News

POST TYPE

EDITORIAL

သင်္ကြန်ပိတ်ရက် ကားခ ပိုတောင်းခြင်း သို့မဟုတ် စီမံခန့်ခွဲမှု ပြဿနာ(Daily, Vol-5/No-6)
07-Apr-2017 tagged as

 
သင်္ကြန်ကာလ ရုံးပိတ်ရက်ရှည်အတွက် ရန်ကုန်မှ ဇာတိနေရပ် ပြန်သူများအပေါ် အဝေးပြေးကားခများ နှစ်ဆနီးပါး ဈေးတင်ရောင်းမှု နှစ်စဉ် ဖြစ်ပေါ်နေခြင်းမှာ သာမန်အားဖြင့်ကြည့်လျှင် ယာဉ်ပိုင်ရှင်များ၏ အခက်အခဲနှင့် လောဘကြောင့်ဟုဆိုနိုင်ပြီး ထို့ထက် ပိုကြည့်ပါက စီမံခန့်ခွဲမှု ပြဿနာတစ်ရပ်ဟု ဆိုနိုင်သည်။

သင်္ကြန်မတိုင်မီ နယ်ပြန်လိုသူများထံမှ ကားခ ပိုတောင်းခြင်းမှာ အပြန်ခရီးစဉ်တွင် လူမပါသလောက် ဖြစ်နေခြင်းကြောင့် ထိုစရိတ် ကာမိစေရန် ဈေးတင် တောင်းခြင်းဖြစ်ကြောင်း ယာဉ်ပိုင်ရှင်များ၏ ပြောဆိုချက်မှာ ဟုတ်သယောင်ယောင် ရှိသော်လည်း ယာဉ်လိုင်းနာမည်ဖြင့် ပြေးဆွဲပါက ယာဉ်တစ်စီးချင်းက မိမိတို့ စိတ်ကြိုက် ဈေးနှုန်းသတ်မှတ် တောင်းခံခွင့် မရှိသောကြောင့် သက်ဆိုင်ရာ ယာဉ်လိုင်း၏ စီမံခန့်ခွဲမှု အားနည်းချက်က ပို၍အဓိက ကျပေသည်။

ယာဉ်တစ်စီးချင်းအပေါ် ယာဉ်လိုင်းများ၏ စည်းကမ်းနှင့် စီမံအုပ်ချုပ်မှု လျော့ရဲခြင်းက အဓိက အချက်အဖြစ် တွေ့ရပြီး သင်္ကြန်ပိတ်ရက် ကာလတိုင်း ယခု ပြဿနာ ဖြစ်နေခြင်းကို သက်ဆိုင်ရာ ယာဉ်လိုင်းများနှင့် ယင်းယာဉ်လိုင်းများကို ကြီးကြပ်သည့်အဖွဲ့က ဖြေရှင်းရန် မကြိုးစားဘဲ လျစ်လျူရှုထားသည့်  သဘောဟု သုံးသပ်နိုင်သည်။

သို့ဆိုလျှင် သင်္ကြန်မတိုင်မီ တစ်နှစ်တာ ကာလပတ်လုံး ပြေးဆွဲထားခြင်းမှ ရရှိထားသော အကျိုးအမြတ်ထဲမှ အနည်းငယ်ခန့် မျှဝေပေးသည့် အနေနှင့် ယာဉ်စီးခကို ပုံမှန်အတိုင်း ရောင်းချလျှင် မရနိုင်သလောဟု မေးစရာ ရှိပေသည်။
 
သို့သော် ဘာသာရေးနှင့်ဆိုင်သော အလှူအတန်းများကိုသာ မိမိကိုယ်ကျိုး ရည်မှန်းလှူဒါန်းမှု များပြားသော မိရိုးဖလာ ဘာသာတရား ကိုးကွယ်သူများ ဖြစ်သည့်အတွက် ပိတ်ရက်တွင် မိသားစု၊ ဆွေမျိုးများထံ ပြန်ကြမည့်သူများကို ပုံမှန် ဈေးနှုန်း ရောင်းချပေးခြင်းဖြင့် မိမိတတ်နိုင်သည့်နေရာမှ ကူညီရာ ရောက်ကြောင်း ယာဉ်လိုင်းများနှင့် ယာဉ်ပိုင်ရှင်များ စဉ်းစားပေးနိုင်ခြင်း မရှိကြပေ။

သို့သော် စီးပွားရှာခြင်းကို အလှူဒါနနှင့် သီးခြား စဉ်းစားကြသည့်အပြင် အကျိုးအမြတ် မျှော်ကိုးသော လုပ်ငန်းများ ဖြစ်သည့်အတွက် တစ်နှစ်တာ အမြတ်ငွေများထဲမှ တစ်ရက်တာ အပြန်အခေါက်အတွက် အနည်းငယ်ခန့် အရှုံးခံပေးရေး တိုက်တွန်း ပြောဆိုရန် ခက်ခဲနိုင်ပေသည်။

