News

POST TYPE

EDITORIAL

တပ်မိတိုင်း မကောင်းသည့် အမြင်ကတ်ပုဒ်မ (Daily, Vol-7/No-131)
10-Sep-2019
အမြင်ကတ်ပုဒ်မဟူသည် တကယ့်ဥပဒေပုဒ်မဟုတ်သည်ကို လူတိုင်းသိကြပါမည်။ ဥပဒေအကြောင်း နားလည်သူရော နားမလည်သူများပါ ကောင်းစွာသိကြသည့် မှတ်ချက်စကားဖြစ်ပါသည်။ လူတစ်ဦးတစ်ယောက်ကို မနှစ်သက်၊ သဘောမကျ ဖြစ်ရုံတစ်ခုတည်းဖြင့် တစ်ခုတစ်ခု တုံ့ပြန်ပြုမူလိုက်ခြင်းကို အမြင်ကတ်ပုဒ်မဖြင့် လုပ်သည်ဟုဆိုလိုခြင်းပင်။

“ကျုပ်ကတော့ အမြင်ကတ်ပုဒ်မနဲ့ ပညာပေးပစ်လိုက်တယ်”၊ “အမြင်ကတ် ပုဒ်မနဲ့ အလုပ်ခံရတာ” စသည်ဖြင့် လူမှုပြဿနာများအကြား မကြာခဏဆိုသလို ကြားရလေ့ရှိပါသည်။

အဖွဲ့အစည်းအချင်းချင်းသော်လည်းကောင်း၊ လူတစ်ဦးချင်းသော်လည်းကောင်း အမှန်တကယ် ပြဿနာဖြစ်ကြ၍ တရားရင်ဆိုင်ကြရာတွင်လည်း ဖြစ်သည့်အမှုနှင့် တိုက်ရိုက်ပတ်သက်သည့် ဥပဒေပုဒ်မများအပြင် အခြားပုဒ်များပါ ထပ်မံပေါင်းထည့်ရန် စဉ်းစားကြသည်မှာလည်း တကယ်တော့ အမြင်ကတ်ပုဒ်မကြီးစိုးနေသည့် သဘောထားကြောင့်ပင်ဖြစ်ပေသည်။

ယနေ့ လူမှုကွန်ရက်အသုံးပြုသည့်ခေတ်ထဲတွင် နောက်လိုက်ပရိသတ် အခိုင်အမာရှိထားသည့် ပုဂ္ဂိုလ်များစွာပေါ်ပေါက်လာသည်။ Social Media Influencer များဟုလည်း ခေါ်ကြသည်။ သူတို့ ရေးသားတင်ဆက်ကြသည့် ပို့စ်များကို အမှန်တကယ် နှစ်သက်ကြသူများရှိသလို မနှစ်သက်ဘဲ အသားလွတ် အမြင်ကတ်နေကြသူ များစွာလည်းရှိကြပေသည်။

သူတို့အနေနှင့် ဘယ်လောက်ကောင်းသည့်၊ အများအကျိုးပြုသည့် အကြောင်းအရာများ ဘယ်လောက်ကောင်းအောင် ရေးသားသည်ဖြစ်စေ အမြင်ကတ်သူများက အမြင်ကတ်ပုဒ်မဖြင့် ပို့စ်တိုင်းတွင် အသားလွတ်ဝင်ဆဲကြသည်။

လူ့သဘော၊ လူ့မနောမှာ ဆန်းကြယ်လှသည်ဟုဆိုရပေမည်။ မိမိနှစ်သက်သဘောကျသည့်သူဖြစ်နေလျှင် ဘာပဲလုပ်လုပ် အကောင်းမြင်စိတ်က အလိုအလျောက်ပေါ်ပြီးသားဖြစ်နေတတ်ပြီး မိမိအမြင်ကတ်သည့်ပုဂ္ဂိုလ်ဆိုလျှင် မှန်ကန်သည့်စကား၊ အကျိုးရှိသည့်စကားများ မည်သို့ပင်ပြောနေစေကာမူ အသိအမှတ်ပြုလက်ခံပေးရန် လွန်စွာခဲယဉ်းတတ်ကြပေသည်။

အဖြူ-အမည်း နိုင်ငံရေးသဘောတရား လွန်စွာကြီးစိုးခဲ့သည့် မြန်မာ့လူ့အဖွဲ့အစည်းတွင် “ငါ့အမြင်၊ ငါ့အယူအဆ၊ ငါ့အဖွဲ့အစည်း၊ ငါ့လူမျိုး၊ ငါ့ဘာသာတရားသာအမှန်”ဆိုသည့် တစ်ဖက်သတ်ဆန်သည့် ရပ်တည်မှုများ အရိုးစွဲနေခဲ့သည်။ သို့အတွက်ကြောင့် ဘက်မတူ၊ အမြင်မတူ၊ အုပ်စုမတူ၊ အယူအဆမတူလျှင် အမြင်ကတ်ပုဒ်မဖြင့် တုံ့ပြန်ရန် အချိန်မရွေး အဆင်သင့်ရှိကြပေသည်။

ဒီမိုကရေစီ အလေ့အထများ၊ စံချိန်စံနှုန်းများနှင့် ဝေးကွာခဲ့သော ပြည်သူများအကြား အဖြူ-အမည်း နိုင်ငံရေးသဘောတရားကိုအခြေခံပြီး အမြင်ကတ်ပုဒ်မကိစ္စဖြင့် တုံ့ပြန်တတ်ကြသည်မှာ ယေဘုယျသဘောအားဖြင့် လက်ခံစရာဖြစ်သော်လည်း ဒီမိုကရေစီကူးပြောင်းရေး၊ နိုင်ငံတည်ဆောက်ရေး၊ အမျိုးသားပြန်လည်သင့်မြတ်ရေး၊ ထာဝရငြိမ်းချမ်းရေး စသည်တို့ကို တည်ဆောက် အကောင်အထည်ဖော်နေသည့် ခေါင်းဆောင်များ၊ အဖွဲ့အစည်းကြီးများနှင့် နိုင်ငံရေးအင်အားစုကြီးများအကြား အမြင်ကတ်ပုဒ်မကိစ္စကြီးစိုးနေမည်ဆိုပါက ဖြစ်သင့်ဖြစ်ထိုက်သည့် လမ်းကြောင်းမှန်ပေါ်ရောက်ရန် လွန်စွာမှခဲယဉ်းနေဦးမည်သာဖြစ်ကြောင်း ပြောလိုရင်းဖြစ်ပါသည်။

အယ်ဒီတာ (၁၀-၉-၂၀၁၉)