News

POST TYPE

EDITORIAL

သင်္ကြန် သို့မဟုတ် အနုပညာမြောက် စီမံခန့်ခွဲမှုရလဒ် (Daily, Vol-5/No-7 )
19-Apr-2017 tagged as

ယခုနှစ် မြန်မာနှစ်သစ်ကူး အတာရေသဘင်ပွဲတော် သို့မဟုတ် သင်္ကြန်ပွဲတော်နှင့် ပတ်သက်လျှင် လူစိတ်ဝင်စားမှု အများဆုံး၊ ဝေဖန်ပြောဆိုမှု အများဆုံးမှာ ရန်ကုန်သင်္ကြန်နှင့် မန္တလေးသင်္ကြန် ကွာခြားချက်ဟု ဆိုနိုင်သည်။

သင်္ကြန်ပွဲတော်သည် ဆယ့်နှစ်ရာသီ ပွဲတော်များ ရှိနေသည့် မြန်မာနိုင်ငံတွင် မှီတင်းနေထိုင်သည့် နိုင်ငံသား အားလုံးအတွက် ရင်ခုန်စိတ်လှုပ်ရှားဖွယ် အကောင်းဆုံး၊ ပျော်ရွှင်ကြည်နူးဖွယ် အကောင်းဆုံး ပွဲတော်တစ်ခုလည်း ဖြစ်သည်။

တစ်နှစ်တာပတ်လုံး အလုပ်ခွင် အသီးသီးတွင် စားဝတ်နေရေး၊ ဘဝ ရှင်သန် ရပ်တည်ရေးနှင့် အောင်မြင်မှု ရရှိရေးအတွက် ခန္ဓာကိုယ်နှင့် ဦးနှောက်ကို အသုံးချကာ ပင်ပန်းကြီးစွာ၊ ရုန်းကန် လှုပ်ရှားနေကြသော နိုင်ငံသူ၊ နိုင်ငံသား အားလုံးအတွက် စိတ်ရော ကိုယ်ပါ အပန်းဖြေရာ အခိုက်အတန့်လည်း ဖြစ်သည်။

နှစ်စဉ် မည်သည့် အစိုးရတက်တက်၊ မည်သည့် အခြေအနေရောက်ရောက် မိသားစုအတွင်း၊ အလုပ်ခွင်အတွင်း၊ အဖွဲ့အစည်းအတွင်း၊ ကုမ္ပဏီ လုပ်ငန်းအတွင်း စသဖြင့် နယ်ပယ် အရပ်ရပ်၊ ကဏ္ဍအထွေထွေ၊ အလွှာအသီးသီး၌ ရှိနေတတ်သော မှားယွင်း၊ ချွတ်ချော်၊ တိမ်းစောင်းမှုများနှင့် ပတ်သက်၍ အားမလို အားမရ စိတ်များ၊ မကျေနပ်ချက်များ၊ စိတ်ခံစားချက်များ၊ အောင့်အည်းမျိုသိပ်၊ ထိန်းချုပ်မှုများကို စိတ်ထွက်ပေါက် အနေနှင့် လွတ်လွတ်လပ်လပ် ဖွင့်ထုတ်ကြသော အချိန်သမယလည်း ဖြစ်သည်။

ထို့အပြင် နှစ်သစ်ကူးချိန်ကို အားခဲမျှော်လင့်ကာ ငွေကြေးစုဆောင်း ထားသူ၊ ယာယီ လုပ်ငန်းငယ်ကလေးများ၊ တစ်ပိုင်တစ်နိုင် လုပ်ငန်းများ ပြင်ဆင်ထားသူ တစ်နည်းအားဖြင့် သင်္ကြန်ကို မှီတည်နေသူများ အတွက်လည်း သင်္ကြန်သည် ဈေးကွက်တစ်ခုဖြစ်သည်။

စီးပွားရေး သဘောအရ သင်္ကြန်ပွဲတော်ကို ဦးတည်ကာ တစ်နိုင်ငံလုံးက သုံးစွဲကြသည့် ပမာဏတစ်ခုရှိသော ငွေကြေးတို့က ပြည်တွင်း လှည့်ပတ်သုံးစွဲငွေ စီးဆင်းမှုကို မြန်ဆန် သွက်လက်သွားစေပြီး သင်္ကြန်နှင့် ကုမ္ပဏီကြီးများမှသည် ပုလင်းခွံ၊ ဘူးခွံကောက်၍ ရောင်းသည့်အဆင့်အထိ ဆက်စပ်နေသော လုပ်ငန်း နယ်ပယ် အသီးသီးသို့ စီးဝင်သွားစေသည်။