ထို့ကြောင့် ယာဉ်လိုင်း တစ်ခုချင်းစီ အနေနှင့် တစ်နှစ်တာ ကာလအတွင်း သင်္ကြန်ကာလအတွက် သီးသန့် ရန်ပုံငွေတစ်ရပ် ထူထောင်ထားခြင်း၊ သို့မဟုတ် ယာဉ်တစ်စီးချင်းထံမှ ဂိတ်ကြေး အနည်းငယ်ခန့် အပိုဆောင်း ကောက်ယူ စုဆောင်းထားခြင်း၊ ယာဉ်ပေါ်၌ အလှူခံပုံးတစ်ခု ထားရှိကာ ခရီးသည်များထံမှ သင်္ကြန်ပိတ်ရက် ကားခ ပုံမှန် ပြေးဆွဲနိုင်ရေး သဒ္ဓါ တတ်အားသရွေ့ လှူဒါန်းစေခြင်း စသည့်နည်းလမ်းများသုံးကာ သင်္ကြန်ပိတ်ရက် မတိုင်မီ ပုံမှန်ဈေးနှုန်းဖြင့် ပြေးဆွဲမည့် ကားများ၏ အပြန် အရှုံးစရိတ်ကို ခုခံပေးခြင်းမျိုးဖြင့်လည်း ဖြေရှင်းပေးနိုင်သည်။

စင်စစ်အားဖြင့် ယာဉ်လိုင်းများ ထူထောင်သည့်စနစ်မှာ ၁၈ ရာစုက နည်းလမ်းအတိုင်း တစ်ဦးချင်းပိုင်သော ယာဉ်များကို စုစည်းကာ ယာဉ်လိုင်းနာမည်  တပ်ထားသည့် သဘောသာဖြစ်ပြီး ယာဉ်လိုင်း တစ်ခုလုံးကို စီမံခန့်ခွဲရခြင်း မဟုတ်ဘဲ ယာဉ်တစ်စီးချင်းစီ သို့မဟုတ် ယာဉ်ပိုင်ရှင် တစ်ဦးချင်းစီကို စီမံခန့်ခွဲနေရသောကြောင့် ယာဉ်ပိုင်ရှင်များ၏ ဆန္ဒကို မလွန်ဆန်၊ မထိန်းကွပ်နိုင်ဘဲ လိုက်လျောနေရခြင်း ဖြစ်သည်။

စင်စစ်အားဖြင့် ယာဉ်လိုင်းတစ်ခု ထူထောင်ခြင်းမှာ စီမံခန့်ခွဲမှု နိုင်နင်းစေရန်၊ အရည်အသွေးနှင့် ဝန်ဆောင်မှု ကောင်းမွန်စေရန်၊ ခရီးသည်များ စိတ်ကျေနပ်မှု အမြဲရရှိစေရန် ယာဉ်ပိုင်ရှင်များကို စုစည်းခြင်းထက် အများပိုင် ကုမ္ပဏီပုံစံမျိုး ထူထောင်ကာ ယာဉ်တစ်စီးစီဖြင့် ဝင်ရောက်မှုအစား ရှယ်ယာစနစ်ဖြင့်သာ လက်ခံပြီး ပြေးဆွဲမည့် ယာဉ်အားလုံးကို ကုမ္ပဏီ နာမည်ဖြင့်သာ ဝယ်ယူရမည်ဖြစ်သည်။

ထို့အတူ အစိုးရအနေနှင့်လည်း အခြားယာဉ်လိုင်း အားလုံးကိုလည်း အများပိုင်ကုမ္ပဏီ၊ သို့မဟုတ် တစ်ဦးတည်းပိုင် ကုမ္ပဏီပုံစံမျိုးဖြင့်သာ ယာဉ်လိုင်း ထူထောင်ခွင့် ပြုလိုက်ပါက အခြားသော အပြိုင်အဆိုင် ယာဉ်လိုင်း ကုမ္ပဏီများ နည်းတူ တစ်နှစ်တာပတ်လုံး ကုမ္ပဏီက သတ်မှတ်ပေးသည့် နှုန်းထားဖြင့်သာ ပြေးဆွဲသည့် ပုံစံဖြစ်လာကာ သင်္ကြန်ပိတ်ရက် ကားခဈေးတက်ရောင်းသော ပြဿနာမျိုး ဖြစ်ပေါ်လာစရာ အကြောင်း မရှိနိုင်ကြောင်း သိစေလိုရင်းဖြစ်သည်။

အယ်ဒီတာ (၆-၄-၂၀၁၇)  

  • TAGS