News

POST TYPE

EDITORIAL

မြန်မာ့အိုပက်အတွက် ခေါင်းလောင်းထိုးသံ
02-Apr-2017 tagged as စက်သုံးဆီ

မြန်မာ့စက်သုံးဆီ လုပ်ငန်းရှင်ကြီးများအတွက် တပ်လှန့်သံ ထွက်ပေါ်လာသည်။ မြန်မာနိုင်ငံတစ်ဝန်း အမျိုးမျိုးသော မော်တော်ယာဉ်များအတွက် မရှိမဖြစ် ဖြစ်သော စက်သုံးဆီရောင်းဝယ် ဖြန့်ဖြူးရေး လုပ်ငန်းတွင် နိုင်ငံတကာမှ လုပ်ငန်းများကို ခွင့်ပြုရန် အစိုးရက စီစဉ်လာခြင်းကြောင့် ဖြစ်သည်။

အမြတ်များစွာ ရနေပြီး လက်ဝါးကြီးအုပ် လုပ်ကိုင်နေသည်ဟု စွပ်စွဲခံထားရသူ လုပ်ငန်းရှင်များမှာ ၂၀၁၀ ခုနှစ် စစ်အာဏာရှင်အစိုးရ လက်ထက် နိုင်ငံပိုင်စက်သုံးဆီ အရောင်းဆိုင် ၂၆၀ ကျော်ကို ပုဂ္ဂလိကပိုင် ပြုလိုက်ရာမှ စက်သုံးဆီ လုပ်ငန်းရှင်များအဖြစ် မွေးဖွားလာခြင်း ဖြစ်သည်။ 

ထိုသို့ ခွင့်ပြုလိုက်သော လုပ်ငန်းများတွင် New Day၊ အဏ္ဏဝါလွှမ်း၊ အေဒင်၊ နီလာရိုးမ၊ မြတ်မေတ္တာမွန်၊ ရွှေတောင်၊ ရွှေသံလွင်၊ ဧရာရွှေဝါ၊ Max၊ ယုဇန၊ ဒဂုံအင်တာနေရှင်နယ် စသည့် လုပ်ငန်းစုများအပြင် ဦးနေရွှေသွေးအောင်၊ ဦးစခုန်တိန်ယိန်း စသည့် လူပုဂ္ဂိုလ်တစ်ဦးချင်းလည်း ပါဝင်သည်။

အချို့သော လုပ်ငန်းစုများသည် ယင်းအခြေခံဖြင့် နိုင်ငံတစ်ဝန်း စက်သုံးဆီဆိုင်များ တိုးချဲ့ဖွင့်လှစ်လာပြီး မြန်မာ့စက်သုံးဆီဈေးကွက်၏ ဘီလူးကြီးများ ဖြစ်လာခဲ့သည်။ ကမ္ဘာ့စက်သုံးဆီ ထုတ်လုပ်ရေးဈေးကွက်ကို ထိန်းချုပ်ထားသော အာဖရိကနှင့် အရှေ့ပိုင်းနိုင်ငံများ အဖွဲ့ဝင်အဖြစ် ပါဝင်သည့် ကမ္ဘာ့ရေနံတင်ပို့သူများအဖွဲ့ (အိုပက်) နှင့်ပင် ၎င်းတို့ကို တင်စားနိုင်သည်။

ယခုတော့ ၎င်းင်းတို့အတွက် တပ်လှန့်ခေါင်းလောင်းထိုးသံ ပေါ်လာပြီ ဖြစ်သည်။ 

ရန်ကုန်မြို့ နိုဗိုတယ်ဟိုတယ်တွင် မတ်လ ၁၈ ရက်နေ့က ပြုလုပ်သည့် ပြည်ပလုပ်ငန်းရှင်များ တွေ့ဆုံပွဲ၌ စီမံကိန်းနှင့် ဘဏ္ဍာရေး ဝန်ကြီးဌာန ပြည်ထောင်စုဝန်ကြီး ဦးကျော်ဝင်းက ဈေးကွက်ပြိုင်ဆိုင်မှု နည်းပါးသော စက်သုံးဆီ လုပ်ငန်းများ၌ ပြည်ပလုပ်ငန်းရှင်များ လုပ်ကိုင်ခွင့်ပြုမည်ဟု ပြောကြားခဲ့သည်။

