News

POST TYPE

EDITORIAL

ပြည်သူများပါ ပူးပေါင်းပါဝင်ရမည့် တရားဥပဒေစိုးမိုးရေး (Daily, Vol-7/No-145)
26-Sep-2019
စစ်အာဏာရှင်စနစ် အဆုံးသတ်ပြီး ဒီမိုကရေစီ စတင်ဖော်ဆောင်သည့် ၂၀၁၀ ပြည့်နှစ် ရွေးကောက်ပွဲလွန်ကာလမှစတင်ပြီး ပြုပြင်ပြောင်းလဲရေးသမ္မတ ဦးသိန်းစိန်လက်ထက် အပါအဝင် ဒေါ်အောင်ဆန်းစုကြည်၏ ပြည်သူ့အစိုးရ အုပ်ချုပ်နေသည့် လက်ရှိအချိန်ကာလအထိ ခေတ်များ မည်သို့ပင် ပြောင်းလဲသွားသည်ဖြစ်စေ မြန်မာ့နိုင်ငံနှင့် ပြည်သူများအကြား ယခုထက်ထိ မပြောင်းလဲသေးပါဟု ခံစားနေရသည့်အရာများကိုပြောပါဟုဆိုလျှင် တရားဥပဒေစိုးမိုးရေး (Rule of Law) ဟုပင်ဆိုရမည်။

ဒီမိုကရေစီပဲပြောပြော၊ ပြည်သူ့ခေတ်ရောက်ပြီဟုပဲဆိုဆို စစ်တမ်းထုတ်စရာမလိုဘဲ လက်တန်းပြော၍ရနိုင်သည့်အရာမှာ အဆိုပါတရားဥပဒေစိုးမိုးရေးပိုင်းတွင် လုံးလုံးလျားလျား လျော့တိလျော့ရဲ ဖြစ်နေသည်ဆိုသော အချက်ပင်ဖြစ်သည်။

တရားဥပဒေစိုးမိုးမှုဟူသည်မှာ တိုင်းပြည်တစ်ပြည်အတွက် လွန်စွာအရေးကြီးသည်ဆိုသည်ကို ထွေထွေထူးထူး ပြောနေစရာပင်လိုမည်မဟုတ်ပေ။ တရားဥပဒေ မစိုးမိုးလျှင် ရိုးသားဖြောင့်မတ်သူများ၊ အမှန်တရားကို မြတ်နိုးသူများ အမြဲပင်တစေ ပတ္တမြားနွံနစ်သည့် ဘဝနှင့်သာ အဆုံးသတ်ရဖွယ်ရှိပြီး မရိုးစင်း၊ မဖြောင့်မတ်သူများမှာ ရှေ့ဆုံးထိပ်ဆုံးရောက်ကာ လူ့အဖွဲ့အစည်းတွင် ရာသက်ပန် လူပေါ်လူဇော်လုပ်ခွင့် ရနေမည်သာပင်။

တစ်နည်းဆိုရလျှင် အမှုအခင်းတစ်ခု၊ ပြဿနာတစ်ခုဖြစ်ပွားပါက မှန်ကန်တိုင်း အနိုင်ရရှိမည်ဟု တပ်အပ်မပြောနိုင်တော့ပေရာ အမှန်တရား (သူတော်ကောင်းတရား)ဟူသည် ဖက်တွယ်အပ်သော အားထားအပ်သော တရားအဖြစ် လက်ခံသူ နည်းပါးလာနိုင်သည့် အန္တရာယ်ရှိပေသည်။ ထိုသို့ အမှန်တရားကို တန်ဖိုးမထားတတ်သည့် သဘောတရား အယူအဆမျိုးကို ကလေးသူငယ်များမှစ၍ အရွယ်ရောက်ပြီး လူကြီးများအထိ စွဲမှတ်သွားလျှင် တိုင်းပြည်၏ အခြားအရေးကြီးကဏ္ဍများဖြစ်သော စီးပွားရေး၊ နိုင်ငံရေးနှင့် လူမှုရေးအပိုင်းတို့တွင်ပါ ဆိုးဆိုးရွားရွား ထိခိုက်လာနိုင်ပေသည်။