ပို၍ ကျယ်ပြန့်စွာ ပြောရပါက အိမ်နီးချင်း ထိုင်းနိုင်ငံသည် မြန်မာနိုင်ငံ၏ သင်္ကြန်ပွဲတော်နည်းတူ ဆုန်ခရမ်ပွဲတော်ကို အကြောင်းပြုကာ ကမ္ဘာ အရပ်ရပ်မှာ ခရီးသွားများကို ဆွဲဆောင် သိမ်းသွင်းပြီး ယင်းပွဲတော်နှင့် ဆက်စပ်နေသော ထိုင်းခရီးသွား လုပ်ငန်းမှသည် စီးပွားရေးလုပ်ငန်း အသီးသီးနှင့် အောက်ခြေ ထိုင်းပြည်သူများအထိ ဝင်ငွေ တိုးတက်ရရှိစေရန် ကောင်းစွာ စီမံခန့်ခွဲလျက် ရှိခြင်းကို နမူနာ ကြည့်နိုင်သည်။ 

ထို့အတူ သင်္ကြန်ပွဲတော်ကို အမှီပြုကာ ကိုယ်ကျိုးရှာမှု၊ ကိုယ်အမူအရာ၊ နှုတ်အမူအရာ၊ ဝတ်စားဆင်ယင်ခြယ်သ လျှပ်ပေါ်လော်လည်မှု၊ ဒုစရိုက်မကင်းသော ကိစ္စရပ်များ သို့မဟုတ် အမှိုက်သရိုက်များကလည်း အကောင်း၊ အဆိုး ဒွန်တွဲ နေတတ်သော လောကနိယာမ သဘောအရ ဖွင့်ထားသော ပြတင်းပေါက်မှ လေကောင်းလေသန့်များနှင့်အတူ ရောနှော မြင်တွေ့ရမည်ဖြစ်သည်။

သို့သော် ဆိုခဲ့ပါ အမှိုက်သရိုက်များ မလိုလားခြင်းကြောင့် လေကောင်း လေသန့်များ ပါဝင်ရောက်နေသည့် ပြတင်းပေါက်ကို ပိတ်ပစ်မည်လော လေကောင်းလေသန့်လည်းရ၊ အမှိုက်များလည်း မဝင်နိုင်သည့် နည်းလမ်းကို စဉ်းစားမည်လော ဆိုသည်မှာ စီမံခန့်ခွဲမှု ပြဿနာဟု ဆိုနိုင်သည်။

ယခုနှစ် သင်္ကြန်သည် ရန်ကုန်နှင့် မန္တလေး မြို့နှစ်မြို့၏ စီမံခန့်ခွဲမှု စွမ်းဆောင်ရည်ကို နှိုင်းယှဉ်လိုက်သည့် သရုပ်ပြပွဲ သို့မဟုတ် အရည်အချင်းစစ် စာမေးပွဲတစ်ခုဟုဆိုပါက မန္တလေးသည် ပရိသတ် လက်ခုပ်သံ အများဆုံး ရရှိသွားသူ သို့မဟုတ် စာမေးပွဲတစ်ခုကို ဂုဏ်ထူးဖြင့် အောင်မြင်သွားသူဟု ဆိုရမည်ဖြစ်သည်။

များစွာ သတိပြုရမည့် အချက်မှာ ရန်ကုန်သင်္ကြန်သည်လည်းကောင်း၊ မန္တလေးသင်္ကြန်သည်လည်းကောင်း လက်တစ်ဆုပ်စာ လူတစ်စု၏ စီးပွားရေး ကစားကွက်၊ လူမှုရေး ဖောက်ပြန်မှုပွဲတစ်ရပ်အဖြစ် ဘောင်ခတ်ကြည့်ခြင်းထက် ပို၍ကျယ်ပြန့်သော အခြား အကြောင်းအရာများကို မြင်အောင်ကြည့်ကာ ရှဥ့်လည်းလျှောက်သာ၊ ပျားလည်းစွဲသာ ဖြစ်စေရန် ချိန်ညှိပေးရသော အနုပညာမြောက် စီမံခန့်ခွဲမှု၏ ရလဒ်ဖြစ်ကြောင်း သိစေလိုရင်း ဖြစ်သည်။

အယ်ဒီတာ (၁၉-၄-၂၀၁၇)

  • TAGS