News

POST TYPE

EDITORIAL

အိမ်ရာ စီမံကိန်းများက ပြောသောစကား (Daily, Vol-4/No-225)
28-Dec-2016 tagged as

ရန်ကုန်မြို့တော် တစ်ဝန်းတွင် တည်ဆောက်ဆဲ၊ တည်ဆောက်ရန် ဟန်ပြင်ဆဲ၊ တည်ဆောက် ပြီးစီးထားသော အိမ်ရာစီမံကိန်း အားလုံးနီးပါးမှာ ဝင်ငွေနိမ့် ပြည်သူများနှင့် များစွာ အလှမ်းဝေးသည့် တန်ဖိုးကြီး အိမ်ရာများဖြစ် နေခြင်းမှာ ဆင်းရဲတွင်းနက်နေဆဲ နိုင်ငံတစ်ခုနှင့် များစွာ မဆီမလျော် ရှိလှသည်။

ယင်းအချက်သည် တစ်နေ့ ရရှိသော ဝင်ငွေကို အချိုးကျ ကြည့်ပါက နေစရာနှင့် စားစရာအတွက် ၈ဝ ရာခိုင်နှုန်းခန့် သုံးစွဲနေရပြီး ကျန်နှစ်ဆယ် ရာခိုင်နှုန်းကို သွားလာစရိတ်နှင့် အခြားသော လူမှုရေး၊ ကျန်းမာရေးတို့အတွက် ဖျစ်ညှစ် သုံးစွဲနေရသည့် လူတန်းစား ၉၅ ရာခိုင်နှုန်းခန့် ရှိနေသော ရန်ကုန်မြို့တော် အတွက်လည်း များစွာ အကျည်းတန်လှသည်။

အာဏာရှင်စနစ် တစ်လျှောက် အာဏာရှိသူများနှင့် အလွန်းသင့်သူများ၊ အာဏာရှိသူများကို ကော်မရှင်ပေး၊ ရှယ်ယာ ခွဲပေးထားသူများ၊ အာဏာရှိသူများကို တပည့်ခံကာ ဆရာ လုပ်နေသူများ ကြီးစိုးထားခဲ့သော မြန်မာ့စီးပွားရေး လောကတွင် အိမ်၊ ခြံ၊ မြေဈေးကွက်ကို ချုပ်ကိုင်ထားသူ အများစုမှာလည်း ထိုသူများပင် ဖြစ်သည်။

ထို့ကြောင့် ရန်ကုန်မြို့တော်အတွင်း အများပြည်သူပိုင် နေရာများ၊ နိုင်ငံတော်ပိုင် နေရာများ၊ ထိန်းသိမ်း ကာကွယ်အပ်သည့် အထိမ်းအမှတ် နေရာများ၊ စည်ပင်ပိုင် ပန်းခြံ၊ ကစားကွင်း မြေနေရာများ အားလုံးတွင် တည်ဆောက်သမျှ အိမ်ရာအားလုံးမှာ အိုးပိုင်၊ အိမ်ပိုင်ဖြင့် ချမ်းသာ ကြွယ်ဝပြီးသား လူတန်းစား တစ်ရပ်အတွက် ငွေကြေးနေရာ ဖြန့်ခွဲချထားရေး အတွက်သာ ရည်ရွယ်ခဲ့သည်။

ရန်ကုန်မြို့တော်တွင် လာရောက် အခြေချ နေထိုင်ကာ သမ္မာအာဇီဝကျကျ ရိုးသားစွာ လုပ်ကိုင် စားသောက်နေပြီး မိမိတို့ လုပ်ကိုင် ဆောင်ရွက်သည့် အတိုင်းအတာ ပမာဏအတိုင်း နိုင်ငံတော်ကို မလိမ်မညာ အခွန် ပုံမှန် ထမ်းဆောင်နေကြသူ အများစုမှာ အိုးပိုင်၊ အိမ်ပိုင် မရှိကြဘဲ အိတ်ပိတ်တင်ဒါ၊ လိုင်စင်၊ ပါမစ် စီးပွားရေးမျိုးဖြင့် ချမ်းသာနေကြသူ အိမ်၊ ခြံ၊ မြေပေါင်း များစွာ ပိုင်ဆိုင်ထားသူများထံမှ မတန်တဆ ဈေးပေး၍ ငှားရမ်း နေထိုင်နေကြရသည်။