“ဒါက ဈေးကွက်မှာ ယှဉ်ပြိုင်နိုင်မှု မရှိလို့ ဖြစ်တယ်။ ဈေးကွက်ယှဉ်ပြိုင်မှုရှိရင် စားသုံးသူက ရွေးချယ်ခွင့်ရှိမယ်။ အရည်အသွေးလည်း တိုးတက်လာမယ်။ ဒါကြောင့် မြန်မာနိုင်ငံသားများနည်းတူ နိုင်ငံခြားသားတွေကိုလည်း စက်သုံးဆီ အရောင်းဆိုင်တွေ ဖွင့်ခွင့်ပေးဖို့ စီစဉ်ထားပါတယ်” ဟု မြန်မာနိုင်ငံရင်းနှီးမြှုပ်နှံမှု ကော်မရှင်နှင့် နိုင်ငံခြားသား စီးပွားရေး လုပ်ငန်းရှင်များ တွေ့ဆုံဆွေးနွေးပွဲတွင် စီမံ/ဘဏ္ဍာဝန်ကြီးက ပြောခဲ့သည်။

ထို့ကြောင့် စက်သုံးဆီဈေးကွက် တစ်ခုလုံး ပုရွက်အုံ တုတ်ဖြင့်ထိုးသကဲ့သို့  လှုပ်လှုပ်ရွရွ ဖြစ်သွားကြသည်။ သုံးစွဲသူများကမူ ပြည်ထောင်စုဝန်ကြီး၏ ယင်းပြောကြားချက်ကို ကြိုဆိုကြသည်။ 

အဘယ့်ကြောင့်နည်း။ 

သုံးစွဲသူများသည် စက်သုံးဆီဈေးနှုန်း၊ အရေအတွက်၊ အရည်အသွေးတို့နှင့် ပတ်သက်၍ ဆိုးရွားစွာ ခံစားခဲ့ရဖူးသည့် အတိတ်များ ရှိနေသည်။

ဈေးနှုန်း

ပြည်တွင်း၌ ရောင်းချသည့် စက်သုံးဆီများကို စင်ကာပူနိုင်ငံမှ အများဆုံး တင်သွင်းခြင်း ဖြစ်သည်။ မလေးရှားနှင့် အချို့သောနိုင်ငံများမှ တင်သွင်းသော်လည်း ငွေပေးငွေယူခက်ခဲမှုကြောင့် အဆင်မပြေ။ ပြည်တွင်း၌ ရောင်းချသော စက်သုံးဆီများကိုလည်း MOPs အမည်ရ  စင်ကာပူအခြေစိုက် စက်သုံးဆီဈေးကွက် စံဈေးနှုန်းများကို အခြေခံ၍ ရောင်းချခြင်း ဖြစ်သည်။ 

၂၀၁၁ ခုနှစ် သြဂုတ်လတွင် စင်ကာပူ MOP ဈေးနှုန်းမှာ တစ်ဂါလန် ကျပ် ၂၈၁၀ ကျပ်အထိ အနိမ့်ဆုံး ကျဆင်းခဲ့သော်လည်း ပြည်တွင်း၌မူ ၃၃၅၀ ကျပ်ဖြင့် ရောင်းချခဲ့ကြောင်း စွမ်းအင်ဝန်ကြီးဌာန၏ စာရင်းများအရ တွေ့ရှိရသည်။ ၂၀၁၄ ဒီဇင်ဘာနှင့် ၂၀၁၅ မတ်လတို့တွင် ကမ္ဘာ့ရေနံဈေး ကျဆင်းမှုနှင့်အတူ ပြည်တွင်းစက်သုံးဆီ ဈေးနှုန်းများကို ထိန်းညှိပေးရေး အစိုးရသို့ တိုက်တွန်းကြောင်း အဆိုကို လွှတ်တော်ကိုယ်စားလှယ်များက ပြည်သူ့လွှတ်တော်သို့ တင်သွင်းခဲ့ကြသည်။ 

