News

POST TYPE

EDITORIAL

“သား”များအားလုံး အပြန်အလှန် မေတ္တာ သက်ဝင်စေချင် (Daily, Vol-5/No-54)
13-Jun-2017 tagged as

ယခင် နိုင်ငံတော် အေးချမ်းသာယာရေးနှင့် ဖွံ့ဖြိုးရေးကောင်စီ(န.ယ.က) အစိုးရလက်ထက် ပြည်တွင်းမီဒီယာများ ပုံနှိပ်ထုတ်ဝေသည့် အကြောင်းအရာ မှန်သမျှကို စာပေစိစစ်ရေးဌာန၏ ဆင်ဆာတည်းဖြတ်သည့် လုပ်ငန်းစဉ် ဖြတ်သန်းပြီးပါမှ ပုံနှိပ်ထုတ်ဝေခွင့် ရခဲ့သည့် အချိန်ကာလက မြန်မာမီဒီယာ လောကထဲသို့ ဝင်ရောက်လာသူ လူသစ်များကို အတွေ့အကြုံရှိသူများက သတိပေးဆုံးမသည့် ဆိုရိုးတစ်ခု ရှိခဲ့ပါသည်။ စာပေစိစစ်ရေး သို့မဟုတ် အာဏာပိုင်ပုဂ္ဂိုလ်များနှင့် ပြဿနာ မဖြစ်စေလိုသောဆန္ဒ၊ မိမိအလုပ်လုပ်သောမီဒီယာတွင် အန္တရာယ် တစ်စုံတစ်ရာ မကျရောက်စေလိုသော ဆန္ဒဖြင့် သတိပေးလေ့ရှိသည့် စကားမှာ ယခုလိုဖြစ်သည်။ 

“သားသုံးသားကို အထူးသတိထား ရှောင်ကြပါ”

အဆိုပါ အတွေ့အကြုံရင့်သော မီဒီယာသမားကြီးများဆိုလိုသည့် သားသုံးသားမှာ ဘုရားသား (ရဟန်းသံဃာတော်များ အပါအဝင် အခြား သာသနာရေးနှင့်ဆိုင်သော ပုဂ္ဂိုလ်များ)၊ တပ်မတော်သား(စစ်သား) နှင့် ကျောင်းသား (အထူးသဖြင့် တက္ကသိုလ်ကျောင်းသား)တို့ဖြစ်သည်။ သူတို့၏ သတိပေးလိုရင်းမှာ အဆိုပါ သားသုံးသားမျှသာမက သူတို့နှင့်ဆိုင်သော အဖွဲ့အစည်းများနှင့် ပတ်သက်၍ မည်သို့သော ဝေဖန်မှုမျိုးမျှ မပြုလုပ်ရန်ပင် ဖြစ်သည်။ သူတို့၏ သတိပေးချက် အလွန် မှန်ကန်ခဲ့ပါသည်။ ထိုစဉ်က အဆိုပါ သားသုံးသားနှင့် ပတ်သက်သော ဝေဖန်ရေးသားမှုများ ပုံနှိပ်ထုတ်ဝေရန် မဆိုထားနှင့်၊ ယင်းဝေဖန်ချက်များပါသည့် သတင်းနှင့် ဆောင်းပါးများ စာပေစိစစ်ရေးဌာနသို့ ဆင်ဆာတည်းဖြတ်ပေးရန် ပို့ရုံမျှဖြင့် အဆိုပါဌာနမှ တာဝန်ရှိသူများ၏ ခေါ်ယူသတိပေးခြင်း၊ အခန့်မသင့်လျှင် ဝန်ခံကတိထိုးရခြင်းမျိုး တွေ့ကြုံခဲ့ကြရသည်ကို ထိုခေတ်ထိုအခါကို ဖြတ်သန်းဖူးသည့် စာနယ်ဇင်းသမားများ အားလုံးလိုလို သိကြပါလိမ့်မည်။ အဆိုပါကာလကို မြန်မာ့မီဒီယာ လောက မှောင်အတိ ဖုံးနေခဲ့ချိန်ဟုပင် ဆို၍ရပါသည်။ အကြောင်းမှာ သား သုံးသား မဆိုထားနှင့်၊ “ကမ္ဘောဒီးယားနိုင်ငံ၌ ငွေစက္ကူ အဟောင်းအစုတ်များကို စစ်ဆေးရာ ဗက်တီးရီးယားပိုး သန်းနှင့်ချီ တွေ့ရှိ”ဟူသော နိုင်ငံတကာ သတင်းမျိုးကိုပင် စာပေစိစစ်ရေးဌာနက ထည့်သွင်းဖော်ပြခွင့် မပြုခဲ့သောကြောင့်ဖြစ်သည်။ သို့သော် ထိုသို့ တိမ်ညိုတိမ်မည်းကြီးများ ဆိုင်းခြင်းခံခဲ့ရသည့် မြန်မာ့မီဒီယာလောကသည် အားလုံးသိထားသည့်အတိုင်း ၂၀၁၁ ခုနှစ် နောက်ပိုင်း၊ ဗိုလ်ချုပ်ကြီးဟောင်း သမ္မတဦးသိန်းစိန် အစိုးရလက်ထက်တွင် နေခြည်သန်းသည့် အခြေအနေထဲသို့ ရောက်ရှိခဲ့ရာ သားတစ်သား၏ စွမ်းဆောင်ရည်ကြောင့် စာဖတ်သူ မိဘပြည်သူများ အလင်းရခဲ့သည်ဟုဆိုလျှင် မှားမည်မဟုတ်ပေ။ မီဒီယာလောကပေါ်က တိမ်ညိုတိမ်မည်းကြီးများလည်း စာပေစိစစ်ရေးဌာနနှင့်အတူ လွင့်ပျောက်ကွယ်သွားခဲ့ပြီဖြစ်ပါသည်။

