News

POST TYPE

EDITORIAL

တွက်နည်းရွေးရမည့် ငြိမ်းချမ်းရေး ပုစ္ဆာ (Daily, Vol-4/No-72)
04-Jul-2016 tagged as

ဒုတိယ ပင်လုံညီလာခံ အမည်ဖြင့် နိုင်ငံလုံးဆိုင်ရာ ငြိမ်းချမ်းရေး ဆွေးနွေးပွဲ ကျင်းပမည့်ရက် တဖြည်းဖြည်းနှင့် နီးကပ်လာပြီ ဖြစ်သည်။ ဒုတိယ ပင်လုံညီလာခံသည် ဦးသိန်းစိန် အစိုးရလက်ထက်က အစပျိုးခဲ့သော ငြိမ်းချမ်းရေး လုပ်ငန်းစဉ်များကို NLD အစိုးရက ဆက်လက်ဆောင်ရွက်သည့် ပထမဦးဆုံး တရားဝင် ညီလာခံဟုလည်း ဆိုနိုင်သည်။

နှစ်ခြောက်ဆယ်ကျော်လာပြီ ဖြစ်သည့် ပြည်တွင်းစစ်မီးသည် အာဏာရှင် သက်တမ်းထက် ပိုကြာမြင့်ခဲ့သော်လည်း ယနေ့အချိန်အထိ မငြိမ်းနိုင်သေးဘဲ တောက်လောက်နေရခြင်းမှာ အဘယ်ကြောင့်နည်းဟု မေးစရာရှိသည်။

သက်ဦးဆံပိုင် ပဒေသရာဇ်ခေတ်၊ ကိုလိုနီခေတ်၊ ပါလီမန် ဒီမိုကရေစီခေတ်၊ အာဏာရှင်ခေတ်မှသည် လက်ရှိအစိုးရအထိ တောင်တန်းဒေသနှင့် ပြည်မအကြား မသိမသာရော၊ သိသိသာသာရော ခွဲခြားအုပ်ချုပ်၊ ဆက်ဆံခဲ့ခြင်း၊ လူအများစု ကြီးစိုးသော နိုင်ငံတွင် လူနည်းစုအပေါ် အနိုင်ကျင့်သကဲ့သို့ ဖြစ်ခဲ့သည့် သာဓကများက ကနဦး ဇာတ်လမ်းအစဟု ဆိုနိုင်သည်။

ထိုစဉ်က ပြည်တွင်းစစ်မီး နောက်ကွယ်တွင် ရိုးသားသော တိုင်းရင်းသားများက ပြည်ထောင်စု သို့မဟုတ် ပြည်မအစိုးရကို လက်နက်ကိုင် ဆန့်ကျင်ပုန်ကန်ရခြင်း၏ အဓိက အကြောင်းတရားမှာ များစွာရိုးစင်းလှသော်လည်း ကုန်ခဲ့သည့် နှစ်ဆယ့်ငါးနှစ်ကျော် ကာလမှစ၍ စွက်ဖက်၊ ခြယ်လှယ်၊ ကြိုးကိုင်မှုများ၊ ကိုယ်ကျိုးအတ္တများဖြင့် ရှုပ်ထွေးပွေလီလာသည်။

ငြိမ်းချမ်းရေးအဆင့် မရောက်မီ အပစ်အခတ်ရပ်စဲရေး စာချုပ်များသည်ပင်လျှင် နှစ်ဖက်စလုံးက လေးစားလိုက်နာမှု မရှိသောကြောင့် အောက်ခြေတပ်များအကြား ကိုယ်ကျိုးစီးပွား မကင်းသော ထိပ်တိုက်တွေ့ဆုံမှုများမှ ဖြစ်ပေါ်လာသော ပြဿနာအချို့ကြောင့် အပစ်ရပ်ထားသော တိုင်းရင်းသား လက်နက်ကိုင်များ အချင်းချင်းရော၊ တပ်မတော်နှင့်ပါ တိုက်ပွဲများ မကြာခဏ ပြန်လည်ဖြစ်ပွားနေပေသည်။

စင်စစ်အားဖြင့် နှစ်ပေါင်းခြောက်ဆယ်ကျော်ကြာတိုင် များစွာ ရှုပ်ထွေးပွေလီလှသော အမယ်ဘုတ်ချည်ခင်ကဲ့သို့ ဖြစ်နေသော ငြိမ်းချမ်းရေးကိစ္စသည် ဒေါ်အောင်ဆန်းစုကြည် ခေါင်းဆောင်သော NLD အစိုးရအတွက် အကြီးမားဆုံး စိန်ခေါ်မှုတစ်ခု ဖြစ်သည်။