“ဖြစ်နိုင်ရင်တော့ အမြတ်ယူတာလေးတွေ လျှော့ပေးကြပါလို့ တိုက်တွန်းလိုပါတယ်။ အမြတ်ရဲ့ ရာခိုင်နှုန်းဟာ တစ်ခါတလေမှာ ၆ ဒသမ ၅၊ ၇ ရာခိုင်နှုန်း လောက်အထိ ရှိနေတာကို တွေ့ရပါတယ်” ဟု စွမ်းအင်ဝန်ကြီးဌာန၊ မြန်မာ့ရေနံထွက်ပစ္စည်း ရောင်းဝယ်ရေးလုပ်ငန်းမှ ထိုစဉ်က ဦးဆောင်ညွှန်ကြားရေးမှူး ဖြစ်သူ ဦးသန့်စင်က ၂၀၁၅ ခုနှစ် မတ်လ ၂၁ ရက်နေ့တွင်  လုပ်ငန်းရှင်များကို မေတ္တာရပ်ခံရသည်အထိ ဆိုရွားခဲ့ခြင်း ဖြစ်သည်။ 

၂၀၁၅ ခုနှစ် ဒီဇင်ဘာလတွင် တစ်စစ ကျဆင်းလာသော ကမ္ဘာ့ရေနံစိမ်းဈေးနှုန်းမှာ ၂၀၁၆ ခုနှစ်အတွင်း ရေနံစိမ်း တစ်စည်လျှင် အမေရိကန်ဒေါ်လာ ၃၀ အောက်သို့ ရောက်ရှိခဲ့သည်။ ထိုစဉ်ကလည်း စက်သုံးဆီ လက်လီရောင်းချသူများမှာ အမြတ်ကြီးမားစွာ ရယူထားကြောင်း မြန်မာ့မော်တော်ယာဉ် တင်သွင်းထုတ်လုပ်ရောင်းချသူများအသင်း ဥက္ကဋ္ဌ ဒေါက်တာစိုးထွန်းက ထုတ်ဖော်ပြောကြားဖူးသည်။ 

ကမ္ဘာ့ရေနံဈေးတက်ချိန်တွင် ပြည်တွင်းစက်သုံးဆီဈေး လိုက်ပါမြင့်တက်ပြီး ကျဆင်းချိန်တွင်မူ ပြည်တွင်းဈေး ကျဆင်းခြင်း မရှိခြင်းသည် ပြည်တွင်းစက်သုံးဆီဈေးကွက် အတွက် အဓိက ဝေဖန်စရာ ဖြစ်ခဲ့ရသည်။

ယင်းသို့ အတိတ်က ဖြစ်ရပ်များသည် ယနေ့တိုင် ရှိပါသေး၏လော။

“ကမ္ဘာ့ရေနံဈေးကွက်မှာ ဈေးကျတယ်။ စွမ်းအင်တွေ၊ ဓာတ်ငွေ့ဈေနှုန်းတွေ ကျတယ်။ ဒါပေမဲ့ ကျွန်တော်တို့နိုင်ငံက ဆိုင်တွေက ဈေးမကျဘူး။ သူတို့က အကြောင်းပြချက်တော့ ပေးတာပေါ့” ဟု စီမံကိန်းနှင့် ဘဏ္ဍာရေး ဝန်ကြီးဌာန ပြည်ထောင်စုဝန်ကြီး ဦးကျော်ဝင်းက မတ်လ ၁၈ ရက်က နိုဗိုတယ်ဟိုတယ် အခမ်းအနားတွင် ပြောကြားသည်။ 

သို့သော်လည်း မြန်မာနိုင်ငံ စက်သုံးဆီ တင်သွင်းရောင်းချသူများအသင်း အတွင်းရေးမှူး ဒေါက်တာဝင်းမြင့်ကမူ ယင်းသို့ ဈေးနှုန်းကြီးမြင့်ခဲ့ခြင်းသည် အတိတ်ကဖြစ်ရပ်များ ဖြစ်ပြီး လက်ရှိတွင်  စက်သုံးဆီဈေးနှုန်းကို နောက်ဆုံးပေါက်ဈေးနှင့် တစ်ပတ်အတွင်း ပေါက်ဈေးများအပေါ် အခြေခံ၍ ဖြစ်သင့်သော ဈေးနှုန်းအတိုင်း ရောင်းချနေကြခြင်း ဖြစ်သည်ဟု ၎င်းက ဆိုသည်။ 

“စက်သုံးဆီဈေးနှုန်းနဲ့ ပတ်သက်လို့ ရှိရင်တော့ ၁၀၀ ရာခိုင်နှုန်း မဟုတ်ပေမယ့် ၉၈ ရာခိုင်နှုန်းလောက်တော့ ဖြစ်သင့်ဖြစ်ထိုက်တဲ့ အတိုင်းအတာအထိ ဆောင်ရွက်နိုင်ခဲ့တယ်လို့ ပြောလို့ရပါတယ်” ဟု ဒေါက်တာဝင်းမြင့်က ပြောသည်။ 

