News

POST TYPE

EDITORIAL

ကြားချင်သည့် သတင်းနှင့် မကြားချင်သည့် သတင်း (Daily, Vol-7/No-78)
10-Jul-2019


ဗစ်တိုးရီးယားအမှုကိစ္စအတွက် အရေးကြီးသော CCTV မှတ်တမ်းတစ်ခုကို ဗြိတိန်အခြေစိုက် BBC သတင်းဌာနက ယမန်နေ့ကဖွင့်ချနိုင်ခဲ့ခြင်းသည် ယင်းအမှုတွင် ပြစ်မှုကျူးလွန်သည်ဟု သက်ဆိုင်ရာအာဏာပိုင်များ၏ သံသယရှိခြင်းခံရသူနှင့်ပတ်သက်၍ အသေအချာ ပြန်လည်ဆန်းစစ်စရာများ၊ စဉ်းစားစရာများဖြစ်ပေါ်စေခဲ့ရာ အကျိုးအာနိသင်ကြီးသော သတင်းတင်ဆက်မှုဟု ဆိုရပေမည်။

အဆိုပါသတင်းကို တင်ဆက်သွားသည့် BBC သတင်းဌာနကိုလည်း ဗစ်တိုးရီးယားအတွက် တရားမျှတမှု ပေါ်ပေါက်စေလိုသည့် ပြည်သူအများစုက ချီးမွမ်းပြောဆိုကြသည်ကို တွေ့ရသည်မှာလည်း BBC သတင်းဌာနတစ်ခုတည်းသာမက တာဝန်ယူမှုရှိသည့် ပင်မရေစီးထဲက သတင်းမီဒီယာ (Mainstream Media)များအတွက်ပါ အားရကျေနပ်သင့်သည့်ကိစ္စပင်ဖြစ်ပေသည်။ အကြောင်းမှာ လူတိုင်းမီဒီယာ လူတိုင်းစာရေးဆရာ လူတိုင်းသတင်းထောက် လူတိုင်းဓာတ်ပုံဆရာ သဘောမျိုးဖြစ်နေသည့်ခေတ်တွင် တာဝန်ယူမှုရှိသော သတင်းမီဒီယာများ၏ အခန်းကဏ္ဍကို တစ်ထောင့်တစ်နေရာမှ ထုတ်ဖော်ပြသနိုင်ခြင်းကြောင့်ပင်။

စာဖတ်ပရိသတ်ဟူသည် မိမိဖြစ်စေလိုသောသတင်း၊ မိမိကြားချင်သောသတင်းများကို အမှန်အတိုင်းထုတ်ဖော်ရေးသားသည့် မည်သို့သော သတင်းမီဒီယာမဆို နှစ်သက်ကြချီးမွမ်းကြစမြဲပင်ဖြစ်သည်။ သတင်းမှန်ကန်တိကျမှုရှိသော်လည်း မိမိမနှစ်သက်သော၊ မကြားလိုသောသူများအကြောင်း ရေးသားဖော်ပြသည့် သတင်းမီဒီယာဆိုလျှင် ပြစ်တင်ဝေဖန်ရုံတင်မက ဆဲဆိုလေ့ရှိသည်မှာ ယနေ့ခေတ် လူမှုကွန်ရက်များတွင် ထင်ထင်ရှားရှားတွေ့ မြင်ရပေသည်။

အဆိုပါ BBC သတင်းဌာနသာမက Mainstream မီဒီယာအတော်များများမှာ မြန်မာ့နိုင်ငံရေး၊ ပြည်တွင်းစစ်အရေး၊ ရခိုင်ပြည်နယ်အရေး၊ ဘင်္ဂါလီအရေးကိစ္စများနှင့်ပတ်သက်၍ မကြာခဏဆိုသလို အဆဲအဆိုခံခဲ့ကြရသည်သာပင်။ 

