News

POST TYPE

EDITORIAL

တရားဥပဒေစိုးမိုးရေး ရက်၁၀၀ စီမံချက်အတွက် စဉ်းစားစရာ (Weekly, Vol-12/No-23)
03-Jul-2016
ရန်ကုန်မြို့တော်တွင် ရဲတပ်ဖွဲ့နှင့် အုပ်ချုပ်ရေးအဖွဲ့ဝင်များကို ခြိမ်းခြောက်ကာ အကြမ်းဖက်မှုများ ကျူးလွန်နေသော ရာဇဝတ် ဂိုဏ်းများကို ဖယ်ရှားရှင်းလင်းမည်ဖြစ်ကြောင်း ရန်ကုန်တိုင်းဒေသကြီးဝန်ကြီးချုပ် ဦးဖြိုးမင်းသိန်းက တရားဥပဒေစိုးမိုးရေးနှင့် မှုခင်းကျဆင်းရေး ရက် ၁၀၀ စီမံချက် ဆွေးနွေးပွဲတွင် ပြောဆိုခဲ့ခြင်းကို ကြိုဆိုအပ်ပေသည်။

ဝန်ကြီးချုပ်၏ ပြောဆိုချက်ကို ထောက်ချင့်လျှင် ရန်ကုန်မြို့တော်တွင် လူမိုက်အုပ်စုများက ဂိုဏ်းအဆင့်မျိုးအထိ ဖွဲ့စည်းကာ ရာဇဝတ်မှုများ ကျူးလွန်နေခြင်း ဖြစ်သည်ဟု တရားဝင် ထုတ်ဖော်ဝန်ခံသည့် သဘော သို့မဟုတ် ပြည်သူလူထုအား အသိပေးသည့် သဘောဟုလည်း ယူဆနိုင်ပေသည်။

ယခင်ဝန်ကြီးချုပ် ဦးမြင့်ဆွေ လက်ထက် ကနဦး ကာလများက လျစ်လျူရှုထားသကဲ့သို့ ဖြစ်ခဲ့ပြီး သက်တမ်းကုန်ခါနီးအချိန် ရက်ပိုင်းအလိုကာတွင်မှ နှိမ်နင်းဖမ်းဆီးမှုများ ဆောင်ရွက်ခဲ့သော်လည်း ဂိုဏ်းများဖွဲ့စည်းကာ ရာဇဝတ်မှုများ ကျူးလွန်နေသည့် အဆင့်အထိ ရောက်ရှိနေကြာင်း ပြည်သူလူထုအား အသိအပေး ထုတ်ဖော်ပြောဆိုခဲ့ခြင်း မရှိခဲ့ပေ။

ရန်ကုန်မြို့တော်တစ်ဝန်း ခိုး၊ ဆိုး၊ လုယက်၊ ရိုက်နှက်၊ ဓားထိုး၊ အုပ်စုဖွဲ့ရိုက်နှက် စသည့် ဒုစရိုက်မှုများအပြင် ထိုဒုစရိုက်မှုများကို တားဆီးနှိမ်နင်းရန် တာဝန်ယူထားသည့် ရဲတပ်ဖွဲ့ဝင်များကိုပါ အကြမ်းဖက် ခြိမ်းခြောက်မှုများ ရှိနေခြင်းသည် ပြည်သူလူထု၏ ဘေးကင်းလုံခြုံရေးနှင့် မြို့တော် တည်ငြိမ်အေးချမ်းရေးကို ကြီးစွာအနှောက်အယှက် ပြုနေပေသည်။

ထိုအခြေအနေကို ဝန်ကြီးချုပ်တစ်ဦး အနေနှင့် ပထမဦးဆုံးအကြိမ် ထုတ်ဖော်ဝန်ခံခြင်းနှင့် တားဆီးနှိမ်နင်းသွားမည် ဖြစ်ကြောင်း ပြောဆိုခြင်းတို့မှာ အသိအမှတ်ပြုရမည် ဖြစ်သော်လည်း လွယ်ကူသောကိစ္စ မဟုတ်သည့်အတွက် ရာဇဝတ်မှုများ၏ နောက်ကွယ်တွင် ပါဝင်ပတ်သက်နေသော အကြောင်းကိစ္စများစွာကိုလည်း စေ့ငုစွာ လေ့လာကြည့်ရန်လိုမည် ဖြစ်သည်။

နောက်ကွယ်အကြောင်းအရာ များစွာ ရှိသည့်အနက် ယခင်စစ်အာဏာရှင် လက်ထက်က နိုင်ငံရေးအရ ဆန္ဒပြ၊ သပိတ်မှောက် လှုပ်ရှားမှုများကို အကြမ်းဖက်နှိမ်နင်းရန် အကူအင်အားအဖြစ် အသုံးချလိုသောကြောင့် မြို့နယ်၊ ရပ်ကွက်အသီးသီးရှိ ဥပဒေပ ဒုစရိုက်မှုများ၊ ကျူးလွန်သူများကို မသိမသာ လွှတ်ပေးထားခဲ့ခြင်းက လူမိုက်များ၊ ဒုစရိုက်ဂိုဏ်းများ ပေါက်ပွားလာစေသော အဓိက အကြောင်းရင်း ဖြစ်သည်။

