News

POST TYPE

EDITORIAL

(၄) နှစ်ပြည့် The Voice Daily ၏ သန္နိဋ္ဌာန် (Daily,Vol-5/No-2)
02-Apr-2017 tagged as

ဧပြီလ ၁ ရက်နေ့သည် မြန်မာနိုင်ငံအတွက် ထူးထူးခြားခြား မှတ်တမ်းတင်ရမည့် နေ့တစ်နေ့ဖြစ်သည်။ နိုင်ငံကို အဓိက စီမံခန့်ခွဲ မောင်းနှင်ရမည့် နိုင်ငံရေးနယ်ပယ်၏ အထင်ကရ ဖြစ်စဉ်များအပြင် ပြည်သူလူထု၏ သိပိုင်ခွင့်ကို ပို၍ ဖြည့်ဆည်းပေးမည့် သတင်းမီဒီယာများ စတင် ပွင့်လင်းလာသောနေ့လည်း ဖြစ်သည်။

ဧပြီလ ၁ ရက်နေ့သည် နှစ်ငါးဆယ်ကျော်အတွင်း ပထမဦးဆုံး ရွေးကောက်ပွဲဖြင့် အာဏာရရှိလာသော အစိုးရအဖွဲ့ စတင် တာဝန် ထမ်းဆောင်သည့်နေ့ ဖြစ်သည်။ 
မကွာမလှမ်း နှစ်အနည်းငယ်ခန့်ကို ပြန်ကြည့်လျှင် ၁၉၆၂ ခုနှစ်နောက်ပိုင်း ပထမဦးဆုံးအကြိမ် ဒီမိုကရေစီ နည်းကျ သန့်ရှင်းလွတ်လပ်စွာ ကျင်းပသော ၂၀၁၂ ခုနှစ် ကြားဖြတ် ရွေးကောက်ပွဲတွင် နှစ်ပေါင်း နှစ်ဆယ်ကျော်ခန့် ဖိနှိပ်ကန့်သတ် တားမြစ်ခြင်းခံခဲ့ရသော NLD ပါတီ ဝင်ရောက်ယှဉ်ပြိုင် အနိုင်ရခဲ့သောနေ့ ဖြစ်သည်။

အနှစ်ငါးဆယ်ကျော် အစိုးရ၏ တစ်ဖက်သတ် ဝါဒဖြန့် မီဒီယာများဖြင့်သာ အလင်းပျပျ အမှောင်ဖုံးနေခဲ့သော နိုင်ငံတွင် ပထမဦးဆုံးအကြိမ် ပုဂ္ဂလိကပိုင် နေ့စဉ်ထုတ် သတင်းစာများ စတင် ထုတ်ဝေခဲ့သောနေ့မှာ ၂၀၁၃ ခုနှစ် ဧပြီလ ၁ ရက်နေ့ ဖြစ်သည်။

ထိုသို့ ဆယ်စုနှစ် ငါးခုကျော် တံခါးပိတ်၊ အမှောင်ဖုံးနေခဲ့သောနိုင်ငံတွင် အမှီအခို ကင်းသော၊ လွတ်လပ်သော၊ ပရော်ဖက်ရှင်နယ် ပီသစေရန် ကြိုးစားနေသော၊ စတုတ္ထမဏ္ဍိုင်၏ အခန်းကဏ္ဍကို မြှင့်တင် တည်ဆောက်လိုသော ပုဂ္ဂလိကစစ်စစ် နေ့စဉ်ထုတ် သတင်းစာ The Voice Daily ကို ကိုယ်ပိုင်ချွေးနှဲစာ စစ်စစ်ဖြင့် စတင် ထုတ်ဝေသောနေ့လည်း ဖြစ်သည်။

ယခုနှစ် ဧပြီလ ၁ ရက်နေ့သည် ၁၉၆၂ ခုနှစ်နောက်ပိုင်း မြန်မာနိုင်ငံတွင် ပထမဦးဆုံး ထုတ်ဝေသော ပုဂ္ဂလိက သတင်းစာ The Voice Daily သက်တမ်း ၄ နှစ်တင်းတင်း ပြည့်ခဲ့ပြီဖြစ်သည်။