ထိုမျှ အချိန်ကြာမြင့်လာခဲ့သော ပြည်တွင်းစစ်မီး သို့မဟုတ် ငြိမ်းချမ်းရေးပုစ္ဆာကို ဦးသိန်းစိန်သည် လည်းကောင်း၊ ဒေါ်အောင်ဆန်းစုကြည်သည် လည်းကောင်း ငါးနှစ်သက်တမ်းတစ်ခု အတွင်း ပြေလည်အောင် ဖြေရှင်းတွက်ချက်ရန်မှာ မည်သို့မျှ မလွယ်ကူနိုင်မှန်း သိနေကြလင့်ကစား အစိုးရများအပေါ်တွင် ဖိအားပေးနေကြခြင်းမှာ နိုင်ငံရေးကိစ္စများ ရောယှက်နေပေသည်။

မြန်မာ့ငြိမ်းချမ်ရေး ပုစ္ဆာကိုကြည့်ပါက အင်အားကြီးသော လက်နက်ကိုင်အဖွဲ့ကြီးအချို့ နောက်ကွယ်တွင် ကိုယ်ကျိုးစီးပွား ကာကွယ်လိုသူနှင့် ဒီမိုကရေစီ ချန်ပီယံ ဖြစ်လိုသူ နိုင်ငံကြီးအချို့၏ စွက်ဖက်မှု၊ နိုင်ငံရေးခြေရှုပ်မှု၊ ဒေသတွင်း အင်အားချိန်ခွင် လျှာညှိလိုမှုတို့ ရောယှက်နေခြင်းကလည်း တစ်ပူပေါ် နှစ်ပူဆင့်အဖြစ် ရှိနေသည်။

လက်နက်ကိုင်ထားခြင်းသည်ပင်လျှင် မြေပေါ်၊ မြေအောက် သယံဇာတနှင့် နယ်စပ်ကုန်သွယ်မှုတို့ကို အကြောင်းပြုကာ အသက်မွေးဝမ်းကျောင်း တစ်ခုကဲ့သို့၊ သာမန်လူများထက် အခွင့်အရေး ပိုရနေသကဲ့သို့ ဖြစ်နေသော လက်နက်ကိုင်အဖွဲ့အချို့ အတွက်မူ လက်နက်စွန့်လိုက်ပါက အကာအကွယ်မဲ့ကာ ရပ်တည်ရှင်သန်ရေး၊ အနာဂတ်ရေး မသေချာမရေရြာ ဖစ်သွားမည်ကို စိုးရိမ်ကြောင့်ကြနေခြင်းက ပုစ္ဆာ၏ ပေးထားချက်တစ်ခု ဖြစ်သည်။

ထို့အပြင် နိုင်ငံရေးပါတီများ ခြေရှုပ်မှုနှင့် အချင်းချင်းအကြား အာဏာလုပွဲများ၊ အကွဲအပြဲများကြောင့် နိုင်ငံရေးနယ်ပယ်အတွင်း ဝင်ရောက်လာကာ အာဏာသုံးရပ်ကို နှစ်ပေါင်းများစွာ ထိန်းချုပ်ထားခဲ့သည့် တပ်မတော်သည် ပြည်တွင်းစစ်များ ချုပ်ငြိမ်းသွားပါက မည်သည့်အခန်းကဏ္ဍတွင် ဆက်လက်ရပ်တည်သွားမည် ဆိုခြင်းကလည်း ငြိမ်းချမ်းရေးပုစ္ဆာတွင် ထည့်သွင်းစဉ်းစားရမည့် အချက်ဖြစ်သည်။

ထိုအခြေအနေတွင် ဖက်ဒရယ်ပြည်ထောင်စု ထူထောင်ရန် ရည်သန်ဆောင်ရွက်နေသော အစိုးရများ အနေနှင့် တိုင်းရင်းသား ဒေသများရှိ ခံစားခွင့်များကို လက်နက်ကိုင်များနှင့် ဒေသခံ အရွေးကောက်ခံ နိုင်ငံရေးပါတီ သို့မဟုတ် ဒေသအစိုးရတို့ အကြားနှင့် ပြည်ထောင်စုအစိုးရအကြား မည်သို့ အချိုးကျ ခွဲဝေမည် ဆိုခြင်းကလည်း ပုစ္ဆာ၏ ပေးထားချက်တွင် ပါဝင်နေပေသည်။

မည်သို့ပင်ဖြစ်စေ နိုင်ငံဖွံ့ဖြိုးတိုးတက်ဖို့ဆိုလျှင် ငြိမ်းချမ်းရေးပုစ္ဆာကို မဖြစ်မနေ တွက်ချက်ဖြေရှင်းရမည် ဖြစ်သောကြောင့် ပုစ္ဆာ၏ ပေးထားချက်များကို ကြိုတင်ကျေညက်စွာ လေ့လာပြင်ဆင်ကာ တွက်နည်းများစွာ ရှိသည့်အနက် အဓိက ပါဝင်ပတ်သက်သူ၊ အဓိက တာဝန်ရှိ သက်ဆိုင်သူ stakeholder အားလုံး ထိခိုက်မှု နည်းနိုင်သမျှ နည်းသည့်တွက်နည်းဖြင့် တွက်ချက်အဖြေထုတ်နိုင်စေကြောင်း ယုံကြည်မျှော်လင့်အပ်ပေသည်။

အယ်ဒီတာ (၃-၇-၂၀၁၆)

  • TAGS