News

POST TYPE

EDITORIAL

အနိုင်ယူခြင်းလော၊ အောင်ပွဲလော (Daily, Vol-5/No-24)
09-May-2017 tagged as

လောကတွင် အားကြီးသူအပေါ် အနိုင်ရရှိခြင်းကသာ အောင်ပွဲနှင့်တူပြီး အားနည်းသူအပေါ် အနိုင်ယူနိုင်ခြင်းမှာမူ အောင်နိုင်သည့်သဘောထက် အနိုင်ကျင့်သည့်သဘောက ပိုများသည်။

ထို့အပြင် အရေးမကြီးသော အသေးအဖွဲ ကိစ္စကလေးများတွင် ခရုခါးတောင်းကျိုက် ဖမ်းသကဲ့သို့ အင်အားကုန် စိုက်ထုတ်နေပြီး အရေးကြီးသော ဧရာမ ပြဿနာ ကိစ္စရပ်များကို ရင်ဆိုင်ဖြေရှင်းရန် အချိန်ဆွဲ ပျက်ကွက်နေလျှင် တာဝန်မဲ့ရာ ရောက်သည်။

အစစ အရာရာ အောက်ခြေမှစ၍ ပြုပြင်ပြောင်းလဲရန် အထူး အရေးတကြီး လိုအပ်နေသော မြန်မာနိုင်ငံတွင် လွှတ်တော်တစ်ရပ်၊ အစိုးရတစ်ဖွဲ့အတွက် လုပ်ကိုင် ဆောင်ရွက်စရာများ မရေမတွက်နိုင်အောင် များပြားလှသည်။

ထိုသို့ မြားမြောင်လှစွာသော ဆောင်ရွက်စရာများကို စနစ်တကျ ကဏ္ဍ၊ နယ်ပယ်အလိုက် စုစည်းကာ အဓိက၊ သာမည ခွဲခြားကာ ရေတို၊ ရေရှည် ကာလ သတ်မှတ်ချက်များဖြင့် ကျွမ်းကျင်သူများကို တာဝန်ပေး၍ စီမံခန့်ခွဲရမည် ဖြစ်သည်။

ငါးနှစ် သက်တမ်းရှိသော အစိုးရတစ်ရပ် ဆိုပါက နှစ်အလိုက်၊ နယ်ပယ် ကဏ္ဍအလိုက် အရေးကြီး ဆောင်ရွက်ဖွယ်ရာများ၊ ငါးနှစ် သို့မဟုတ် နောင်အစိုးရအဆက်ဆက်အလိုက် နိုင်ငံတော်နှင့် ပြည်သူတစ်ရပ်လုံးအတွက် အရေးကြီးသော ရေခံ၊ မြေခံများအဖြစ် ရေရှည် အကောင်အထည်ဖော်  သွားရမည့် စီမံကိန်းများဟူ၍ စနစ်တကျ ပိုင်းခြား လုပ်ကိုင်ရမည်ဖြစ်သည်။

လတ်တလောအားဖြင့် ငြိမ်းချမ်းမှု တည်ဆောက်ရေးကို အထူးအားစိုက် အကောင်အထည် ဖော်နေသော်လည်း စီးပွားရေး၊ ပညာရေး၊ ကျန်းမာရေးကဲ့သို့ အခြားသော နယ်ပယ်များကိုလည်း ကျွဲကူးရေပါ ပြောင်းလဲဖွံ့ဖြိုးလာစေရန် အချိန်ကိုက် ဆောင်ရွက်စီမံရမည်ဖြစ်သည်။

