News

POST TYPE

EDITORIAL

ရာမညပြည် ပြန်လည်သာစွရန် ဝိုင်းဝန်းကြရပါမည် (Daily, Vol-7/No-105)
11-Aug-2019
မွန်ပြည်နယ်အစိုးရက အရေးပေါ် အခြေအနေ မကြေညာသေးသည့်တိုင် ယင်းပြည်နယ်တွင် လတ်တလော ဖြစ်ပေါ်နေသည့် သဘာဝ ဘေးအန္တရာယ်ဆိုးကြီးများက ဒါဇင်နှင့်ချီသော ပြည်သူတို့၏အသက်ကို နုတ်ယူသွားပြီဖြစ်သလို ထောင်ပေါင်းများစွာသော ဒေသခံပြည်သူတို့ကို ကြီးစွာသော ဘေးဒုက္ခရောက်ရှိစေခဲ့ပြီဖြစ်ပေသည်။

ဒေသတွင်း မိုးလေဝသ အခြေအနေကို ကြည့်သောအခါ မုန်တိုင်းစက်ကွင်းထဲမှလွတ်ရန် ရက်အနည်းငယ် ကျန်သေးသည်ဖြစ်ရာ မိုးသည်းထန်စွာ ရွာသွန်းပြီး လေပြင်းများ တိုက်နေဦးမည့် အနေအထားတွင် ရှိနေပေသည်။ လက်ရှိအနေအထားတွင် အိမ်နီးချင်း တရုတ်နှင့် အိန္ဒိယတို့တွင်လည်း ရေလွှမ်းမိုးမှုနှင့် မြေပြိုမှုကဲ့သို့သော သဘာဝ ဘေးအန္တရာယ်ကြီးနှင့် ရင်ဆိုင်နေရသည်ဟု ကြားသိရပေသည်။

သို့အတွက်ကြောင့် ရေများလည်း ဆက်တိုးလာဖွယ်ရှိသလို မြေပြိုမှုများလည်း ထပ်ဖြစ်မည့် အနေအထားတွင် ရှိနေပေသည်။

လူမှုကွန်ရက်ပေါ်တွင် တက်လာသော သတင်းများနှင့် တာဝန်ရှိသူအချို့အဆိုအရ ရေးမြို့နယ်သည် ရေလွှမ်းမိုးမှုဒဏ်ကို အဆိုးရွားဆုံး ခံစားနေရသည့် မြို့နယ်တစ်ခုဖြစ်ပြီး ၉၀ ရာခိုင်နှုန်းနီးပါး ရေလွှမ်းခြင်း ခံနေရပေသည်။ ၉၀ ရာခိုင်နှုန်းနီးပါးဆိုတော့ ကယ်ဆယ်ရေးလုပ်ငန်းတွင် အသုံးပြုမည့် ရဟတ်ယာဉ်များ ဆင်းသက်၍ပင် မလွယ်ကူသည့် အနေအထားဟု ဆိုရပေမည်။ အခြား မြို့နယ်များမှာလည်း ရေဆက်တက်နေသောကြောင့် ဒေသခံအများစု ဘေးလွတ်ရာသို့ ပြောင်းရွှေ့နေကြရပြီဖြစ်ပါသည်။

သို့သော် အချို့နေရာများတွင် ဆက်သွယ်ရေး ပြတ်တောက်နေသောကြောင့် ချောင်ပိတ်မိနေသည့် အနေအထားထဲသို့ ရောက်ရှိနေသူများစွာ ကျန်ရှိနေနိုင်ကြောင်း စုံစမ်းသိရှိရပေရာ ၎င်းတို့ကို မည်သို့မည်ပုံ ကယ်ထုတ်မည်ကို ကယ်ဆယ်ရေးအဖွဲ့များ၊ ဒေသခံများနှင့် သက်ဆိုင်ရာ အာဏာပိုင်များ အမြန်ဆုံး ပူးပေါင်းအဖြေရှာသင့်ပေသည်။ ဩဂုတ်လ ၁၁ ရက်နေ့ နံနက်ပိုင်းအထိ တောင်ပြိုသည့်သတင်းနှင့် မြေပြိုသည့်သတင်းများ ဆက်လက် ကြားသိနေခဲ့ရပေသည်။

