News

POST TYPE

EDITORIAL

စားနပ်ရိက္ခာနှင့် နိုင်ငံတည်ဆောက်ရေး (Daily Vol-4/No-103)
08-Aug-2016
ယခုနှစ်သည် မြန်မာ့သမိုင်းတွင် ယခင်က မကြုံခဲ့ဖူးသည့် နေရာဒေသများတွင်ပါ ရေကြီး၊ ရေလျှံမှုများ ကြုံတွေ့ခဲ့ရသည့် နှစ်တစ်နှစ်ဖြစ်သည့်အလျောက် ယင်း၏ နောက်ဆက်တွဲ ဘေးအကျိုးဆက်များကိုလည်း လာမည့်နှစ်များတွင် ရင်ဆိုင်ရန် အသင့်ပြင်ထားရမည် ဖြစ်သည်။

အထူးသဖြင့် ဆန်စပါး အထူးပြုစိုက်ပျိုးရာ နေရာဒေသများ ဖြစ်သော ဧရာဝတီတိုင်း၊ ပဲခူးတိုင်း၊ မန္တလေးတိုင်းနှင့် စစ်ကိုင်းတိုင်းတို့တွင် မြစ်ရေကြီးခြင်း၊ ဆည်မြောင်း၊ တာတမံမျ ားကျိုးပေါက်ခြင်း၊ လျှံကျခြင်း၊ ရေတံခါးများ ဖောက်ချခြင်းတို့ကြောင့် လယ်ဧကပေါင်း သိန်းချီ ပျက်စီးခဲ့ခြင်းကြောင့် လာမည့်နှစ် စပါးအထွက်နှုန်းအပေါ် ကြီးစွာ သက်ရောက်မည် ဖြစ်သည်။

သဘာဝဘေးအန္တရာယ်တို့ မည်သည် လူတို့၏ လောဘကို အရင်းတည်ကာ မလိုလားအပ်သော သဘာဝပတ်ဝန်းကျင် ဆုံးရှုံးပျက်စီးကာ ရာသီဥတုများ ဖောက်ပြန်ပြောင်းလဲခြင်းကြောင့် ပေါ်ပေါက်လာခြင်း ဖြစ်သည်ကို စနစ်တကျ သုတေသနပြု လေ့လာချက်များအရ တစ်ကမ္ဘာလုံးက လက်ခံထားကြသည်။

ထို့အတူ မြန်မာနိုင်ငံ၏ ရာသီဥတုများ ဖောက်ပြန်ပြောင်းလဲရခြင်းသည် ကမ္ဘာလုံးဆိုင်ရာ အပြောင်းအလဲများနှင့် သွယ်ဝိုက်ချိတ်ဆက်နေပြီး ပြည်တွင်းရှိ သစ်တောဧက သန်းချီ ဆုံးရှုံးပျောက်ကွယ်သွားခြင်းနှင့် တိုက်ရိုက်ပတ်သက်နေကြောင်း ပညာရှင်အားလုံးက တညီတညွတ်တည်း လက်ခံထားကြသော်လည်း သစ်တောရေးရာ ဝန်ကြီးဌာနမှ အကြီးတန်း အရာရှိကြီးတစ်ဦးက မဟုတ်မှန်ကြောင်း ငြင်းဆိုနေခြင်းမှာ ထူးခြားချက် ဖြစ်သည်။

မြန်မာနိုင်ငံသည် ယခင်က အာရှဒေသ၏ ဆန်အိုးကြီးအဖြစ် နာမည်ကျော်ကြားခဲ့သော်လည်း ယနေ့အချိန်တွင်မူ တစ်နှစ်ပြီးတစ်နှစ် သဘာဝဘေးအန္တရာယ် ကျရောက်မှုနှုန်း မြင့်မားလာခြင်းကြောင့် လာမည့်နှစ်တွင် ပြည်ပမှ ဆန်ဝယ်ယူတင်သွင်းရမည့် အခြေအနေသို့ ရောက်ရှိသွားနိုင်ကြောင်း ခန့်မှန်းသုံးသပ်မှုများ ရှိနေပြီ ဖြစ်သည်။ 

ပထဝီမြေမျက်နှာပြင်နှင့် ရာသီဥတု အခြေအနေအရလည်းကောင်း၊ နိုင်ငံ၏ လူသားအရင်းအမြစ် ဖွံ့ဖြိုးမှုအရ လည်းကောင်း စက်မှုလက်မှုနှင့် နည်းပညာ အခြေပြု နိုင်ငံများကဲ့သို့ နိုင်ငံတော်၏ ဓနဥစ္စာကို မြှင့်တင်၍ မရဘဲ လယ်ယာစိုက်ပျိုးရေး အခြေပြု စက်မှုလုပ်ငန်းများနှင့် စိုက်ပျိုးရေးနှင့် စားသောက်ကုန်ချောထုတ်လုပ်ရေးလ ုပ်ငန်းများကို အခြေပြုကာ ဝင်ငွေရှာဖွေရမည့်နိုင်ငံ ဖြစ်သည်။