နိုင်ငံရေးအရ အတိုက်အခံအဖြစ် ရှိနေမည့် ပါတီများ၏ ပူးပေါင်းကူညီမှု မရရှိနိုင်သည့်အပြင် သဘာဝအရ အခက်အခဲ၊ အကျပ်အတည်း တွေ့စေရန်ပင် ဖိအားပေးနိုင်ဖွယ်ရှိပေရာ ဒီမိုကရေစီ တိုက်ပွဲကာလက ရပ်တည်ချက်ခြင်း တူခဲ့သော နိုင်ငံရေးပါတီများ၊ တိုင်းရင်းသား ပါတီများ၏ အကူအညီနှင့် ပူးပေါင်း ဆောင်ရွက်မှု ရရှိစေရန် အထူး ကြိုးစားရမည်ဖြစ်သည်။

ထိုသို့ ကြိုးစားရာတွင် ပြိုင်ပွဲတွင် အနိုင် ရရှိထားသူတစ်ဦးက မိမိအား ရှုံးနိမ့်ထားသူများအပေါ် အမြင့်မှကြည့်၍ ဆက်ဆံခြင်းမျိုးထက် မိမိကိုယ်ကို ပို၍ နှိမ့်ချဆက်ဆံနိုင်မှသာ စစ်မှန်သော အမျိုးသား ရင်ကြားစေ့ရေးနှင့် အမျိုးသား စည်းလုံး ညီညွတ်မှုကို ရရှိနိုင်ပေမည်။

အာဏာနိုင်ငံရေး လောကသည် မည်သည့်စနစ်တွင်မဆို အာဏာရရှိရန် အဓိက ဦးတည်ကြိုးစားကြသည့်အတွက် အတိုက်အခံနှင့် အာဏာရပါတီများအကြား ပြိုင်ဆိုင်မှုနှင့် အပြန်အလှန် ဖိအားပေးမှုများ ရှိနေတတ်သည်။ 

မြန်မာနိုင်ငံကဲ့သို့ နှစ် ငါးဆယ်ကျော် အာဏာရှင်စနစ် ကျင့်သုံးလာခဲ့သော နိုင်ငံမျိုးတွင် အာဏာကို လက်လွှတ်ထားသူများ၏ ပြင်းထန်သော ဖိအားပေး၊ အကျပ်ကိုင်မှုများ တည့်တည့်သော်လည်းကောင်း၊ သွယ်ဝိုက်၍သော်လည်းကောင်း နည်းလမ်း အမျိုးမျိုးဖြင့် ရှိနေနိုင်သည်။

ဒီမိုကရေစီကို ဦးတည်သော အစိုးရနှင့် နိုင်ငံရေး အင်အားစုများ ဖြစ်ကြလျှင် မိမိတို့အင်အားကို အချင်းချင်းအကြား အပေါ်စီးယူ အနိုင်အထက် ပြုလိုသောစိတ်ဖြင့် ဖြုန်းတီး မပစ်ကြဘဲ အပြန်အလှန် ကျောချင်းကပ်၍ ကြုံလာသည့် ဖိအားများကို စုပေါင်း တွန်းလှန်ကာ နိုင်ငံကို ပြန်လည် ထူထောင်ကြရန် အရေးကြီးလှသည်။

ဒီမိုကရေစီ အသွင်ကူးပြောင်းကာလ ဖြစ်သည့်အတွက် ဒီမိုကရေစီ စနစ်၏ ရေခံမြေခံများကို အစပျိုး ထူထောင်ပေးရမည် ဖြစ်သော်လည်း အာဏာရှင် စနစ်၏ အကြွင်းအကျန် စရိုက်လက္ခဏာများကို ပြန်လည် အသက်သွင်းသကဲ့သို့ ဖြစ်နေလျှင် မိမိကိုယ်တိုင် ပန်းတိုင်ပျောက်ကာ ပြည်သူလူထု၏ စိတ်ပျက်မှုနှင့်အတူ ဒီမိုကရေစီကိုပင် အယုံအကြည်မဲ့လာသည့် အန္တရာယ်နှင့် ရင်ဆိုင်ရနိုင်ကြောင်း သတိပေး ထောက်ပြလိုရင်း ဖြစ်သည်။

အယ်ဒီတာ (၉-၅-၂၀၁၇)

  • TAGS