ဒေါက်တာဝင်းမြင့်သည် ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီမှ ပြည်သူ့လွှတ်တော် ကိုယ်စားလှယ်ဟောင်းတစ်ဦး ဖြစ်ပြီး မြတ်မေတ္တာမွန် စက်သုံးဆီလုပ်ငန်း ပိုင်ရှင်လည်း ဖြစ်သည်။ ပြည်ပမှ စက်သုံးဆီ တင်သွင်းသူလည်း ဖြစ်သည်။

ပြည်တွင်းလက်လီဈေးကွက်တွင် ဆိုင်ခွဲများစွာ ဖွင့်လှစ်ထားနိုင်သည့် ကုမ္ပဏီအချို့မှာ ဒေါက်တာဝင်းမြင့်၏ မြတ်မေတ္တာ မွန် စက်သုံးဆီလုပ်ငန်း၊ ဦးချစ်ခိုင်၏ Denko စက်သုံးဆီလုပ်ငန်း၊ ဦးဇော်ဇော်၏ MAX Energy၊ ဦးအိုက်ထွန်း၏ ST Oil၊ ဦးထွန်းမြင့်နိုင် (အေးရှားဝေါလ်) ၏ Green Luck၊ ထူး၏ ထူးစက်သုံးဆီ စသည်တို့ ဖြစ်သည်။

“စက်သုံးဆီ ရောင်းဝယ်ခွင့်ရတဲ့ တချို့ကုမ္ပဏီတွေဟာ အရင်က ခရိုနီတစ်ဖြစ်လဲ အခွင့်ထူးခံသမားတွေ ဖြစ်နေတယ်။ အခွင့်ထူးပဲခံချင်တယ်။ လက်ဝါးကြီးပဲ အုပ်ချင်တယ်။ သူတို့ ကျောထောက်နောက်ခံ အရင်လူကြီးတွေက ရှိနေတော့ ဂုဏ်မောက်နေတာ ရှိနေတယ်။ ပြည်ပမှာ  စက်သုံးဆီတွေ ဈေးကျတာတောင် သူတို့က ခပ်တည်တည်နဲ့ နေလို့ရသေးတယ်” ဟု မြန်မာ့စီးပွားရေး လေ့လာသူ ဦးလှမောင်က ဆိုသည်။

ဒေါက်တာဝင်းမြင့်ကမူ စက်သုံးဆီ ဈေးကွက်ကို လက်ဝါးကြီး အုပ်ထားသည် ဆိုသည်မှာ မမှန်ကြောင်း စက်သုံးဆီ တင်သွင်းရောင်းချသည့် လုပ်ငန်းကို လုပ်လိုသည့် နိုင်ငံသား မည်သူမဆို လုပ်ခွင့်ရှိနေပြီ ဖြစ်ကြောင်း ဆိုသည်။

အရည်အသွေး

စက်သုံးဆီ အရည်အသွေးနှင့် ပတ်သက်၍ အများဆုံး ဝေဖန်ကြသည့် အဓိကအချက်မှာ အရောအနှောဆီများ အကြောင်းပင် ဖြစ်သည်။ အရောအနှောဆီများကြောင့် မော်တော်ယာဉ်အင်ဂျင်များ ကောင်းစွာ အလုပ်မလုပ်ကြောင်း မရမ်းကုန်းမြို့နယ် ခဝဲခြံရှိ မော်တော်ယာဉ် ပြုပြင်ရေး လုပ်ငန်းတစ်ခု ဖြစ်သော WK Auto  Mechanic Services ပိုင်ရှင် ကိုတိုးက ဆိုသည်။

အရောအနှောဆီများကြောင့် မော်တော်ယာဉ်တွင် မီးသံခေါက်လာခြင်း၊ အင်ဂျင်အဆွဲအရုန်း ကျလာခြင်းများ ဖြစ်ပေါ်လာကြောင်း ၎င်းက ဆိုသည်။ WK Auto Mechanic Services ဝပ်ရှော့သို့ ရောက်ရှိလာသော ယာဉ်များ၏ ၆၀ ရာခိုင်နှုန်းခန့်မှာ ဆီမသန့်မှုကို အကြောင်းခံ၍ ပြုပြင်ရန်ရောက်ရှိလာခြင်း ဖြစ်သည်ဟု ကိုတိုးက ရှင်းပြသည်။

