News

POST TYPE

EDITORIAL

ကောလာဟလများနှင့် ဥပဒေစိုးမိုးမှု (Daily, Vol-5/No-20)
04-May-2017 tagged as



တရားဥပဒေ စိုးမိုးရေး ခေါင်းစဉ်တပ်၍ ပြောလိုက်သည်နှင့် လိုလျှင် လိုသလို၊ မလိုလျှင် မလိုသလို စိုးမိုးခြင်း၊ မစိုးမိုးခြင်း ဖြစ်နေသလော ဟူသော မေးခွန်း မေးစရာ ရှိပေသည်။ 

အာဏာသုံးရပ်နှင့် တပ်မတော်တို့မှ တာဝန် အရှိဆုံး ပုဂ္ဂိုလ်များနှင့် ပတ်သက်သော ပုတ်ခတ်၊ စွပ်စွဲမှုများကိုမူ နာမည်ဆိုးဖြင့် ကျော်ကြားနေသည့် ဆက်သွယ်ရေး ဥပဒေ ပုဒ်မ ၆၆ (ဃ)ဖြင့် အမှုဖွင့်၊ ဖမ်းဆီး၊ တရားစွဲဆို၊ အပြစ်ဒဏ်ချ အရေးယူနေသော်လည်း ထိုထက် ကြီးမားသော ကိစ္စရပ်များကိုမူ သာမန် အမှုအခင်းသဖွယ် သဘောထားနေခြင်းကြောင့် ယင်းသို့မေးခွန်း ထုတ်စရာ ရှိလာခြင်းဖြစ်သည်။

လတ်တလော ကာလအတွင်း ဘာသာရေးပဋိပက္ခကို ဦးတည်လာနိုင်ဖွယ်ရှိသည့် လှုပ်ရှားမှုအချို့၊ ပုဂ္ဂလိက ဘဏ်ကြီးတစ်ခုနှင့် ပတ်သက်သော ကောလာဟလ၊ နိုင်ငံတော်သမ္မတ နုတ်ထွက်စာ တင်မည်ဟူသော လုပ်ကြံ ဖန်တီးသတင်းတို့မှာ နိုင်ငံတော် တည်ငြိမ်ရေးနှင့် အေးချမ်းသာယာရေးကို အဟန့်အတား ဖြစ်နိုင်ခြေရှိသော သတင်းများဖြစ်သည်။

ပုဂ္ဂိုလ်ရေး တိုက်ခိုက်၊ လုပ်ကြံမှုများမှာမူ နယ်ပယ် အသီးသီး၊ အလွှာ အသီးသီးတွင် ဖြစ်မြဲဖြစ်နေကျ ကိစ္စရပ် ဖြစ်သောကြောင့် ပုဂ္ဂိုလ်ရေး တိုက်ခိုက်မှုတိုင်းကို အလေးထား တုံ့ပြန်နေပါက အိုးမလုံ၊ အုံပွင့်သည့်သဘော သက်ရောက် သွားတတ်သည်ကို သတိချပ်သင့်ပေသည်။

ပုံမှန်အားဖြင့် အများပြည်သူနှင့် သက်ဆိုင်သော ကိစ္စရပ်များ၊ ကောလာဟလများ၊ လုပ်ကြံသတင်းများ ဆိုပါက သက်ရောက်မှု နယ်ပယ်နှင့် အတိုင်းအတာ ကြီးမားပျံ့နှံ့ သွားနိုင်သည့်အတွက် အထူး အရေးကြီးကိစ္စအဖြစ် သတ်မှတ်ကာ မဖြစ်မနေ အပူတပြင်း ဖော်ထုတ်၊ အရေးယူရတတ်သည်။

သာမန် အခြေအနေ တစ်ရပ်ကို မူတည်ကာ ဖြစ်ရိုးဖြစ်စဉ် ကောလာဟလ မျိုးထက် နိုင်ငံသား အများစု၏ စားဝတ်နေရေးနှင့် ချိတ်ဆက်နေသော နိုင်ငံရေး၊ စီးပွားရေးဆိုင်ရာ ကောလာဟလများကို တမင်ရည်ရွယ်ချက်ဖြင့် ဖန်တီးပျံ့နှံ့စေခြင်းမျိုး ဆိုပါက အချိန်မဆိုင်းဘဲ လျင်လျင်မြန်မြန် တုံ့ပြန် ဖြေရှင်းရမည်ဖြစ်သည်။  

သို့သော် လူပုဂ္ဂိုလ် တစ်ဦးဦး၊ အဖွဲ့အစည်း တစ်ခုခုနှင့်သာ သက်ဆိုင်သော ကိစ္စရပ်တိုင်းကို မလုံမလဲစိတ်ဖြင့် ကြည့်ပါက အနုတ်လက္ခဏာဆောင် အဓိပ္ပာယ် ကောက်ယူမှု၊ လိုရာဆွဲ အနက်ဖော်ကောက်ချက်ချမှုတို့သာ ရှိလာနိုင်ပြီး အပျက်သဘောဘက်သို့ နားလည်မှု လွဲချော်သွားတတ်သည်။

ဆိုလိုသည်မှာ ပုဂ္ဂိုလ်ရေး ထိပါးမှုများကို အာမခံ မပေးဘဲ ချက်ချင်း ဖမ်းဆီး အရေးယူနိုင်သည်အထိ အခွင့်အာဏာ ပေးထားသော ဆက်သွယ်ရေး ဥပဒေ ပုဒ်မ ၆၆ (ဃ)နှင့် အခြားတည်ဆဲ ဥပဒေပုဒ်မ အချို့ကို နိုင်ငံတော်နှင့် နိုင်ငံသားများ အကျိုးကို ထိခိုက်စေပြီး နိုင်ငံတော် တည်ငြိမ်အေးချမ်းရေးကို ဖျက်ဆီး နှောင့်ယှက်လိုသော ကောလာဟလ ဖြန့်ချိသူများအား အရေးယူရာတွင် အသုံးပြုသင့်ကြောင်းကို ဆိုလိုသည်။

အထူးသဖြင့် တရားဥပဒေ စိုးမိုးရေးနှင့် ချိတ်ဆက် ပတ်သက်နေသော ဥပဒေပြုရေး၊ အုပ်ချုပ်ရေး၊ တရားစီရင်ရေး မဏ္ဍိုင်များအပြင် ပြည်ထဲရေး ဝန်ကြီးဌာနကို တိုက်ရိုက် သို့မဟုတ် သွယ်ဝိုက်ဩဇာ သက်ရောက်မှုရှိသေည့် တပ်မတော်တို့ အနေနှင့် ကောလာဟလများကို ထိရောက်ပြင်းထန်စွာ  ထိန်းသိမ်း ကိုင်တွယ်နိုင်ကြပါမည့်အကြောင်း အထူး အကြံပြုအပ်ပေသည်။
 
အယ်ဒီတာ (၄-၅-၂၀၁၇)

  • TAGS