လက်ရှိအခြေအနေတွင် အထူးလိုအပ်နေသည်မှာ ကယ်ဆယ်ရေးနှင့် ပြန်လည် နေရာချထားရေးလုပ်ငန်းစဉ်အတွက် “လူအင်အား”ဖြစ်သည်ဟု သိရှိရပေရာ ရန်ကုန်တိုင်းဒေသကြီး အပါအဝင် အခြားပြည်နယ်နှင့် တိုင်းဒေသကြီးများမှ စေတနာ့ ဝန်ထမ်းများအနေနှင့် မွန်ပြည်နယ်မှ ဒေသခံများ၊ သက်ဆိုင်ရာ အန်ဂျီအိုများနှင့် အမြန်ဆုံး ချိတ်ဆက်ပူးပေါင်းနိုင်ရန် အရေးကြီးလှပေသည်။

အိမ်နီးချင်းထိုင်းနိုင်ငံ၏ စစ်တပ်က မြန်မာ့တပ်မတော်နှင့် ချိတ်ဆက်ကာ လူသားချင်း စာနာထောက်ထားသည့် အကူအညီများပေးရန် ကြိုးပမ်းနေသည်ဟူသော သတင်းမှာ ဝမ်းသာစရာသတင်းတစ်ရပ်ဟု ဆိုရပေမည်။ မွန်ပြည်နယ်ဘက်မှ ဒေသခံများနှင့် ထိုင်းလူမျိုး၏ နီးကပ်သော ချစ်ကြည်ရင်းနှီးမှုကိုလည်း အမှတ်မထင် တွေ့မြင်ရသလိုပင် ဖြစ်ပေသည်။

ဘေးဒုက္ခရောက်နေသူများကို ကူညီထောက်ပံ့လိုသူ အလှူရှင်များစွာလည်း မြန်မာပြည်နေရာအနှံ့တွင် သေချာပေါက်ရှိနေသည်ဖြစ်ရာ အလေအလွင့်မရှိသော လှူဒါန်းပေးကမ်းမှု ဖြစ်လာစေရေးအတွက် သက်ဆိုင်ရာ မြို့မိမြို့ဖ၊ ရပ်မိရပ်ဖများကအစ ပြည်နယ်အဆင့် အစိုးရမှ တာဝန်ရှိသူများနှင့် ယုံကြည်စိတ်ချရသည့် အဖွဲ့အစည်းများက ဒုက္ခသည်များ ထောက်ပံ့ရေး၊ ရန်ပုံငွေ စီမံခန့်ခွဲရေး အစီအစဉ်တစ်ရပ်ကို စနစ်တကျ အကောင်အထည်ဖော်ရမည်ဖြစ်ပါသည်။

မပြောမဖြစ် ပြောရမည့်ကိစ္စရပ်တစ်ခုမှာ Disaster Management ကိစ္စပင်ဖြစ်ပေသည်။ အရေးပေါ် အခြေအနေ ကြေညာမည့်ကိစ္စ၊ သဘာဝ ဘေးအန္တရာယ် ကျရောက်နေစဉ်နှင့် ကျရောက်ပြီးကာလ စီမံခန့်ခွဲရေး (Post Disaster Management) ကို အဓိက တာဝန်ယူမည့်ဗဟိုအဖွဲ့ သို့မဟုတ် ကော်မတီဖွဲ့စည်းရေးကိစ္စ၊ အချိန်နှင့်တစ်ပြေးညီ သတင်းအချက်အလက်များ ရရှိရေးကိစ္စနှင့် လမ်းပန်းဆက်သွယ်ရေးကိစ္စတို့ကို ထိထိရောက်ရောက် လုပ်ဆောင်နိုင်ရန် အရေးအကြီးဆုံးဖြစ်သည်။

မွန်ပြည်နယ်တွင် ဒေသခံပြည်သူများ ကြုံတွေ့ခံစားနေရသော ဘေးဒုက္ခဆိုးကြီးများကို ယင်းပြည်နယ်အစိုးရအနေနှင့် မြန်မာ့တပ်မတော်အပါအဝင် အခြားအကူအညီပေးရေး အဖွဲ့အစည်းများနှင့် အကောင်းဆုံးဖြစ်အောင် ပူးပေါင်းဖြေရှင်းနိုင်သလို သဘာဝ ဘေးအန္တရာယ်ဆိုးကြီးများကပေးသော အဖိုးတန် သင်ခန်းစာများကိုလည်း ရယူနိုင်လိမ့်မည်ဟု အထူးပင် မျှော်လင့်မိပေသည်။

အယ်ဒီတာ (၁၁-၈-၂၀၁၉)