မြန်မာနိုင်ငံ မော်တော်ယာဉ် တင်သွင်းထုတ်လုပ်ရောင်းချသူများအသင်း အတွင်းရေးမှူး ဦးအောင်ဇော်ဝင်းကလည်း စက်သုံးဆီ အရည်အသွေး မပြည့်မီမှုအတွက် သုံးစွဲသူများ နစ်နာနေရကြောင်း ဆိုသည်။ မုံရွာရှိ ချက်ဖိုများနှင့် အစိုးရပိုင်မန်း သံပုရာကန်ရှိ အရည်အသွေး မပြည့်သော ဆီများသည် မည်သည့်နေရာသို့ ရောက်ရှိကုန်ကြသနည်းဟု စက်သုံးဆီ အရည်အသွေးနှင့် ပတ်သက်၍ ၎င်းက မေးခွန်းထုတ်သည်။

လက်ရှိတွင်လည်း မန်းသံပုရာ ကန်ဆီများနှင့် ပတ်သက်၍ အရည်အသွေး မပြည့်ဟူသည့် သတင်းများ ထွက်ပေါ်လျက် ရှိပြီး ယင်းတို့ကို ရောင်းချသည့် လုပ်ငန်းရှင်များလည်း ရှိနေကြောင်း စက်သုံးဆီ လုပ်ငန်းရှင် အသိုင်းအဝန်းထံမှ သိရသည်။ 

သို့သော်လည်း စက်သုံးဆီ အရည်အသွေးနှင့် ပတ်သက်၍ စွမ်းအင်ဝန်ကြီးဌာနက လိုက်လံစစ်ဆေးလျက် ရှိကြောင်း ဒေါက်တာဝင်းမြင့်က ဆိုသည်။ လာမည့် ကာလများတွင် ဝန်ကြီးဌာနနှင့် စက်သုံးဆီ လုပ်ငန်းရှင်အသင်း ပူးပေါင်း၍ အရည်အသွေး စစ်ဆေးမည်ဖြစ်ပြီး စစ်ဆေးသော ဆိုင်များကို အသိအမှတ်ပြုတံဆိပ် ကပ်ပေးမည် ဖြစ်ကြောင်း ၎င်းက ဆိုသည်။

ပြည်ပလုပ်ကိုင်ခွင့်

ပြည်ပမှ စက်သုံးဆီ တင်သွင်းသည့် ကုမ္ပဏီမှာ ၇၀-၈၀ ခန့်ရှိသည်။ ပြည်ပမှ စက်သုံးဆီ တင်သွင်းမှုမှာလည်း တစ်လလျှင် ဓာတ်ဆီတန်ချိန် တစ်သိန်းမှ တစ်သိန်းခွဲ၊ ဒီဇယ်တန်ချိန် သုံးသိန်းခန့် တင်သွင်းနေရသည်။ ဤလုပ်ငန်းသည် နှစ်စဉ် စုစုပေါင်း အမေရိကန်ဒေါ်လာ သန်း ၁၀၀ မှ သန်း ၃၀၀ (မြန်မာကျပ်ငွေ ၁၃၀ ဘီလီယံမှ ဘီလီယံ ၄၁၀ နီးပါး) ကြား အမြတ်ရနေသော လုပ်ငန်းဖြစ်ကြောင်း စက်သုံးဆီ လုပ်ငန်းရှင် အသိုင်းအဝန်းထံမှ သိရသည်။ 

ပြည်ပကုမ္ပဏီများကို ဤကဏ္ဍတွင် လုပ်ကိုင်ခွင့်ပြုမည် ဆိုသောအခါ အဆိုပါ အမေရိကန်ဒေါ်လာ သန်း ၁၀၀ မှ သန်း ၃၀၀ ကြားအမြတ်များကို ခွဲဝေယူရမည့် သဘောပင်။ ထို့ကြောင့် လုပ်ငန်းရှင်များက မလိုလားကြ။ 

