News

POST TYPE

EDITORIAL

မြန်မာ့စီးပွားရေး မူဝါဒ ဘာလဲ (Daily, Vol-4/No-229)
03-Jan-2017 tagged as

ကမ္ဘာလုံးဆိုင်ရာ အချက်အလက်များကို စနစ်တကျ စစ်တမ်းကောက်၊ သုတေသန ပြုထားသော အချက်အလက်များအရ မြန်မာနိုင်ငံသည် ယနေ့အချိန်အထိ စီးပွားရေး လုပ်ကိုင်ရန် ခက်ခဲနေဆဲ နိုင်ငံများအနက် အောက်ဆုံးနားတွင် ရှိနေသေးသည်။

ထင်ရှားသိသာသော အချက်မှာ ယနေ့အချိန်ထိ လျှပ်စစ်မီး၊ အင်တာနက် မြန်နှုန်း၊ တည်ငြိမ်သော ငွေကြေးဈေးကွက်၊ လမ်းပန်း ဆက်သွယ်ရေးကဲ့သို့ အခြေခံ အဆောက်အဦများ သာမက ကြိုးနီစနစ်နှင့် အကျင့်ပျက်ခြစားမှု နည်းပါးသော 
ဌာနဆိုင်ရာ လုပ်ငန်းစဉ်များ၊ အရည်အချင်းမြင့် ကျွမ်းကျင်လုပ်သား၊ သင့်တင့်လျောက်ပတ်သော အိမ်၊ ခြံ၊ မြေဈေး၊ မျှတခေတ်မီသော အခွန် စနစ်ကဲ့သို့ ရေခံမြေခံများလည်း အဆင်သင့် မဖြစ်သေးပေ။

အထက်ဆိုခဲ့ပါ အခြေခံ အဆောက်အဦနှင့် ရေခံမြေခံများတွင် အနိမ့်ဆုံးအဆင့် ဒေသတွင်းရှိ လာအိုနှင့် ကမ္ဘောဒီးယားကဲ့သို့ နိုင်ငံများနှင့်ပင် နှိုင်းယှဉ်မသေးသော အခြေအနေ ဖြစ်နေပေရာ နိုင်ငံခြား ရင်းနှီးမြှုပ်နှံမှုများ ယနေ့အချိန်အထိ ထင်ရှားသိသာစွာ ၀င်ရောက် မလာသေးခြင်းမှာ မထူးဆန်းလှချေ။

ထိုအခြေအနေတွင် ရှမ်းပြည်နယ် မြောက်ပိုင်း၊ ရခိုင်ပြည်နယ်နှင့် ကချင်ပြည်နယ်တို့တွင် ဖြစ်ပေါ်နေသော တိုက်ပွဲများ၊ ရန်ကုန်မြို့တော်ကဲ့သို့ နေရာမျိုးတွင်ပင် ရာဇ၀တ်မှုခင်းများ အထူးမြင့်တက်နေခြင်းမှာ တစ်ပူပေါ် နှစ်ပူဆင့် သကဲ့သို့ ရှိပေသည်။

နိုင်ငံတော်၏ စီးပွားရေး ဖွံ့ဖြိုးတိုးတက်လာစေရန် အဓိက ဖြည့်ဆည်းပေးမည့် ရေတို၊ ရေရှည် နယ်ပယ်လုပ်ငန်းများအတွက် မူလကပင် ကြိုတင် ပြင်ဆင်ထားမှု မရှိခြင်း၊ ကိုယ်ကျိုးနှင့် အဖွဲ့အစည်း အကျိုးစီးပွား မကင်းသည့် နိုင်ငံတကာ အကူအညီများကို အားထားလွန်းခြင်း၊ လူတစ်စု၏ လက်တွင် နိုင်ငံ့စီးပွား ဘဏ္ဍာများ ရောက်ရှိနေခြင်းတို့သည်လည်း အဟန့်အတားများအဖြစ် ရှိနေသည်။

အထူးသဖြင့် ဒေသတွင်းနှင့် ကမ္ဘာကြီး၏ အပြောင်းအလဲ၊ ဦးတည်ချက်များကို လေ့လာ ဆန်းစစ်ပြီး နိုင်ငံတော်၏ အားသာချက်၊ အားနည်းချက်ကို မူတည်ကာ စနစ်တကျ သုတေသနပြု ရေးဆွဲထားရမည့် တိကျ ခိုင်မာသော စီးပွားရေး မူဝါဒများ ရှင်းလင်းပြတ်သားမှု မရှိခြင်းက အရေးအကြီးဆုံး စိန်ခေါ်မှု ဖြစ်သည်။

ဥပမာ - လွန်ခဲ့သော နှစ်ပေါင်း နှစ်ဆယ်ခန့်က လက်ကိုင်ပြုလာခဲ့သော စိုက်ပျိုးရေးကို အခြေပြု၍ အခြားနယ်ပယ်များ ဘက်စုံဖွံ့ဖြိုးတိုးတက်ရေး ဆိုသည့် ယေဘုယျ ဆန်သောမူကို ကိုင်စွဲမည်လော၊ မျက်မှောက် ကမ္ဘာကြီးနှင့် အရှိန်နှုန်းနှင့်အညီ အိုင်တီ သို့မဟုတ် ဇီဝနည်းပညာကို အခြေပြု၍ ၀န်ဆောင်မှု လုပ်ငန်းများ အားကောင်းလာစေရန် အထူးပြု လုပ်ဆောင်မည်လော ရေရာကွဲပြားစွာ မူဝါဒ ချမှတ်ရမည်ကို ဆိုလိုရင်းဖြစ်သည်။

ထိုအတွက် လက်ရှိအစိုးရအဖွဲ့အတွင်းရှိ စီးပွားရေးနှင့် ဆက်စပ် ပတ်သက်သော ၀န်ကြီးဌာနများတွင် မူဝါဒ၊ စီမံချက်၊ စီမံကိန်း၊ အကောင်အထည် ဖော်မည့် နည်းနာများ မည်မျှ အတိုင်းအတာအထိ ကြိုတင်ပြင်ဆင် ထားသနည်း၊ အဆင်သင့် ရှိနေသနည်း၊ မရှိသေးပါက မည်သည့်နိုင်ငံ၊ မည်သည့်ပုံစံမျိုးကို မိမိနိုင်ငံနှင့် လျော်ညီစေရန် ပေါင်းစပ် အသုံးပြုရန် ရည်ရွယ်ထားသနည်း ဆိုသော မေးခွန်းများကို ဖြေကြည့်ရန် လိုပေမည်။

အထူးအားဖြင့် ဈေးကွက်ကို သူ့သဘောအတိုင်း လွှတ်ပေးသည့် မူဝါဒကို သုံးမည်လော၊ အစိုးရက တစ်စိတ်တစ်ပိုင်း စွက်ဖက်သည့် မူဝါဒကို သုံးမည်လော ဆိုသည့် အခြေခံ အကျဆုံး ဈေးကွက်မူဝါဒကို များစွာ နောက်ကျမသွားမီ ပြတ်သားစွာ ဆုံးဖြတ်ရန် တစ်နှစ်သက်တမ်း နီးကပ်လာသည့် အစိုးရ တစ်ရပ်အတွက် အရေးကြီးလှကြောင်း သတိပေးလိုရင်း ဖြစ်သည်။

အယ်ဒီတာ (၂-၁-၂၀၁၇)

  • TAGS