News

POST TYPE

EDITORIAL

ဥပဒေအထက်မှာ နေချင်သူများကို မြန်မြန်မောင်းချပါ (Daily, Vol-7/No-79)
11-Jul-2019
ဒီမိုကရေစီရသည်ဖြစ်စေ၊ မရသည်ဖြစ်စေ၊ ငြိမ်းချမ်းရေးဆောင်ကြဉ်းနိုင်သည်ဖြစ်စေ၊ မဆောင်ကြဉ်းနိုင်သည်ဖြစ်စေ မြန်မာနိုင်ငံတွင် ပြည်သူတစ်ရပ်လုံး၏ အဓိကမျှော်လင့်ချက်မှာ တရားမျှတမှုရှိသည့် တရားစီရင်ရေးစနစ်တစ်ရပ်ပေါ်ထွန်းပြီး သာမန်နိုင်ငံသားမှအစ သမ္မတနှင့် ကာကွယ်ရေးဦးစီးချုပ်မကျန် မျှတသည့်ဥပဒေအောက်တွင် အတူတကွရှိနေရေးပင်ဖြစ်သည်။

သာမန်အားဖြင့် စား၊ ဝတ်၊ နေရေး အဆင်ပြေရေးသည် ပြည်သူများအတွက် အဓိက အရေးကိစ္စမဟုတ်လောဟု ဆိုနိုင်သော်လည်း မျှတမှုရှိသည့် ဥပဒေအောက်တွင် နိုင်ငံသားအားလုံးရှိမှသာ စားရေးသောက်ရေး၊ နေရေးထိုင်ရေးကိစ္စအဝဝကို လုံလုံခြုံခြုံဖြင့် လုပ်ကိုင်နိုင်မည်ဖြစ်ပေသည်။

ထိုသို့ မျှတသည့် တရားဥပဒေအောက်တွင် အုပ်ချုပ်သူများ (အာဏာရှိသူ)ရော၊ အုပ်ချုပ်ခံလူတန်းစား နှစ်ရပ်စလုံးရှိရေးကို အလေးအနက်ထား ပြောဆိုနေရခြင်းမှာ ယနေ့ခေတ်ကာလတွင် ပြည်သူများ၏ အဆိုပါမျှော်လင့်ချက်များ တဖြည်းဖြည်းချင်း မှေးမှိန်လာနေသကဲ့သို့ဖြစ်နေခြင်းကြောင့်ပင်။

ပို၍ပွင့်ပွင့်လင်းလင်းပြောရလျှင် ထိုသို့မှေးမှိန်လာသည့် သဘောမျိုးဖြစ်လာခြင်းက မြန်မာနိုင်ငံ၏ ပစ္စုပ္ပန်နှင့် အနာဂတ်နှစ်ရပ်စလုံးအတွက် အနုတ်လက္ခဏာဆောင်သော အခြေအနေများ ပေါ်ပေါက်လာနိုင်သည်ကို စိုးရိမ်မိပေသည်။

အာဏာရှင်စနစ်တို့မည်သည် နေရာတိုင်းတွင် အကျင့်ပျက်ခြစားမှုများ၊ အာဏာအလွဲသုံးမှုများ၊ လိမ်လည်လှည့်ဖြားမှုများ၊ အကြီးအကဲအကြိုက် လက်ညှိုးထောင်၊ ခေါင်းညိတ်စီမံခန့်ခွဲမှုများ၊ အရည်အချင်းနိမ့်ကျမှုများ ရှိနေတတ်သည်။

ထိုအခြေအနေများကို နေ့ချင်း၊ ညချင်း ပြောင်းလဲမပစ်နိုင်ကြောင်း ပြည်သူများက နားလည်ထားကြပြီးဖြစ်ပေသည်။ ယနေ့ ဒီမိုကရေစီအစိုးရအပါအဝင် အာဏာသုံးရပ်နှင့် တပ်မတော်အပေါ် ဝေဖန်ထောက်ပြနေသူများဟူသည်မှာလည်း အပြောင်းအလဲကောင်းများကို ယခုရေတွင်းတူး ယခုရေကြည်သောက် သဘောမျိုးဖြင့် ဖိအားပေးပြောဆိုနေခြင်းတော့မဟုတ်ပေ။

သို့သော် ယခင်ကမှားခဲ့ပြီးသော အမှားများ ထပ်ဆင့်မှားခြင်း၊ ယခင်က ကိုယ်တိုင်ဝေဖန်ရှုတ်ချခဲ့သော အမှုကိစ္စများ ကိုယ်တိုင်ပြန်ကျူးလွန်ခြင်းကဲ့သို့ ဖြစ်စဉ်များကိုမူ နားလည်ပေးရန်မှာ သာမန်ပြည်သူများမဆိုထားနှင့်၊ အပေါင်းလက္ခဏာဆောင်သည့် အမြင်ရှိသော နိုင်ငံရေးသုခမိန်ကြီးများပင် လွယ်ကူမည်မဟုတ်ပေ။

ထိုအခြေအနေမျိုးတွင် ဥပဒေကျော်လွန်နေသောကိစ္စများ၊ ဥပဒေဖောက်ဖျက်ကျူးလွန်မှုများ ပေါ်ပေါက်နေခြင်း၊ ယင်းဖြစ်ရပ်များကို မြေပြင်တွင်ဖြစ်ပျက်ခဲ့သော အခြေအနေမှန်ကို ဖုံးကွယ်ခြင်း၊ တစ်ဖက်စောင်းနင်း သတင်းထုတ်ပြန်ခြင်းတို့ရှိလာပါက ပြည်သူများ၏ နားလည်မှုရေချိန် လျော့ပါးသွားနိုင်သည်ကို အထူးသတိပြုအပ်ပေသည်။

အထူးအားဖြင့် တရားရေးမဏ္ဍိုင် ယိမ်းယိုင်နေခြင်း၊ ဥပဒေအထက်တွင် တစ်စုံ၊ တစ်ဦး၊ တစ်ဖွဲ့ ရှိနေသကဲ့သို့ ဖြစ်နေခြင်းတို့ကို မပြုပြင်နိုင်ဘဲ ပြဿနာတိုင်းကို ယခင်စနစ်ဟောင်း၊ စဉ်းစားပုံအဟောင်း၊ ချဉ်းကပ်ပုံအဟောင်း၊ နည်းလမ်းအဟောင်းတို့ဖြင့် အဖြေထုတ် ဖြေရှင်းနေပါက ပြည်သူလူထု၏ နားလည်သည်းခံမှု ပျောက်ဆုံးသွားနိုင်ကြောင်း သတိပေးထောက်ပြလိုရင်းဖြစ်ပေသည်။

အယ်ဒီတာ (၁၁-၇-၂၀၁၉)