အာဏာရှင်ခေတ် တစ်လျှောက်ကမူ သိန်း ထောင်ဂဏန်း တန်ကြေး ရှိသော အိမ်ရာ စီမံကိန်း တစ်ခုကို နိုင်ငံတော်အဆင့် ပုဂ္ဂိုလ်တစ်ဦးဦး တက်ရောက် ချီးမြှင့်ခြင်း၊ ဖဲကြိုးဖြတ် ဖွင့်လှစ်ပေးခဲ့ခြင်းတို့သည် အပေးအယူ သဘောများစွာ ပါဝင်နေပြီး ဆင်းရဲသော သာမန် ပြည်သူများကို ကြီးစွာ မထေမဲ့မြင် ပြုခဲ့ခြင်း ဖြစ်သည်။ 

ယနေ့ကဲ့သို့ ပြည်သူလူထုက ဒီမိုကရေစီနည်းကျ ရွေးကောက် တင်မြှောက် ထားသော ပြည်သူ့ ကိုယ်စားလှယ်များနှင့် အရပ်သား အများစု ပါဝင်သော အစိုးရအဖွဲ့ တာဝန် ယူထားသည့် ကာလမျိုးတွင် သာမန်လူများ မကပ်နိုင်ဘဲ အိမ်တစ်လုံးထက်မက ပိုရှိသူများသာ ဝယ်နိုင်သည့် အိမ်ရာများ ဆက်လက် တည်ဆောက်နေခြင်း၊ ယင်းသို့ တည်ဆောက်သော အိမ်ရာ စီမံကိန်းများကို နိုင်ငံတော်အဆင့် ပုဂ္ဂိုလ်များ တက်ရောက် ချီးမြှင့်ပေးခြင်းတို့ ရှိနေပါက ရည်ရွယ်သည်ဖြစ်စေ၊ မရည်ရွယ်သည်ဖြစ်စေ အိမ်ရာမဲ့များ၊ အိမ်ငှား နေထိုင်ကြရသူ သာမန် ပြည်သူများ၏ ဘဝကို ကိုယ်ချင်း မစာနာသည့်သဘော သက်ရောက် သွားနိုင်ပေသည်။

ထိုအတွက် သာမန်လူများနှင့် ဆင်းရဲသော ပြည်သူများ နှစ်ရှည် အရစ်ကျ စနစ်ဖြင့် ဝယ်ယူနိုင်မည့် အရည်အသွေး ရှိသော တန်ဖိုးနည်း၊ တန်ဖိုးသင့် အိမ်ရာ များစွာ အလျင်အမြန် ဖော်ထုတ်ခြင်း၊ ထိုသို့ အိမ်ရာများ ဖော်ထုတ်နိုင်ရန် အခွန်နှင့် သွင်းကုန်ဆိုင်ရာ မူဝါဒများ လျှော့ပေါ့ ပြင်ဆင်ပေးခြင်း၊ နိုင်ငံတကာမှ ဘဏ်ချေးငွေ ရရှိရန် ထောက်ခံပေးခြင်းကဲ့သို့ လိုအပ်သည့် ထောက်ပံ့ကူညီမှုများ ပေးခြင်းဖြင့် နိုင်ငံတော်ဘဏ္ဍာ မကုန်ကျဘဲ ကူညီပေးခြင်းကသာ အခြေခံ ပြည်သူများကို စာနာ နားလည်ရာ ရောက်ကြောင်း သိစေအပ်ပေသည်။

အယ်ဒီတာ (၂၈-၁၂-၂ဝ၁၆)

  • TAGS