လက်ရှိစနစ်တွင် စက်သုံးဆီများသည် ဈေးနှုန်းအရ ယှဉ်ပြိုင်မှုမရှိ။ တစ်ဆိုင်နှင့် တစ်ဆိုင်ကြား နေ့စဉ် ပေါက်ဈေးသည် ကျပ်ဆယ်ဂဏန်း ဝန်းကျင်ဖြင့်သာ ကွာဟနေသောကြောင့် စားသုံးသူများ၏ ရွေးချယ်ခွင့်မှာ ပျောက်ဆုံးလျက် ရှိသည်။ 

စက်သုံးဆီဈေးနှုန်းများ အတွက် စက်သုံးဆီလုပ်ငန်းရှင်များ အသင်းတွင်  အစည်းအဝေးများ လုပ်ကြသည်။ ဈေးနှုန်းအတက်အကျပြုရန် အစည်းအဝေးများတွင် တိုက်တွန်းခြင်းများလည်း ရှိသည်။  အခြားကိစ္စများလည်း ဆွေးနွေးကြသည်။ 

“အေးပေါ့ကွာ။ (ဈေးနှုန်းကို) လက်ဝါးကြီးအုပ်တဲ့ ပုံစံမျိုး ပေါက်နေတာပေါ့။ ဒါက ဒီနေရာမှာတင် မဟုတ်ပါဘူး။ ကျန်တဲ့နေရာတွေ အားလုံးမှာလည်း ဒီလိုပါပဲ” ဟု မြန်မာ့စီးပွားရေး သုတေသီ  ခင်မောင်ညို (ဘောဂဗေဒ) က ဈေးကွက်စီးပွားရေးနှင့် မညီကြောင်း ၎င်း၏ အမြင်ကို  ပြောကြားသည်။ 

ဈေးနှုန်းကို အစည်းအဝေးက ထိန်းကွပ်ခြင်းသည် လွတ်လပ်စွာ ယှဉ်ပြိုင်ခွင့်အတွက် အဟန့်အတားဖြစ်၊ မဖြစ်၊  ဈေးကွက်စီးပွားရေးစနစ် ပီပြင်ခြင်း ရှိ၊ မရှိ မေးခွန်းထုတ်စရာပင် ဖြစ်သည်။ ၂၀၀၈ ခုနှစ် ဖွဲ့စည်းပုံအခြေခံဥပဒေတွင် မြန်မာနိုင်ငံသည် ဈေးကွက်စီးပွားရေးကို ကျင့်သုံးသည့်နိုင်ငံဟု အတိအလင်း ဖော်ပြထားသည်။

ထို့ပြင် ဈေးနှုန်းကို ယင်းကဲ့သို့ ထိန်းကျောင်းခြင်းသည် ယှဉ်ပြိုင်မှု ဥပဒေ အခန်း (၇)၊ ပုဒ်မ ၁၄ ပါ ပြဋ္ဌာန်းချက်များကို ချိုးဖောက်ခြင်းရှိ မရှိ ပြန်လည်ဆန်းစစ် ကြည့်သင့်ပေသည်။ 

နိုင်ငံတကာတွင်မူ ရေနံဈေးနှုန်း ထိန်းချုပ်မှုနှင့် ပတ်သက်၍ ကမ္ဘာ့ရေနံ ထုတ်လုပ်သူနိုင်ငံများ စုစည်းဖွဲ့ထားသည့် OPEC သည် ဈေးနှုန်းနှင့် ဝယ်လိုအားပေါ် မူတည်၍ နှစ်စဉ် ရေနံမည်မျှ ထုတ်မည်ကို တွက်ချက်ကြသည်။ အာရပ်ကမ္ဘာမှ ရေနံထုတ်လုပ်သည့် နိုင်ငံအများစုသည် OPEC တွင် ပါဝင်ကြသည်။ OPEC သည် ရေနံဈေးကွက်နှင့် ဈေးနှုန်းကို ချုပ်ကိုင်ရန် ကြိုးစားသည်။ လက်ရှိတွင်လည်း OPEC နိုင်ငံများအကြား ကမ္ဘာ့ရေနံ လျှော့ချထုတ်လုပ်မှု စာချုပ်ကို သက်တမ်းတိုးရန် အဖွဲ့ဝင်နိုင်ငံ အများစုက ထောက်ခံထားကြသည်။ လာမည့် တနင်္ဂနွေတွင် OPEC အဖွဲ့ဝင် မဟုတ်သည့် အခြားနိုင်ငံများနှင့် ဆွေးနွေးမည် ဖြစ်ကြောင်း နိုင်ငံတကာ သတင်းများက ဖော်ပြသည်။ အဆိုပါစာချုပ်ကို သက်တမ်းမတိုးနိုင်ပါက အမေရိကန် ရေနံစိမ်းတစ်စည်လျှင် ယခုအခါ ၄၉ ဒေါ်လာကျော် ရှိရာမှ ဒေါ်လာ ၃၀ အောက်သို့ ရောက်ရှိသွားနိုင်သည်ဟု အဆိုပါ သတင်းရင်းမြစ်များက ဆိုသည်။ 

