News

POST TYPE

EDITORIAL

မျှော်လင့်တောင့်တသည့် ခေတ်စနစ်ရောက်လိုလျှင် (Daily, Vol-7/No-129)
08-Sep-2019
နိုင်ငံတစ်နိုင်ငံတွင် ဒီမိုကရေစီတည်ဆောက်ရေး၊ လွတ်လပ်ပွင့်လင်းကာ တရားမျှတမှုထွန်းကားသည့် လူ့အဖွဲ့အစည်းတစ်ရပ် ထူထောင်ရေး စသည်တို့သည် လွှတ်တော်၊ အစိုးရ၊ တရားစီရင်ရေး နိုင်ငံရေးပါတီများ၊ အရပ်ဘက်လူ့အဖွဲ့အစည်းများနှင့် တပ်မတော်တို့တွင်သာမက နိုင်ငံသားအားလုံးတွင်လည်း တာဝန်ရှိသည် ဆိုသောအချက်ကို အားလုံးသိနှင့်ပြီးသားဖြစ်ပါသည်။

ဒီမိုကရေစီ ပြုပြင်ပြောင်းလဲရေး လမ်းကြောင်းပေါ်ရောက်ခဲ့သည့် ၈ နှစ်ခန့်ကာလအတွင်း နိုင်ငံရေးဟူသည်မှာ တစ်ခေတ်တစ်ခါကလို အထူးအဆန်း၊ မတို့ရဲ၊ မထိရဲသည့်ကိစ္စ မဟုတ်တော့ရုံမျှမက နိုင်ငံရေးဟောပြောပွဲများသည်ပင် ထူးခြားဆန်းကြယ်သည့်ကိစ္စမဟုတ်သည့် အခြေအနေသို့ ရောက်ရှိနေပြီဖြစ်ပါသည်။

သို့သော်လည်း ယနေ့အချိန်အထိ နိုင်ငံရေးဟူသည် ဆန့်ကျင်ဘက်အုပ်စုကို ဆဲနိုင်ဆိုနိုင်မှ အလုပ်ဖြစ်သည့်ကိစ္စဟု စိတ်စွဲနေသူ အမြောက်အမြား ရှိနေသေးသည်ကို တွေ့မြင်နေရပေသည်။ အမှန်စင်စစ် နိုင်ငံရေးမှာ ဆန့်ကျင်ခြင်း၊ ထောက်ခံခြင်းတို့ထက်များစွာ လေးနက်ပေသည်။

လူမှုကွန်ရက်များပေါ်တွင် စိတ်လှုပ်ရှားမှုသက်သက်ဖြင့် အုပ်စုဖွဲ့ကာ အော်ဟစ်ဆဲဆိုပြတိုင်း နိုင်ငံရေးမဟုတ်ဆိုသောအချက်ကို သိရှိနားလည်သူ လွန်စွာ နည်းပါးနေပါသေးသည်။ စနစ်တကျ လေ့လာဆည်းပူးနိုင်မှ ရရှိသည့်ပညာရပ်ဖြစ်ပြီး ဆန့်ကျင်ဘက်အင်အားစုကို နေရာမပေးသရွေ့၊ မတူကွဲပြားသူများနှင့် စေ့စပ်ညှိနှိုင်းနိုင်မှုမရှိသေးသရွေ့ ဒီမိုကရေစီအသွင်ကူးပြောင်းရေးဖြစ်စဉ်မှာ ခရီးပေါက်ရန် ခဲယဉ်းနေပေဦးမည်။

