News

POST TYPE

EDITORIAL

မြန်မာ့သမိုင်းထဲက ရှစ်လေးလုံး (Daily, Vol-7/No-103)
08-Aug-2019

၈၈ အရေးအခင်း ၃၁ နှစ်ပြည့်သွားပြီဖြစ်ပါသည်။ ဆယ်စုနှစ်သုံးခုဆိုတော့ ယနေ့အသက် ၃၁ နှစ်နှင့်အောက်မဆိုထားနှင့်၊ ၃၅ နှစ်နှင့်အောက်ရှိသူများပင် ၈၈ အရေးအခင်းကို ကိုယ်တွေ့မှတ်မိနိုင်ကြမည်မဟုတ်ပေ။

အသက် ၄၀ ကျော်၊ သို့မဟုတ် အသက် ၄၅ နှစ်နှင့်အထက်ရှိသူများသာ လွန်ခဲ့သည့်နှစ် ၃၀ ကျော်က တိုင်းပြည်ပျက်လောက်သည့် အခြေအနေသို့ ရောက်ခဲ့ရသည့် အဆိုပါ အရေးအခင်းကြီးကို ကောင်းစွာ မှတ်မိကြပေလိမ့်မည်။ သေချာသည်မှာ ယခုအခါ အသက် ၄၀ အောက်မျိုးဆက်အများစုမှာ ၈၈ အဖြစ်အပျက်ကြီးနှင့်ပတ်သက်၍ လူကြီးသူမများထံမှ သို့မဟုတ် ယင်းသမိုင်းကြောင်းရေးထားသည့် စာအုပ်များထံမှသာ သိခွင့်ရခဲ့ကြသူများ ဖြစ်ပေလိမ့်မည်။

၈၈ အရေးအခင်းကြီးသည် လွတ်လပ်ရေးဗိသုကာကြီး ဗိုလ်ချုပ်အောင်ဆန်း ဖွဲ့စည်းတည်ထောင်သွားခဲ့သော မြန်မာ့တပ်မတော်နှင့် ဒီမိုကရေစီခေတ်ပြောင်း တော်လှန်ရေးကို လိုလားသည့် မြန်မာပြည်သူတို့အကြား အမုန်းတရားများ အခိုင်အမာ သန္ဓေတည်သွားစေခဲ့သည့် ဖြစ်စဉ်ကြီးဟုဆိုလျှင်လည်း မှားမည်မဟုတ်ပေ။

အရေးတော်ပုံကာလတွင် ရန်ကုန်မြို့တစ်နေရာရှိ နေအိမ်၌ပင် မိသားစုနှင့်အတူ ထမင်းဝိုင်းဖွဲ့စားသောက်ရင်း နေအိမ်ထဲသို့ တပ်ကပစ်လိုက်သည့် ကျည်ဆန် ဝင်ရောက်ထိမှန်ကာ သေဆုံးခဲ့သည့် သာမန်မိသားစုတစ်စု၏ မိခင်တစ်ယောက်က အစ တပ်၏ပစ်ခတ်မှုကြောင့် မြန်မာနိုင်ငံ၏ လမ်းမကြီးငယ်အသွယ်သွယ်တွင် သွေးမြေကျခဲ့သော ဒီမိုကရေစီ ခေတ်ပြောင်းတော်လှန်ရေးအင်အားစုများ မနည်းမနောရှိခဲ့သည်။

၁၉၈၈ ခုနှစ်တွင် တိုင်းပြည်ပျက်မည့် အခြေအနေ၊ တပ်စကားနှင့်ဆိုပါက တိုင်းပြည်ချောက်ထဲကျမည့်အန္တရာယ်ကို ကာကွယ်သည့်အနေနှင့် နိုင်ငံတော် အာဏာသိမ်းယူခဲ့သည်မှာ လက်ခံစရာဖြစ်သော်လည်း ၁၉၉၀ ရွေးကောက်ပွဲရလဒ် လူသိရှင်ကြားချောင်ထိုးခံခဲ့ရသည့်ဖြစ်ရပ်က သမိုင်းတွင်လောက်အောင် ရုပ်ဆိုး အကျည်းတန်စေခဲ့ပေသည်။