တရားဥပဒေစိုးမိုးရေး၏ အဓိပ္ပာယ်မှာ ကျယ်ပြန့်လှသည့်အတွက် တာဝန်ရှိသူ အာဏာပိုင်တို့ချည်းသက်သက် ဆောင်ကြဉ်း၍မဖြစ်နိုင်ဘဲ သာမန်ပြည်သူများ၏ စိတ်ဓာတ်၊ စည်းကမ်းနှင့်ပါ သက်ဆိုင်နေသည်ကို သတိပြုသင့်ပေသည်။ တစ်မျိုးပြောရလျှင် ပြည်သူများကပါ စိတ်ပါလက်ပါဖြင့် ပါဝင်ကူညီနိုင်မှသာ မြန်မာနိုင်ငံအနှံ့ တရားဥပဒေ စိုးမိုးနိုင်လိမ့်မည်ဖြစ်ပေသည်။

ဥပမာပြရလျှင် လာဘ်ပေးလာဘ်ယူ ကိစ္စများတွင် မတောင်းအောင် ကြပ်ကြပ်မတ်မတ် ဆောင်ရွက်ထားခြင်းနှင့် အရေးယူခြင်းတို့ အရေးကြီးသလို အလွယ်တကူ လာဘ်မပေးမိအောင် ချုပ်တည်းခြင်းသည်လည်း ခြစားမှုများ ပပျောက်စေရေးတွင် အဓိကကျလှပေသည်။

နိစ္စဓူဝ သွားလာလှုပ်ရှားနေကြသည့် မြန်မာပြည်သူများအနေနှင့် မိမိပတ်ဝန်းကျင်တွင် ဖမ်းဆီးအရေးယူမည့် အာဏာပိုင်များရှိလျက်ဖြစ်စေ၊ မရှိဘဲဖြစ်စေ အသေးအဖွဲကိစ္စများမှအစ ပြဿနာ မတက်နိုင်သော ကိစ္စကြီးများအထိ အလွယ်တကူ ဥပဒေချိုးဖောက်နေသည်ကို သတိထားကြည့် ထင်ထင်ရှားရှား တွေ့မြင်နိုင်မည်ဖြစ်သည်။

သာမန်အခြေခံ မလုပ်သင့် မလုပ်ထိုက်သည့်အရာများကို အလွယ်တကူ ချိုးဖောက်ခြင်းသည် တရားဥပဒေစိုးမိုးရေး ရှင်သန်ကြီးထွားရန် ရေခံမြေခံကောင်း မဟုတ်ကြောင်း လက္ခဏာပင်ဖြစ်သည့်အတွက် မြန်မာနိုင်ငံတွင် တရားဥပဒေ စိုးမိုးအောင် မျိုးဆက်နှင့်ချီပြီး လုပ်ဆောင်ကြရဦးမည်သာ ဖြစ်ပေသည်။ ပို၍ရှင်းရှင်းလင်းလင်း ပြောရမည်ဆိုပါက တရားဥပဒေစိုးမိုးရေးတွင် ရဟန်းရှင်လူပြည်သူများ ပူးပေါင်းဆောင်ရွက်ခြင်း မရှိသေးသရွေ့ မည်သို့သော စွမ်းဆောင်ရှင်အစိုးရပဲ တက်သည်ဖြစ်စေ ဆင်းသည်ဖြစ်စေ ဒုံရင်းဘဝထဲက လွတ်မြောက်ဖွယ်မရှိကြောင်း ထောက်ပြလိုသည်။

အယ်ဒီတာ (၂၆-၉-၂၀၁၉)