News

POST TYPE

EDITORIAL

ပညာရေးကို အလေးပေးသည့်စနစ်သာ အရေးအကြီးဆုံးပါ (Daily, Vol-7/No-102)
07-Aug-2019

ပညာရေးစနစ်ဟူသည် နိုင်ငံတစ်နိုင်ငံ အဆင့်အတန်း ဘယ်လောက်မြင့်သလဲဆိုသည့်အချက်ကို တိုင်းတာပေးနိုင်သည့်အရာဖြစ်လျှင် ပညာရေးစနစ်ကောင်းများကို ဖော်ထုတ်ပေးမည့်သူမှာ အစိုးရဖြစ်သည်ကို ထွေထွေထူးထူး ရှင်းပြနေစရာပင်လိုမည်မထင်ပေ။ အစိုးရမှ သာမန်အစိုးရမဟုတ်၊ ပညာရေးကို အသားပေး၊ အလေးပေးခဲ့သည့် အစိုးရပင်ဖြစ်ရပေမည်။

မြန်မာနိုင်ငံ၏ ပညာရေးအဆင့်အတန်းကိုကြည့်မည်ဆိုလျှင် ကိုလိုနီနယ်ချဲ့ ဗြိတိသျှတို့အုပ်ချုပ်သော ခေတ်တွင်ပင် ပညာရေးကို အလေးထားခဲ့သောကြောင့် ရန်ကုန်တက္ကသိုလ်ကဲ့သို့ ဒေသတွင်းနိုင်ငံများအကြား များစွာ ထင်ရှားကျော်ကြားသည့် ရန်ကုန်တက္ကသိုလ် ပေါ်ပေါက်ခဲ့သည့်အပြင် ကိုလိုနီအုပ်ချုပ်ရေးစနစ်၏ ဗျူရိုကရေစီယန္တရားအလို့ငှာ မြန်မာပညာတတ်၊ ထူးချွန်ထက်မြက်သူ များစွာပေါ်ထွန်းစေနိုင်ခဲ့ပေသည်။

ဗိုလ်ချုပ်အောင်ဆန်း၊ ဦးသန့်၊ ဦးနုတို့လို ခေါင်းဆောင်များ အပါအဝင် အခြားထူးချွန်ထက်မြက်သည့် နိုင်ငံရေးသမားကြီးများနှင့် စာရေးဆရာကြီးများ မြန်မာနိုင်ငံတွင်သာမက ကမ္ဘာ့အဆင့်အထိပါ ကျော်ကြားခဲ့သည်မှာ မြန်မာနိုင်ငံ၏ အမျိုးသားပညာရေး အုတ်မြစ်ကောင်းများ၊ ရေခံမြေခံကောင်းများရှိခြင်း၏ အသီးအပွင့်များပင်ဖြစ်ခဲ့ပေသည်။

ပါလီမန်ဒီမိုကရေစီခေတ်တွင်လည်း ထိုခေတ်ထိုအခါနှင့်ကြည့်လျှင် လွတ်လပ်၍ ခေတ်မီသော ပညာရေးမူဝါဒတို့ကြောင့် ထူးချွန်သော မြန်မာ လူငယ်များစွာ လေ့ကျင့်ပျိုးထောင်ပေးနိုင်ခဲ့ပေသည်။ ရန်ကုန်တက္ကသိုလ်သည် နိုင်ငံတကာမှ ပညာတော်သင်ကျောင်းသားများ လာရောက်လေ့လာ သင်ကြားရသည်အထိ အဆင့်အတန်း မြင့်မားခဲ့သည်မဟုတ်ပါလော။ ထိုလူငယ်တို့ကပင် လမ်းစဉ်ပါတီခေတ်တွင် နယ်ပယ်အသီးသီးရှိ ထိပ်ပိုင်းနေရာများတွင် ဦးစီးဦးဆောင်နိုင်ခဲ့ကြပေသည်။