ပြည်သူ့ဘဏ္ဍာငွေဖြင့်ထုတ်ဝေကာ ပြည်သူထံ အခကြေးငွေဖြင့် ရောင်းချလျက်ရှိပြီး စီးပွားရေးကြော်ငြာ အများဆုံး ရရှိသော်လည်း နိုင်ငံတော်ကို အခွန်ထမ်းဆောင်ခြင်း မရှိသော နိုင်ငံပိုင် အစိုးရအာဘော် သတင်းစာများနှင့် ဈေးကွက်တွင် ပြိုင်ဆိုင် ထုတ်ဝေနေသာ ပုဂ္ဂလိက သတင်းစာတစ်စောင်၏ လေးနှစ်သက်တမ်း သို့မဟုတ် လေးနှစ်တာ မှတ်တိုင်ကို ဂုဏ်ယူစွာ စိုက်ထူနိုင်ခဲ့သည်။ 

လေးနှစ်တာ ကာလအတွင်း စတုတ္ထမဏ္ဍိုင်ကဏ္ဍ ပီပြင်ရန်၊ ပရော်ဖက်ရှင်နယ် ပီသရန် အတိုက်အခိုက်၊ အခုအခံ၊ အကန့်အသတ်များအကြား၊ နိုင်ငံရေး လုပ်ကြံမှုများ၊ အုပ်စုစွဲ၊ ဂိုဏ်းဂဏစွဲများ၏ ရန်ငါစည်းခြား အမြင်များ အကြား၊ ဈေးကွက်လက်ဝါးကြီးအုပ် အပိုင်စီးမှုများအကြားမှ ကြိုးစားရုန်းကန် ရပ်တည်နိုင်ခဲ့သည်။

ဒီမိုကရေစီနည်းကျ ရွေးကောက်တင်မြှောက်ခံရသည့် ပထမဦးဆုံး အရပ်သားစစ်စစ် သမ္မတက ဥပဒေအရ ဦးဆောင်သော ယနေ့ အစိုးရလက်ထက်အထိ ပြည်သူလူထု၏ သိပိုင်ခွင့်ကို ဖြည့်ဆည်းပေးနေသော ပုဂ္ဂလိက သတင်းမီဒီယာများ၏ အခန်းကဏ္ဍကို လေးစား အသိအမှတ်ပြုမှု၊ ပုဂ္ဂလိက သတင်းမီဒီယာများ ရှင်သန်ဖွံ့ဖြိုးရေး အားပေးကူညီမှု များစွာ အားနည်းနေလင့်ကစား မိမိတို့ ခြေထောက်ပေါ်တွင် ကြိုးစားရပ်တည်လျက် ရှိပေသည်။

Media Literacy ခေါ်  မီဒီယာအပေါ် သိမြင်နားလည်မှု အားနည်းသည့် မြန်မာလူ့အဖွဲ့အစည်းတွင် သတင်းမီဒီယာများအပေါ် ချစ်စိတ်၊ မုန်းစိတ်၊ အုပ်စုစွဲ၊ ဂိုဏ်းဂဏစွဲစိတ်ဖြင့် ရှုမြင်တတ်ခြင်းကြောင့် အစိုးရများ အပါအဝင် ဒီမိုကရေစီအရေး လှုပ်ရှားတိုက်ပွဲဝင်ခဲ့သူများ၊ အတိုက်အခံ ပါတီများ၊ ယင်းတို့ကို ထောက်ခံအားပေးသော ပြည်သူများနှင့် တပ်မတော်တို့၏ အထင်အမြင် လွဲမှားမှုကို ကြိမ်ဖန်များစွာ ကြုံတွေ့ခဲ့ရသည်။

The Voice Daily သည် ပရော်ဖက်ရှင်နယ် မီဒီယာအဖြစ် ကြိုးစား ရပ်တည်နေသည့်အလျောက် ပုဂ္ဂိုလ်စွဲ၊ ပါတီစွဲ၊ အုပ်စု၊ ဘက်အမြင်စွဲများကို ဂရုစိုက်မည် မဟုတ်ဘဲ မည်သည့်အစိုးရကိုမဆို၊ မည်သည့် အတိုက်အခံကိုမဆို၊ မည်သည့် လက်နက်ကိုင် အဖွဲ့အစည်းကိုမဆို ပြည်သူလူထုနှင့် နိုင်ငံတော် အကျိုးစီးပွားဘက်မှ ရပ်တည်ကာ အမြဲဝေဖန်၊ အကြံပြု၊ ထောက်ပြသွားမည်ဖြစ်ကြောင်း သန္နိဋ္ဌာန် ပြုအပ်ပေသည်။

 အယ်ဒီတာ(၂-၄-၂၀၁၇)

  • TAGS