ပရိသတ်ကြားချင်သော၊ ပရိသတ်ဖြစ်စေလိုသောသတင်းများကို ထုတ်ဖော်ရေးသားလိုက်ချိန်တွင် ပြည်သူချစ်သော မီဒီယာအဖြစ် သတ်မှတ်ချီးမွမ်းခံရပြီး ပရိသတ်မကြားချင်သော၊ ပရိသတ်၏ ဆန္ဒနှင့်ဆန့်ကျင်သော အကြောင်းအရာကို အမှန်အတိုင်း ဖော်ထုတ်ရေးသားချိန်တွင် ပြည်သူမုန်းသော မီဒီယာအဖြစ်သာမက နိုင်ငံနှင့်လူမျိုးအပေါ် သစ္စာဖောက်သည့် မီဒီယာများအဖြစ် တံဆိပ်ကပ်ခံရလေ့ရှိသည်ကို ယနေ့လို အဆဲကြမ်းသူပေါများသည့် လူမှုကွန်ရက်ပေါ်တွင် တွေ့မြင်နိုင်မည်ဖြစ်ပေသည်။ (မှတ်ချက်။ Reuters သတင်းဌာနမှ သတင်းထောက်များဖြစ်သော ကိုဝလုံးနှင့် ကိုကျော်စိုးဦးတို့အမှုမှာ ထင်ရှားသည့်သာဓကတစ်ခုပင်ဖြစ်သည်) 

မိမိအလိုဆန္ဒနှင့် ဆန့်ကျင်သောအရာများကို မမြင်လို၊ မကြားလို ဖြစ်ကြသည်မှာ လူသားတို့၏ ပင်ကိုသဘာဝတစ်ရပ်ဖြစ်သော်လည်း မိမိဆန္ဒနှင့်ဆန့်ကျင်သည့် အကြောင်းအရာများကို ထုတ်ဖော်ရေးသားသည့် သတင်းမီဒီယာများကို တံဆိပ်အမျိုးမျိုးကပ်ကာ ဆဲရေးတိုင်းထွာခြင်းမှာမူ ယဉ်ကျေးမှုနှင့် အသိဉာဏ်နိမ့်ပါးနေခြင်းကို ထုတ်ဖော်ပြသရာသာရောက်ပေမည်။

အစိုးရနှင့် မြန်မာ့တပ်မတော် အပါအဝင် နိုင်ငံခေါင်းဆောင်များကို တိကျမှန်ကန်မှုမရှိသည့် သတင်းများဖြန့်၍တစ်မျိုး၊ ရုန့်ရင်းကြမ်းတမ်းသည့် စကားလုံးများ၊ ဓာတ်ပုံများသုံး၍တစ်ဖုံ ဝေဖန်တိုက်ခိုက်နေသည့် လူမှုကွန်ရက်များပေါ်က ဆိုက်ဘာ မသမာသူများ ပန်းပန်လျက်ရှိချိန်တွင် တာဝန်ယူမှုရှိသော Mainstream သတင်းမီဒီယာများမှ သတင်းသမားများနှင့် အယ်ဒီတာများ သည်ဘက်ခေတ် (ဒီမိုကရေစီအစိုးရခေတ်) တွင် ပိုမိုပစ်မှတ်ထားဖမ်းဆီးခံခဲ့ကြရခြင်းမှာ အထူးပင် ဝမ်းနည်းစရာကောင်းလှပေသည်။ 

ဒီမိုကရေစီစနစ်တစ်ခု၏ အဓိကအနှစ်သာရများထဲတွင် တာဝန်ယူမှုရှိသော သတင်းစာနှင့် သတင်းမီဒီယာများ လွတ်လပ်စွာ ရေးသားဖော်ပြခွင့်ဟူသည် အရေးကြီးသည့် အခန်းကဏ္ဍမှပါဝင်ပြီး သတင်းမီဒီယာဟူသည့် ဒေါက်တိုင်တစ်ခု ယိုင်လဲအောင် လုပ်ဆောင်ခြင်းသည် ဒီမိုကရေစီယိုင်လဲအောင် လုပ်ဆောင်ခြင်းဖြစ်သည်ဆိုသောအချက်ကို ဒီမိုကရေစီဖော်ဆောင်နေကြကုန်သော သက်ဆိုင်ရာအစိုးရနှင့် အာဏာပိုင်များအား အထူးရှင်းပြရန်ပင်လိုမည်မဟုတ်ပေ။ ထို့အတူ တာဝန်ယူမှု ပြည့်ဝသော သတင်းမီဒီယာများဟူသည် ဒီမိုကရေစီရှင်သန်ရေးအတွက် ကြားချင်သည့်သတင်းရော၊ မကြားချင်သည့် သတင်းများကိုပါ မှန်ကန်တိကျမှုရှိစွာရေးသား တင်ဆက်နေကြမည်သာဖြစ်ကြောင်းနှင့် ယင်းသတင်းမီဒီယာများပိုမိုအားကောင်း လာအောင်လည်း ဝိုင်းဝန်းပံ့ပိုးပေးရမည်ဖြစ်ကြောင်း ဖော်ပြလိုရင်းဖြစ်ပေသည်။

အယ်ဒီတာ (၁၀-၇-၂၀၁၉)