တော်လှန်ရေးကောင်စီခေတ်နှင့် မြန်မာ့ဆိုရှယ်လစ် လမ်းစဉ်ပါတီခေတ်တို့တွင်လည်း ယခင်စနစ်ဟောင်းမှ ကျန်ရှိနေသေးသော လူချွန်၊ လူတော်ကြီးများနှင့် ထိတွေ့ပညာသင်ခွင့်ရခဲ့သောကြောင့် အတိုင်းအတာတစ်ခုလောက်အထိ ထူးချွန်ထက်မြက်သူများ မွေးထုတ်ပေးနိုင်ခဲ့သည်ဟု ဆိုရပေမည်။

၁၉၈၈ ခုနှစ်နောက်ပိုင်း ခေတ်ကာလမှာ မြန်မာ့ပညာရေးစံချိန်တင်လောက်အောင် အရည်အသွေး ကျဆင်းသွားစေခဲ့သည့် ခေတ်ကာလတစ်ခုဟုပင်ဆိုရမည်။ ပညာရေးကို လုံးဝအသားမပေးသည့် (အလေးမထားသည့်) စနစ်ဆိုးတစ်ခု၏အောက်သို့ရောက်ခဲ့သော အမှောင်ခေတ်ဟုပင် ဆိုနိုင်ပါသည်။ တစ်မျိုးထပ်ပြောရလျှင် တက္ကသိုလ်ကျောင်းသားများ ဦးစားပေးမခံရသောခေတ်၊ တက္ကသိုလ်များကို တောရောက်၊ တောင်ရောက်ဖြစ်အောင် လုပ်ခဲ့သည်ခေတ်ကာလပင်။

ခေတ်တစ်ခု၊ စနစ်တစ်ခုသည် နောက်မျိုးဆက်များကို လက်ဆင့်ကမ်း အမွေပေးလေ့ရှိသည်ဟုဆိုလျှင် ၁၉၈၈ နောက်ပိုင်းခေတ်ကာလက လက်ဆင့်ကမ်းပေးလိုက်သော အမွေကို ယနေ့မြန်မာ့လူ့အဖွဲ့အစည်းတစ်ခုလုံး ရင်ဝယ်ပိုက်ထားရပေသည်။ ၈၈ နောက်ပိုင်း စနစ်ဆိုးက ကျင့်သုံးသော ပညာရေးစနစ်က ယခုမျိုးဆက်၊ ယခုလူ့အဖွဲ့အစည်း၏ အဆင့်အတန်းကို ဖော်ကျူး၍နေပေသည်။ ယနေ့ မြန်မာလူငယ် ဘွဲ့ရ၊ ပညာတတ်များ နိုင်ငံတကာနှင့်ယှဉ်လျှင် မည်သည့်အဆင့်အတန်းတွင်ရှိနေသည်ကို အားလုံးသိပြီးသားဖြစ်ပါသည်။

The Voice Daily အနေနှင့် အနာဂတ် မြန်မာလူ့အဖွဲ့အစည်း၏ အဆင့်အတန်းဂုဏ်သိက္ခာကို အမှန်တကယ် မြှင့်တင်ပေးနိုင်မည့်သူများပေါ်ထွန်းရေး၊ နိုင်ငံတကာနှင့်ရင်ပေါင်တန်းကာ ကမ္ဘာ့အလယ်တွင် လက်မထောင်နိုင်သည့် မြန်မာတက္ကသိုလ်ကျောင်းသားများ မွေးထုတ်နိုင်ရေးအတွက် အစဉ်အမြဲအလေးပေးသွားမည်ဖြစ်ကြောင်းနှင့် အမျိုးသားပညာရေးမူဝါဒကောင်းများ ပေါ်ထွန်းလာအောင် လက်ရှိမျိုးဆက်များတွင် အကောင်အထည်ဖော်ရမည့်တာဝန်ရှိကြောင်း ဖော်ပြလိုရင်းဖြစ်ပါသည်။

အယ်ဒီတာ (၈-၇-၂၀၁၉)