တိုက်ဆိုင်သည်ဟုပင် ဆိုရပါမည်။ ဤခေါင်းကြီးပိုင်း ရေးသားနေချိန်တွင် The Voice Daily သတင်းစာ၌ စီးပွားရေး ကြော်ငြာထည့်မည့်ကိစ္စနှင့် ပတ်သက်၍ နာမည်ကျော် စီးပွားရေး လုပ်ငန်းတစ်ခုက အဆိုပါကိစ္စကို ပြန်လည် စဉ်းစားမည်ဖြစ်ကြောင်း၊ အကြောင်းမှာ The Voice သည် တပ်မတော်နှင့် အမှုရင်ဆိုင်နေရခြင်းကြောင့် ယင်းစီးပွားရေး လုပ်ငန်း၏ အကြီးအကဲဖြစ်သူက ကြော်ငြာကိစ္စ ပြန်လည်သုံးသပ်ရန် သတိပေးထား၍ဖြစ်ကြောင်း ကြော်ငြာဌာနကို ဆက်သွယ်လာပါသည်။ အထက်တွင်ဆိုခဲ့သည့် သားသုံးသားအနက် သားတစ်သား၏ ငြိုငြင်ခြင်းခံရမည့်အရေးအပေါ် အဆိုပါစီးပွားရေး လုပ်ငန်းရှင်အနေနှင့် မည်မျှအတိုင်းအတာအထိ စိုးရိမ်စိတ်ထားသည်ကို The Voice အနေနှင့် ကောင်းစွာ စာနာနားလည်မိပါသည်။ နိုင်ငံရေး၊ စီးပွားရေး၊ လူမှုရေး စသည့်နယ်ပယ်အသီးသီးမှ ပုဂ္ဂိုလ်တိုင်း တိမ်ညိုတိမ်မည်းများ အုံ့ဆိုင်းခဲ့သော ယခင်ခေတ်ကာလ သာမက ယနေ့ခေတ်ကာလတွင်ပါ သားသုံးသားနှင့် ကတောက်ကဆ မဖြစ်လိုဘဲ အပြန်အလှန် နားလည်မှု၊ ရိုင်းပင်း ကူညီပံ့ပိုးမှုတို့ဖြင့်သာ အတူရှေ့ဆက်လိုကြသည်ချည်းသာပင် ဖြစ်ပါလိမ့်မည်။ သို့သော်လည်း တစ်ခါတစ်ရံတွင် မိမိအဖွဲ့အစည်း၏ ရပ်တည်ချက်၊ မိမိအလုပ်၏ ကျင့်ဝတ် အစရှိသည့် ကွဲပြားသော ပြဋ္ဌာန်းချက်များကြောင့် နားလည်မှုလွဲကာ မကြုံတွေ့ချင်သည့်အဖြစ်မျိုး ကြုံတွေ့နိုင်သည်ကို အထူးသတိပြုထားရပါမည်။ ဤနေရာတွင် အဓိက မေတ္တာရပ်ခံလိုသည့် အချက်မှာ မြန်မာနိုင်ငံတွင် မတူကွဲပြားသော တိုင်းရင်းသား လူမျိုးများ အပါအဝင် နယ်ပယ်အလိုက် “သား”ပေါင်း များစွာရှိနေရာ သားများအားလုံး တစ်ဦးနှင့် တစ်ဦး နိုင်ထက်စီးနင်းပြုခြင်း၊ ဗိုလ်ကျခြင်း၊ ခွဲခြားဆက်ဆံခြင်း စသည်တို့ကို ရှောင်ရှားပြီး စာနာနားလည်မှု၊ ငဲ့ညှာထောက်ထားမှု၊ ကူညီရိုင်းပင်းမှုတို့ဖြင့် တိမ်ညိုတိမ်မည်းများ အုံ့ဆိုင်းခဲ့သည့်အခြေအနေမျိုး ထပ်မဖြစ်ရန် အခိုင်အမာလက်တွဲ လုပ်ဆောင်ကြပါမည့်အကြောင်း ဆိုလိုရင်းဖြစ်ပေသည်။ 

အယ်ဒီတာ(၁၃-၆-၂၀၁၇)

  • TAGS