News

POST TYPE

EDITORIAL

ရှစ်လေးလုံး အရေးတော်ပုံမှသည် ဤခရီးနီးပြီလား (Daily Vol-4/No-102)
08-Aug-2016
ရှစ်လေးလုံး အရေးတော်ပုံဟု ဆိုလိုက်သည်နှင့် ကမ္ဘာပေါ်တွင် အကြီးကျယ်ဆုံး မြန်မာ့လူထုအုံကြွမှုကြီးအဖြစ် မှတ်တမ်းတင်ထိုက်သည့် ခေတ်ပြောင်းတော်လှန်ရေး နိမိတ်ပုံတစ်ခုအဖြစ် အမှတ်တရ ဖြစ်စေသည်။

၁၉၈၈ ခုနှစ်၊ သြဂုတ်လ ၈ ရက်နေ့သည် တစ်ပါတီ အာဏာရှင်စနစ်ကို မြန်မာပြည်သူလူထု တစ်ရပ်လုံးက တညီတညာတည်း ဆန့်ကျင်တော်လှန်ကြသည့် အထိမ်းအမှတ်နေ့လည်း ဖြစ်သည်။

ထို့အတူ တစ်ပါတီ အာဏာရှင်စနစ်ကို ရှေ့ဆုံးက စတင်ဆန့်ကျင်ဆန္ဒပြခဲ့သော တစ်နည်းအားဖြင့် ရှစ်လေးလုံး အရေးတော်ပုံကို နိဒါန်းပျိုး၊ အစချီခဲ့ကြသည့် ကျောင်းသားလူငယ်များ၏ သူရသတ္တိ၊ စွန့်လွှတ်အနစ်နာခံမှု၊ ကိုယ်ကျိုးမပါသော ပေးဆပ်မှု အခန်းကဏ္ဍတို့ကိုလည်း သောင်းတိုက်က ကြားစေခဲ့သည့် နှစ်ဖြစ်သည်။

စက်မှုတက္ကသိုလ် ကျောင်းသားအချို့နှင့် အရပ်သားအချို့အကြား သာမန်ရန်ပွဲငယ် တစ်ခုမှ အဓိကရုဏ်းအသွင်အထိ ဖြစ်သွားခဲ့ပြီး ယင်းကိစ္စအပေါ် အစိုးရ၏ အလွန်အကျွံ ကိုင်တွယ်ဖြေရှင်းခဲ့ခြင်း သို့မဟုတ် စီမံခန့်ခွဲမှု အားနည်းချက်နှင့် ယင်းဖြစ်ရပ်မှန်နှင့် ပတ်သက်၍ ဖုံးကွယ်လိမ်ညာ သတင်းထုတ်ပြန်ခြင်းတို့က အနှစ်နှစ်အလလ အောင့်အည်းမျိုသိပ်ထားသော ပြည်သူလူထု၏ မကျေနပ်ချက်များကို မီးထိုးပေးလိုက်သကဲ့သို့ ဖြစ်သွားကာ လူထုအုံကြွမှုကြီး ပေါ်ပေါက်လာရခဲ့ခြင်း ဖြစ်သည်။

တစ်ဆက်တည်းမှာပင် ရန်ကုန်မြို့တော် အပါအဝင် မြန်မာနိုင်ငံ တစ်နံတစ်လျားမှနေ၍ အစိုးရအား ဆန့်ကျင်ဆန္ဒပြသူ ရဟန်း၊ ရှင်၊ လူ၊ ကျောင်းသား၊ ကျောင်းသူများစွာကို ပစ်ခတ်နှိမ်နင်းကာ စစ်အာဏာရှင်စနစ်ကို ထူထောင်လိုက်ခြင်းဖြင့် ပထမအမှားကို ဒုတိယအမှားဖြင့် ထပ်မံဖြေရှင်းလိုက်သကဲ့သို့ ဖြစ်သွားခဲ့သည်။ 

