News

POST TYPE

EDITORIAL

မြန်မာတွေကြိုက်တဲ့ ဂျပန်နဲ့ ကိုရီးယား(Daily, Vol-7/No-98)
03-Aug-2019
ဂျပန်တို့၊ ကိုရီးယားတို့ဆိုတာ မြန်မာတွေနဲ့ သိပ်စိမ်းလွန်းတဲ့နိုင်ငံတွေတော့ မဟုတ်ပါဘူး။ တကယ်တော့ သိပ်မစိမ်းတာတင်မကပါဘူး၊ မြန်မာတွေအပေါ် အင်မတန်လွှမ်းမိုးမှုကြီးတဲ့ နိုင်ငံတွေလို့တောင်ဆိုရမှာပါပဲ။ အစားအသောက်၊ အဝတ်အစား၊ နေထိုင်မှုပုံစံကအစ မြန်မာတွေအပေါ် အများကြီး လွှမ်းမိုးထားတဲ့ ယဉ်ကျေးမှုကိုပြောပါဆိုလျှင် ရှေးအခါက အိန္ဒိယတို့၊ တရုတ်တို့ဖြစ်ခဲ့ပေမယ့်လည်း ယခုအခါမှာတော့ ဂျပန်နဲ့ ကိုရီးယားလို့ပဲဆိုရမှာပါ။

မြန်မာတွေ ကောင်းကောင်းသိကြတဲ့ နိုင်ငံတွေစာရင်း ထိပ်ဆုံးမှာ ဂျပန်တို့၊ ကိုရီးယားတို့ ရှိနေတယ်လို့တောင်ပြောလို့ရမှာပါ။ ရေညှိထမင်းလိပ် (ဆူရှီ)တို့၊ မုန်ညင်း ဖြူ/ မုန်လာဥနီချဉ်ဖတ် (ဂင်မ်ချီ)ကအစ အနုပညာရှင် ဆယ်လီဘရစ်တီတွေ အဆုံး မြန်မာတွေမသိတာဆိုလို့ ခပ်ရှားရှားပါပဲ။

အထူးသဖြင့် ယနေ့ခေတ်လူငယ်တွေဆိုရင် ပိုစိတ်ဝင်စားကြပါတယ်။ သူတို့တွေ (မြန်လူငယ်တွေ)အပေါ်မှာ အများဆုံး လွှမ်းမိုးတဲ့ ယဉ်ကျေးမှုကလည်း ကိုရီးယားနဲ့ ဂျပန်ယဉ်ကျေးမှုတွေပဲ ဖြစ်တာကိုတွေ့ရပါတယ်။ တချို့လူငယ်တွေဆိုရင် ဂျပန် အန်နီမေးရှင်းကာတွန်း၊ ရုပ်ရှင် ဝတ္ထု စတာတွေထဲက ဇာတ်ကောင်တွေအတိုင်း ဝတ်စားဆင်ယင်ကြတာတွေအထိ ဂျပန်၊ ကိုရီးယားတွေရဲ့ ယဉ်ကျေးမှုကို ရူးသွပ်ကြပါတယ်။

ယခင်ကဆိုရင် ဘာသာစကားနဲ့ ပတ်သက်လာရင် အင်္ဂလိပ်စာကိုသာ မဖြစ်မနေ လေ့လာရမယ့် ဘာသာစကားအဖြစ် သဘောထားပြီး လေ့လာလိုက်စားခဲ့ကြပေမယ့် သည်ဘက်ခေတ်မျိုးဆက်တွေကတော့ အင်္ဂလိပ်စာထက် ဂျပန်၊ ကိုရီးယားဘာသာ စကားတွေကို ပိုစိတ်ဝင်စားလာကြပါတယ်။ တက္ကသိုလ်ဝင်တန်း အောင်သွားတဲ့သူတွေ နိုင်ငံခြားဘာသာတက္ကသိုလ်မှာ မေဂျာလျှောက်ကြတော့လည်း ကိုရီးယားနဲ့ ဂျပန် ဘာသာစကားပဲ များမယ်လို့ထင်ပါတယ်။

ဂျပန်နဲ့ (တောင်)ကိုရီးယားမှာ အလုပ်လုပ်နေကြတဲ့၊ ပညာသွားသင်ယူနေကြတဲ့ မြန်မာတွေလည်း ယခင်ခေတ်ကာလတွေကထက် အများကြီး ရှိလာပါတယ်။ အဲဒီတော့ ဂျပန်တွေ၊ ကိုရီးယားတွေ ဘယ်နေရာမှာ ဘယ်လို တော်တယ်၊ စည်းကမ်းရှိကြတယ်ဆိုတာကိုလည်း တဖြည်းဖြည်းချင်း သိလာကြမှာပါပဲ။

