News

POST TYPE

EDITORIAL

ဘဏ်လုပ်ငန်းပြဿနာ ထိရောက်သည့် အဖြေရှာပါ (Daily, Vol-7/No-125)
03-Sep-2019
ဈေးကွက်စီးပွားရေးစနစ် ကျင့်သုံးသော နိုင်ငံတစ်နိုင်ငံ၏ စီးပွားရေးတိုးတက်မှုတွင် အရေးကြီးသည့် အစိတ်အပိုင်းတစ်ခုဟုဆို၍ရသော ဘဏ်လုပ်ငန်းများနှင့် စီးပွားရေးလုပ်ငန်းရှင်များအကြားက ချေးငွေကိစ္စနှင့်ပတ်သက်သော သတင်းအမျိုးမျိုးက မြန်မာ့စီးပွားရေးအပေါ် ဂယက်များ ပုံစံအမျိုးမျိုးဖြင့် ရိုက်ခတ်လျက်ရှိကြောင်း ကြားသိရပေသည်။

ယင်းဂယက်ကြောင့် အိမ်ခြံမြေဈေးကွက်တွင် တန်ဖိုးများဆက်လက်ကျဆင်းနေသလို ရာသီမဟုတ် ရွှေဈေးနှင့် ဒေါ်လာဈေးများ အဆမတန်မြင့်တက်လျက်ရှိရုံမျှမက ဘဏ်များအပေါ် ပြည်သူလူထု၏ယုံကြည်မှုပါ ထိခိုက်မည့်အနေအထားဖြစ်လာရာ ဗဟိုဘဏ်ကမစိုးရိမ်ကြရန်နှင့် ယင်းပြဿနာအတွက် အကူအညီ အပြည့်အဝပေးသွားမည်ဖြစ်ကြောင်း ထုတ်ဖော်ပြောဆိုထားပေသည်။

သို့တိုင်အောင် ဗဟိုဘဏ်ဒုတိယဥက္ကဋ္ဌကိုယ်တိုင်က ပြည်သူလူထုက ယုံကြည်မှုဖြင့် လာရောက်အပ်နှံထားသည့်ငွေကြေးများ မဆုံးရှုံးစေရန် ဘဏ်များတွင် တာဝန်ရှိသောကြောင့် စီးပွားရေးလုပ်ငန်းများ၏ သက်တမ်းလွန်ချေးငွေများကို ထိရောက်စွာ ကိုင်တွယ်ဖြေရှင်းရန်လိုအပ်ကြောင်း သတိပေးထောက်ပြထားသည့်ကိစ္စက အားလုံးအပေါ် ခြောက်လှန့်သည့်သဘောမျိုးဖြစ်နေဆဲပင်။

အဆိုပါ ဒုဥက္ကဋ္ဌ၏ပြောဆိုမှုမှာခပ်ရှင်းရှင်းပင်။ ဘဏ်တွေဘက်က လိုအပ်တာထက် စောင့်ဆိုင်းခဲ့ပြီးဖြစ်သောကြောင့် ထပ်မံအလျှော့ပေးရန် မလိုသည့်သဘောမျိုးဖြစ်သည်။

ဗဟိုဘဏ်က အဆိုပါဒုဥက္ကဋ္ဌဖြစ်သူ၏ သုံးသပ်ပြောဆိုမှုများသည် ဗဟိုဘဏ်၏သဘောထားမဟုတ်ဟု ထုတ်ပြန်ကြေညာခြင်းဖြင့် စီးပွားရေးလုပ်ငန်းရှင်ကြီးများ၏ သောကနှင့် အခြားသော ဂယက်ထမှုများတည်ငြိမ်အောင် ကြိုးပမ်းလိုက်သော်လည်း သက်တမ်းလွန်ချေးငွေကိစ္စနှင့်ပတ်သက်၍ တိကျပြတ်သားသော ရှင်းလင်းချက်မပါဝင်ဘဲဖြစ်နေခြင်းက ပို၍ပင် သို့လော သို့လောဖြစ်သွားစေပေသည်။

အတိုးရော အရင်းပါမပေးဘဲနေသည့် သိန်းထောင်နှင့်ချီသော ချေးငွေများ ပြန်မဆပ်ဘဲထား၍ ရနိုင်ပြီလောဆိုသည့် မေးခွန်းမျိုးကိုပင် ပျက်ရယ်ပြုစရာသဖွယ် မေးရမည့်သဘောမျိုး ဖြစ်သွားစေသည်။ အချို့စီးပွားရေး လုပ်ငန်းရှင်များကမူ ချေးငွေကိစ္စနှင့်ပတ်သက်၍ ဘဏ်များက ၎င်းတို့၏ စီးပွားရေးလုပ်ငန်းများအပေါ် တရားစွဲဆိုစေလိုသည့် သဘောမျိုး ရှိကြသည်ဟုလည်း လေ့လာသိရှိရပါသည်။ အကြောင်းမှာ တရားအမှုရင်ဆိုင်နေရချိန် ကြာမြင့်လေ အတိုး၊ အရင်း အစရှိသည့် ချေးငွေကိစ္စကို ကောင်းစွာ အချိန်ဆွဲထားနိုင်လေ ဖြစ်သောကြောင့်ပင်။

မြန်မာနိုင်ငံ၏ တရားခွင်များ၊ အထူးသဖြင့် တရားမမှုများ၏ အမှုသွားအမှုလာ သဘောသဘာဝအကြောင်း သိရှိနားလည်သူအားလုံး သိထားသည့်အတိုင်းပင်။ တစ်ထောင့်တစ်ည ပုံပြင်ပေါင်းများစွာ နာကြားရသည်ထက်ပင် ကြာလွန်းလှသည် မဟုတ်ပါလော။ သို့အတွက်ကြောင့် လုပ်ငန်းရှင်အချို့က ချေးငွေကိစ္စတွင် ဘဏ်လုပ်ငန်းများဘက်က အမှုဖွင့် တရားစွဲဆိုစေလိုကြခြင်းဖြစ်ပေသည်။

ပြဿနာကို ဗဟိုဘဏ်အပါအဝင် ဘဏ္ဍာရေးအာဏာပိုင်များ မည်သို့ဖြေရှင်းကြမည်နည်း။ အတိုးရော၊ အရင်းပါ ပြန်မဆပ်သည့် (ပြန်မရသည့်) ကြွေးမြီများ များပြားလာမည်ဆိုပါက တိုင်းပြည်စီးပွားရေးတွင် ငွေကြေးလည်ပတ်မှုနှေးသွားနိုင်သလို ဘဏ်အပ်ငွေလည်းကျဆင်းသွားနိုင်ပေသည်။

တရားစွဲမည်လော၊ ညှိနှိုင်းမှု အလျှော့ပေးမှုတွေထပ်လုပ်မည်လော၊ ဒေဝါလီခံကြမည်လော။ ဘဏ်လုပ်ငန်းများပြိုလျှင် အားလုံးပြိုလဲကြရမည်သာဖြစ်ရာ လက်ရှိအကျပ်အတည်းအတွက် ထိရောက်သော အဖြေတစ်ခုခုတော့ မလွဲမသွေ ရှာကြရမည်ဖြစ်ကြောင်း မေတ္တာရပ်ခံလိုပေသည်။

အယ်ဒီတာ (၃-၉-၂၀၁၉)