ဒေါက်တာဝင်းမြင့်ကမူ ပြည်တွင်းစက်သုံးဆီဈေးသည် ပြည်ပဈေးနှင့် ငွေလဲလှယ်နှုန်း အပေါ်တွင် အခြေခံ၍ ပြောင်းလဲခြင်း ဖြစ်သည်ဟု ဆိုသည်။ လုပ်ငန်းရှင်များသည် လက်ကားဈေးနှုန်းကို အမြတ် ၂ ရာခိုင်နှုန်းသာယူပြီး လက်လီဈေးနှုန်းကိုမူ အမြတ် ၄ ရာခိုင်နှုန်း ယူသည်ဟု ဆိုသည်။ ဤသို့ဆိုပါက  လက်လီ၊ လက်ကားလုပ်သော စက်သုံးဆီ တင်သွင်းသည့် လုပ်ငန်းရှင်များမှာ အမြတ်  ၆ ရာခိုင်နှုန်းယူသည့် သဘောပင်။ စက်သုံးဆီဈေးနှုန်း ကြီးမြင့်ပြီး အမြတ်များစွာ ရယူပါက ဝန်ကြီးဌာနမှ ၎င်းတို့ထံ အကြောင်းကြားသည်ဟု ၎င်းက ပြောပြသည်။ 

ပြည်ပကုမ္ပဏီများ ဝင်ရောက်လာချိန်တွင်မူ ဈေးနှုန်းများကို ယခုကဲ့သို့ ထိန်းကွပ်၍ မဖြစ်နိုင်ပေ။ လွတ်လပ်သော ဈေးနှုန်းက ဦးမဆောင်နိုင်သော ဈေးကွက်စီးပွားရေးစနစ်မှာ အသက်မဝင်။ လွတ်လပ်သော ဈေးနှုန်းဖြစ်မှသာ စားသုံးသူများ၏  အခွင့်အရေးမှာ ပိုမိုအသက်ဝင်လာမည်ဟု မြန်မာ့စီးပွားရေး လေ့လာသူ ဦးလှမောင်က ဆိုသည်။ 

ဝေဖန်ထောက်ပြသူများ အဆိုအရ မြန်မာ့ဆက်သွယ်ရေးကို တစ်ဦးတည်းပိုင် ပြုလုပ်ထားသည့် MPTခေတ်တွင် ဆင်းမ်ကတ်များကို ကျပ်သိန်းနှင့်ချီ ဝယ်သုံးခဲ့ရပြီး တယ်လီနောနှင့် အူရီဒူးဝင် ရောက်လာချိန်တွင် ကျပ်ထောင်ဂဏန်း ဝန်းကျင်ဖြင့် သုံးစွဲခွင့်ရခဲ့ခြင်းက ယှဉ်ပြိုင်မှုကြောင့် တိုးတက်လာခဲ့ခြင်းကို သက်သေခံလျက်ရှိသည်။

သို့သော်လည်း ပြည်ပရင်းနှီးမြှုပ်နှံမှု ဖိတ်ခေါ်ရာ၌ ပြည်တွင်းနိုင်ငံသားများ  မလုပ်နိုင်သည့် ကဏ္ဍများ၌သာ လုပ်ကိုင်ခွင့်ပြုရန် ဟူသည့် မူဝါဒများ နိုင်ငံတကာတွင်လည်း ရှိကြောင်း ဒေါက်တာဝင်းမြင့်က ဦးစွာထောက်ပြသည်။ စက်သုံးဆီ တင်သွင်းရောင်းချသည့် လုပ်ငန်းသည် နည်းပညာ မလိုအပ်ခြင်းနှင့် အရင်းအနှီး လုံလောက်ခြင်းကြောင့် နိုင်ငံသားများကိုသာ ဆက်လက်လုပ်ကိုင်ခွင့် ပြုစေလိုကြောင်း ၎င်းက ဆိုသည်။ 

