် မိဘ၊ ဆရာများက သတိပေးလေ့ ရှိခဲ့ကြသည်မှာ ယင်းစာမေးပွဲဖြေဆိုမှုမှ ထွက်ပေါ်လာမည့် ရလဒ်သည် မြန်မာ့ပညာရေးစနစ်အရ လူတစ်ဦး၏ ဘဝလမ်းကြောင်းတစ်ခု ဖြောင့်ဖြူးနိုင်ခြင်း ရှိ၊မရှိကို အတိုင်းအတာတစ်ခုအထိ ပုံဖော်ပေးနိုင်ခြင်းကြောင့်ဖြစ်ပေသည်။ ထို့ပြင် အခြေခံပညာသင်ယူသူ ကျောင်းသားတစ်ဦးအတွက် ခေတ်အလိုက် မြင့်တက်လာသော ကုန်ကျစရိတ်များထဲတွင် ဆယ်တန်း ကျောင်းသားတစ်ဦးအတွက် ပညာရေးစရိတ်စကမှာ အမြင့်ဆုံး အနေအထားတွင်ရှိရာ ဆယ်တန်းစာမေးပွဲသည် ဖြေဆိုသူများ၏ မိဘများအတွက်ပါ နတ်ကြီးသည့်ကိစ္စတစ်ခုလို ဖြစ်နေပေသည်။ ယင်းသို့သော အကြောင်းအရင်းများကြောင့် မိဘအများစုက ဆယ်တန်းကို မဖြစ်မနေ အောင်မြင်ရန်နှင့် အောင်မြင်ခဲ့လျှင်လည်း အမှတ်များများဖြင့် အောင်မြင်ရန် ဆယ်တန်း တက်ရောက်တော့မည့် အချိန်ကစ၍ တဖွဖွ သတိပေးလေ့ရှိခြင်း ဖြစ်ပါလိမ့်မည်။ သို့သော် မိဘများ၏ သတိပေးဆုံးမမှုမှာ တစ်ခါတစ်ရံတွင် စိတ်ဖိစီးမှု လွန်စွာ ကြီးမားသွားလောက်အောင် ဖိအားပေးသည့်ပုံစံမျိုး ဖြစ်သွားတတ်ပေရာ မျှော်လင့်ထားချက်နှင့် လုံးဝ ဆန့်ကျင်သည့် ရလဒ်ဆိုးများကိုသာ ဖြစ်ပေါ်စေနိုင်သည်ကို အထူး သတိထားသင့်ပေသည်။ ဥပမာ - ယခုနှစ် ဆယ်တန်း အောင်စာရင်း ထွက်ရှိပြီးနောက် စာမေးပွဲကျသောကြောင့် သေကြောင်း ကြံစည်သွားသည်အထိ ဖြစ်ခဲ့ရသော ကျောင်းသူလေးများ၏ ရင်နင့်ဖွယ် သတင်းများကို ယမန်နေ့ထုတ် သတင်းစာနှင့် ယနေ့ထုတ် သတင်းစာတို့တွင် တွေ့ရှိရမည်ဖြစ်သည်။ 

မိဘဟူသည် သားသမီးအပေါ် ဆင်စီး၍မြင်းရံနေသည့် အခြေအနေမျိုးကိုသာ အမြဲပင်တစေ တွေ့ရှိလိုသည့် ဆန္ဒရှိသူများသာ ဖြစ်သည်မှာ မှန်သော်လည်း တစ်ခါတစ်ရံတွင် ယင်းစိတ်စေတနာတို့က မိမိသားသမီးကို လူမှန်နေရာမှန်ဖြစ်အောင် ဖန်တီးမပေးနိုင်သည့် အနေအထားမျိုး ဖြစ်စေသည်ကိုလည်း နားလည်သဘောပေါက်ရန် လိုအပ်ပါသည်။ ဥပမာ- မိမိက ဆရာဝန်ဟူသည့် ဂုဏ်ဒြပ်ကို လွန်စွာ နှစ်သက် သဘောကျခြင်းကြောင့် ဆေးပညာ သင်ယူနိုင်မည့် အမှတ်မီသူ သားသမီးကို ဆရာဝန်ဖြစ်ရန် ဖိအားပေးသော်လည်း သားသမီးက ကွယ်လွန်သူ ဒေါက်တာ သန်းထွန်းကဲ့သို့ ကမ္ဘာသိ မြန်မာ့သမိုင်းပညာရှင်ကြီး တစ်ဦးဖြစ်ရန် ဆန္ဒရှိနေခြင်းမျိုးကို ဆိုလိုပေသည်။ မည်သို့ပင်ဆိုစေကာမူ ယခုအခါ ဆယ်တန်း အောင်မြင်သွားသူ ကျောင်းသားကျောင်းသူများအနေနှင့် ရရှိခဲ့သည့် အမှတ်များအပေါ် မူတည်ပြီး တက္ကသိုလ်နှင့် အင်စတီကျုအသီးသီး၌ ဘာသာရပ် အသီးသီးကို ရွေးချယ်ခွင့်ကြရတော့မည်ဖြစ်ရာ မိဘများအနေနှင့် မိမိ၏ ဖြစ်စေချင်သော ဆန္ဒနှင့် သားသမီးတို့၏ ဖြစ်လိုသော ဆန္ဒနှစ်ရပ်အနက် မည်သည့်အရာကို ဦးစားပေးသင့်သည်ကို စဉ်းစားချင့်ချိန်သင့်ကြောင်း သတိပေးလိုရင်းဖြစ်သည်။ အကြောင်းမှာ အဆင့်မြင့်ပညာများကို ဆက်လက် သင်ယူကြတော့မည့် တက်သစ်စ လူငယ်လေးများသည် မိဘများအတွက် သာမက တိုင်းပြည်၏ အနာဂတ်တောက်ပအောင် ဖန်တီးပေနိုင်မည့် ရတနာများဆိုလျှင် မည်သို့မျှ မမှားနိုင်သောကြောင့်ပင်ဖြစ်ပေသည်။ 

အယ်ဒီတာ (၁၉-၆-၂၀၁၇)

  • TAGS