ထို့အပြင် ယင်း ဆိုး၊ ခိုး၊ နှိုက်၊ လုယက်မှု ကျူးလွန်သူများကို နိုင်ငံရေးလှုပ်ရှားမှုများနှင့် အချိန်ကိုက် မကြာခဏဆိုလို လွတ်ငြိမ်း ချမ်းသာခွင့်ပြုပေးခဲ့ခြင်းကလည်း ပြစ်မှုနှင့် မျှတခြင်းမရှိဘဲ ပေါ့လျော့လွန်းသည့်အတွက် နောင်တမရစေသည့်အပြင် ပို၍ အတင့်ရဲလာစေရန် တွန်းအားပေးသကဲ့သို့ ဖြစ်ခဲ့သည်။

အခြားအကြောင်းရင်း အချို့မှာ ယခင်အစိုးရ လက်ထက်က မျက်စိတစ်ဖက် မှိတ်ထားပေးသကဲ့သို့ ဖြစ်ခဲ့သည့် မူးယစ်ဆေးဝါး ထုတ်လုပ်၊ ရောင်းဝယ်၊ သုံးစွဲမှုနှင့် စနစ်တကျ ဥပဒေနှင့်အညီ စံချိန်၊ စံညွှန်း စစ်ဆေးမှု၊ လိုင်စင်အတည်ပြု၊ ခွင့်ပြုမှု မရှိခဲ့သော အရက်သေစာ ထုတ်လုပ်၊ ရောင်းဝယ်မှုများကြောင့် ယုတ်စွအဆုံး အသက်မပြည့်သေးသော အလယ်တန်းအဆင့် ကျောင်းသားများ လက်ဝယ်သို့ပါ မူယစ်ဆေးဝါး၊ အရက်၊ စီးကရက် အလွယ်တကူ ရောက်ရှိနေခြင်းတို့ ဖြစ်သည်။

အထူးသဖြင့် အင်အားလုံလောက်မှု မရှိသည့်အပြင် ထမ်းဆောင်ရသည့် ရာထူး၊ တာဝန်နှင့် လျော်ညီသော အရည်အချင်း၊ အဆောင်အယောင်၊ ခံစားခွင့်၊ လစာ၊ အပိုဆောင်း ထောက်ပံ့ကြေး၊ လိုအပ်သော လုံခြုံရေးဆိုင်ရာ လက်နက်ကိရိယာ၊ ယာဉ်ယန္တရား အစရှိသည်များ အားနည်းချို့တဲ့နေသော မြန်မာနိုင်ငံရဲတပ်ဖွဲ့ကို လိုအပ်သည့် ထောက်ပံ့ဖြည့်ဆည်းမှုများ ပြုပြင်တိုးမြှင့်ပေးရန် လိုအပ်မည် ဖြစ်သည်။

ဒုစရိုက်မှုများနှင့် လူဆိုး၊ လူမိုက်များ တိုးပွားလာခြင်း၏ အခြေခံအကျဆုံးမှာ တရားဥပဒေစိုးမိုးမှု မရှိခြင်း ဖြစ်သော်လည်း ထိုထက်ပို၍ လေးနက်စွာ စဉ်းစားကြည့်ပါက ရန်ကုန်မြို့တော်နေ ပြည်သူအများစု၏ စားဝတ်နေရေး မပြေလည်ခြင်း တစ်နည်းအားဖြင့် နိုင်ငံတော်၏ စီးပွားရေး ချွတ်ခြုံကျနေခြင်း (ဝါ) ဆင်းရဲနွမ်းပါးခြင်းက အဓိကလက်သည် ဖြစ်နေခြင်းတို့ကိုလည်း လုံခြုံရေးနှင့် တရားဥပဒေစိုးမိုးရေး၊ မှုခင်းကျဆင်းရေး ရက် ၁၀၀ စီမံချက်တွင် ထည့်သွင်းစဉ်းစားသင့်ကြောင်း တိုက်တွန်းအကြံပြုအပ်ပေသည်။

အယ်ဒီတာ(၂၉-၆-၂၀၁၆)

(မေလ ၁၂ ရက်နေ့ထုတ် The Voice Daily သတင်းစာတွင် ဖော်ပြခဲ့ပြီးသော အယ်ဒီတာ့အာဘော်ကို ပြန်လည်ဖော်ပြခြင်း ဖြစ်ပါသည်)