စီးပွားရေးပညာရှင် ခင်မောင်ညို (ဘောဂဗေဒ) ကမူ တိုင်းရင်းသားလုပ်ငန်းရှင် အကျိုးကို ကာကွယ်မည်လား သို့မဟုတ် စားသုံးသူ အကျိုးစီးပွား ပိုအရေးစိုက်မည်လား ဆိုသည့် အစိုးရမူဝါဒအပေါ် မေးခွန်းထုတ်သည်။ 

“ခွင့်ပြုမယ် ဆိုရင်တော့ ပြိုင်ဆိုင်မှု များလာမယ်။ ဝန်ဆောင်မှု ပိုကောင်းလာမယ်။ ဒါပေမဲ့ နိုင်ငံခြားကို ဖွင့်ပေးတိုင်း ကောင်းတာမဟုတ်ဘူး။ သူတို့ကိုလည်း ထိန်းရလိမ့်မယ်။ တစ်ခါတစ်ခါကျ သူတို့ အင်အားနဲ့ ဖိသွားတာမျိုးရှိတယ်။ လွှတ်ပေးထားလို့တော့ မရဘူး” ဟု ၎င်းက ဆိုသည်။ 

လုပ်ငန်းရှင်နှင့် စားသုံးသူအကြား မည်သူကို ဦးစားပေးသည့် မူဝါဒကို ရွေးချယ်သည်ဖြစ်စေ နှစ်ဖက်လုံးတွင် အကျိုးအပြစ် ရှိသည်ဟု ၎င်းက ဆိုသည်။

ဒေါက်တာဝင်းမြင့်ကမူ “အရည်အသွေး၊ အရေအတွက်၊ ဈေးနှုန်းတွေကို ဖြစ်သင့်ဖြစ်ထိုက်တဲ့ ဈေးနှုန်းရောက်အောင် လုပ်ပေးနိုင်ခဲ့မယ် ဆိုရင်တော့ နိုင်ငံခြားသားတွေကို ခေါ်ဖို့ကိုတော့ လူကြီးတွေ ပြန်စဉ်းစားနိုင်လိမ့်မယ်လို့ မျှော်လင့်ပါတယ်” ဟု ဆိုသည်။ 

သမ္မတဦးသိန်းစိန် အစိုးရလက်ထက် ပထမအကြိမ်လွှတ်တော်တွင် နိုင်ငံခြား ရင်းနှီးမြှုပ်နှံမှု ဥပဒေ ဆွေးနွေးစဉ်ကလည်း တိုင်းရင်းသား လုပ်ငန်းရှင်အကြား အကျိုးစီးပွားလွန်ဆွဲမှုများ ဖြစ်ပေါ်ခဲ့သည်။ ယခု စက်သုံးဆီသည် ယင်းကဲ့သို့ အခြေအနေ မဟုတ်ပေ။ နိုင်ငံသားလုပ်ငန်းရှင် အကျိုးစီးပွားနှင့် နိုင်ငံသား စားသုံးသူတို့၏ တိုက်ပွဲလည်း ဖြစ်သည်။ 

“ဘာပဲဖြစ်ဖြစ် ကျွန်တော်တို့ကတော့ ဈေးလည်းသက်သာပြီး အရည်အသွေးကောင်းရင် ရပြီ။ ခုကတော့ ရွေးစရာ မရှိဘူး။ ပြည်တွင်းဈေးကလည်း သိပ်မကွာဘူး” ဟု အငှားယာဉ်မောင်း ကိုဇော်မင်းက ဆိုသည်။

မြန်မာ့စီးပွားရေးလေ့လာသူလည်း ဖြစ်၊ ကိုယ်တိုင်လည်း စီးပွားရေးလုပ်ငန်းရှင်လည်း ဖြစ်သော ဦးလှမောင်ကမူ အစိုးရကို ယခုလို တိုက်တွန်းသည်။ 

“ပြည်သူတွေ အကျိုးအတွက်ဆိုရင် လုပ်မယ်ဆိုရင် လူတစ်စုကောင်းစားရေးအတွက် ဘယ်တော့မှ မစဉ်းစားပါနဲ့။ တစ်ပြည်လုံး ကောင်းစားရေးအတွက် လုပ်သင့်လုပ်ထိုက်တာကို လုပ်ပါလို့ အကြံပြုချင်ပါတယ်”

ရဲနိုင်ဦး