ယင်းနောက်ပိုင်း ဆယ်စုနှစ် နှစ်ခုကျော် ကာလအထိတိုင် အမှားကို အမှားဆင့်သော ဖြေရှင်းနည်းများဖြင့် ဆင့်ကဲအမှားများ ကျူးလွန်လာခဲ့ခြင်းက လူထုနှင့် အာဏာရှင် အုပ်ချုပ်သူများ အကြား သို့မဟုတ် လူထုနှင့် တပ်မတော်အကြား မြင့်မားကြမ်းရှလှသည့် တံတိုင်းကြီးတစ်ခု ပိတ်ကာလိုက်သကဲ့သို့ ဖြစ်သွားတော့သည်။

စင်စစ်အားဖြင့် ရှစ်လေးလုံး အရေးတော်ပုံကြီးသည် ရက်စက်စွာ နှိမ်နင်း၊ ဖိနှိပ်ခံခဲ့ရသူများနှင့် ထိုသို့ ရက်စက်ဖိနှိပ်ခဲ့သူ နှစ်ဖက်စလုံးအတွက် စိတ်ပျက် နာကြည်းစရာများ၊ ခံပြင်း ဒေါသဖြစ်စရာများ၊ ထိတ်လန့်ကြောက်မက်ဖွယ် အတွေ့အကြုံများစွာ ကြုံခဲ့ရသည့်နည်းတူ သင်ခန်းစာယူ ဆင်ခြင်ဖွယ်ရာ များစွာလည်း ရှိပေသည်။

တစ်နည်းအားဖြင့် ဆိုရသော် ရှစ်လေးလုံး အရေးတော်ပုံကြီးသည် ဖိနှိပ်သူ အာဏာရှင်များ အတွက်ရော အဖိနှိပ်ခံ ပြည်သူများအတွက်ပါ သွေးနှင့်ရင်းကာ တန်ဖိုးကြီးကြီး ပေးထားရသည့် အထင်ရှားဆုံး၊ ဝမ်းနည်းစရာ အကောင်းဆုံး၊ တောက်ခေါက်သံများ၊ အော်ဟစ်သံများ၊ ငိုရှိုက်သံများ၊ မျက်ရည်များ၊ သွေးများ ပေကျံနေသော သမိုင်းသင်ခန်းစာလည်း ဖြစ်သည်။

ယနေ့အချိန်သည် ရှစ်လေးလုံး ကာလမှသည် အနှစ်နှစ်ဆယ်ကျော် အဖိနှိပ်ခံခဲ့ရသူများ လက်ဝယ်သို့ ပြည်သူလူထုက အချုပ်အခြာအာဏာ အများစုကို လွှဲပြောင်းပေးအပ်လိုက်ပြီး ခရီးရှည် ချီတက်ရမည့် ဒီမိုကရေစီပန်းတိုင်သို့ ဦးတည်နေသော မင်္ဂလာရှိသည့် နေ့သစ်များ၊ နှစ်သစ်များ စတင်စ ကာလဟု ဆိုနိုင်သည်။ 

ရှစ်လေးလုံး အရေးတော်ပုံကြီးတွင် နှစ်ဖက်စလုံးမှ ပါဝင်ပတ်သက်ခဲ့ကြသည့် လူပုဂ္ဂိုလ်များ၊ အဖွဲ့အစည်းများ၊ အင်အားစုများ အနေနှင့် အမှားပေါ် အမှားဆင့်ကာ အမှားသံသရာ လည်နေသော အမှားသင်ခန်းစာများကို ရှောင်ကြဉ်နိုင်ကြကာ နိုင်ငံကြီးသား ပီသသော၊ ရင်ကြားစေ့ သင့်မြတ်သော၊ စည်းလုံးညီညွတ်သော၊ ငြိမ်းချမ်းသော ဒီမိုကရေစီလူ့ဘောင်ကို အတူတကွ ဝိုင်းဝန်းတည်ဆောက်ခြင်းအားဖြင့် ပန်းတိုင်နှင့် နီးသထက် နီးနိုင်ကြစေကြောင်း ဆန္ဒပြု တိုက်တွန်းအပ်ပေသည်။

အယ်ဒီတာ (၇-၈-၂၀၁၆)


  • VIA