မြန်မာ့နိုင်ငံရေး ကျွမ်းကျင်သူနှင့် နိုင်ငံရေး ဘောဂဗေဒများ အကြောင်းအရာ များစွာ ရေးသားလျက်ရှိသည့် စာရေးဆရာ(ဦး)ကျော်ဝင်း ထောက်ပြရေးသားဖူးသည့်အတိုင်းပင်။ “အစိုးရ” သို့မဟုတ် “မင်း” (စနစ်) ကို ရန်သူမျိုးငါးပါးစာရင်းထဲ ထည့်သွင်းထားသည့် ယဉ်ကျေးမှုဓလေ့မျိုးရှိသည့် မြန်မာ့လူ့အဖွဲ့အစည်းအနေနှင့် အစိုးရတို့၊ မူဝါဒတို့အပေါ် ယုံကြည်မှုအားနည်းတတ်သည်မှာ အဆန်းတော့ မဟုတ်ပါချေ။

ခေတ်အဆက်ဆက် အင်မတန် ဆိုးဝါးလွန်းသည့်စနစ်များက မိုလောင်းပေးလိုက်သည့် အစွဲတွေကို (နာကျင်မှုတွေကို) လူ့အဖွဲ့အစည်း၏ အာရုံထဲကပျောက်အောင် ဒီမိုကရေစီအစိုးရ (လူထုအစိုးရ) အနေနှင့် များစွာ ကြိုးပမ်းရဦးမည်သာပင်။ သို့သော် ပြည်သူလူထုဘက်ကလည်း ဒီမိုကရေစီစနစ်ဟူသည် ကိုယ်တင်မြှောက်ထားသည့် အစိုးရလုပ်သမျှ ထောက်ခံရန်မဟုတ်သလို ကိုယ်မဲမပေးသည့် အစိုးရဖြစ်နေသည့်အတွက် သူဘာလုပ်လုပ် အမြဲတစေ ဆန့်ကျင်ကန့်ကွက်ပြရမည့်သဘောမျိုးအဖြစ် မသတ်မှတ်မိရန် သတိပြုကြရပေမည်။

ဟုတ်ပါသည်။ မြန်မာပြည်သူများသည် ယနေ့ခေတ်ကာလကို ရောက်ရန် အချိန်များစွာ၊ အသက်သွေးချွေးများစွာ ပေးဆပ်ခဲ့ကြရသည်ဖြစ်ပါသည်။ သို့သော် အခြားတိုင်းပြည်များနှင့် အခြားလူ့အဖွဲ့အစည်းများသည် ရပ်တန့်နေကြသူများ မဟုတ်ဘဲ မြန်မာတို့ထက် မလျော့နည်းသည့် ဇွဲလုံ့လ ဝီရိယများဖြင့် လျှောက်လှမ်းနေကြသူများဖြစ်ရာ မိမိလိုချင်သော ခေတ်ကာလကို ပိုင်ဆိုင်ထားသော်လည်း အခြားတိုင်းပြည်များလောက် မဖွံ့ဖြိုးနိုင်၊ မတိုးတက်နိုင်ဖြစ်နေရခြင်းအပေါ် အားမလို၊ အားမရ ဖြစ်ကြရမည်သာပင်။

သို့သော်လည်း ရောမမြို့ကို တစ်ရက်တည်းနှင့် အပြီးမတည်ဆောက်နိုင်ဟူသောဆိုရိုးထဲကလိုပင် မြန်မာတို့မျှော်လင့်တောင့်တသည့် လူ့အဖွဲ့အစည်းမျိုးနိုင်ငံမျိုးပေါ်ပေါက်ရန် များစွာပေးဆပ်ရဦးမည်သာဖြစ်ရာ ယခင်ခေတ်စနစ်ဆိုးမှ ကျန်ရစ်သော ဆိုးမွေများကို မေတ္တာတရားကိုယ်စီဖြင့် တုံ့ပြန်ရင်း မိမိတို့တတ်နိုင်သည့်နေရာမှ ဒီမိုကရေစီ အသွင်ကူးပြောင်းရေး လုပ်ငန်းစဉ်များကို ညီညီညွတ်ညွတ်ဖြင့် ကူညီကြပါမည့်အကြောင်း မေတ္တာရပ်ခံလိုရင်းဖြစ်ပါသည်။

အယ်ဒီတာ (၈-၉-၂၀၁၉)