တစ်နေ့က ဂျပန်နဲ့ တောင်ကိုရီးယားနဲ့ ကုန်သွယ်ရေးကိစ္စ မပြေမလည်ဖြစ်ကြရာမှ တောင်ကိုရီးယားကို ဂျပန်က ယုံကြည်စိတ်ချရတဲ့ ကုန်သွယ်ဖက်စာရင်းက ပယ်ဖျက်ပစ်လိုက်ပါတယ်။ အဲဒီဟာကို မကျေနပ်တဲ့ တောင်ကိုရီးယားတွေဟာ ဆိုးလ်မြို့ပေါ်မှာ ဂျပန်နိုင်ငံက ထုတ်လုပ်တဲ့ မော်တော်ကားတချို့ကို လူရှေ့သူရှေ့မှာ ဆန္ဒပြတဲ့အနေနဲ့ ဖျက်ဆီးပစ်ပြပါတယ်။

ကိုရီးယားတွေဟာ နဂိုကတည်းက ဂျပန်ကို အစာမကြေတဲ့စိတ်ရှိသူတွေပါ၊ ဖက်ဆစ်လက်ထက်က သူတို့လူမျိုးတွေအပေါ် နှိပ်စက်ခဲ့တာ၊ သူတို့နယ်မြေတွေကို သိမ်းပိုက်ခဲ့တာတွေကို ဘယ်တော့မှ မမေ့နိုင်ကြတဲ့သူတွေပါ။ ဒါပေမဲ့လည်းတစ်ဖက်မှာ ဂျပန်ကို အင်မတန် အားကျတဲ့စိတ်၊ ယှဉ်ပြိုင်လိုတဲ့စိတ်ကလည်း ကြီးမားကြပါတယ်။ အဲဒီစိတ်နဲ့ပဲ တောင်ကိုရီးယားဟာ သင်္ဘောတွေ၊ မော်တော်ကားတွေ၊ ရထားတွေ၊ လျှပ်စစ်ပစ္စည်းတွေ၊ နည်းပညာပစ္စည်းတွေကို ဂျပန်နဲ့ အပြိုင် ထုတ်လာနိုင်တဲ့ အဆင့်ရောက်လာတာပါ။

မြန်မာတွေဟာ ကိုရီးယားတွေ ဂျပန်တွေလို စိတ်ဓာတ် မပြင်းထန်ကြပါဘူး၊ မေ့မေ့ပျောက်ပျောက် ရှိတတ်ကြပါတယ်။ တစ်ချိန်က ဖက်ဆစ်တွေ ဘယ်လိုပဲရှိခဲ့ရှိခဲ့ ဂျပန်တွေအပေါ်မှာ ပြင်းပြင်းထန်ထန်နဲ့ မှတ်တေးထားတာမျိုး မရှိကြပါဘူး။ အဆိုးမြင်တဲ့ဘက်က ပြောမယ်ဆိုရင်တော့ စိတ်ဓာတ်မပြင်းထန်ဘူး၊ မျိုးချစ်စိတ် သိပ်မရှိကြဘူးပေါ့။

အကောင်းမြင်တဲ့ဘက်က ပြောမယ်ဆိုရင်တော့ ခွင့်လွှတ်တဲ့နှလုံးသား ကြီးမားတယ်၊ သည်းခံစိတ်ရှိကြတယ်လို့ ဆိုရမှာပေါ့။ နောက်ပြီး မြန်မာဟာ ကိုရီးယားလို တရုတ်နဲ့ အမေရိကန်ကလုပ်လို့ တောင်နဲ့ မြောက်ဆိုပြီး နှစ်ခြမ်းမကွဲအောင် ရပ်တည်နေနိုင်ခဲ့တာလည်း ဝမ်းသာစရာပါပဲ။

တစ်ခုပဲမေးစရာရှိတာက မြန်မာတွေဟာ တိုင်းပြည်ပြင်ပမှာရှိတဲ့သူတွေအပေါ်ပဲ သည်းခံခွင့်လွှတ်တတ်ကြတာလား။ ပြည်ထောင်စုထဲမှာရှိတဲ့သူ အချင်းချင်း သည်းခံခွင့်လွှတ်စိတ်ရော မရှိကြဘူးလားဆိုတာပါ။ တကယ်လို့ အချင်းချင်း ခွင့်လွှတ်တတ်၊ သည်းခံတတ်ကြပြီဆိုရင် ဂျပန်နဲ့ ကိုရီးယားကို တစ်နေ့နေ့ တစ်ချိန်ချိန်မှာ ပုံစံတစ်မျိုးနဲ့ ကျော်တက်နိုင်မယ်ဆိုတာပါ။

အယ်ဒီတာ (၃-၈-၂၀၁၉)