News

POST TYPE

EDITORIAL

ပန်းတိုင်တိုင်းအတွက် သင်ခန်းစာကောင်းများ အရေးကြီးသည် (Daily, Vol-7/No-77)
09-Jul-2019
ယနေ့ခေတ်ကာလသည် နည်းပညာနှင့် လူမှုကွန်ရက်တို့မှတစ်ဆင့် တစ်ဦးနှင့်တစ်ဦး အသိုင်းအဝိုင်း တစ်ခုနှင့်တစ်ခု ချိတ်ဆက်မှုအားကောင်းလှသည့် ခေတ်ကာလဖြစ်ပေရာ မြန်မာတို့အနေနှင့် ကမ္ဘာ့နိုင်ငံကြီးများ ဖြတ်သန်းကြုံတွေ့နေရသော အခြေအနေအရပ်ရပ်ကို စိတ်ပါလျှင်ပါသလို လေ့လာစောင့်ကြည့်နိုင်၊ သင်ခန်းစာ ယူနိုင်သည့်ကာလဟုဆို၍ရပေသည်။

ထို့အတူ မြန်မာနိုင်ငံ၏သမိုင်းကြောင်းတွင် တစ်ချိန်က သိခွင့်မရခဲ့၊ ဖော်ပြခွင့်မရခဲ့သော အဖြစ်သနစ်များ အပါအဝင် မှတ်တမ်းမှတ်ရာ အတော်များများကို ယင်းနည်းပညာများ၊ လူမှုကွန်ရက်များ၏ကျေးဇူးကြောင့် သိနိုင်၊ သင်ခန်းစာယူနိုင်သည့် အခြေအနေတွင်ရှိပေသည်။ မိမိတွင် သိလိုစိတ်၊ သင်ခန်းစာယူလိုစိတ်ရှိရန်သာ လိုအပ်ပေသည်။ သမိုင်းကြောင်းများနှင့် သမိုင်းတွင်သည့်ပုဂ္ဂိုလ်များအကြောင်း ခဲရာခဲဆစ်ရှာဖွေနေစရာမလိုပေ။

မြန်မာ့သမိုင်းကြောင်းကိုကြည့်လျှင်ဖြစ်စေ၊ ကမ္ဘာ့သမိုင်းကြောင်းကိုကြည့်လျှင်ဖြစ်စေ၊ အခြားနိုင်ငံတစ်နိုင်ငံ၏ သမိုင်းကြောင်းကိုကြည့်လျှင်ဖြစ်စေ ပန်းတိုင်အတွက် တစ်မျိုးသားလုံးပေးဆပ်ကြရသည့် အသက်၊ သွေး၊ ချွေးများနှင့်အတူ အဆိုး၊ အကောင်း သင်ခန်းစာများစွာရှိနေပြီး ယင်းသင်ခန်းစာများကို နောင်လာနောက်သားများက မည်မျှအတိုင်းအတာအထိ ရယူဆင်ခြင်နိုင်ကြသနည်းဟူသော မေးခွန်းကသာ အရေးကြီးပေသည်။

သို့အတွက် လောကသဘာဝအရ ရှိနေတတ်သည့် အဆိုး၊ အကောင်း၊ အမှား၊ အမှန်တို့ကို ပိုင်းပိုင်းခြားခြား ကွဲပြားစွာသိရှိရန်အလို့ငှာ ယထာဘူတကျကျ၊ ကျိုးကြောင်းဆီလျော်အပ်စပ်မှုရှိရှိ ပကတိအခြေအနေအတိုင်း ဆန်းစစ်ဝေဖန်သုံးသပ်မှုက အရေးကြီးသလို ဆန်းစစ်ဝေဖန်သုံးသပ်မည့်သူများ၏ အသိပညာရေချိန်နှင့် အဂတိ တရားကင်းစင်မှုလည်း အရေးကြီးပေသည်။

လွတ်လပ်ရေးရရှိပြီးနောက် မြန်မာ့သမိုင်းမှ ထူးခြားသည့်မှတ်တိုင်များကို ကြည့်မည်ဆိုလျှင် ခုနှစ်မှစလျှင် ၁၉၅၈၊ ၁၉၆၂၊ ၁၉၇၃၊ ၁၉၈၈၊ ၁၉၉၀၊ ၂၀၀၈၊ ၂၀၁၀၊ ၂၀၁၁၊ ၂၀၁၃၊ ၂၀၁၅၊ ၂၀၁၆ မှစကာ ယနေ့အထိ သင်ခန်းစာများစွာ ရှိနေပေသည်။ မြန်မာတို့အနေနှင့် ဖြတ်သန်းလာသော သမိုင်းကြောင်းထံမှ အဆိုးများကိုရှောင်ကာ အကောင်းများကို ဆောင်နိုင်ခြင်းမရှိပါက ယင်းသမိုင်းများသည် သမိုင်းမှတ်တမ်းအဆင့်သာ ရှိသည်။

မြန်မာတို့အနေနှင့် သမိုင်းများထဲက မကောင်းသည်များကိုရှောင်ပြီး ကောင်းသည့်အချက်များကို ဆောင်ယူနိုင်မှသာ သမိုင်းသင်ခန်းစာကောင်းများကို ယူနိုင်သည့်အခြေအနေသို့ရောက်ရှိပေလိမ့်မည်။ တစ်မျိုးပြောရမည်ဆိုပါက သင်ခန်းစာ ယူတတ်မှသာ လှပသည့်အနာဂတ်များကို ဖန်တီးနိုင်မည်ဖြစ်သည်။

ယနေ့ ဒီမိုကရေစီအစိုးရက ဦးဆောင်တည်ဆောက်နေသည့် အမျိုးသားပြန်လည်သင့်မြတ်ရေး၊ ငြိမ်းချမ်းရေးဖော်ဆောင်ရေးနှင့် အသွင်ကူးပြောင်းရေး အစရှိသည့် ပန်းတိုင်အတွက်မူ ကျွနု်ပ်တို့ တွေ့ကြုံဖြတ်သန်းခဲ့ရသည့် အကောင်းအဆိုးများမှ သင်ခန်းစာကောင်းကောင်းယူနိုင်ကြလိမ့်မည်ဟု မျှော်လင့်ကြောင်း ပြောလိုပေသည်။ 

အယ်ဒီတာ (၉-၇-၂၀၁၉)