အာဏာသိမ်းယူခါစက ပေးခဲ့သည့်ကတိစကားအတိုင်း လမ်းပြမြေပုံအတိုင်း ဒီမိုကရေစီဖော်ဆောင်ပေးခဲ့သည်မှာမှန်သော်လည်း နှစ်ပေါင်း ၂၀ လောက်ထိ တမင်တကာ အချိန်ဆွဲဆန့်ကာ ကြားကာလတွင် လုပ်ချင်တာလုပ်ခဲ့ကြသည်မှာလည်း မြန်မာပြည်သူတို့၏ နှလုံးသားတွင် ထာဝရမေ့နိုင်ဖျောက်နိုင်ကြမည်မဟုတ်ပေ။

ရှစ်လေးလုံး အရေးတော်ပုံကြီးနှင့် ပတ်သက်လာလျှင် ဇာတ်လိုက်၊ ဗီလိန်၊ သမိုင်းတရားခံတွေကအများကြီးဖြစ်သလို ပြောစရာတွေ၊ နာစရာတွေကလည်း အများကြီး ရှိကြသည်။ ၁၉၈၈ နောက်ပိုင်း ကြားကာလတွင် ဒီမိုကရေစီအရေး လှုပ်ရှားမိ၍ ကိုယ်တိုင်ရော၊ မိသားစုအသိုင်းအဝိုင်းပါ ဆိုးဆိုးရွားရွား ပညာပေးခံခဲ့ရသူများလည်း အမြောက်အမြားရှိခဲ့ပေသည်။

သေချာသည်မှာ ၈၈ အရေးတော်ပုံကြီး၊ သို့မဟုတ် ဒီမိုကရေစီခေတ်ပြောင်း တော်လှန်ရေးလှုပ်ရှားမှုကြီးမှရခဲ့သော ဒဏ်ရာအကြီးအသေးအပေါ်မူတည်ပြီး ခံစားချက်နှင့် အမြင်များလည်း မတူကွဲပြားနေကြမည်သာပင်ဖြစ်သည်။

အသက်အရွယ်မတူ၊ ခေတ်ဖြတ်သန်းမှုမတူ၊ ဒဏ်ရာဒဏ်ချက်ချင်းမတူ၊ အယူအဆချင်းမတူ၊ နိုင်ငံရေးခံယူချက်ချင်းမတူ၊ နိုင်ငံချစ်စိတ်ချင်းမတူကြသော မြန်မာပြည်သူ မျိုးဆက်အသီးသီးအကြား ၈၈ အရေးအခင်းကြီးမှာ အဓိပ္ပာယ် အမျိုးမျိုးဖွင့်ဆို၍ရသော နိုင်ငံရေးဖြစ်ရပ်ကြီးတစ်ခုသဖွယ် ဖြစ်ပါလိမ့်မည်။

သို့သော် မြန်မာနိုင်ငံနှင့် မြန်မာ့လူ့အဖွဲ့အစည်းအပေါ် စစ်မှန်သည့်စေတနာဖြင့် ဦးဆောင်လိုသူမျိုးဆက်များနှင့် ကိုယ့်တိုင်းပြည်ကို အခြားတိုင်းပြည်များကဲ့သို့ ဖွံ့ဖြိုးစေလိုသည့် ဆန္ဒရှိသော ပြည်သူများအနေနှင့် ၈၈ နှင့်ပတ်သက်သော သမိုင်းကြောင်းကို ကောင်းစွာလေ့လာပြီး သင်ခန်းစာကောင်းများ ထုတ်ယူနိုင်ကြရမည်ဖြစ်ကြောင်း ဖော်ပြလိုက်ရပေသည်။

အယ်ဒီတာ (၈-၈-၂၀၁၉)