ကမ္ဘာပေါ်တွင် မြန်မာတစ်နိုင်ငံတည်းတွင်သာ စီးပွားဖြစ် စိုက်ပျိုးဖြစ်ထွန်းသည့် ဆန်စပါးမျိုးရင်းများ၊ ပဲအမျိုးမျိုးနှင့် ဖီးကြမ်းငှက်ပျောသီးကဲ့သို့ အသီးအနှံ သစ်သီးဝလံများကို အခြေပြုကာ စိုက်ပျိုးရေး ထွက်ကုန်များ အလုံးအရင်းဖြင့် ပြည်ပတင်ပို့နိုင်ရန် အခြေခံအဆောက်အဦများကို အရန်သင့် ပြင်ဆင်ဖြည့်ဆည်းထားရန် လိုပေသည်။

ကမ္ဘာကြီး၏ လူဦးရေမှာလည်း တစ်နေ့တခြား တိုးပွားများပြားလာခြင်း၊ သဘာဝဘေးအန္တရာယ်များ ပို၍ ခြိမ်းခြောက်ဖျက်ဆီးလာခြင်းတို့ ကြောင့် တိုးပွားများပြားလာသော ကမ္ဘာ့လူဦးရေကို အလျဉ်မီစွာ ဖြည့်ဆည်းပေးနိုင်ရန် ခက်ခဲကာ များမကြာမီ နှစ်များအတွင်း စားနပ်ရိက္ခာ ပြဿနာနှင့် အကြီးအကျယ် ရင်ဆိုင်လာရဖွယ် ရှိပေသည်။

ထိုအခြေအနေတွင် မူလကပင် စိုက်ပျိုးရေးဆိုင်ရာ ရေခံမြေခံများ အထူးကောင်းမွန်ခဲ့သော မြန်မာနိုင်ငံအတွက် အဆိုးထဲမှ အကောင်းရရှိစေရန် နိုင်ငံ၏ စားနပ်ရိက္ခာ ဖြည့်တင်းမှုနှင့် လယ်ယာစိုက်ပျိုးရေး လုပ်ငန်းများ၊ စိုက်ပျိုးရေး အခြေပြု စက်မှုလုပ်ငန်းများကို ယခုကပင် စတင်၍ အသင့်ပြင်ဆင်ထားရန် လိုပေသည်။

ယနေ့အချိန်အထိ ခက်ခဲနက်နဲသော နည်းပညာ မပါသည့် အသင့်စား ဆန်ပြုတ်နှင့် ပဲစည်သွတ်ဘူးကဲ့သို့ စားသောက်ကုန်များကိုပင် အိမ်နီးချင်း ထိုင်းနိုင်ငံမှ အမြောက်အမြား တင်သွင်းနေရသေးသော မြန်မာနိုင်ငံ၏ စိုက်ပျိုးရေး အခြေပြု စက်မှုလုပ်ငန်း နယ်ပယ်ကို အစိုးရအနေနှင့် အထူးဦးစားပေး စဉ်းစားကာ ယင်းနယ်ပယ်ကို ရင်းနှီးမြှုပ်နှံ ထုတ်လုပ်လိုသည့် ပြည်တွင်း၊ ပြည်ပ လုပ်ငန်းရှင်များကို ဆွဲဆောင်စည်းရုံးခြင်း၊ ဆန်စက်များ၏ အရည်အချင်း မြှင့်တင်ထားခြင်း၊ ပြည်တွင်းမျိုးရင်းများကို ပို၍အထွက်နှုန်းကောင်းစေမည့် မျိုးစပ်၊ မျိုးပွား နည်းပညာများ သုတေသန ပြုထားခြင်း၊ တောင်သူလယ်သမားများ စိုက်ပျိုးလုပ်ကိုင်မှု အဆင်ပြေစေရန် မက်လုံးများ၊ သွင်းအားစု အထောက်အပံ့များ၊ အခွန်လျှော့ပေါ့မှုများ၊ အရစ်ကျစနစ်ဖြင့် လယ်ယာသုံး စက်ကိရိယာ ရောင်းချမှုများဖြင့် နိုင်ငံတော်၏ စပါးကျီများကို ခေတ်မီစေရန် ပြုပြင်ထားခြင်းဖြင့် နိုင်ငံတော် ဖွံ့ဖြိုးရေး (ဝါ) နိုင်ငံတည်ဆောက်ရေးကို စေတနာပါပါ လုပ်ကိုင်စေလိုကြောင်း အထူးအကြံပြုအပ်ပေသည်။ 

 အယ်ဒီတာ (၂၆-၉-၂၀၁၅)

(လက်ရှိအခြေအနေသည် ယခင် ၂၀၁၅ ခုနှစ်က အခြေအနေများအတိုင်း ဖြစ်နေသည့်အတွက် ၂၀၁၅ ခုနှစ် အောက်တိုဘာလထုတ် Living Color မဂ္ဂဇင်းတွင် ဖော်ပြခဲ့ပြီးသော အယ်ဒီတာ့အာဘော်ကို ပြန်လည်ဖော်ပြအပ်ပါသည်)


  • VIA